22
يُدَيَ مَنفّ شَ فبَلٌي
1 عَلَتَلَ بَرَ عَ مَسٍن، «سِفَ يُدَيَ مَنفّ شْنيِ يِ مَسٍنيِ رَ.
2 عِ شَ عَ قَلَ عَ بّ، ‹يُدَيَ مَنفّ، عِ تَن نَشَن نَ دَوُدَ شَ كِبَنيِ كُي، عِ تَن، عِ شَ مِشِيٍ، نُن عِ شَ حَمَ نَشَن سٌمَ يِ نَادّ رَ، وٌ وٌ تُلِ مَتِ عَلَتَلَ رَ.
3 عَلَتَلَ بَرَ عَ مَسٍن، وٌ شَ تِنشِن، وٌ شَ سّرِيّ رَبَتُ. وٌ شَ تْورْ مِشِ رَتَنفَ مِشِ كٌبِ مَ. وٌ نَشَ شْحّ، كِرِدِ، نُن كَاحّ فِنّ تْورْ. وٌ نَشَ قٍ حَاشِ رَبَ، وٌ نَشَ كٌبِ، وٌ نَشَ مِشِ نِي بَ يِ بْشِ مَ.
4 شَ عَ سَ لِ وٌ نَشَ بِرَ يِ سّرِيّ قْشْ رَ، مَنفّ نَشٍيٍ دْشْمَ دَوُدَ شَ كِبَنيِ كُي، عٍ قَمَ نّ سٌدٍ تَا كُي سٌي نُن سْورِ رَفِسٍيٍ قَرِ، عٍ تَن نُن عٍ شَ مِشِيٍ، نُن عٍ شَ حَمَ.
5 كْنْ شَ وٌ مُ يِ سّرِيّ رَبَتُ، ﭑ بَرَ ﭑ كَلِ ﭑ يّتّ رَ، يِ بْنسْي شُن نَكَنَمَ نّ. عَلَتَلَ شَ مَسٍنيِ نَن نَ كِ.›»
عَلَتَلَ شَ مَسٍنيِ
6 عَلَتَلَ بَرَ عَ مَسٍن يُدَيَ مَنفّ بّ عَ بْنسْي شَ قٍ رَ،
«عِ بَرَ لُ عَلْ فَلَدِ ﭑ بّ، عِ بَرَ لُ عَلْ لِبَن فٍيَ،
كْنْ ﭑ بٍكَيٍ كٍرِ مَ نّ، ﭑ بٍ قِندِ فبٍنفبٍرٍنيِ رَ.
7 ﭑ سْورِيٍ شّيمَ نّ فٍرٍ سٌسٍيٍ رَ،
عٍ شَ سّدِرِ وُرِيٍ شَبَ، عٍ شَ عٍ فَن.
8 سِ فبٍفبٍ دَنفِمَ نّ نَا، عٍ قَ عَ قَلَ عٍ بٌورٍ بّ،
‹مُنقٍ رَ عَلَتَلَ يِ مْولِ رَبَشِ يِ تَا شُنفبٍ رَ؟›
9 ندٍ عٍ يَابِمَ نّ، ‹عٍ مَرِفِ عَلَتَلَ نَ رَبَشِ نّ
بَرِ مَ عٍ بَرَ عَ شَ سَاتّ رَبّحِن،
عٍ قَ عَلَ فبّتّيٍ بَتُ، عٍ تُوبِ عٍ بّ.›»
عَننَبِ يٍرٍ مِ شَ مَسٍنيِ
10 «وٌ نَشَ حْنقٍ رَبَ مِشِ قَشَشِيٍ بّ،
وٌ نَشَ سُننُن.
وٌ شَ وَ مِشِيٍ بّ نَشٍيٍ شَنِنمَ حَمَنّ مَ،
بَرِ مَ عٍ مُ فبِلٍنمَ عٍ شْنيِ عَبَدَن.
11 عَلَتَلَ بَرَ عَ مَسٍن يٌسِيَ شَ دِ سَلُمُ شَ قٍ رَ،
نَشَن نُ بَرَ تِ مَنفّ رَ عَ بَبَ حْشْي رَ،
‹عَ مُ فبِلٍنمَ عَبَدَن.
12 عَ قَشَمَ حَمَنّ نَن مَ عٍ عَ شَنِنمَ دّننَشّ.
عَ مُ يِ بْشِ تٌمَ سْنْن.›»
عَلَتَلَ شَ مَسٍنيِ
13 «حَشَنكَتّ نَ مِشِ بّ
نَشَن بَنشِ تِمَ تِنشِنتَرٍيَ كُي،
نَشَن عَ قَرِ عِدْشْمَ مُحّ سَابُي رَ،
نَشَن مِشِ رَوَلِمَ تْورّ كُي،
عَ تٌندِ سَرٍ سٌدٍ عَ شَ وَلِكّ يِ رَ.
14 حَشَنكَتّ نَ مِشِ بّ نَشَن عَ قَلَمَ،
‹ﭑ شَ بَنشِ بٍلٍبٍلٍ تِ ﭑ يّتّ بّ،
نَشَن كُي فبٌ، وُندّرِ وُيَ نَشَن مَ،
نَشَن شُنمَسَشِ سّدِرِ وُرِ رَ،
نَشَن مَسٌشِ سٍ فبٍيلِ رَ.›
15 عِ قِندِشِ مَنفّ رَ سّدِرِ وُرِ نَن مَ قٍ رَ؟
عِ بَبَ مُ بَلٌي نُن مِنسٍ سْتْشِ شّ؟
كْنْ عَ نَشَ تِنشِنيِ نُن قٍ قَنيِ رَبَ،
نَ نَن قِندِشِ سْونّيَ رَ عَ بّ.
