41
مِسِرَ مَنفّ شَ شِيٍ
حّ قِرِن دَنفِ شَنبِ، مِسِرَ مَنفّ نَشَ شِيٍ ندٍ سَ. نَ شِيٍ كُي عَ تِشِ شُرٍ دّ رَ. عَ نَشَ نِنفٍ قَتٍ قَنيِ سٌلٌقٍرٍ تٌ مِنِ رَ شُرٍ كُي، عٍ نَ حٌوفٍ دٌنقٍ كَلٍيٍ تَفِ. نَ دَنفِ شَنبِ، نِنفٍ سٌلٌقٍرٍ فبّتّ، نَشٍيٍ شْسِشِ، نٍيٍ نَشَ مِنِ شُرٍ دّ رَ بٌورٍ نِنفٍيٍ سّيتِ مَ. يِ نِنفٍ شْسِشِ سٌلٌقٍرٍ نَشَ يِ نِنفٍ قَتٍ قَنيِ سٌلٌقٍرٍ دٌن. نَ نَن لَن مِسِرَ مَنفّ نَشَ شُنُ.
عَ تٌ فبِلٍن عَ سَ رَ، عَ مَن نَشَ شِيٍ فبّتّ سَ. نَ شِيٍ كُي تْنسْي سٌلٌقٍرٍ قَنيِ تِشِ بِلِ كٍرٍن مَ. نَ دَنفِ شَنبِ، تْنسْي سٌلٌقٍرٍ فبّتّ، نَشٍيٍ شُن شُرُن، قٌيٍ بَرَ عٍ رَفَن، عٍ تِشِ بٌورٍ تْنسْييٍ سّيتِ مَ. يِ تْنسْي شُنشُرِيٍ نَشَ يِ تْنسْي رَقٍشِ قَنيِيٍ دٌن. نَ نَن لَن، مِسِرَ مَنفّ نَشَ شُنُ. نَ شِيٍ نَن نَ كِ.
نَ كُيٍ عِبَ، مِسِرَ مَنفّ بْحّ نُ مِنِشِ. عَ نَشَ مَندُرُلَيٍ نُن كَرَ مْشْي بِرِن شِلِ. عَ نَشَ نَ شِيٍيٍ مَسٍن عٍ بّ، كْنْ مِشِ يٌ مُ سْتْ عٍ يَ مَ، نَشَن نْ عَ تَفِ رَبَدٍ عَ بّ. نَ تّمُي نَشَن عَ حّنفِ سَمَ مَنفّ شَ مِنسٍ شْن مَ، نَ نَشَ وْيّنيِ تٌنفٌ عَ قَ عَ قَلَ مِسِرَ مَنفّ بّ، «ﭑ نَن مَ كَنَرِ يَ شَرَنمَ نّ تٌ لْشْي. 10 تّمُي دَنفِشِ، مِسِرَ مَنفّ شْنْ نّ عَ شَ كٌنيِيٍ مَ. عَ نَشَ ﭑ سُشُ، عَ ﭑ بَلَن سْورِ مَنفّ شَ فٍيلِ كُي، عَ نُن نَشَن تَامِ فَنمَ مَنفّ بّ. 11 عَ تَن نُن ﭑ تَن، مُشُ بِرِن شِيٍ سَ نّ كْي كٍرٍن كُي نَشَن تَفِ لَن عَ شَ رَبَ. كَنكَن شَ شِيٍ نُ وَ مَ قٍ ندٍ مَسٍنقٍ عَ كَنيِ بّ. 12 سْورِ مَنفّ شَ عٍبُرُ كٌنيِ ندٍ نَن نُ نَ فٍيلِ كُي مُشُ يَ مَ. مُشُ تٌ نَ شِيٍيٍ قَلَ عَ بّ، عَ نَشَ عٍ بِرِن قَسَرِ مُشُ بّ. مُشُ شِيٍ نَشٍيٍ سَشِ، عَ نَشَ كَنكَن فبٍ قَسَرِ عَ بّ. 13 عَ بِرِن دَنفِ نّ عَلْ عَ شِيٍ تَفِ رَبَ مُشُ بّ كِ نَشّ. مِسِرَ مَنفّ بَرَ ﭑ تَن نَفبِلٍن ﭑ وَلِدٍ قٌرِ، كْنْ عَ بَرَ بٌورٍ فبَكُ وُرِ مَ.»
