16
سَمِسٌن نُن دَلِلَ
1 لْشْي ندٍ سَمِسٌن نَشَ سِفَ فَسَ. عَ تٌ لَنفٌي ندٍ تٌ نَا، عَ نَشَ سٌ عَ شْنيِ.
2 فَسَكَيٍ نَشَ عَ كٌلٌن سَمِسٌن نُ نَ نَ. عٍ نَشَ مّننِ مّلّن، عَلَكٌ كُيٍ نَ عِبَ عٍ شَ عَ قَشَ تَا سٌدٍ دّ رَ.
3 كْي تَفِ سَمِسٌن نَشَ كٍلِ، عَ تَا نَادّ سُشُ، نُن عَ فبَكُشِ وُرٍ نَشٍيٍ رَ وُرِيٍ مَ، عَ نَ بِرِن تَلَ، عَ عَ دْشْ عَ تُنكِ قَرِ. عَ نَشَ عَ شَنِن فٍيَ قَرِ نَشَن نَ هٍبِرٌن يَ تَفِ.
4 نَ دَنفِ شَنبِ، سَمِسٌن نَشَ فِنّ ندٍ كٌلٌن سٌرٍكِ فُلُنبَ نَشَن شِلِ دَلِلَ. سَمِسٌن نَشَ نَ فِنّ شَنُ.
5 قِلِسِتَكَيٍ شَ مَنفّيٍ نَشَ سِفَ نَ فِنّ شْن، عٍ عَ قَلَ عَ بّ، «عِ شَ عَ كٌلٌن سَمِسٌن سّنبّ كٍلِشِ دّننَشّ، عَلَكٌ مُشُ شَ نْ عَ رَ. شَ عِ فّ نَ كٌلٌندٍ، مُشُ عَ شِرِ مَ نّ، مُشُ كٍرٍن كٍرٍن مَ قَ كْبِرِ كٌلٍ وُلُ كٍرٍن نُن كْبِرِ كٌلٍ كّمّ قِ عِ مَ.»
6 نَ تّمُي دَلِلَ نَشَ عَ قَلَ سَمِسٌن بّ، «يَندِ، عِ شَ عِ فُندٌ قَلَ ﭑ بّ، عِ سّنبّ سْتْمَ كِ نَشّ. مِشِ نْمَ مُنسٍ رَبَدٍ، عٍ شَ عِ شِرِ، عٍ نْ عِ رَ؟»
7 سَمِسٌن نَشَ عَ يَابِ، «شَ عٍ ﭑ شِرِ مَ لُوتِ نّينّ رَ، نَشٍيٍ مُ نُ شَرَ سِندٍن، ﭑ سّنبّ بَمَ ﭑ يِ، ﭑ لُمَ نّ عَلْ شّمّ بٌورٍيٍ.»
8 قِلِسِتَكَيٍ نَشَ لُوتِ نّينّ شَرَتَرٍ سٌلٌقٍرٍ شَنِن دَلِلَ شْن مَ. عَ نَشَ سَمِسٌن شِرِ عٍ رَ.
9 قِلِسِتَكَيٍ نَشَ عَ شَ كٌنكٌي مّلّن. دَلِلَ نَشَ عَ شُي رَ مِنِ سَمِسٌن مَ، «قِلِسِتَكَيٍ بَرَ قَ عِ سُشُدٍ.» سَمِسٌن نَشَ نَ لُوتِيٍ بٌلٌن كٍرٍن نَ، عَلْ فّسّ نَشَن فَنشِ. نَ تّمُي عٍ مُ نْ عَ سّنبّ فُندٌ كٌلٌندٍ.
10 دَلِلَ نَشَ عَ قَلَ سَمِسٌن بّ، «عِ وَ مَ ﭑ مَدَشُقٍ نّ. عِ بَرَ وُلٍ قَلَ ﭑ بّ. يَكْسِ، يَندِ، عِ شَ عِ فُندٌ قَلَ ﭑ بّ. عٍ نْمَ عِ شِرِدٍ مُنسٍ رَ؟»
11 سَمِسٌن نَشَ عَ قَلَ عَ بّ، «شَ مِشِ ﭑ شِرِ مَ لُوتِ نّينّيٍ رَ، سٍسٍ مُ نُ شِرِ نَشٍيٍ رَ، ﭑ سّنبّ لُمَ عَلْ عَدَ مَدِ بِرِن نَ كِ نَشّ.»
