21
بُنيَمِن بْنسْي شَ فِنّ سْتْي
1 عِسِرَيِلَ شّمّيٍ نُ بَرَ عٍ يّتّ رَكَلِ مِسِثَ، عَ قَلَقٍ رَ، «مِشِ يٌ نَشَ عَ شَ دِ فِنّ قِ بُنيَمِنكَ ندٍ مَ.»
2 حَمَ نَشَ سِفَ بٍتٍلِ، عٍ نَشَ لُ عَلَ يَ عِ هَن نُنمَرٍ. عٍ نَشَ وَ عٍ شُي عِتٍشِ رَ.
3 عٍ نُ قَ عَ قَلَ، «عِسِرَيِلَ مَرِفِ عَلَتَلَ بْنسْي ندٍ بَشِ مُشُ رَ مُنقٍ رَ؟»
4 نَ كُيٍ عِبَ، عٍ نَشَ كٍلِ سُبَشّ مَ، عٍ سّرّشّبَدٍ يَءِلَن، عٍ قَ سّرّشّ فَن دَاشِ نُن شَنُنتٍيَ سّرّشّ بَ عَلَ بّ.
5 عِسِرَيِلَكَيٍ نَشَ عَ مَشْرِن، «شَبِلّ مُندُن مُ نَ وٌن يَ مَ تٌ نَشَن مُ قَشِ عَلَتَلَ شَ مَلَنيِ؟» عٍ نُ بَرَ عٍ رَكَلِ مِشِ شِلِ مَ نَشَن مُ قَمَ عَلَتَلَ شَ مَلَنيِ مِسِثَ. عٍ نُ بَرَ عَ قَلَ نَ كَنيِ شَ قَشَ.
6 عِسِرَيِلَكَيٍ نَشَ كِنِكِنِ عٍ نفَشَكٍرٍنيِ بُنيَمِنكَيٍ مَ، عٍ نُ قَ عَ قَلَ، «تٌ لْشْي بْنسْي كٍرٍن بَرَ بَ عِسِرَيِلَ رَ.
7 وٌن مُنسٍ رَبَمَ عٍ بّ عَلَكٌ عٍ شَ فِنّيٍ سْتْ، بَرِ مَ وٌن تَن بَرَ وٌن كَلِ عَلَتَلَ رَ، وٌن مُ وٌن مَ دِ فِنّيٍ قِمَ عٍ مَ؟»
8 نَ كُي، عٍ نَشَ عَ قَلَ، «شَبِلّ ندٍ نَ عِسِرَيِلَ بْنسْييٍ يَ مَ نَشَن مُ تٍ عَلَتَلَ يِرٍ مِسِثَ؟» عٍ نَشَ عَ مَتٌ قَ يَبّسِ فَلَدِ مِشِ يٌ مُ نُ نَ عٍ يَ مَ.
9 عٍ تٌ حَمَ مَتٌ، عٍ نَشَ عَ كٌلٌن يَبّسِ فَلَدِ شَبِلّ مُ نُ نَ عٍ يَ مَ.
10 حَمَ نَشَ سْورِ وُلُ قُ نُن قِرِن شّي يَبّسِ فَلَدِ عٍ شَ مِشِ بِرِن، فِنّيٍ نُن دِ مّدِيٍ، قَشَ سَنتِدّفّمَ رَ.
11 «وٌ لَن نّ وٌ شَ مّننِ شّمّ بِرِن قَشَ. وٌ مَن شَ فِنّيٍ قَشَ نَشٍيٍ مُ قِندِشِ فِنّدِ مّدِ رَ.»
12 عٍ نَشَ فِنّدِ مّدِ كّمّ نَانِ لِ يَبّسِ فَلَدِ، نَشٍيٍ مُ شّمّ قٍ كٌلٌن. عٍ نَشَ عٍ شَنِن سِلٌ كَنَان بْشِ مَ.
13 حَمَ بِرِن نَشَ شّيرَيٍ شّي بُنيَمِن شَ دِيٍ شْن مَ نَشٍيٍ نُ نَ رِ مْن فٍيَ مَبِرِ. عٍ نَشَ لَنيِ وْيّنيِ مَسٍن عٍ بّ.
