38
يُدَ نُن تَمَرِ
نَ تّمُي، يُدَ نَشَ كٍلِ عَ نفَشَكٍرٍنيِيٍ شُن مَ، عَ سِفَ عَدُلَمَكَ ندٍ شْنيِ نَشَن شِلِ هِرَ. مّننِ يُدَ نَشَ سُوَ كَنَانكَ شَ دِ فِنّ تٌ. عَ نَشَ عَ قِندِ عَ شَ فِنّ رَ. عٍ نَشَ لُ عٍ بٌورٍ رَ. نَ فِنّ نَشَ تّيفّ، عَ نَشَ دِ شّمّ بَرِ. يُدَ نَشَ نَ دِ شِلِ سَ عٍرِ. تَمَرِ مَن نَشَ تّيفّ دِ قِرِن ندٍ مَ، عَ نَشَ دِ شّمّ بَرِ. عَ نَشَ نَ دِ شِلِ سَ عٌنَن. نَ شَنبِ، عَ مَن نَشَ دِ شّمّ فبّتّ بَرِ. عَ نَشَ نَ دِ شِلِ سَ سٍلَهَ. يُدَ شَ فِنّ نَ دِ بَرِ كٍسِبٍ نّ.
يُدَ نَشَ فِنّ ندٍ قٍن، عَ عَ سٌ عَ شَ دِ سِنفٍ عٍرِ يِ رَ. نَ فِنّ شِلِ تَمَرِ. مِشِ كٌبِ نَن نُ لَنشِ يُدَ شَ دِ سِنفٍ عٍرِ مَ عَلَتَلَ يَ عِ. عَلَتَلَ نَشَ عَ رَفِرِ عَ شَ قَشَ. نَ شَنبِ يُدَ نَشَ عَ قَلَ عٌنَن بّ، «عِ تَارَ شَ فِنّ تٌنفٌ، عَ شَ قِندِ عِ شَ فِنّ رَ. عِ شَ نِمْشْ وَلِ رَبَ، عَلَكٌ عِ شَ دِ قِ عِ تَارَ مَ.» كْنْ عٌنَن عَ كٌلٌن نَ دِ مُ قَمَ قِندِدٍ عَ فبٍ رَ. نَ نَن عَ تٌ، عٍ نُن عَ نِمْشْ نَ كَقُ، عَ عَ شَ مَنِيٍ سَمَ بْشِ نَن مَ عَلَكٌ عَ نَشَ قَ دِ قِ عَ تَارَ مَ. 10 عَ نُ نَشَن نَبَمَ، نَ مُ نُ رَقَن عَلَتَلَ مَ. نَ نَن عَ رَ، عَلَ نَشَ عَ رَفِرِ عَ قَن شَ قَشَ.
11 نَ تّمُي يُدَ نَشَ عَ قَلَ عَ شَ مَمَدِ تَمَرِ بّ، «كَاحّ شَنِن عِ بَبَ شْنيِ، بٍينُن ﭑ مَ دِ سٍلَهَ مْمَ تّمُي نَشّ.» عَ عَ مَحْشُن نّ، تّمُندٍ سٍلَهَ قَن قَشَمَ عَلْ عَ تَارَيٍ قَشَشِ كِ نَشّ. نَ كُي تَمَرِ نَشَ سِفَ، عَ سَ لُ عَ بَبَ شْنيِ. 12 عَ مُ بُ يُدَ شَ فِنّ نَشَ قَ، نَشَن نُ لَنشِ سُوَ شَ دِ فِنّ مَ. حْن قٍ تٌ بَ عَ رَ، يُدَ نَشَ سِفَ تِمِنَ عٍ نُن عَ بٌورٍ هِرَ عَدُلَمَكَ. عٍ نَشَ سِفَ يُدَ شَ شُرُ سٍ يِرٍ، يُدَ شَ وَلِكّيٍ نُ شُرُ سٍيٍ شَبٍ مَشَبَقٍ دّننَشّ.
13 مِشِ ندٍ نَشَ عَ قَلَ تَمَرِ بّ، «عِ تَنُن نَ سِفَقٍ تِمِنَ عَ شَ شُرُ سٍيٍ شَبٍ مَشَبَدٍ.» 14 تَمَرِ نَشَ عَ شَ كَاحّ دٌنمَ رَتٍ عَ مَ، عَ نَشَ عَ يَتَفِ مَكٌتٌ مَقٍلٍنيِ رَ، عَ سَ دْشْ عٍنَيِمَ سٌدٍ دّ رَ تِمِنَ كِرَ شْن. عَ نُ بَرَ عَ تٌ، سٍلَهَ بَرَ عَ فِنّ دْشْدٍ لِ، كْنْ يُدَ مُ تَمَرِ قِ عَ مَ، عَ شَ قِندِ عَ شَ فِنّ رَ.