12 دَلِلَ تٌ فّ عَ شِرِدٍ لُوتِ نّينّيٍ رَ، عَ نَشَ فبٍلٍفبٍلٍ، «سَمِسٌن، قِلِسِتَكَيٍ بَرَ قَ عِ سُشُدٍ!» قِلِسِتَكَيٍ نُ بَرَ عَ شَ كٌنكٌي مّلّن. سَمِسٌن نَشَ لُوتِ بٌلٌن عَ شِرِشِ نَشَن نَ عَلْ فّسّ بٌلٌنمَ كِ نَشّ.
13 دَلِلَ نَشَ عَ قَلَ سَمِسٌن بّ، «هَن تٌ عِ نَ ﭑ مَدَشُقٍ، عِ وُلٍ نَن تُن قَلَقٍ ﭑ بّ. عَ قَلَ ﭑ بّ عَ لَنمَ عِ شَ شِرِ سٍ نَشَن نَ.» سَمِسٌن نَشَ عَ يَابِ، «ﭑ شُنسّشّ، نَشَن دّنبّشِ سٌلٌقٍرٍ رَ، شَ عِ نَ بِرِن دّفّ مَبْي دُفِ رَ، وٌ نَشَ دُفِ سْشْ سٍ قَن سْتِ ﭑ شُنسّشّ كُي، عَ سَ سْرْن بْشِ، ﭑ سّنبّ لُمَ عَلْ عَدَ مَدِ بِرِن نَ كِ نَشّ.»
14 دَلِلَ تٌ فّ دُفِ سْشْ سٍ سٌدٍ عَ قَنيِ رَ، عَ مَن نَشَ فبٍلٍفبٍلٍ، «سَمِسٌن، قِلِسِتَكَيٍ بَرَ قَ عِ سُشُدٍ!» سَمِسٌن نَشَ شُنُ، عَ نَشَ دُفِ سْشْ سٍ بِرِن تَلَ.
15 دَلِلَ نَشَ عَ قَلَ سَمِسٌن بّ، «عِ نَشّ عَ مَرَقَنيِ نَ وٌن تَفِ، كْنْ ﭑ مَ شَنُنتٍيَ مُ نَ عِ بّ. عَ سَنيَ سَشَن نَن يَ عِ ﭑ مَدَشُمَ. هَن تٌ عِ تٌندِشِ عِ فُندٌ قَلَدٍ ﭑ بّ، عِ سّنبّ كٍلِشِ دّننَشّ مَ.»
16 لْشْي بِرِن دَلِلَ نُ عَ تْورْ مَ يِ وْيّنيِ مْولِ رَ. عَ تٌ دْشْ عَ رَ،
17 سَمِسٌن نَشَ عَ فُندٌ قَلَ عَ بّ، عَ نَشّ، «كَقِ ﭑ بَرِ تّمُي ﭑ شُنيِ مُ بِشِ، بَرِ مَ عٍ ﭑ قِشِ عَلَ نَن مَ، عَلَ شَ نَسَرِ نَن ﭑ نَ. شَ ﭑ شُنيِ بِ، ﭑ سّنبّ لُمَ عَلْ عَدَ مَدِ بِرِن فبٍ نَ كِ نَشّ.»
18 دَلِلَ تٌ عَ كٌلٌن سَمِسٌن بَرَ نْندِ يَتِ يَتِ قَلَ عَ بّ، عَ نَشَ قِلِسِتَ مَنفّيٍ شِلِ، عَ قَ عَ قَلَ عٍ بّ، «وٌ مَن شَ قَ، بَرِ مَ يِ بِيَاسِ عَ بَرَ عَ شَ فُندٌ قَلَ ﭑ بّ.» قِلِسِتَ مَنفّ نَشَ سِفَ عَ شْنيِ، عٍ مَن كْبِرِ شَنِن عٍ سَاتَشِ نَشَن مَ.
19 دَلِلَ نَشَ سَمِسٌن رَشِ، عَ سَشِ عَ سَنيِ مَ. عَ نَشَ شّمّ ندٍ شِلِ، عَ نَشَ سَمِسٌن شُنسّشّ دّنبّشِ سٌلٌقٍرٍ مَشَبَ. نَ بَرَ عَ نِيَ دَلِلَ شَ نْ عَ رَ. عَ سّنبّ بِرِن نُ بَرَ سِفَ.
20 نَ تّمُي دَلِلَ نَشَ فبٍلٍفبٍلٍ، «سَمِسٌن، قِلِسِتَكَيٍ بَرَ قَ عِ سُشُدٍ!» سَمِسٌن تٌ شُنُ، عَ نَشَ عَ قَلَ عَ يّتّ بّ، «ﭑ مَن شَ مِنِ يِ قٍ كُي عَلْ بٌورٍ بِيَاسِ.» عَ مُ عَ كٌلٌن عَلَتَلَ نُ بَرَ عَ رَبّحِن.