14 نَ تّمُي بُنيَمِنكَيٍ نَشَ فبِلٍن عِسِرَيِلَ بْشِ مَ. عِسِرَيِلَكَيٍ نَشَ يَبّسِ فَلَدِ فِنّيٍ سٌ عٍ يِ رَ، كْنْ عٍ بِرِن مُ فِنّ سْتْ.
15 حَمَ نَشَ كِنِكِنِ عٍ مَ، بَرِ مَ عَلَتَلَ نُ بَرَ عَ رَفِرِ ندٍ شَ بَ عِسِرَيِلَ بْنسْييٍ رَ.
16 قٌرِيٍ نَشَ عَ قَلَ، «وٌن مُنسٍ رَبَمَ عٍ بّ عَلَكٌ نَشٍيٍ مُ فِنّ سْتْ، عٍ قَن شَ فِنّ ندٍيٍ دْشْ؟ بُنيَمِنكَ فِنّ بِرِن بَرَ قَشَ.
17 عَ لَنمَ عٍ شَ كّ تٌنفٌي سْتْ، عَلَكٌ بْنسْي ندٍ نَشَ بَ عِسِرَيِلَ يَ مَ.
18 كْنْ وٌن مُ نْمَ وٌن مَ دِيٍ سٌدٍ عٍ يِ رَ، بَرِ مَ وٌن بَرَ وٌن نَكَلِ، ‹مِشِ نَشَن عَ شَ دِ فِنّ قِمَ بُنيَمِنكَ ندٍ مَ، نَ كَنيِ شَ دَنكَ.›»
19 «عَوَ، وٌن نَشَن نَبَمَ، نَ نَن يِ كِ. حّ يٌ حّ سَلِ ندٍ رَبَمَ سِلٌ، بٍتٍلِ كْولَ مَ، بٍتٍلِ نُن سِكٍمِ كِرَ قُفٍ رَ، لٍبٌنَ يِرٍقَنيِ مَ.»
20 عٍ نَشَ عَ قَلَ بُنيَمِنكَيٍ بّ، «وٌ سِفَ، وٌ سَ وٌ نْشُن وّنِ بِلِيٍ شْورَ.
21 سِلٌ فِنّيٍ نَ مِنِ قَرٍ بٌرٌندٍ، وٌ شَ مِنِ وّنِ بِلِيٍ شْورَ، وٌ شَ سِلٌ فِنّ ندٍيٍ تٌنفٌ وٌ يّتّ بّ، وٌ مَن شَ فبِلٍن بُنيَمِن بْشِ مَ.
22 شَ عٍ بَبَ، شَ نَ مُ عَ رَ عٍ تَارَيٍ، قَ وٌ كَلَمُدٍ مُشُ شْن، مُشُ عَ قَلَمَ نّ عٍ بّ، ‹وٌ شَ دِحّ عٍ مَ مُشُ شَ قٍ رَ، بَرِ مَ مُشُ مُ فِنّ سْتْشِ عٍ شَ سْورِ بِرِن بّ. وٌ تَن شَ مُ وٌ شَ دِيٍ قِشِ عٍ مَ. نَ كُي وٌ مُ نَ مَرَكَلِ كَنَشِ.›»
23 بُنيَمِن شَ دِيٍ نَشَ نَ بِرِن نَبَ. عٍ نَشَ فِنّ تٌنفٌ عٍ شَ كْنتِ مَ فِنّيٍ يَ مَ، نَشٍيٍ نُ نَ قَرٍ بٌرٌنقٍ. عٍ نَشَ عٍ شَنِن عٍ شَ بْشِ مَ، عٍ مَن نَشَ عٍ شَ تَايٍ تِ، عٍ سَبَتِ نَا.
24 عِسِرَيِلَكَيٍ قَن نَشَ فبِلٍن عٍ شْنيِ، عٍ بْنسْي نُن شَبِلّ نُ نَ بْشِ نَشَن مَ.
25 نَ وَشَتِ مَنفّ يٌ مُ نُ نَ عِسِرَيِلَ. كَنكَن نُ عَ وَشْنقٍ نَن نَبَمَ.