25
عِسِرَيِلَ شَ كٌنيِيَ
1 عَلَتَلَ نَشَ مَسٍنيِ ندٍ تِ عَننَبِ يٍرٍ مِ بّ، يٌسِيَ شَ دِ يٍهٌيَكِمِ شَ مَنفّيَ حّ نَانِ ندٍ كُي يُدَيَ بْشِ مَ. نَ نُ قِندِشِ نٍبُكَدَنسَرِ شَ مَنفّيَ حّ سِنفٍ نَن نَ بَبِلْن بْشِ مَ.
2 عَننَبِ يٍرٍ مِ نَشَ يِ مَسٍنيِ تِ يُدَيَكَيٍ نُن دَرِ سَلَمُكَيٍ بّ،
3 «كَبِ عَمٌن شَ دِ يٌسِيَ شَ مَنفّيَ حّ قُ نُن سَشَن ندٍ يُدَيَ بْشِ مَ، هَن تٌ، نَ حّ مْشْحّن نُن سَشَن نَن يَ. نَ وَشَتِ عَلَتَلَ نُ بَرَ مَسٍنيِ ندٍ تِ ﭑ بّ. ﭑ بَرَ نَ قَلَ وٌ بّ تّمُي بِرِن، كْنْ وٌ مُ تِنشِ وٌ تُلِ مَتِدٍ ﭑ نَ.
4 عَلَتَلَ بَرَ عَ شَ كٌنيِ نَمِحْنمّيٍ شّي وٌ مَ وَشَتِ بِرِن، كْنْ وٌ مُ عٍ شُي رَ مّشِ، وٌ مُ عٍ شَ مَسٍنيِ سُشُشِ.
5 عٍ نَشَ عَ مَسٍن وٌ بّ وٌ شَ فبِلٍن وٌ شَ حّرّ كِ حَاشِ قْشْ رَ، عَلَكٌ وٌ شَ بُ يِ بْشِ مَ، عَلَتَلَ نَشَن قِشِ وٌ نُن وٌ بَبَيٍ مَ، عَ شَ قِندِ وٌ فبٍ رَ عَبَدَن.»
6 «وٌ نَشَ بِرَ عَلَ فبّتّيٍ قْشْ رَ، وٌ نَشَ عٍ بَتُ، وٌ نَشَ تُوبِ عٍ بّ. وٌ نَشَ ﭑ نَشْنْ، عَلَكٌ ﭑ نَشَ وٌ حَشَنكَتَ.
7 كْنْ وٌ مُ ﭑ شُي سُشُشِ. وٌ حّرّ كِ بَرَ ﭑ نَشْنْ، ﭑ شَ وٌ حَشَنكَتَ. عَلَتَلَ شَ مَسٍنيِ نَن نَ كِ.»
8 نَ نَن عَ رَ مَنفّ عَلَتَلَ نَشَ عَ مَسٍن، «وٌ تٌ تٌندِ ﭑ مَ مَسٍنيِ رَ،
9 ﭑ فَلِ قٍنمَ نّ كْولَ مَ، نَشَن نَ ﭑ مَ كٌنيِ بَبِلْن مَنفّ نٍبُكَدَنسَرِ شَ يَامَرِ بُن مَ. ﭑ عٍ شّيمَ نّ وٌ نُن وٌ دْشْبٌورٍ سْنتْدٍ. مِشِ دّ عِشَرَ مَ نّ وٌ شَ قٍ رَ، عٍ قَ يٌ وٌ مَ. وٌ لُمَ نَا شُننَكَنّ نَن كُي عَبَدَن.
10 سِفِ مُ سَمَ وٌ شْنيِ سْنْن، شُلُنيِ مُ رَبَمَ. مِشِ مُ مَالٍ دِن شُي مّمَ، عٍ مُ لَنثُي شَ نَءِيَلَنيِ تٌمَ.
11 فبَلٌي يِ بْشِ لِمَ نّ، سٍ بِرِن كَنَ. وٌ نُن وٌ دْشْبٌورٍيٍ لُمَ كٌنيِيَ نَن كُي بَبِلْن مَنفّ شَ نْي بُن مَ حّ تٌنفٌ سٌلٌقٍرٍ.»