14 مِسِرَ مَنفّ نَشَ شّيرَيٍ شّي يُسُقُ يِرٍ. عٍ نَشَ عَ رَ مِنِ فٍيلِ كُي عَ عِكْرّشِ رَ. عٍ نَشَ عَ شُنيِ بِ، عٍ سٌسٍ فبّتّيٍ رَفٌرٌ عَ مَ، عٍ سِفَ عَ رَ مِسِرَ مَنفّ يِرٍ. 15 مِسِرَ مَنفّ نَشَ عَ مَسٍن يُسُقُ بّ، «ﭑ بَرَ شِيٍ ندٍ سَ. مِشِ يٌ مُ نْشِ عَ تَفِ رَبَدٍ، كْنْ ﭑ بَرَ عَ مّ عِ تَن شِيٍ تَفِ رَبَمَ عٍ نَ نَشَن قَلَ عِ بّ.» 16 يُسُقُ نَشَ مِسِرَ مَنفّ يَابِ، «ﭑ تَن مُ عَ رَ. عَلَ نَن مِسِرَ مَنفّ شَ شِيٍ تَفِ رَبَمَ عَ بّ.»
17 مِسِرَ مَنفّ نَشَ عَ مَسٍن يُسُقُ بّ، «ﭑ مَ شِيٍ كُي ﭑ تِشِ شُرٍ دّ رَ. 18 ﭑ نَشَ نِنفٍ قَتٍ قَنيِ سٌلٌقٍرٍ تٌ مِنِ رَ شُرٍ كُي، عٍ نَ حٌوفٍ دٌنقٍ كَلٍيٍ لٌنفٌرِ رَ. 19 نَ نَن لَن، نِنفٍ سٌلٌقٍرٍ فبّتّ نَشَ تٍ عٍ شَنبِ رَ، عٍ شْسِشِ هَن. عٍ فَنيَنشْرِ بِرِن سَشِ كّنّ مَ. هَن تٌ ﭑ مُ نَ نِنفٍ شْسِشِ مْولِ تٌ مِسِرَ بْشِ مَ. 20 نَ نِنفٍ شْسِشِ شُن نَكَنَشِيٍ نَشَ نَ نِنفٍ سٌلٌقٍرٍ قَتٍ قَنيِ دٌن. 21 كْنْ نَ دَنفِ شَنبِ، مِشِ يٌ مُ نْ عَ كٌلٌندٍ شَ عٍ بَرَ عٍ دٌن. عٍ شَ شْسِ مُ مَسَرَ. نَ نَن لَن، ﭑ نَشَ شُنُ.»
22 «نَ تّمُي ﭑ مَن نَشَ شِيٍ فبّتّ سَ. تْنسْي رَقٍشِ قَنيِ سٌلٌقٍرٍ تِشِ بِلِ كٍرٍن مَ. 23 نَ دَنفِ شَنبِ تْنسْي شُنشُرِ سٌلٌقٍرٍ فبّتّ، قٌيٍ نَشٍيٍ رَفَنشِ، نٍيٍ نَشَ مِنِ بٌورٍيٍ سّيتِ مَ. 24 تْنسْي ثٌنثٌييٍ نَشَ نَ تْنسْي سٌلٌقٍرٍ قَنيِ دٌن. ﭑ بَرَ نَ قَلَ مَندُرُلَيٍ بّ، كْنْ مِشِ يٌ مُ نْ عَ قَسَرِدٍ ﭑ بّ.»
25 يُسُقُ نَشَ عَ قَلَ مِسِرَ مَنفّ بّ، «عِ شَ شِيٍ قِرِنيِ بِرِن قٍ كٍرٍن نَن مَسٍنشِ. عَلَ بَرَ عِ رَكٌلٌن قٍ مَ عَ قَمَ نَشَن نَبَدٍ. 26 نَ نِنفٍ سٌلٌقٍرٍ قَنيِيٍ نُن نَ تْنسْي سٌلٌقٍرٍ قَنيِيٍ، حّ سٌلٌقٍرٍ نَن مَسٍنشِ نَ كِ. نَ تَن شِيٍ كٍرٍن نَن عَ رَ. 27 نَ نِنفٍ شْسِشِ شُن نَكَنَشِ سٌلٌقٍرٍ نُن نَ تْنسْي ثٌنثٌي سٌلٌقٍرٍ قٌيٍ نَشٍيٍ رَفَنشِ، نٍيٍ قَن حّ سٌلٌقٍرٍ كَامّ نَن مَسٍنشِ.»
