49
عَلَتَلَ شَ كٌنيِ
1 سِ يٍنسٍنشِيٍ، وٌ شَ وٌ تُلِ مَتِ ﭑ نَ.
يِرٍ مَكُيٍيٍ، وٌ شَ وٌ حْشْ سَ ﭑ وْيّن شُي شْن مَ.
عَلَتَلَ ﭑ شِلِ نّ كَبِ ﭑ نفَ تّفّ،
عَ نَشَ ﭑ شِلِ قَلَ بٍينُن ﭑ شَ مِنِ قٌيٍ رَ.
2 عَ نَشَ ﭑ دّ لُ عَلْ سَنتِدّفّمَ شّحّنشِ عَ بّلّشّ،
عَ نَشَ ﭑ قِندِ شَلِ حْي رَ مٍلُشِ رَ،
عَ نَشَ ﭑ سَ عَ شَ شَلِ فبْنقْي كُي.
3 عَ نَشَ عَ قَلَ ﭑ بّ، «عِسِرَيِلَ، ﭑ مَ كٌنيِ نَن عِ رَ،
ﭑ نَ ﭑ مَ نْرّ مَسٍنمَ نَشَن سَابُي رَ.»
4 كْنْ ﭑ نَشَ عَ يَابِ، «ﭑ مَ وَلِ مُ سْونّيَشِ،
ﭑ بَرَ كَتَ، كْنْ قُقَقُ نَ عَ رَ.
ﭑ مَ وَلِ سَرٍ نَ ﭑ مَرِفِ عَلَتَلَ نَن يِ.»
5 نَ كُي عَلَتَلَ نَشَ مَسٍنيِ ندٍ تِ،
نَشَن ﭑ دَا ﭑ نفَ تّفّ عِ، ﭑ شَ قِندِ عَ شَ كٌنيِ رَ،
عَلَكٌ ﭑ شَ يَشُبَ بْنسْي رَفبِلٍن عَ مَ،
عِسِرَيِلَ حَمَ مَن شَ مَلَن عَ قّ مَ.
عَلَتَلَ بَرَ بِنيّ شُنفبٍ قِ ﭑ مَ،
عَ تَن نَشَن قِندِشِ ﭑ سّنبّ رَ.
6 عَ نَشّ، «يَشُبَ بْنسْي عِسِرَيِلَ رَفبِلٍنقٍ ﭑ مَ،
وَلِ نَ عَ رَ نَشَن شُرُن عِ بّ ﭑ مَ كٌنيِ.
ﭑ مَن عِ قِندِ مَ نّ نَءِيَلَنيِ رَ سِ فبّتّيٍ بّ،
عَلَكٌ ﭑ مَ كِسِ شَ مَسٍن دُنِحَ يِرٍ بِرِن.»
7 عَلَتَلَ شَ مَسٍنيِ نَن يَ،
عَلَتَلَ نَشَن قِندِشِ عِسِرَيِلَ شُنسَرَ مَ رَ، عِسِرَيِلَ شَ سّنِيّنتْي،
وٌن بْنسْي نَشَن شْنشِ،
نَشَن وَلِشِ مَنفّيٍ بّ،
«مَنفّيٍ نَ وٌ تٌ، عٍ تِمَ نّ،
كُنتِفِيٍ نَ وٌ تٌ، عٍ عٍ شِنبِ سِنمَ نّ وٌ بُن مَ،
بَرِ مَ دُفُتّفّ عَلَتَلَ نَشَن عِسِرَيِلَ شَ سّنِيّنتْي رَ،
نَ نَن وٌ سُفَندِشِ.»
8 عَلَتَلَ شَ مَسٍنيِ نَن يَ،
«ﭑ وٌ يَابِمَ يَابِ تّمُي نّ،
ﭑ وٌ رَكِسِمَ كِسِ لْشْي نّ.
ﭑ وٌ مَكَنتَمَ نّ،
ﭑ وٌ تِمَ نّ عَلْ حَمَ ﭑ سَاتّ تٌنفٌ نَشَن بّ،
عَلَكٌ وٌ شَ بْشِ شَ قَن، نَشَن كَنَشِ عَ شَ يَءِلَن.
9 فٍيلِمَنِيٍ مِنِمَ نّ،
مِشِ نَشٍيٍ نَ دِ مِ شْورَ، نٍيٍ شْرّيَ سْتْمَ نّ.
10 عٍ لُمَ نّ عَلْ شُرُ سٍيٍ نَشٍيٍ عٍ دّ مَدٌنمَ قِيلِيٍ مَ،
كَامّ نُن يٍ شْلِ مُ عٍ سُشُمَ،
كُيٍقُرٍ نُن سٌفٍ شْنّ مُ عٍ تْورْ مَ.
عٍ رَهِننّمَ نَن لُمَ عٍ رَحّرّ رَ،
عَ عٍ شُن تِ دُلٌن يِرٍ رَ.
11 تٍنتٍنيِ رَفٌرٌ مَ نّ، يِلِ رَقٍ،
عَلَكٌ عٍ شَ كِرَ شَ قَن.
12 عٍ قَمَ نّ كٍلِقٍ يِرٍ مَكُيٍ،
كٍلِقٍ كْولَ نُن سٌفٍفٌرٌدٍ مَ،
كٍلِقٍ عَسُوَن بْشِ مَ.»
13 «نَشٍيٍ نَ كٌورٍ مَ، عٍ شَ عٍ سّيوّ شُي عِتٍ،
نَشٍيٍ نَ بْشِ مَ، عٍ شَ حّلّشِن،
نَشٍيٍ نَ فٍيَيٍ قَرِ، عٍ شَ بّيتِ بَ،
بَرِ مَ عَلَتَلَ عَ شَ حَمَ مَدُندُ مَ نّ،
عَ كِنِكِنِ تْورْ مِشِيٍ مَ.»
