33
دَرِ سَلَمُ شَ كِسِ
1 عَلَتَلَ مَن نَشَ مَسٍنيِ ندٍ تِ عَننَبِ يٍرٍ مِ بّ فٍيلِ تّتّ كُي؛
2 «عَلَتَلَ شَ مَسٍنيِ نَن يَ،
نَشَن قٍ بِرِن نَبَمَ،
نَشَن قٍ بِرِن نَفِرِ مَ،
نَشَن شِلِ عَلَتَلَ.
3 ﭑ مَشَندِ عَلَكٌ ﭑ شَ عِ يَابِ.
ﭑ قٍ شُنفبٍيٍ مَسٍنمَ نّ عِ بّ،
قٍ نْشُنشِيٍ عِ مُ نَشٍيٍ كٌلٌن.
4 عِسِرَيِلَ مَرِفِ عَلَتَلَ بَرَ عَ مَسٍن يِ تَا بَنشِيٍ شَ قٍ رَ،
عَ نُن يُدَيَ مَنفّ شَ بَنشِيٍ شَ قٍ رَ،
عٍ بِرِن قَمَ نّ بِرَدٍ عَلَكٌ مِشِيٍ شَ عٍ يّتّ رَتَنفَ يَشُييٍ مَ،
نَشٍيٍ تٍمَ تَا تّتّ قَرِ سَنتِدّفّمَ رَ.
5 فٍرٍ نَ مِنِ كَلِدِكَيٍ شْنيِ،
نَ بَنشِيٍ قَمَ نّ رَقٍدٍ بِنبِيٍ رَ،
عَلَتَلَ نَشٍيٍ قَشَمَ عَ شَ شْنّ كُي.
ﭑ نَ ﭑ يَ نْشُنمَ نّ يِ تَا مَ عٍ شَ وَلِ كٌبِ شَ قٍ رَ.
6 كْنْ ﭑ قَمَ نّ يَلَنيِ قِدٍ عَ مَ،
عَلَكٌ عٍ شَ لُ بْحّسَ نُن هّيرِ كُي.
7 ﭑ يُدَيَكَيٍ نُن عِسِرَيِلَكَيٍ رَ مِنِمَ نّ كٌنيِيَ كُي،
عٍ مَن شَ سَبَتِ بٍ عَلْ سِنفٍ.
8 ﭑ عٍ رَ سّنِيّنمَ نّ عٍ شَ كّوَلِ كٌبِ بِرِن مَ،
عٍ نَشَن نَبَشِ ﭑ نَ.
ﭑ عٍ شَ يُنُبِيٍ شَقَرِ مَ نّ،
عٍ نَشَن نَبَشِ ﭑ نَ عٍ شَ مَتَندِ كُي.
9 ﭑ سّيوَ مَ نّ يِ تَا شَ قٍ رَ.
سِ بِرِن قَمَ نّ ﭑ مَتْشْدٍ، عٍ ﭑ بِنيَ هّيرِ شَ قٍ رَ،
ﭑ قَمَ نَشَن نَبَدٍ عِسِرَيِلَكَيٍ بّ.
دُنِحَ نَ عَ تٌ ﭑ نَشَن نَبَمَ بٍكَيٍ بّ،
عٍ دّ عِشَرَ مَ نّ، عٍ كَابَ.»
10 عَلَتَلَ شَ مَسٍنيِ نَن يَ؛
«وٌ عَ قَلَمَ عَ بٍ بَرَ قِندِ فبَلٌي يِرٍ رَ،
عَدَ مَدِ مُ نَ، سُبٍ مُ نَ.
كْنْ مِشِ شُي مَن قَمَ نّ رَ مّدٍ يُدَيَ تَايٍ كُي،
عَ نُن دَرِ سَلَمُ شَ كِرَيٍ شْن مَ.
11 حّلّشِن سِفِ سَمَ نّ،
فِنّ دْشْي شُلُنيِ رَبَ،
تَنتُي قَن رَ سِفَ مَنفّ عَلَتَلَ مَ،
بَرِ مَ عَلَتَلَ قَن، عَ شَ هِننّ مُ كَنَمَ عَبَدَن.
مِشِ بّيتِ بَمَ نّ نَشٍيٍ تَنتُي سّرّشّيٍ شَنِنمَ عَلَتَلَ شَ هْرْ مْبَنشِ كُي.
ﭑ عِسِرَيِلَكَيٍ رَ مِنِمَ نّ كٌنيِيَ كُي،
عٍ شَ سَبَتِ بٍ عَلْ سِنفٍ.
عَلَتَلَ شَ مَسٍنيِ نَن نَ كِ.»
12 مَنفّ عَلَتَلَ شَ مَسٍنيِ نَن يَ؛
«يَكْسِ عَدَ مَدِ نُن سُبٍ يٌ مُ نَ يِ تَا كَنَشِ كُي،
كْنْ ﭑ مَن قَمَ نّ عَ نِيَدٍ فْورّ شَ وُيَ بٍ،
شُرُ سٍ مَكَنتَمَيٍ شَ لُ عٍ قّ مَ.