16 عَ نَشَ سٍتَرٍ نُن تْورْ مِشِ رَتَنفَ،
نَ نَن قِندِشِ سْونّيَ رَ عَ بّ.
نَ بِرِن عَ مَسٍنشِ نّ عَ بَرَ ﭑ كٌلٌن.»
عَلَتَلَ شَ مَسٍنيِ نَن نَ كِ.
17 «كْنْ عِ تَن بِرَ مَ عِ يّتّ شَ فٍينِ نَن تُن قْشْ رَ،
هَلِ نَ قَ قِندِ قَشّ تِقٍ رَ،
هَلِ نَ قَ قِندِ مِشِ تْورْقٍ رَ.
18 نَ نَن عَ تٌشِ عَلَتَلَ مَسٍنيِ تِشِ
يٌسِيَ شَ دِ يٍهٌيَكِمِ شَ قٍ رَ، يُدَيَ مَنفّ،
‹عٍ مُ نْمَ عَ بِنيَدٍ حْنقٍ رَ،
عٍ مُ عَ قَلَمَ، ﭑ تَارَ، ﭑ مَرِفِ.›
19 عٍ مُ عَ رَفَتَمَ،
عَ لُمَ نّ عَلْ سٌقَلٍ قَشَشِ نَشَن وْلّمَ دَرِ سَلَمُ قَرِ مَ.»
20 «وٌ شَ تٍ لِبَن،
وٌ شَ وٌ شُي عِتٍ بَسَن بْشِ مَ،
وٌ شَ فبٍلٍفبٍلٍ عَبَرِ مِ،
بَرِ مَ وٌ دّقَنبٌورٍ بِرِن بَرَ بِرَ.
21 بٍينُن تْورّ شَ وٌ سُشُ،
ﭑ نُ بَرَ مَسٍنيِ تِ وٌ بّ،
كْنْ وٌ مُ تِن نَ رَ مّدٍ.
وٌ نَ نَ كِ نّ كَبِ وٌ دِ مّدِ تّمُي،
وٌ مُ وَ مَ ﭑ مَ سّرِيّ رَبَتُقٍ.
22 وٌ شَ يَرٍرَتِيٍ بَرَ لْي عَلْ قٌيٍ،
وٌ مّينِمَيٍ بَرَ سِفَ كٌنيِيَ كُي.
وٌ تَن بَرَ يَافِ، وٌ شَشِلِ بَرَ عِقُ وٌ شَ كٌبِحَ شَ قٍ رَ.
23 وٌ تَن نَشٍيٍ نَ لِبَن،
نَشٍيٍ لُشِ عَلْ شْنِيٍ عٍ تّي كُي سّدِرِ وُرِ كْن نَ،
وٌ قَمَ نّ تْورْدٍ عَ حَاشِ رَ فبَلٌي شَ قٍ رَ.
وٌ قَمَ نّ لُدٍ تْورّ كُي عَلْ فِنّ نَشَن نَ دِ بَرِقٍ.»
24 عَلَتَلَ شَ مَسٍنيِ نَن يَ؛
«ﭑ بَرَ ﭑ كَلِ،
هَلِ يٍهٌيَكِمِ شَ دِ يٍكٌيَكِنِ، يُدَيَ مَنفّ،
سَ قَتُ ﭑ مَ عَلْ ﭑ مَ شُرُندّ قَنيِ،
ﭑ مُ تٌندِ مَ نَ بَدٍ ﭑ بّلّشّ رَ.
25 ﭑ عِ سٌمَ عِ يَشُييٍ نَن يِ رَ نَشٍيٍ وَ مَ عِ سْنتْقٍ،
عِ فَاشُمَ نَشٍيٍ يَ رَ،
نٍبُكَدَنسَرِ، بَبِلْن مَنفّ، نُن بَبِلْنكَيٍ.
26 ﭑ وٌ كٍرِ مَ نّ حَمَنّ مَ، عِ تَن نُن عِ نفَ،
وٌ مُ بَرِشِ دّننَشّ.
وٌ قَشَمَ نَا نّ.
27 وٌ مُ فبِلٍنمَ وٌ شْنيِ سْنْن، وٌ وَ مَ لُقٍ دّننَشّ.
وٌ مُ فبِلٍنمَ نَا عَبَدَن.»
28 «يٍهٌيَكِنِ بَرَ لُ عَلْ قّحّ عِبْوشِ،
مِشِ مُ وَ مَ نَشَن شْن؟
مُنقٍ رَ عٍ عَ تَن نُن عَ شَ دِيٍ كٍرِ مَ حَمَنّ مَ، عٍ مُ دّننَشّ كٌلٌن؟
29 ﭑ مَ حَمَ نَشَن سَبَتِشِ ﭑ مَ بْشِ مَ،
وٌ شَ وٌ تُلِ مَتِ عَلَتَلَ رَ.
30 عَلَتَلَ بَرَ عَ مَسٍن،
‹وٌ شَ سّبّلِ تِ يِ مِشِ شَ قٍ رَ،
عَ مُ دِ سْتْمَ،
عَ شَ دُنِحّءِفِرِ مُ سْونّيَمَ،
عَ شَ دِ يٌ مُ لُمَ دَوُدَ شَ كِبَنيِ كُي،
عَ شَ دِ يٌ مُ يُدَيَ يَمَرِ مَ سْنْن.›»