12 «عَلَتَلَ شَ مَسٍنيِ نَن يَ؛ كْنْ نَ حّ تٌنفٌ سٌلٌقٍرٍ نَ كَمَلِ، ﭑ بَبِلْن مَنفّ نُن عَ شَ حَمَ حَشَنكَتَمَ نّ عٍ شَ قٍ حَاشِ شَ قٍ رَ. ﭑ عٍ شَ بْشِ شُن نَكَنَمَ نّ عَبَدَن.
13 ﭑ قٍ نَشَن بِرِن قَلَشِ يِ حَمَيٍ شِلِ مَ يِ كِتَابُي كُي عَننَبِ يٍرٍ مِ سَابُي رَ، ﭑ قَمَ نّ نَ بِرِن نَكَمَلِدٍ.
14 بَبِلْنكَيٍ قَمَ نّ لُدٍ سِ سّنبّمَ وُيَشِيٍ شَ يَامَرِ بُن مَ. ﭑ عٍ شَ وَلِ سَرٍ رَفبِلٍنمَ نّ عٍ مَ.»
عَلَتَلَ شَ مَسٍنيِ
15 عِسِرَيِلَ مَرِفِ عَلَ بَرَ عَ مَسٍن ﭑ بّ،
«ﭑ مَ شْنّ شَ قٍ قَلَ سِ بِرِن بّ
ﭑ عِ شّيمَ دّننَشّ.
16 عٍ نَ ﭑ مَ شْنّ تٌ،
عٍ لُمَ نّ عَلْ سِيسِلَيٍ سَنتِدّفّمَ يَ رَ.»
عَننَبِ يٍرٍ مِ شَ مَسٍنيِ
17 «ﭑ بَرَ عَلَتَلَ شَ شْنّ مَسٍن سِ بِرِن بّ،
عَ ﭑ شّيشِ دّننَشّ.
18 ﭑ بَرَ عَ مَسٍن دَرِ سَلَمُ نُن يُدَيَ تَايٍ كُي،
عٍ شَ مَنفّيٍ نُن كُنتِفِيٍ بّ.
مِشِيٍ دّ قَمَ نّ عِشَرَدٍ عٍ شَ فبَلٌي سْتْشِيٍ شَ قٍ رَ،
عٍ قَ يٌ عٍ مَ، عٍ عٍ دَنكَ عَلْ عَ رَبَقٍ كِ نَشّ تٌ لْشْي.
19 ﭑ بَرَ عَ مَسٍن مِسِرَ مَنفّ قِرَوُنَ بّ،
عَ شَ كٌنيِيٍ، عَ شَ كُنتِفِيٍ، نُن عَ شَ حَمَ بِرِن بّ.
20 ﭑ بَرَ عَ مَسٍن سِيٍ بّ
نَشٍيٍ نَ سٌفٍفٌرٌدٍ مَبِرِ.
ﭑ بَرَ عَ مَسٍن عُسِ مَنفّيٍ بّ، عَ نُن قِلِسِتَ مَنفّيٍ بّ،
نَشٍيٍ نَ عَسِكَلْن، فَسَ، عٍكِرٌن، نُن عَسِدٌدِ.
21 ﭑ بَرَ عَ مَسٍن عٍدٌن، مٌوَبَ، نُن عَمٌنِ مَنفّيٍ بّ.
22 ﭑ بَرَ عَ مَسٍن تِرٍ نُن سِدْن مَنفّيٍ بّ،
نَشٍيٍ نَ بَا دّ رَ.
23 ﭑ بَرَ عَ مَسٍن دٍدَن، تٍمَ، نُن بُسِ مَنفّيٍ بّ،
نَشٍيٍ نَ يِرٍ مَكُيٍ.
24 ﭑ بَرَ عَ مَسٍن عَرَبُ مَنفّيٍ بّ،
نَشٍيٍ نَ فبٍنفبٍرٍن يِرٍ.
25 ﭑ بَرَ عَ مَسٍن سَبِدِ، عٍلَمَ، نُن مٍدِيَ مَنفّيٍ بّ،
26 عَ نُن مَنفّ بِرِن نَشٍيٍ نَ كْولَ مَ،
نَشٍيٍ مَكْرّ نُن نَشٍيٍ مَكُيَ دُنِحَ يِرٍ بِرِن.
نٍيٍ بِرِن دَنفِ شَنبِ،
ﭑ مَن بَرَ عَ مَسٍن سٍيسَكِ مَنفّ بّ.»