21 قِلِسِتَكَيٍ نَشَ عَ سُشُ، عٍ عَ يَيٍ سْشْ، عٍ عَ شَنِن فَسَ. مّننِ عٍ نَشَ عَ شِرِ يْلْنشْنيِ يْشُي دَاشِ رَ فٍيلِ كُي، عَ شَ نُ سٍ بِنيٍيٍ مَيِندِفِلِن، نَشَن سَنسِ شْرِ لُشُتَمَ.
سَمِسٌن شَ قَشّ
22 نَ وَشَتِ عَ شُنسّشّ، نَشَن نُ بِشِ، نَ نَشَ مِنِ قْلْ.
23 لْشْي ندٍ قِلِسِتَ مَنفّيٍ نَشَ عٍ مَلَن، عٍ شَ سّرّشّ شُنفبٍ بَ عٍ شَ كُيٍ دَفْن بّ حّلّشِنيِ كُي. عٍ نَشَ عَ قَلَ، «وٌن مَ عَلَ بَرَ سَمِسٌن سَ وٌن سَفٌي!»
24 حَمَ تٌ دَفْن تٌ، عٍ نَشَ عَ مَتْشْ، عٍ قَ عَ قَلَ، «وٌن مَ عَلَ بَرَ وٌن يَشُي سَ وٌن سَفٌي، نَشَن بَرَ وٌن مَ بْشِ كَنَ، عَ مَن بَرَ وٌن مَ مِشِيٍ قَشَ.»
25 نَ سّيوّ كُي، عٍ نَشَ عَ قَلَ، «وٌن شَ سَمِسٌن شِلِ، وٌن شَ عَ مَيٍلٍ.» عٍ نَشَ قَ عَ رَ كٍلِقٍ فٍيلِ كُي، عٍ عَ شِرِ عٍ شَ سَلِدٍ سَنيِيٍ رَ. عٍ نَشَ عَ قِندِ مَيٍلٍ سٍ رَ.
26 سَمِسٌن نَشَ عَ قَلَ عَ رَحّرّ مَ بّ، «عَ لُ ﭑ بّلّشّ شَ سَ سَلِدٍ سَنيِيٍ مَ، ﭑ شَ ﭑ كِلْن عٍ رَ.»
27 شّمّ نُن فِنّ فبٍفبٍ نُ نَ سَلِدٍ كُي. قِلِسِتَ مَنفّيٍ قَن نُ نَ. نَ بِرِن قِندِ مِشِ وُلُ سَشَن نَن نَ، عٍ بِرِن نُ قَ سَمِسٌن مَيٍلٍ.
28 سَمِسٌن نَشَ عَلَتَلَ مَشَندِ، «ﭑ مَرِفِ عَلَتَلَ، عِ شَ رَتُ ﭑ مَ. ﭑ بَرَ عِ مَيَندِ، عَلَ، سّنبّ قِ ﭑ مَ عَلَكٌ ﭑ شَ ﭑ فبٍحْشْ قِلِسِتَكَيٍ مَ ﭑ يَيٍ شَ قٍ رَ.»
29 سَمِسٌن نَشَ عَ كِلْن نَ سَلِدٍ سَنيِيٍ رَ، كٍرٍن نَ عَ يِرٍقَنيِ مَ، كٍرٍن نَ عَ كْولَ مَ.
30 سَمِسٌن نَشَ عَ قَلَ، «ﭑ شَ قَشَ ﭑ نُن قِلِسِتَكَيٍ رَ.» عَ نَشَ سَلِدٍ سَنيِيٍ تُتُن عَ سّنبّ بِرِن نَ. سَلِدٍ نَشَ بِرَ قِلِسِتَكَيٍ نُن مَنفّيٍ مَ، نَشٍيٍ نُ نَ سَلِدٍ كُي. قِلِسِتَكَ نَشٍيٍ قَشَ نَ قٍ كُي، نَ كْنتِ دَنفِ مِشِيٍ رَ سَمِسٌن نَشٍيٍ قَشَ عَ شَ دُنِحّءِفِرِ بِرِن كُي.
31 عَ شُنيَيٍ نُن عَ بَبَ شَ دٍنبَيَ بِرِن نَشَ فٌرٌ نَا عَ قُرٍ تٌنفٌدٍ. عٍ نَشَ عَ رَفَتَ سٌرَهَ نُن عٍسٍتَيٌلِ تَفِ، عَ بَبَ مَنٌوَ شَ فَبُرِ كُي. سَمِسٌن نُ بَرَ عِسِرَيِلَ يَمَرِ حّ مْشْحّن بٍينُ عَ شَ قَشَ.