15 يُدَ تٌ بَرَ تَمَرِ تٌ كِرَ دّ رَ، عَ يَتَفِ مَكٌتٌشِ مَقٍلٍنيِ رَ، عَ نَشَ عَ مَحْشُن لَنفٌي رَ. 16 عَ نَشَ عَ قَلَ عَ بّ كِرَ رَ، «وٌن شّي، وٌن شَ سَ كَقُ.» عَ مُ نُ عَ كٌلٌنشِ عَ شَ مَمَدِ نَن عَ رَ. كْنْ تَمَرِ نَشَ يُدَ مَشْرِن، «عِ مُنسٍ قِمَ ﭑ مَ وٌن نَ كَقُ؟» 17 عَ نَشَ عَ يَابِ، «ﭑ سِ كٍرٍن تٌنفٌمَ ﭑ مَ شُرُ سٍيٍ يَ مَ، ﭑ قَ عَ رَ عِ شْن مَ.» تَمَرِ نَشَ عَ يَابِ، «عَوَ، سّيكّ سٍ ندٍ لُ ﭑ يِ رَ بٍ سِندٍن، بٍينُن عِ قَمَ سِ رَ تّمُي نَشّ.» 18 عَ نَشَ عَ مَشْرِن، «عِ وَ مَ ﭑ شَ مُنسٍ دْشْ عِ شْن مَ سّيكّ رَ؟» تَمَرِ نَشَ عَ يَابِ، «عِ شَ عِ شَ تْنشُمَ، عَ لُوتِ، نُن عِ شَ يِسُشُوُرِ سٌ ﭑ يِ رَ.» عَ نَشَ نَ سٍيٍ سٌ عَ يِ رَ، عٍ قَ كَقُ عٍ بٌورٍ رَ. تَمَرِ نَشَ تّيفّ عَ شَ دِ مَ. 19 تَمَرِ نَشَ فبِلٍن عَ شْنيِ. عَ نَشَ عَ شَ مَقٍلٍنيِ بَ عَ شُن مَ، عَ مَن نَشَ عَ كَاحّ فِنّ دٌنمَ رَفٌرٌ عَ مَ.
20 يُدَ نَشَ عَ بٌورٍ عَدُلَمَكَ شّي سِ تِدٍ نَ فِنّ مَ، عَلَكٌ عَ شَ قَ سٍيٍ رَ عَ نَشَن سٌ فِنّ يِ رَ سٍيدٍحْشْيَ رَ. كْنْ عَ بٌورٍ مُ نَ فِنّ تٌ. 21 عَ نَشَ عٍنَيِمَ مِشِيٍ مَشْرِن، «يِ لَنفٌي فِنّ نَشَن نُ نَ عٍنَيِمَ كِرَ رَ، عَ نَ مِندٍن؟» عٍ نَشَ عَ يَابِ، «لَنفٌي يٌ مُ نَ بٍ.» 22 عَ نَشَ فبِلٍن يُدَ يِرٍ، عَ قَ عَ قَلَ، «ﭑ مُ عَ لِشِ نَا. نَ لٌنفٌرِ مِشِيٍ بَرَ عَ قَلَ ﭑ بّ عَ لَنفٌي يٌ مُ نَ نَ كِرَ شْن.» 23 يُدَ نَشَ عَ قَلَ، «نَ فِنّ شَ نَ سٍيٍ رَفَتَ. وٌن قَن نَشَ وٌن يّتّ رَيَافِ. ﭑ بَرَ سِ رَ سَنبَ عَ مَ، كْنْ عِ مُ عَ لِشِ نَا.»
24 كِكٍ سَشَن دَنفِ شَنبِ، مِشِ ندٍ نَشَ عَ قَلَ يُدَ بّ، «عِ شَ مَمَدِ تَمَرِ بَرَ قِندِ لَنفٌي رَ، عَ بَرَ قُرِ تٌنفٌ عَ شَ لَنفٌيحَ سَابُي رَ.» يُدَ نَشَ عَ قَلَ، «وٌ عَ رَ مِنِ، عَ شَ فَن.» 25 عٍ نُ قَقٍ عَ رَ تّمُي نَشّ، تَمَرِ نَشَ شّيرَ رَ سَنبَ عَ تَنُن مَ، «يِ سٍيٍ مَتٌ نَشَن نَ ﭑ يِ رَ. يِ تْنشُمَ، عَ لُوتِ، نُن يِ يِسُشُوُرِ قِندِ مِشِ نَن فبٍ رَ نَشَن ﭑ نَقُرُشِ. عِ لَن نّ عِ شَ يِ كَنيِ كٌلٌن.» 26 يُدَ نَشَ كٌلٌن سْتْ نَ سٍيٍ شَ قٍ مَ. عَ نَشَ عَ قَلَ، «عَ بَرَ سّرِيّ رَكَمَلِ دَنفِقٍ ﭑ تَن نَ بَرِ مَ ﭑ مُ عَ قِشِ ﭑ مَ دِ سٍلَهَ مَ.» نَ شَنبِ، عَ مُ عَ كٌلٌن فِنّ رَ سْنْن.
27 تَمَرِ نُ دِ بَرِ مَ تّمُي نَشّ، عٍ نَشَ عَ كٌلٌن عَ فُلِيٍ نَن نَ عَ قُرِ. 28 دِ بَرِ تّمُي، كٍرٍن نَشَ عَ بّلّشّ رَ مِنِ. دِ رَ سُشُي نَشَ عَ بّلّشّ سُشُ، عَ فّسّ فبٍيلِ شِرِ عَ بّلّشّ رَ. عَ قَ عَ قَلَ، «يِ نَن سِنفٍ بَرِشِ.» 29 كْنْ نَ دِيْرّ نَشَ عَ بّلّشّ رَ سٌ، عَ شُنيَ نَشَ بَرِ. دِ رَ سُشُي نَشَ عَ قَلَ، «عِ قَشِ سّنبّ مُندُن نَ يِ كِ؟» يُدَ نَشَ عَ شِلِ سَ ثٍرٍ سِ. 30 نَ شَنبِ، بٌورٍ قَن نَشَ بَرِ فّسّ فبٍيلِ شِرِشِ عَ بّلّشّ رَ. يُدَ نَشَ عَ شِلِ سَ سٍرَ.