عَلَتَلَ شَ مَسٍنيِ
27 «عِ شَ عَ مَسٍن عٍ بّ،
‹عِسِرَيِلَ مَنفّ عَلَتَلَ بَرَ عَ مَسٍن،
وٌ شَ عَ شَ شْنّ كٌلٌن،
وٌ شَ لُ نَ شْنّ كُي هَن سَنتِدّفّمَ شَ فّ وٌ سْنتْدٍ
ﭑ نَشَن شّيمَ وٌ تَفِ.›
28 شَ عٍ تٌندِ ﭑ مَ شْنّ كٌلٌندٍ، عَ قَلَ عٍ بّ،
عَلَتَلَ بَرَ نَتّ شْرْشْي تٌنفٌ،
عٍ شَ ﭑ مَ شْنّ كٌلٌن.»
29 عَلَتَلَ شَ مَسٍنيِ نَن يَ؛
«ﭑ بَرَ نَتّ تٌنفٌ
ﭑ شَ ﭑ مَ تَا سُفَندِشِ حَشَنكَتَ،
ﭑ شِلِ قَلَمَ نَشَن شُن مَ.
وٌ نَشّ عَ وٌ مُ قٍ حَاشِ يٌ رَبَشِ
كْنْ وٌ بَرَ قٍ حَاشِ رَبَ.
نَ نَن عَ رَ ﭑ بَرَ نَتّ تٌنفٌ،
وٌ شَ سْنتْ سَنتِدّفّمَ رَ.»
مَنفّ عَلَتَلَ شَ مَسٍنيِ نَن نَ كِ.
30 «عِ شَ يِ بِرِن قَلَ عٍ بّ.
عِ شَ عَ قَلَ عٍ بّ عَلَتَلَ شُي مَفَاشُشِ بَرَ مِنِ
عَ شَ هْرْ مْلِنفِرَ كُي كٌورٍ مَ عَ شَ بْشِ شِلِ مَ.
عَ بَرَ عَ شُي رَ مِنِ عَ حَاشِ رَ دُنِحَ شِلِ مَ.
31 نَ شُي بَرَ دُنِحَ بِرِن لِ.
عَلَتَلَ نَ كِيتِ سَقٍ سِ بِرِن مَ نَشٍيٍ نَ دُنِحَ.
نَشَن حَاشُ، عَ سْنتْمَ نّ سَنتِدّفّمَ رَ.»
عَلَتَلَ شَ مَسٍنيِ نَن نَ كِ.
32 عَلَتَلَ بَرَ عَ مَسٍن،
«عَلَتَلَ شَ شْنّ بَرَ كٍلِ
عَلْ قٌيٍ شُنفبٍ نَشَن سِفَمَ سِ بِرِن مَ دُنِحَ بّندّ قُحِ قَرِ.
33 عَلَتَلَ نَشٍيٍ سْنتْمَ دُنِحَ مَ نَ لْشْي،
حْن قٍ مُ رَبَمَ عٍ بّ، عٍ مُ فَبُرِ سْتْمَ،
عٍ قِندِ مَ حَحّ نَن نَ بّندّ قُحِ قَرِ.
34 حَمَ يَرٍرَتِيٍ، وٌ شَ فبٍلٍفبٍلٍ،
وٌ شَ وٌ وَ شُي رَ مِنِ،
بَرِ مَ فبَلٌي لْشْي بَرَ وٌ لِ.
وٌ قَمَ نّ يٍنسٍندٍ، وٌ بِرَ،
عَلْ سٍ شُنشُرِ نَشَن تِدٍ مُ نَ.
35 وٌ شَ يَرٍرَتِيٍ مُ كِسِمَ سْنْن،
وٌ مُ يِفِيَ سْتْمَ.
36 وٌ وٌ شَ يَرٍرَتِيٍ وَ شُي مّمَ نّ،
وٌ عٍ فبٍلٍفبٍلٍ شُي مّ،
بَرِ مَ عَلَتَلَ نَ عٍ شَ بْشِ كَنَقٍ.
37 عَلَتَلَ شَ شْنّ مَفَاشُشِ بَرَ عَ نِيَ
شُي يٌ مُ مِنِمَ سْنْن عٍ شَ بْشِ مَ.
38 عَلَتَلَ بَرَ لُ عَلْ يّتّ نَشَن بَرَ عَ يِرٍ مَسَرَ.
عَ بَرَ بْشِ كَنَ عَ شَ شْنّ شَ قٍ رَ.»