35
رٍكَبُ بْنسْي
1 عَلَتَلَ نَشَ يِ مَسٍنيِ تِ عَننَبِ يٍرٍ مِ بّ يٌسِيَ شَ دِ يٍهٌيَكِمِ، يُدَيَ مَنفّ شَ وَشَتِ.
2 «عِ شَ سِفَ رٍكَبُ بْنسْي شِلِدٍ، عٍ شَ قَ عَلَتَلَ شَ هْرْ مْبَنشِ. عٍ نَ مّننِ لِ، عِ شَ عٍ رَ سٌ كٌنكٌي ندٍ كُي، عِ شَ وّنِ سٌ عٍ يِ رَ.»
3 ﭑ نَشَ سِفَ يٍرٍ مِ شَ دِ يَاسَنِيَ تٌنفٌدٍ، شَبَسِنِيَ شَ مَمَدِ، عَ نُن عَ شُنيَ شّمّمَيٍ نُن عَ شَ دِ شّمّمَيٍ. نٍيٍ قِندِشِ رٍكَبُ بْنسْي نَن نَ.
4 ﭑ نَشَ عٍ شَنِن عَلَتَلَ شَ بَنشِ، يِفِدَلِيَ شَ دِ هَنَن شَ كٌنكٌي كُي. هَنَن قِندِشِ عَلَ شَ كٌنيِ نَن نَ. عَ شَ كٌنكٌي نُ نَ كُنتِفِيٍ شَ كٌنكٌي نَن سّيتِ مَ. نَ كٌنكٌي نُ دْشْشِ سَلَمُ شَ دِ مَاسٍيَ شَ كٌنكٌي نَن قَرِ، نَشَن قِندِشِ نَادّ كَنتَمَ رَ.
5 ﭑ نَشَ وّنِ سٌ رٍكَبُ بْنسْي شَ مِشِيٍ يِ رَ، ﭑ قَ عَ قَلَ عٍ بّ عٍ شَ عَ مِن.
6 كْنْ عٍ نَشَ ﭑ يَابِ، «مُشُ تَن مُ وّنِ مِنمَ، بَرِ مَ مُشُ بَبَ يٌنَدَبٌ، مُشُ بٍنبَ رٍكَبُ شَ دِ، عَ بَرَ مُشُ يَمَرِ، ‹وٌ نَشَ وّنِ مِن، وٌ تَن نُن وٌ شَ دِيٍ.
7 وٌ نَشَ بَنشِ تِ، وٌ نَشَ سَنسِ سِ، وٌ نَشَ وّنِ بِلِ سِ. نَ سٍسٍ نَشَ لُ وٌ يِ رَ. عَ لَنمَ وٌ شَ لُ كِرِ بَنشِيٍ نَن كُي وٌ شَ دُنِحّءِفِرِ بِرِن كُي، عَلَكٌ وٌ شَ بُ يِ بْشِ مَ وٌ قَشِ دّننَشّ.›
8 مُشُ بَرَ بِرَ رٍكَبُ شَ دِ يٌنَدَبٌ شُي بِرِن قْشْ رَ، نَشَن قِندِشِ مُشُ بَبَ رَ. مُشُ تَن مُ وّنِ مِنمَ مُشُ شَ دُنِحّءِفِرِ كُي، مُشُ نُن مُشُ شَ فِنّيٍ نُن مُشُ شَ دِيٍ.
9 بَنشِ يٌ، وّنِ بِلِ يٌ، شّ يٌ، دَاشَيٍ يٌ، نَ سٍسٍ مُ نَ مُشُ يِ رَ.
10 مُشُ تَن لُمَ كِرِ بَنشِيٍ نَن بُن مَ، عَلْ مُشُ بَبَ يٌنَدَبٌ مُشُ يَمَرِشِ كِ نَشّ.