28 «ﭑ شَ نْندِ قَلَ عِ بّ، عَلَ بَرَ قٍ مَسٍن مِسِرَ مَنفّ بّ عَ قَمَ نَشَن نَبَدٍ. 29 يِ حّ سٌلٌقٍرٍ نَشَن قَقٍ يِ كِ، عٍ قِندِ مَ حّ قَنيِ نَن نَ مِسِرَ بْشِ بّ. 30 نَ نَ دَنفِ، كَامّ حّ سٌلٌقٍرٍ فبّتّ قَمَ قَدٍ، وٌن نّيمُمَ نّ نَ قٍ قَنيِ بِرِن نَ. كَامّ بْشِ هَلَكِمَ نّ. 31 نَ قِندِ مَ قٍ مَفَاشُشِ نَن نَ، عَ لُ عَلْ سٍسٍ قَنيِ مُ نُ رَبَ يِ بْشِ مَ.»
32 «عِ يِ شِيٍ سَشِ نّ دْشْ قِرِن، بَرِ مَ عَلَ شَ نَتّ نَ عَ رَ نَشَن مُ كَنَمَ، عَ مَن مُ بُمَ عَ شَ رَبَ. 33 مَنفّ، يَكْسِ عَ لَنمَ عِ شَ شَشِلِمَ قٍن نَشَن لْننِشِ. عِ شَ مِسِرَ نْي سٌ نَ كَنيِ يِ رَ. 34 مَنفّ، عِ شَ مِشِيٍ سُفَندِ نَشٍيٍ حّنفِ قَمَ سَدٍ بْشِ رَوَلِ شْن مَ يِ حّ قَنيِ سٌلٌقٍرٍ بُن مَ. بْشِ دَشَمُي بُسَلِ سُولِ يٌ سُولِ، عٍ شَ قَ كٍرٍن نَ مَنفّ شْن مَ، عَ شَ عَ رَفَتَ. 35 عٍ شَ دٌنسٍ بِرِن مَلَن، عٍ شَ عَ رَفَتَ تَايٍ كُي مِسِرَ مَنفّ شَ نْي بُن مَ. 36 يِ دٌنسٍ رَفَتَشِ قَمَ مِسِرَ بْشِ رَتَنفَدٍ كَامّ مَ، نَشَن قَمَ قَدٍ حّ سٌلٌقٍرٍ بُن.»
37 نَ وْيّنيِ نَشَ رَقَن مِسِرَ مَنفّ نُن عَ شَ مِشِ بِرِن مَ. 38 مِسِرَ مَنفّ نَشَ عَ قَلَ عٍ بّ، «وٌن نْمَ مِشِ ندٍ سْتْدٍ نَشَن لُمَ عَلْ يِ شّمّ؟ عَلَ شَشِلِ نَ عَ بّ.» 39 مِسِرَ مَنفّ نَشَ عَ قَلَ يُسُقُ بّ، «عَلَ بَرَ نَ قٍ بِرِن مَسٍن عِ بّ. مِشِ يٌ مُ نَ نَشَن شَشِلِ قَن عَلْ عِ تَن، عَ شَ لْننِ مَن شَ دَنفِ عِ فبٍ رَ. 40 عِ تَن نَن قَمَ قِندِدٍ ﭑ مَ بَنشِ شُنيِ رَ. ﭑ مَ حَمَ قَمَ بِرَدٍ عِ شَ يَامَرِ نَن قْشْ رَ. ﭑ مَ مَنفّ كِبَنيِ نَن تُن ﭑ نَدَنفِشِ عِ رَ.»
41 مِسِرَ مَنفّ مَن نَشَ عَ قَلَ يُسُقُ بّ، «عَ مَتٌ، ﭑ بَرَ نْي سٌ عِ يِ رَ مِسِرَ بْشِ بِرِن مَ.» 42 عَ نَشَ عَ شَ فبٍتِ شُرُندّ بَ عَ بّلّشّ رَ، عَ نَشَ عَ سٌ يُسُقُ بّلّشّ رَ. عَ نَشَ سٌسٍ قَنيِ رَفٌرٌ عَ مَ. عَ نَشَ كْنمَفٌرٍ شّيمَ دَاشِ رَفٌرٌ عَ كْن مَ. 43 عَ نَشَ عَ رَتٍ فِسٍ كُي، نَشَن بِرَ مَ مِسِرَ مَنفّ رَفِسٍ قْشْ رَ. سْورِيٍ نُ قَ عَ قَلَ عٍ شُي عِتٍشِ رَ حَمَ بّ، «وٌ شِنبِ سِن!» مِسِرَ مَنفّ عَ شَ مَنفّيَ تَشُ يُسُقُ رَ نَ كِ نّ.
