12
مَرِيَمَ لَبُندّ تُرٍ مَسٌقٍ عِسَ سَنيِ مَ
1 شِ سٍننِ بٍينُن سَيَمَلٍكّ دَنفِ سَلِ شَ عَ لِ، عِسَ نَشَ سِفَ بٍتَنِ، لَسَرُ شْنيِ، عَ نُ بَرَ نَشَن نَكٍلِ قَشّ مَ.
2 عٍ نَشَ دٌنسٍ قَنيِ يَءِلَن، عٍ قَ حَمَ شِلِ، عٍ شَ عٍ دّفٍ يِرٍ كٍرٍن عِسَ شَ بِنيّ بُن مَ. مَرَتَ نُ دٌنسٍ عِتَشُنمَ مِشِيٍ مَ، لَسَرُ نُن عِسَ نَشَ لُ تٍيبِلِ رَ.
3 مَرِيَمَ نَشَ سَ نَرَدَ لَبُندّ تُرٍ لِتِرِ تَفِ تٌنفٌ. نَرَدَ تِنسٍشِ نَن نُ عَ رَ، نَشَن سَرٍ شْرْشْ كِ قَنيِ. عَ نَشَ عَ مَسٌ عِسَ سَنيِيٍ مَ، عَ عٍ مَقُرُكُ عَ شُنسّشّ رَ. لَبُندّ تُرٍ شِرِ نَشَ دِن بَنشِ بِرِن نَ.
4 يُدَ سِ عِسِكَرِيٌتِ، عِسَ قْشِرَبِرّ نَشَن نُ قَمَ عَ يَنقَدٍ، عَ نَشَ عَ قَلَ،
5 «عَ نُ لَنمَ يِ لَبُندّ شَ مَتِ كْبِرِ كٌلٍ كّمّ سَشَن نَ، عَ قِ سٍتَرٍيٍ مَ.»
6 عَ يِ قَلَ نّ بَرِ مَ عَ تَن نَن نُ عِسَ قْشِرَبِرّيٍ شَ كْبِرِ رَفَتَمَ، عَ نُ قَ ندٍ مُحَ. سٍتَرٍيٍ شَ قٍ مُ نُ نَ عَ بْحّ كُي قٍوٌ!
7 نَ كُي، عِسَ نَشَ عَ قَلَ، «فبِلٍن مَرِيَمَ قْشْ رَ. يِ نُ رَفَتَشِ عَ يِ رَ نّ، ﭑ مَ مَرَفَتّ نَن مَ قٍ رَ.
8 سٍتَرٍيٍ لُمَ نّ وٌ يَ مَ تّمُي بِرِن، كْنْ ﭑ تَن مُ لُمَ وٌ يَ مَ عَبَدَن شّ.»
9 عٍ تٌ عَ مّ عَ عِسَ بَرَ قَ بٍتَنِ، يُوِقِيٍ حَمَ فبٍفبٍ قَن نَشَ سِفَ. عٍ مُ سِفَ عِسَ شَ قٍ فبَنسَن شَ مَ. عٍ نُ وَ مَ لَسَرُ قَن تٌقٍ، عِسَ نَشَن نَكٍلِ قَشّ مَ.
10 نَ كُي، سّرّشّدُبّ كُنتِفِيٍ نَشَ نَتّ تٌنفٌ عٍ شَ لَسَرُ قَن قَشَ،
11 بَرِ مَ يُوِقِ فبٍفبٍ نُ فبِلٍنقٍ عٍ قْشْ رَ عَ تَن نَن مَ قٍ رَ، عٍ نُ قَ دَنشَنِيَ عِسَ مَ.
عِسَ سٌقٍ دَرِ سَلَمُ
12 نَ كُيٍ عِبَ، حَمَ فبٍفبٍ نَشَن نُ قَشِ سَيَمَلٍكّ دَنفِ سَلِ رَبَدٍ، عٍ نَشَ عَ مّ عَ عِسَ نَ قَقٍ دَرِ سَلَمُ.
