4
مٌرٌدٍكَيِ عٍسِتَ مَيَندِقٍ
1 مٌرٌدٍكَيِ تٌ يِ قٍ بِرِن مّ، عَ نَشَ عَ شَ دُفِ عِبْو عَ مَ، عَ سُننُن دٌنمَ رَفٌرٌ عَ مَ، عَ تّ شُبٍ مَسٌ عَ قَتٍ مَ، عَ مِنِ تَا كُي عَ وَ مَ عَ شُي عِتٍشِ رَ.
2 عَ نَشَ سِفَ هَن مَنفّ شْنيِ، كْنْ عَ مُ نْ سٌدٍ، بَرِ مَ سُننُن دٌنمَ كَنيِ مُ دَشَ سٌقٍ نَا.
3 مَنفّ شَ يَامَرِ تٌ سٌ تَا بِرِن كُي، يُوِقِيٍ نَشَ وَ عٍ شُي عِتٍشِ رَ سُننُنيِ كُي. عٍ نَشَ سُننُن دٌنمَ رَفٌرٌ عٍ مَ، عٍ تّ شُبٍ مَسٌ عٍ قَتٍ مَ. عٍ نَشَ نَ بِرِن نَبَ سُنيِ كُي.
4 عٍسِتَ شَ كٌنيِ فِنّيٍ نُن شّمّ بَنَشِ نَشٍيٍ نُ مّينِمَ عَ مَ، عٍ تٌ مٌرٌدٍكَيِ شَ قٍ قَلَ عٍسِتَ بّ، سُننُنيِ نَشَ عَ بْحّ سُشُ عَ حَاشِ رَ. عَ نَشَ دُفِ ندٍ رَ سَنبَ مٌرٌدٍكَيِ مَ، كْنْ عَ مُ تِن عَ شَ سُننُن دٌنمَ رَتٍدٍ عَ مَ.
5 عٍسِتَ نَشَ هَتَكِ شِلِ، شّمّ بَنَشِ مَنفّ نَشَن يَمَرِ عَ شَ مّينِ عٍسِتَ مَ. عَ نَشَ عَ شّي مٌرٌدٍكَيِ شْن مَ، عَلَكٌ عَ شَ عَ كٌلٌن عَ سُننُنشِ قٍ نَشَن مَ.
6 هَتَكِ نَشَ سَ مٌرٌدٍكَيِ لِ تَا كُي مَنفّ شَ بَنشِ سٌدٍ دّ رَ.
7 هَمَن نَشَن نَبَ، عَ نُن عَ كْبِرِ شَسَبِ نَشَن لَايِدِ مَنفّ بّ يُوِقِيٍ قَشَقٍ رَ، مٌرٌدٍكَيِ نَشَ نَ بِرِن دّنتّفّ هَتَكِ بّ.
8 عَ نَشَ نَ بَتَاشّ مَسٍن عَ بّ نَشَن شَرَنشِ سُسٍ تَا كُي يُوِقِيٍ قَشَقٍ شَ قٍ رَ. مٌرٌدٍكَيِ نَشَ عَ قَلَ عَ بّ عَ شَ نَ كّيدِ سٌ عٍسِتَ يِ رَ، عَ مَن شَ دّنتّفّ سَ عَ بّ. عَ نُ وَ مَ نّ عٍسِتَ شَ مَنفّ مَيَندِ يُوِقِيٍ بّ، عَلَكٌ عَ بْنسْي نَشَ تْورْ.
9 هَتَكِ نَشَ فبِلٍن عٍسِتَ يِرٍ، عَ نَشَ مٌرٌدٍكَيِ شَ مَسٍنيِ بِرِن تَفِ رَبَ عَ بّ.
10 عٍسِتَ تٌ نَ مّ، عَ مَن نَشَ هَتَكِ شّي مٌرٌدٍكَيِ شْن مَ، عَ شَ سَ يِ قَلَ عَ بّ،
11 «مَنفّ شَ وَلِكّيٍ نُن عَ شَ مِشِ بِرِن عَ كٌلٌن فِنّ يٌ، شّمّ يٌ نَشَن سِفَمَ مَنفّ يِرٍ بٍينُ مَنفّ شَ عَ شِلِ، نَ كَنيِ لَنمَ سّرِيّ كِ مَ عَ شَ قَشَ. شَ مَنفّ سَ تِن، عَ عَ شَ سَوُرِ شّيمَ دَاشِ عِتَلَ عَ بّ، عَ نْمَ دِحّدٍ نَ كَنيِ مَ. كْنْ عَ شِ تٌنفٌ سَشَن نَن يَ، مَنفّ مُ ﭑ شِلِ!»
12 هَتَكِ تٌ نَ قَلَ مٌرٌدٍكَيِ بّ،
13 مٌرٌدٍكَيِ نَشَ عٍسِتَ يَابِ، عَ نَشّ، «عٍسِتَ، هَلِ عِ تٌ نَ مَنفّ نَن شْنيِ، عِ نَشَ عَ مَحْشُن دٍ عَ عِ كٍرٍن نْمَ كِسِدٍ يُوِقِيٍ يَ مَ.
14 شَ عِ دُندُ يِ قٍ مَ، سَابُي فبّتّ مِنِمَ نّ يُوِقِيٍ بّ، كْنْ عِ تَن نُن عِ شَبِلّ هَلَكِمَ نّ. ندٍ عَ كٌلٌن شَ عِ قِندِشِ مَنفّ فِنّ رَ يِ لْشْي يَتِ يَتِ نَن مَ قٍ رَ؟»
15 نَ كُي عٍسِتَ نَشَ مٌرٌدٍكَيِ يَابِ يِ وْيّنيِ رَ،
16 «سِفَ، عِ سَ سُسٍ يُوِقِيٍ بِرِن مَلَن، وٌ شَ سُنيِ سُشُ ﭑ بّ. وٌ نَشَ يٍ مِن، وٌ نَشَ وٌ دّفٍ يَنيِ سَشَن نُن كْي سَشَن بُن مَ. ﭑ تَن نُن ﭑ مَ كٌنيِيٍ قَن سُنيِ سُشُمَ نَ كِ نّ. نَ دَنفِ شَنبِ، ﭑ سِفَمَ نّ مَنفّ يِرٍ، هَلِ تْنيِ تٌ دْشْشِ نَ مَ. شَ عٍ ﭑ قَشَ، عَوَ يِرٍ.»
17 نَ تّمُي مٌرٌدٍكَيِ نَشَ عٍسِتَ وَشْنقٍ رَبَ، عَلْ عَ قَلَ عَ بّ كِ نَشّ.