44 مِسِرَ مَنفّ مَن نَشَ عَ قَلَ يُسُقُ بّ، «ﭑ تَن نَن مَنفّ رَ، كْنْ شَ عِ مُ يَامَرِ قِ نَشَن مَ، قٍقٍ مُ رَبَمَ مِسِرَ بْشِ مَ.» 45 مِسِرَ مَنفّ نَشَ يُسُقُ شِلِ سَ سَقَنَتِ ثَنٍيَ. عَ نَشَ ثٌتِقٍرَ، عٌن سّرّشّدُبّ، شَ دِ فِنّ عَسَنَ، قِ عَ مَ. يُسُقُ نَشَ مِسِرَ بْشِ شُن مَتٌ قْلْ عَ رَ. 46 يُسُقُ سِمَيَ نُ بَرَ حّ تٌنفٌ سَشَن لِ، عَ قَ مِسِرَ مَنفّ يِرٍ تّمُي نَشّ.
نَ تّمُي يُسُقُ نَشَ كٍلِ مِسِرَ مَنفّ يِرٍ، عَ سَ مِسِرَ بْشِ بِرِن عِحّرّ. 47 نَ حّ سٌلٌقٍرٍ قَنيِ كُي، بْشِ بِرِن نَشَ رَوَلِ. 48 يُسُقُ نَشَ دٌنسٍ بِرِن مَلَن نَشَن سْتْشِ نَ حّ سٌلٌقٍرٍ بُن مَ مِسِرَ بْشِ مَ. عَ نَشَ دٌنسٍ رَفَتَ تَايٍ كُي نَشَن سْتْشِ دَاشَ. 49 يُسُقُ نَشَ دٌنسٍ شْرِ فبٍفبٍ مَلَن، عَلْ مّيّنيِ نَشَن نَ بَا دّ رَ. عَ نَشَ فبٌ يّ هَن عَ مُ نَ شَسَبِ سّبّ سْنْن، بَرِ مَ مِشِ يٌ مُ نْمَ عَ كْنتِ كٌلٌندٍ.
50 بٍينُن كَامّ حّ سِن تّمُي، يُسُقُ شَ فِنّ عَسَنَ، عٌن سّرّشّدُبّ ثٌتِقَرِ شَ دِ فِنّ، نَشَ دِ قِرِن بَرِ عَ بّ. 51 يُسُقُ نَشَ عَ شَ دِ سِنفٍ شِلِ سَ مَنَسِ. نَ نَن نَ كِ، عَلَ بَرَ عَ نِيَ ﭑ بَرَ نّيمُ ﭑ مَ تْورّ بِرِن مَ، عَ نُن ﭑ بَبَ شَ دٍنبَيَ. 52 عَ نَشَ عَ شَ دِ قِرِن ندٍ شِلِ سَ عٍقِرَ مِ. نَ نَن نَ كِ، عَلَ بَرَ ﭑ قِندِ دِ بَرِ رَ بْشِ مَ ﭑ شُن نُ فٌرٌشِ دّننَشّ.
53 حّ قَنيِ سٌلٌقٍرٍ نَشَ دَنفِ مِسِرَ بْشِ مَ. 54 كَامّ حّ سٌلٌقٍرٍ نَشَ عَ لِ قْلْ، عَلْ يُسُقُ عَ تَفِ رَبَ كِ نَشّ. كَامّ نَشَ دِن دُنِحَ بِرِن نَ، كْنْ بَلٌي نُ نَ مِسِرَ بْشِ تَن مَ. 55 كَامّ تٌ بَرَ مِسِرَ بْشِ بِرِن سُشُ، حَمَ نَشَ سْنشْي رَتٍ مِسِرَ مَنفّ مَ بَلٌي قٍ رَ. مِسِرَ مَنفّ نَشَ عَ قَلَ مِسِرَكَيٍ بِرِن بّ، «وٌ سِفَ عَ قَلَ يُسُقُ بّ، عَ نَ قٍ نَشَن قَلَ وٌ بّ، وٌ شَ نَ رَبَ.» 56 كَامّ نَشَ دِن بْشِ بِرِن نَ. يُسُقُ نَشَ دٌنسٍ مَلَندٍيٍ رَبِ، عَ نَشَ مّنفِ سَرَ مِسِرَكَيٍ مَ، بَرِ مَ كَامّ نُ بَرَ سّنبّ سْتْ مِسِرَ بْشِ بِرِن مَ. 57 مِشِيٍ نُ قَ كٍلِ يِرٍ بِرِن، قَقٍ مّنفِ سَرَدٍ يُسُقُ مَ، بَرِ مَ كَامّ نُ بَرَ سّنبّ سْتْ دُنِحَ بِرِن مَ.