13 عٍ نَشَ تُفِ قّنسّيٍ تٌنفٌ، عٍ سِفَ عَ رَلَندٍ عٍ شُي عِتٍ رَ،
«تَنتُي نَ وٌن نَكِسِمَ بّ!
بَرَكَ نَ عَ بّ نَشَن قَقٍ مَرِفِ شِلِ رَ،
عِسِرَيِلَ مَنفّ!»
14 عِسَ نَشَ سٌقَلٍ لَنمَ ندٍ سْتْ، عَ دْشْ عَ قَرِ، عَلْ عَ سّبّشِ كِتَابُي كُي كِ نَشّ،
15 «سِيٌنِكَيٍ، وٌ نَشَ فَاشُ.
وٌ شَ مَنفّ نَ قَقٍ،
عَ دْشْشِ سٌقَلٍ قَرِ.»
16 نَ وَشَتِ عِسَ قْشِرَبِرّيٍ مُ قَهَامُي سْتْ نَ قٍ مَ، كْنْ عِسَ تٌ كٍلِ قَشّ مَ، عٍ نَشَ رَتُ كِتَابُي سّبّلِ مَ نَشَن نُ بَرَ كَمَلِ نَ قٍ كُي.
17 حَمَ نَشَن لَسَرُ تٌ كٍلِ رَ قَشّ مَ، عٍ نَشَ سٍيدٍ بَ عِسَ بّ.
18 نَ نَن عَ نِيَ، حَمَ نَشَ سِفَ عَ رَلَندٍ، بَرِ مَ عٍ نُ بَرَ نَ تْنشُمَ مَكَابَشِ شَ قٍ مّ.
19 نَ كُي، قَرِ سّنِيٍ نَشَ عَ قَلَ عٍ بٌرٍ بّ، «وٌ بَرَ عَ تٌ، وٌن مُ نْمَ سٍسٍ رَ. دُنِحَ بِرِن بَرَ بِرَ عَ قْشْ رَ!»
عِسَ عَ شَ قَشّ شَ قٍ مَسٍنقٍ
20 فِرّكِ مِشِ ندٍيٍ قَن نُ بَرَ تٍ سَلِ رَبَدٍ دَرِ سَلَمُ، عٍ شَ سَ عَلَ بَتُ.
21 عٍ نَشَ قَ قِلِثُ شْن، نَشَن كٍلِ بٍتٍسَيِدَ، فَلِلٍ بْشِ مَ، عٍ عَ قَلَ عَ بّ، «ﭑ بَ، مُشُ وَ مَ عِسَ تٌقٍ.»
22 قِلِثُ نَشَ سَ عَ قَلَ عَندِرٍ بّ، عٍ قِرِن بِرِن نَشَ سِفَ عٍ سَ عَ قَلَ عِسَ بّ.
23 عِسَ نَشَ عٍ يَابِ، «وَشَتِ بَرَ عَ لِ عَدَ مَ شَ دِ شَ شُننَكٍلِ شَ مَكّنّن.
24 ﭑ شَ عَ قَلَ وٌ بّ عَ نْندِ كِ مَ، شَ مَالٍ شْرِ مُ سِ، عَ مُ دِحّ عَ يّتّ مَ بْشِ بُن، عَ لُمَ نَ كِ، عَ كٍرٍن فبَنسَن. كْنْ شَ عَ سَ دِحّ عَ يّتّ مَ بْشِ بُن، عَ عَ بٌفِ فبٍفبٍ نَن نَمِنِمَ.
25 نَشَن فبَكُمَ عَ يّتّ شَ دُنِحَ قٍ رَ، عَ لْيمَ نّ. نَشَن مُ كَنكَنمَ عَ يّتّ شَ قٍ مَ يِ دُنِحّءِفِرِ كُي، عَ عَبَدَن كِسِ نَن سْتْمَ.
26 شَ نَشَن يٌ وَ مَ ﭑ مَ وَلِ سُشُقٍ، عَ شَ بِرَ ﭑ قْشْ رَ نّ، ﭑ تَن نَ لُ دّدّ، ﭑ مَ وَلِكّ قَن نَ نَا. شَ نَشَن يٌ ﭑ مَ وَلِ سُشُ، بَبَ عَلَ عَ كَنيِ بِنيَمَ نّ.»
