43
يَشُبَ شَ دِيٍ شَ بِيَاسِ قِرِن ندٍ
1 كَامّ سّنبّ نُ فبٌمَ نَن تُن كَنَان بْشِ كُي.
2 يَشُبَ نُن عَ شَ دٍنبَيَ تٌ بَرَ فّ مّنفِ بِرِن دٌندٍ عٍ قَ نَشَن نَ كٍلِقٍ رَ مِسِرَ، يَشُبَ نَشَ عَ قَلَ عَ شَ دِيٍ بّ، «وٌ مَن شَ سِفَ، وٌ شَ سَ دٌنسٍ ندٍ سَرَ وٌن بّ.»
3 يُدَ نَشَ عَ يَابِ، «مِسِرَ مَنفّ عَ قَلَ نّ مُشُ بّ عَ قَنيِ رَ، ‹وٌ مُ ﭑ يَتَفِ تٌمَ شَ وٌ نُن وٌ شُنيَ بِرِن مُ قَ.›
4 شَ عِ بَرَ تِن مُشُ نُن بُنيَمِن بِرِن شَ سِفَ، مُشُ سِفَمَ نّ، مُشُ سَ دٌنسٍ سَرَ عِ بّ.
5 كْنْ شَ عِ مُ تِن نَ رَ، مُشُ مُ سِفَمَ، بَرِ مَ نَ شّمّ عَ قَلَ نّ مُشُ بّ، ‹وٌ مُ ﭑ يَتَفِ تٌمَ شَ وٌ نُن وٌ شُنيَ بِرِن شَ مُ قَ.›»
6 نَ تّمُي عِسِرَيِلَ نَشَ عَ قَلَ، «مُنقٍ رَ وٌ قٍ كٌبِ عِلَنشِ ﭑ نَ عَ قَلَقٍ نَ شّمّ بّ عَ شُنيَ فبّتّ نَ وٌ بّ؟»
7 عٍ نَشَ عَ يَابِ، «نَ شّمّ مُشُ مَشْرِنشِ نّ عَ شْرْشْي رَ مُشُ بَرِ كِ مَ. عَ نُ قَ عَ قَلَ، ‹وٌ بَبَ مَن نَ سِمَيَ كُي؟ وٌ شُنيَ ندٍ نَ؟› مُشُ قَن نَشَ عَ شَ مَشْرِنيِ بِرِن يَابِ. مُشُ حْشْ مُ نُ عَ مَ، عَ قَلَمَ، ‹وٌ قَ وٌ شُنيَ رَ.›»
8 يُدَ نَشَ عَ قَلَ عَ بَبَ عِسِرَيِلَ بّ، «عَ لُ مُشُ نُن دِ مّدِ شَ سِفَ. مُشُ شَ سِفَ، نَ تّمُي وٌن بَلٌي سْتْمَ نّ وٌن مُ قَشَ، عِ تَن، مُشُ تَن، عَ نُن مُشُ شَ دِيٍ.
9 عِ يَ تِ ﭑ تَن نَ. عِ قَمَ عَ مَشْرِندٍ ﭑ تَن نَن مَ. شَ ﭑ مُ قَ عَ رَ، ﭑ قَ عَ تِ عِ يَ عِ، نَ كٌتٍ بَرَ قِندِ ﭑ فبٍ رَ عِ مَبِرِ.
10 يَكْسِ، شَ يِ قٍ شَ مُ مُشُ رَبُشِ نُ، مُشُ بَرَ سِفّ نُن قَ قِرِن نَبَ نُ.»
11 عٍ بَبَ عِسِرَيِلَ نَشَ عَ قَلَ عٍ بّ، «يِ نَن تٌ قَ عَ رَ، وٌ قَن يِ نَن نَبَمَ. وٌ بْشِ دَشَمُي ندٍيٍ سَ كٌتٍ عَلَكٌ وٌ شَ نَ شّمّ سَنبَ وُرِ دٌلٍ، كُمِ، سُرَيِ، لَبُندّ، كُسُ، نُن قٌوتٍ كَنسِ رَ.
12 وٌ شَ مّنفِ سَرٍ سِنفٍ، وٌ نَشَن تٌشِ بّكِيٍ كُي، عَ نُن مّنفِ فبّتّ سَرٍ، وٌ شَ نَ كْبِرِ بِرِن شَنِن وٌ شُن. تّمُندٍ نَ قِندِشِ نّيمُي نَن نَ.