14 كْنْ سِيٌنكَيٍ نُ عَ قَلَمَ نّ،
«عَلَتَلَ بَرَ مُشُ رَبٌلٌ،
مُشُ مَرِفِ بَرَ نّيمُ مُشُ مَ.»
15 «دِنفّ نْمَ نّيمُدٍ عَ شَ دِيْرّ مَ؟
عَ مُ كِنِكِنِمَ شّ عَ شَ دِ مَ؟
هَلِ عَ تَن نّيمُ،
ﭑ تَن مُ نّيمُمَ وٌ مَ.
16 وٌ شِلِيٍ كٌرِنشِ ﭑ بّلّشّ كُي،
ﭑ يَيٍ تِشِ نّ عِ شَ بَنشِ رَ تّمُي بِرِن.
17 وٌ شَ دِيٍ نَ فبِلٍنقٍ وٌ شْنيِ.
نَشٍيٍ وٌ تْورْشِ، نٍيٍ نَ كٍلِقٍ وٌ شُن مَ.
18 وٌ وٌ يَ عِتٍ. وٌ شَ دِيٍ بَرَ عٍ مَلَن، عٍ نَ قَقٍ.
ﭑ تَن عَلَتَلَ بَرَ ﭑ كَلِ ﭑ يّتّ رَ،
وٌ شَ مِشِيٍ قَمَ نّ لُدٍ وٌ سّيتِ مَ،
عَلْ دُفِ تٌقَنيِيٍ لُمَ فِنّ مَ كِ نَشّ عَ شَ قُتِ شِرِ لْشْي.»
19 «هَلِ وٌ يَشُييٍ تٌ وٌ شْنيِ كَنَشِ، عٍ وٌ شَ حَمَ رَيٍنسٍن يّ،
يَكْسِ وٌ قَمَ نّ وُيَدٍ هَن وٌ فبٌ وٌ شَ بْشِ بّ.
مِشِ نَشٍيٍ كَسَرّ تِشِ وٌ شْنيِ، عٍ بَرَ سِفَ.
20 وٌ شَ دِ نَشٍيٍ بَرِشِ يِ تْورْ وَشَتِ،
عٍ قَمَ نّ عَ قَلَدٍ، ‹بٍ شُرُن وٌن بّ.
وٌن شَ يِرٍ نّينّ تِ وٌن لُمَ دّننَشّ.›
21 نَ تّمُي وٌ قَمَ نّ عَ قَلَدٍ،
‹ندٍ يِ دِيٍ بَرِشِ ﭑ بّ؟
مِشِ رَبّحِنشِ نَن نُ نَ ﭑ نَ.
عَلَ نُ بَرَ ﭑ نَبٌلٌ، عَ مّي ﭑ نَ.
ندٍ يِ دِيٍ رَ مْشِ؟
ﭑ كٍرٍن ثٍتِ نَن نُ عَ رَ.
يِ دِيٍ كٍلِشِ مِندٍن؟›»
22 وٌن مَرِفِ عَلَتَلَ شَ مَسٍنيِ نَن يَ،
«ﭑ نَن ﭑ بّلّشّ عِتٍمَ نّ حَمَنّيٍ بّ،
ﭑ تْنشُمَ مَسٍن عٍ بّ،
عَلَكٌ عٍ شَ قَ وٌ شَ دِ شّمّيٍ رَ عٍ بّلّشّ،
عٍ شَ قَ وٌ شَ دِ فِنّيٍ رَ عٍ تُنكِ مَ.
23 مَنفّيٍ مّينِمَ نّ وٌ شَ دِيٍ مَ،
مَنفّ فِنّيٍ عٍ رَ مْ.
نَ مِشِ شُنفبٍيٍ عٍ شِنبِ سِنمَ نّ وٌ بُن مَ،
عٍ وٌ سَنيِيٍ مَسُنبُمَ نّ.
نَ كُي وٌ قَمَ نّ عَ كٌلٌندٍ عَ عَلَتَلَ نَ ﭑ تَن نَن نَ.
مِشِ نَشٍيٍ عٍ شَشِلِ تِمَ ﭑ نَ، نَ كَنيِ مُ يَافِمَ.»
24 سْورِ شَ سٍ تٌنفٌشِ نْمَ رَ سُشُدٍ عَ يِ رَ؟
سّنبّمَ شَ مِشِ سُشُشِ نْمَ بَدٍ عَ يِ رَ؟
25 عَلَتَلَ وٌ يَابِمَ يِ كِ نّ؛
«عِيٌ، ﭑ سْورِ شَ سٍ تٌنفٌشِ رَ سُشُمَ نّ عَ يِ رَ،
ﭑ سّنبّمَ شَ مِشِ سُشُشِ بَمَ نّ عَ يِ رَ.
ﭑ وٌ فٍرٍقَيٍ فٍرٍ مَ نّ، ﭑ وٌ شَ دِيٍ رَكِسِ.
26 نَشٍيٍ وٌ حَشَنكَتَمَ، عٍ قَمَ نّ عٍ يّتّ سُبٍ دٌندٍ،
عٍ سِيسِمَ نّ عٍ يّتّ وُلِ رَ.
نَ كُي عِبُنَدَ مَ بِرِن عَ كٌلٌنمَ نّ،
عَ ﭑ تَن نَن عَلَتَلَ رَ، وٌ رَكِسِمَ، وٌ شُنسَرَ مَ، يَشُبَ شَ سّنبّمَ.»