27 «ﭑ بْحّ تْورْشِ نّ يِ كِ، كْنْ ﭑ قَ مُنسٍ قَلَمَ؟ ﭑ شَ عَ قَلَ بَبَ عَلَ بّ عَ شَ ﭑ نَتَنفَ يِ حَشَنكَتّ وَشَتِ مَ؟ عَدٍ، يِ حَشَنكَتّ نَشَن قَقٍ ﭑ لِدٍ، ﭑ قَشِ نَ نَن يَتِ مَ.
28 ﭑ بَبَ عَلَ، عَ نِيَ عِ شِلِ شَ عِتٍ.» عِسَ تٌ نَ قَلَ، شُي ندٍ نَشَ كٍلِ كٌورٍ مَ، عَ عَ قَلَ، «ﭑ بَرَ عَ عِتٍ، ﭑ مَن فبِلٍنمَ نّ عَ عِتٍ رَ.»
29 حَمَ نَشٍيٍ نُ تِشِ نَا، عٍ تٌ عَ مّ، ندٍيٍ نَشَ عَ قَلَ عَ فَلَنيِ نَن شُي عَ رَ، كْنْ فبّتّ نَشَ عَ قَلَ، «مَلٍكّ نَن وْيّنشِ عَ بّ!»
30 عِسَ نَشَ عَ مَسٍن عٍ بّ، «نَ شُي مُ مِنِشِ ﭑ تَن ﭑ مَ قٍ شَ مَ، عَ مِنِشِ وٌ تَن نَن مَ قٍ مَ.
31 يِ دُنِحَ مَكِيتِ وَشَتِ بَرَ عَ لِ. مَنفّيَ قَقٍ بَدٍ يِ دُنِحَ نْلَ يِ رَ.
32 مِشِيٍ نَ ﭑ نَتٍ وُرِ مَفَلَنبُشِ كْن نَ ﭑ قَشَقٍ رَ، ﭑ مِشِ بِرِن نَقَمَ نّ ﭑ مَ.»
33 عِسَ عَ قَشَ كِ مَسٍن نَ كِ نّ.
34 نَ كُي، حَمَ نَشَ عَ قَلَ عِسَ بّ، «مُشُ تَن بَرَ عَ مّ سّرِيّ كِتَابُي كُي، عَ عَلَ شَ مِشِ سُفَندِشِ بُمَ عَبَدَن. مُنقٍ رَ عِ تَن عَ قَلَمَ عَ قٌ عَدَ مَ شَ دِ شَ رَتٍ؟ ندٍ قِندِشِ يِ عَدَ مَ شَ دِ رَ؟»
35 عِسَ نَشَ عٍ يَابِ، «عَلَ شَ نَءِيَلَنيِ مَن لُمَ نّ وٌ يَ مَ دٌندٌرٌنتِ. وٌ شَ حّرّ نَ نَءِيَلَنيِ كُي، عَلَكٌ دِ مِ نَشَ وٌ تّرّننَ. نَشَن حّرّ مَ دِ مِ كُي عَ مُ عَ سِفَدٍ تٌمَ.
36 نَءِيَلَنيِ تٌ يَنبَمَ وٌ بّ يِ كِ، وٌ شَ لَ عَ رَ نّ، عَلَكٌ وٌ شَ قِندِ نَءِيَلَنيِ شَ دِيٍ نَن نَ.»
حَمَ دَنشَنِيَتَرٍ
عِسَ تٌ فّ نَ قَلَدٍ، عَ نَشَ سِفَ، عَ سَ عَ نْشُن عٍ مَ.
37 عَ نُ بَرَ تْنشُمَ مَكَابَشِ فبٍفبٍ رَبَ عٍ يَ شْرِ، كْنْ نَ بِرِن كُي، عٍ مُ دَنشَنِيَ عَ مَ.