13 وٌ وٌ شُنيَ تٌنفٌ، وٌ شَ سِفَ نَ شّمّ يِرٍ.
14 عَلَ سّنبّ كَنيِ شَ عَ نِيَ نَ شّمّ شَ كِنِكِنِ وٌ مَ، عَ شَ وٌ شُنيَ سٌ وٌ يِ رَ عَ نُن بُنيَمِن. شَ ﭑ تَن قَ فَنمَ نّ ﭑ مَ دِيٍ بِرِن نَ، ﭑ بَرَ يّرّلّ.»
15 يَشُبَ شَ دِيٍ نَشَ نَ سَنبَسٍيٍ يَءِلَن. عٍ نَشَ مّنفِ سَرٍ سِنفٍ كْبِرِ تٌنفٌ، عَ نُن عٍ لَنمَ عٍ شَ مّنفِ فبّتّ سَرَ كْبِرِ نَشَن نَ. عٍ نَشَ سِفَ مِسِرَ عَ نُن بُنيَمِن، عٍ سَ عٍ يّتّ دّنتّفّ يُسُقُ بّ.
16 يُسُقُ تٌ بُنيَمِن تٌ عٍ يَ مَ، عَ نَشَ عَ قَلَ عَ شَ كٌنيِ بّ، «يِ شّمّيٍ شَنِن ﭑ شْنيِ. عِ شَ شُرُ سٍ ندٍيٍ قَشَ، عِ دٌنسٍ يَءِلَن، عَلَكٌ مُشُ شَ مُشُ دّفٍ يِرٍ كٍرٍن تٌ يَنيِ رَ.»
17 يُسُقُ شَ كٌنيِ نَشَ عَ شَ يَامَرِ رَبَ كٍرٍن نَ. عَ نَشَ يَشُبَ شَ دِيٍ شَنِن يُسُقُ شْنيِ.
18 فَاشُي نَشَ لُ عٍ مَ عَ نُ عٍ شَنِنمَ تّمُي نَشّ يُسُقُ شْنيِ. عٍ نُ قَ عَ قَلَ عٍ بٌورٍ بّ، «عٍ نَ وٌن شَنِنقٍ نَ كْبِرِ نَن مَ قٍ رَ، وٌن نَشَن تٌ وٌن مَ بّكِيٍ كُي. عٍ قَمَ نّ دُتُندٍ وٌن مَ، عٍ وٌن مَ سٌقَلٍيٍ تٌنفٌ، عٍ وٌن قِندِ كٌنيِيٍ رَ.»
19 نَ كُي عٍ نَشَ عٍ مَسٌ يُسُقُ شَ بَنشِ كٌنيِ رَ، عٍ نَشَ وْيّن عَ رَ بَنشِ سٌدٍ دّ رَ.
20 عٍ نَشَ عَ قَلَ، «يَندِ مَنفّ، مُشُ سِنفٍ بَرَ قَ بٍ نُ دٌنسٍ سَرَدٍ.
21 كْنْ مُشُ تٌ مُشُ شِدٍ لِ فبِلٍنقٍ رَ مُشُ شْنيِ، مُشُ نَشَ مُشُ شَ بّكِيٍ رَقُلُن، كَنكَن نَشَ عَ شَ كْبِرِ تٌ عَ شَ بّكِ كُي نَ دٌنسٍ سَرَشِ نَشَن نَ. يَكْسِ مُشُ مَن بَرَ قَ نَ كْبِرِ رَفبِلٍندٍ عِ مَ.
22 مُشُ بَرَ قَ كْبِرِ فبّتّ قَن نَ، عَلَكٌ مُشُ مَن شَ دٌنسٍ فبّتّ سَرَ. مُشُ مُ عَ كٌلٌن مِشِ يٌ نَشَن نَ كْبِرِ سَشِ مُشُ شَ بّكِيٍ كُي.»