13 تَا نَشٍيٍ نَ فٍيَيٍ قَرِ،
نَشٍيٍ نَ سٍقٍلَ بْشِ مَ نُن نٍفٍوِ فبٍنفبٍرٍنيِ مَ،
نَشٍيٍ نَ بُنيَمِن بْنسْي شَ بْشِ مَ نُن دَرِ سَلَمُ رَبِلِنيِ،
نَشٍيٍ نَ يُدَيَ بْشِ مَ،
شُرُ سٍيٍ مَن شَ لُ عٍ بِرِن يِ رَ عٍ كَنتَمَيٍ قّ مَ.
عَلَتَلَ شَ مَسٍنيِ نَن نَ كِ.»
14 عَلَتَلَ شَ مَسٍنيِ نَن يَ؛
«وَشَتِ قَمَ نّ عَ لِدٍ ﭑ مَ مَسٍنيِ قَنيِ كَمَلِمَ تّمُي نَشّ،
ﭑ نَشَن تٌنفٌ عِسِرَيِلَ نُن يُدَيَ بْنسْي بّ.
15 نَ لْشْي ﭑ دَوُدَ شَ دِ ندٍ رَ مِنِمَ نّ،
نَشَن تِنشِنيِ نُن سّرِيّ وَلِ رَبَمَ يِ بْشِ كُي.
16 نَ لْشْي يُدَيَ كِسِمَ نّ،
دَرِ سَلَمُ قَ لُ بْحّسَ كُي.
نَ دِ شِلِ قَلَمَ نّ؛ عَلَتَلَ نَن وٌن مَ تِنشِنيِ رَ.»
17 عَلَتَلَ بَرَ عَ مَسٍن،
«دَوُدَ شَ دِ ندٍ لُمَ نّ عِسِرَيِلَ شَ كِبَنيِ كُي تّمُي بِرِن.
18 ﭑ يَ مُ بَمَ لٍوِكَ سّرّشّدُبّيٍ رَ،
عَلَكٌ عٍ شَ سّرّشّ فَن دَاشِيٍ بَ،
عٍ شَ سُرَيِ فَن سّرّشّ رَ،
عٍ شَ سّرّشّ ندٍ قَن بَ لْشْ يٌ لْشْ.»
19 عَلَتَلَ بَرَ يِ مَسٍنيِ تِ عَننَبِ يٍرٍ مِ بّ؛
20 «عَلَتَلَ بَرَ عَ مَسٍن،
لْشْ يٌ لْشْ ﭑ يَنيِ نُن كْي رَ مِنِمَ.
شَ عَ سَ لِ نُ، نَ يَنيِ نُن كْي رَ مِنِقٍ كَنَمَ،
21 نَ تّمُي ﭑ مَ سَاتّ ﭑ نَشَن تٌنفٌ ﭑ مَ كٌنيِ دَوُدَ بّ،
نَ قَن كَنَمَ نّ،
عَ لِمَ دَوُدَ شَ دِ ندٍ مُ لُمَ عَ شَ كِبَنيِ كُي،
لٍوِكَ سّرّشّدُبّيٍ قَن مُ لُمَ ﭑ مَ وَلِ رَبَ رَ.
22 ﭑ عَ رَفِرِ مَ نّ ﭑ مَ كٌنيِ دَوُدَ شَ دِيٍ نُن لٍوِكَ سّرّشّدُبّيٍ مَ،
عٍ وُيَ عَلْ تُنبُي نَشٍيٍ نَ كٌورٍ مَ،
عَلْ مّيّنيِ نَشَن نَ بَا دّ رَ.»
23 عَلَتَلَ بَرَ يِ مَسٍنيِ تِ عَننَبِ يٍرٍ مِ بّ؛
24 «عِ مُ عَ مّشِ مِشِيٍ نَشَن قَلَمَ؟
عٍ نَشّ عَ عَلَتَلَ بَرَ عَ شَ حَمَ سُفَندِشِ قِرِنيِ رَبّحِن.
عٍ بَرَ يٌ ﭑ مَ حَمَ مَ نَ وْيّنيِ رَ،
عٍ مَحْشُنشِ نّ عَ ﭑ مَ حَمَ مُ قِندِشِ سِ رَ سْنْن.»
25 عَلَتَلَ بَرَ عَ مَسٍن،
«عَلْ ﭑ سَاتّ تٌنفٌشِ يَنيِ نُن كْي رَ مِنِقٍ رَ كِ نَشّ،
عَلْ ﭑ سَاتّ تٌنفٌشِ كٌورٍ نُن بْشِ رَحّرّقٍ رَ كِ نَشّ،
26 ﭑ مَن سَاتّ تٌنفٌشِ نَ كِ نّ مّينِقٍ رَ يَشُبَ بْنسْي مَ.
نَ مُ كَنَمَ قٍوٌ.
ﭑ مَ كٌنيِ دَوُدَ شَ دِ ندٍ لُمَ نّ عِبُرَهِمَ، عِسِيَفَ، نُن يَشُبَ بْنسْي شُن نَ عَبَدَن.
ﭑ عٍ رَ مِنِمَ نّ كٌنيِيَ كُي،
ﭑ كِنِكِنِمَ نّ عٍ مَ.»