38 نَ رَبَ نّ عَلَكٌ عَننَبِ عٍسَيِ شُي شَ كَمَلِ، عَ تٌ عَ مَسٍن،
«مَرِفِ، ندٍ لَشِ مَسٍنيِ رَ، عٍ بَرَ نَشَن مّ مُشُ رَ؟
عَلَ سّنبّ بَرَ مَكّنّن ندٍ بّ؟»
39 نَ كُي، عٍ مُ نْ دَنشَنِيَدٍ عِسَ مَ، بَرِ مَ عٍسَيِ عَ مَسٍن نّ،
40 «عَلَ بَرَ عٍ يَ دْنشُ،
عَ عٍ شَشِلِ بَلَن،
عَلَكٌ عٍ يَ نَشَ قَ سٍ عِفبّ،
عٍ شَشِلِ نَشَ قَ قٍ كٌلٌن،
عٍ نَشَ قَ عٍ بْحّ رَقِندِ ﭑ مَ،
ﭑ شَ عٍ رَيَلَن.»
41 عَننَبِ عٍسَيِ نَ قَلَ نّ عَ تٌ نُ بَرَ عِسَ شَ نْرّ تٌ. نَ كُي، عَ نُ عِسَ شَ قٍ نَن قَلَقٍ.
42 كْنْ نَ بِرِن كُي، هَلِ كُنتِفِيٍ يَ مَ، عٍ فبٍفبٍ نَشَ لَ عِسَ رَ. كْنْ عٍ مُ نُ سُو سَمَ عَ قَلَدٍ كّنّ مَ بَرِ مَ عٍ نُ فَاشُشِ قَرِ سّنِيٍ يَ رَ، نٍيٍ نَشَ قَ تْنيِ دْشْ عٍ مَ، سٌقٍ رَ سَلِدٍ كُي.
43 عَدَ مَدِيٍ شَ مَتْشْي سْتْقٍ نَن نُ رَقَن عٍ مَ دَنفِ عَلَ شَ مَتْشْي رَ.
عِسَ شَ مَسٍنيِ دْنشْي حَمَ بّ
44 عِسَ نَشَ عَ شُي عِتٍ، عَ عَ قَلَ، «نَشَن نَ دَنشَنِيَ ﭑ مَ، عَ مُ دَنشَنِيَشِ ﭑ تَن شَ مَ، عَ دَنشَنِيَشِ ﭑ شّيمَ نَن مَ.
45 نَشَن نَ ﭑ تَن تٌ، عَ بَرَ ﭑ شّيمَ تٌ.
46 ﭑ تٌ قَشِ دُنِحَ، نَءِيَلَنيِ نَن ﭑ نَ، عَلَكٌ نَشَن يٌ نَ دَنشَنِيَ ﭑ مَ، نَ كَنيِ نَشَ لُ دِ مِ كُي سْنْن.
47 شَ نَشَن يٌ ﭑ شُي مّ، كْنْ عَ مُ عَ رَبَتُ، ﭑ تَن مُ نَ كَنيِ مَكِيتِمَ، بَرِ مَ ﭑ مُ قَشِ دُنِحَ مَكِيتِدٍ شّ. ﭑ قَشِ دُنِحَ رَكِسِدٍ نّ.
48 نَشَن نَ تٌندِ ﭑ نَ، عَ مُ تِن ﭑ مَ مَسٍنيِ رَ، نَ كَنيِ مَكِيتِمَ نَ نَ. ﭑ مَسٍنيِ نَشَن تِمَ، نَ نَن قِندِ مَ عَ مَكِيتِمَ رَ لْشْ دْنشْي.
49 بَرِ مَ ﭑ مَ مَسٍنيِ مُ قَتَنشِ ﭑ تَن شَ رَ. عَ قَتَنشِ بَبَ عَلَ نَن نَ، نَشَن ﭑ شّيشِ يَامَرِ رَ، عَ لَنمَ ﭑ شَ نَشَن قَلَ، ﭑ شَ نَشَن مَسٍن.
50 ﭑ عَ كٌلٌن عَ شَ سّرِيّ قِندِ مَ كِسِ نَن نَ، نَشَن مُ حْنمَ عَبَدَن. نَ نَن عَ رَ، ﭑ قٍ مَسٍنمَ وٌ بّ عَلْ بَبَ عَلَ عَ مَسٍنشِ كِ نَشّ.»