11 بَبِلْن مَنفّ نٍبُكَدَنسَرِ تٌ فٍرٍ سٌ عِسِرَيِلَ، مُشُ نَشَ عَ قَلَ، ‹وٌن شّي دَرِ سَلَمُ، وٌن شَ وٌن مَكُيَ كَلِدِكَيٍ نُن سِرِيَكَيٍ شَ سْورِيٍ رَ.› نَ نَن عَ رَ مُشُ نَشَ قَ سَبَتِ دَرِ سَلَمُ.»
12 نَ تّمُي عَلَتَلَ نَشَ يِ مَسٍنيِ تِ عَننَبِ يٍرٍ مِ بّ،
13 «عِسِرَيِلَ مَرِفِ عَلَتَلَ نَشَ عَ مَسٍن، سِفَ، عَ قَلَ يُدَيَكَيٍ نُن دَرِ سَلَمُكَيٍ بّ، ‹وٌ مُ قَهَامُي سْتْ يِ مَسٍنيِ كُي؟ وٌ مُ ﭑ مَ سّرِيّ رَبَتُمَ؟ عَلَتَلَ شَ مَسٍنيِ نَن نَ كِ.
14 رٍكَبُ شَ دِ يٌنَدَبٌ تٌ عَ شَ دِيٍ يَمَرِ عٍ نَشَ وّنِ مِن، عٍ مُ عَ مِنشِ هَن تٌ، عٍ بَرَ عٍ بَبَ شَ يَامَرِ رَبَتُ. ﭑ تَن بَرَ وْيّن وٌ بّ سَنيَ وُيَشِ، كْنْ وٌ مُ ﭑ شُي سُشُ.
15 ﭑ بَرَ ﭑ مَ كٌنيِ نَمِحْنمّيٍ شّي وٌ يِرٍ سَنيَ وُيَشِ عَ قَلَقٍ رَ وٌ بّ، وٌ شَ فبِلٍن وٌ شَ كِرَ حَاشِ قْشْ رَ، وٌ شَ تُوبِ، وٌ نَشَ عَلَ فبّتّيٍ بَتُ، عَلَكٌ وٌ شَ نْ لُدٍ يِ بْشِ كُي ﭑ نَشَن قِشِ وٌ مَ نُن وٌ بَبَيٍ مَ. كْنْ وٌ مُ وٌ تُلِ مَتِشِ ﭑ نَ، وٌ مُ ﭑ شُي رَبَتُشِ.
16 رٍكَبُ شَ دِ يٌنَدَبٌ شَ دِيٍ بِرَشِ عٍ بَبَ شَ سّرِيّ نَن قْشْ رَ، كْنْ يِ حَمَ بَرَ ﭑ تَن مَتَندِ.
17 نَ نَن عَ رَ عِسِرَيِلَ مَرِفِ عَلَتَلَ بَرَ عَ مَسٍن، ﭑ قَمَ نّ فبَلٌي رَ يُدَيَ نُن دَرِ سَلَمُكَ بِرِن مَ عَلْ ﭑ عَ مَسٍنشِ كِ نَشّ، بَرِ مَ ﭑ نُ بَرَ وْيّن، كْنْ عٍ مُ ﭑ شُي سُشُ، ﭑ نُ بَرَ عٍ شِلِ، كْنْ عٍ مُ ﭑ مَ شِلِ رَتِن.›»
18 عَننَبِ يٍرٍ مِ نَشَ عَ مَسٍن رٍكَبُ بْنسْي بّ، «عِسِرَيِلَ مَرِفِ عَلَتَلَ شَ مَسٍنيِ نَن يَ؛ وٌ تٌ وٌ بَبَ يٌنَدَبٌ شَ يَامَرِ سُشُ، وٌ تٌ بِرَ عَ شَ سّرِيّ بِرِن قْشْ رَ،
19 رٍكَبُ شَ دِ يٌنَدَبٌ شَ دِيٍ مُ فَنمَ عَ رَ عَبَدَن. عِسِرَيِلَ مَرِفِ عَلَتَلَ شَ مَسٍنيِ نَن نَ كِ.»