23 مَنفّ شَ كٌنيِ نَشَ عٍ يَابِ، «وٌ بْحّ شَ سَ، وٌ نَشَ فَاشُ. عَلَ نَ عَ رَ، وٌ بَبَ مَرِفِ عَلَ نَن نَ هَرِفٍ قِشِ وٌ مَ وٌ شَ بّكِيٍ كُي. ﭑ تَن يَتِ نَن وٌ شَ كْبِرِ رَ سُشُ.» نَ تّمُي عَ نَشَ سِمٍيْن رَ مِنِ عٍ مَ،
24 عَ قَ عٍ رَ سٌ يُسُقُ شْنيِ. عَ نَشَ يٍ سٌ عٍ يِ رَ، عَلَكٌ عٍ شَ عٍ سَنيِيٍ مَشَ. عَ نَشَ حٌوفٍ سٌ عٍ شَ سٌقَلٍيٍ يِ رَ دٌنسٍ رَ.
25 يُسُقُ تَارَيٍ نَشَ سَنبَسٍيٍ يَءِلَن، بٍينُ يُسُقُ سٌمَ تّمُي نَشّ يَنيِ رَ، بَرِ مَ عٍ نُ بَرَ عَ مّ عٍ عٍ دّفٍمَ نَا نّ.
26 يُسُقُ تٌ سٌ بَنشِ، عٍ نَشَ عَ شَ سَنبَسٍيٍ سٌ عَ يِ رَ، عٍ عٍ رَقٍلٍن بْشِ مَ عَ بّ.
27 يُسُقُ نَشَ عٍ مَشْرِن شَ عٍ يَلَنشِ. عَ مَن نَشَ عٍ مَشْرِن، «وٌ بَبَ قٌرِشِ وٌ نَشَن شَ قٍ قَلَ ﭑ بّ، سٍ مُ عَ تٌشِ؟ عَ مَن نَ سِمَيَ كُي؟»
28 عٍ نَشَ عَ يَابِ، «عِ شَ كٌنيِ مُشُ بَبَ، سٍسٍ مُ عَ سْتْشِ. عَ مَن نَ سِمَيَ كُي.» عٍ مَن نَشَ عٍ رَقٍلٍن بْشِ مَ عَ بُن مَ.
29 يُسُقُ تٌ عَ يَ رَكٍلِ، عَ نَشَ عَ شُنيَ بُنيَمِن تٌ، عَ نفَ شَ دِ. عَ نَشَ عَ قَلَ، «يِ نَن نَ وٌ شُنيَ رَ وٌ نَشَن شَ قٍ قَلَ ﭑ بّ؟» يُسُقُ نَشَ عَ قَلَ بُنيَمِن بّ، «ﭑ مَ دِ، عَلَ شَ هّيرِ قِ عِ مَ.»
30 عَ شُنيَ شَ قٍ كِنِكِنِ نَشَ فٌرٌ عَ سٌندٌنيِ كُي، وَ شْلِ نَشَ عَ سُشُ. عَ نَشَ كٍلِ مَقُرٍن، عَ سٌ عَ شِدٍ عَ نُ قَ وَ.
31 يُسُقُ تٌ فّ عَ يَ رَقُرُكُدٍ، عَ نَشَ مِنِ، عَ نَ مَحْشُنيِ بَ عَ يَ رَ. عَ نَشَ يَامَرِ قِ، «وٌ دٌنسٍ عِتَشُن.»
32 عَ شَ وَلِكّيٍ نَشَ عَ فبٍ سَ عَ شَتِ مَ، عٍ عَ تَارَيٍ فبٍ دْشْ عٍ شَتِ مَ، عٍ مِسِرَكَيٍ فبٍ قَن دْشْ عٍ شَتِ مَ، بَرِ مَ مِسِرَكَيٍ نُن عٍبُرُ مِشِيٍ مُ عٍ دّفٍمَ يِرٍ كٍرٍن. مِسِرَكَيٍ شَ نَامُنيِ مُ تِنمَ نَ رَ قٍوٌ.
33 يُسُقُ شَ وَلِكّيٍ نَشَ عَ تَارَيٍ مَفٌرٌ عَ يَ شْرِ. عٍ بِرِن نُ مَفٌرٌشِ عَ قٌرِ كِ مَ، كٍلِ دِ سِنفٍ مَ هَن دِ مّدِ. يِ قٍ نَشَ عٍ بِرِن كَابَ.
34 يُسُقُ تٌ يَامَرِ قِ دٌنسٍ شَ سٌ عٍ يِ رَ، بُنيَمِن شَ دٌنسٍ نُ دَنفِ عَ تَارَيٍ فبٍ رَ دْشْ سُولِ. عٍ بِرِن نَشَ عٍ دّفٍ، عٍ مِن، هَن عٍ وَ سَ.