3
عِسِرَيِلَ مَنفّ يٌرَ مِ
عَكَبُ شَ دِ شّمّ يٌرَ مِ نَشَ تِ مَنفّ رَ عِسِرَيِلَ بْشِ مَ سَمَرِ، يُدَيَ مَنفّ يٍهٌسَقَتِ شَ مَنفّيَ حّ قُ نُن سٌلٌمَسَشَن ندٍ رَ. عَ مَنفّيَ حّ قُ نُن قِرِن نَن نَبَ. عَ نَشَ قٍ رَبَ نَشَن مُ رَقَن عَلَتَلَ مَ، كْنْ عَ شَ يُنُبِ رَبَشِ مُ لُ عَلْ عَ بَبَ نُن عَ نفَ نَشَن نَبَ. يٌرَ مِ تَن نَشَ بَلِ كُيٍ رَبِرَ، عَ بَبَ نَشَن تِ. كْنْ عَ نَشَ بِرَ نٍبَتِ شَ دِ يٍرٌبٌوَ مِ شَ يُنُبِ مْولِ قْشْ رَ، نَشَن عَ نِيَ عِسِرَيِلَ حَمَ شَ يُنُبِ رَبَ. عَ مُ تِن عَ مَكُيَدٍ نَ قٍ مْولِ رَ.
عِسِرَيِلَكَيٍ نُن مٌوَبَكَيٍ فٍرٍقٍ
مٌوَبَ مَنفّ مٍسَ نُ شُرُ سٍ نَن دّ مَدٌنمَ. عَ نُ دُوتِ قِمَ نّ عِسِرَيِلَ مَنفّ مَ يّشّي يْرّ وُلُ كّمّ نُن يّشّي كٌنتٌنيِ وُلُ كّمّ رَ، عٍ شَبٍيٍ سَشِ نَ نَن قَرِ. عِسِرَيِلَ مَنفّ عَكَبُ قَشَ شَنبِ، مٌوَبَ مَنفّ نَشَ مُرُتَ عِسِرَيِلَ مَنفّ شِلِ مَ. نَ كُي مَنفّ يٌرَ مِ نَشَ مِنِ سَمَرِ تَا كُي، عَ سَ عَ شَ سْورِيٍ شُن مَتٌ عَ رَ عِسِرَيِلَ بْشِ بِرِن مَ.
عَ تٌ عَ رّدِ مٌوَبَ فٍرٍقٍ مَ، عَ نَشَ شّيرَ شّي يُدَيَ مَنفّ يٍهٌسَقَتِ مَ، عَ قَلَقٍ رَ، «مٌوَبَ مَنفّ بَرَ مُرُتَ ﭑ شِلِ مَ، عِ تِنمَ ﭑ مَلِدٍ عَ فٍرٍدٍ؟» يٍهٌسَقَتِ نَشَ عَ يَابِ، «وٌن بِرِن نَن تٍمَ مٌوَبَكَيٍ فٍرٍدٍ. ﭑ مَ حَمَ، عِ شَ حَمَ نَن عَ رَ، ﭑ مَ سٌييٍ، عِ شَ سٌييٍ نَن عٍ رَ.» عَ مَن نَشَ عَ مَشْرِن، «وٌن تٍمَ كِرَ مُندُن نَ؟» يٍهٌسَقَتِ نَشَ عَ يَابِ، «وٌن تٍمَ عٍدٌن فبٍنفبٍرٍن يِرٍ نَن نَ.» عِسِرَيِلَ مَنفّ، يُدَيَ مَنفّ، نُن عٍدٌن مَنفّ تٌ عٍ حّرّ شِ سٌلٌقٍرٍ، يٍ مِن دَاشِ نَشَ حْن عٍ شَ سْورِيٍ نُن عٍ شَ شُرُ سٍيٍ يِ رَ. 10 نَ كُي عِسِرَيِلَ مَنفّ نَشَ عَ قَلَ، «عَلَتَلَ بَرَ وَ وٌن تَن مَنفّ سَشَنيِيٍ سَقٍ مٌوَبَكَيٍ بّلّشّ عِ.»
11 كْنْ يٍهٌسَقَتِ نَشَ عٍ مَشْرِن، «عَلَتَلَ شَ نَمِحْنمّ يٌ مُ نَ وٌن يَ مَ، نَشَن نْمَ عَلَتَلَ شِلِدٍ وٌن بّ؟» عِسِرَيِلَ مَنفّ شَ مِشِ ندٍ نَشَ عَ يَابِ، «عَننَبِ عٍلِسٍ نَ بٍ، سَقَتِ شَ دِ شّمّ، عَننَبِ عٍلِيَ قْشِرَبِرّ.» 12 يٍهٌسَقَتِ نَشَ عَ قَلَ، «عَلَتَلَ شَ مَسٍنيِ نَ عَ يِ رَ.» عِسِرَيِلَ مَنفّ يٍهٌسَقَتِ نُن عٍدٌن مَنفّ نَشَ فٌرٌ عَ يِرٍ. 13 عَننَبِ عٍلِسٍ نَشَ عَ قَلَ عِسِرَيِلَ مَنفّ بّ، «مُنسٍ نَ وٌن تَن تَفِ؟ سِفَ عِ بَبَ نُن عِ نفَ شَ نَمِحْنمّيٍ يِرٍ.» عِسِرَيِلَ مَنفّ نَشَ عَ يَابِ، «عَدٍ، بَرِ مَ عَلَتَلَ يِ مَنفّ سَشَنيِ شِلِشِ نّ بٍ، عَ شَ قَ عٍ سَ مٌوَبَكَيٍ سَفٌي.»
14 عَننَبِ عٍلِسٍ نَشَ عَ قَلَ عَ بّ، «ﭑ بَرَ ﭑ كَلِ مَنفّ عَلَتَلَ رَ، ﭑ نَشَن بَتُمَ، شَ ﭑ مُ بِنيّ سَشِ يٍهٌسَقَتِ شَ مَ نُ، ﭑ مُ تِنمَ يَتِ عِ شَ تِ ﭑ يَ عِ نُ. 15 وٌ قَ كْرَ بْنبْي ندٍ رَ ﭑ بّ.» عَ تٌ كْرَ بْنبْ قْلْ، عَلَتَلَ نَشَ قَ عٍلِسٍ مَ، 16 عَ عَ قَلَ عَ بّ، «وٌ يِلِ وُيَشِ فٍ يِ فُلُنبَ كُي. 17 عَلَتَلَ يِ نَن مَسٍنشِ، وٌ مُ قٌيٍ تٌمَ، وٌ مُ تُنّ تٌمَ، كْنْ يِ فُلُنبَ بِرِن نَقٍمَ نّ يٍ رَ، وٌ نُن وٌ شَ شُرُ سٍيٍ نَشَن مِنمَ. 18 كْنْ نَ تَن قِندِشِ قٍ شُرِ نَن نَ عَلَتَلَ بّ. نَشَن دَنفِمَ عَ رَ، عَ مٌوَبَكَيٍ سَمَ نّ وٌ سَفٌي. 19 وٌ عٍ شَ تَا كَنتَشِيٍ نُن عٍ شَ تَا شُنفبٍيٍ بِرِن كَنَمَ نّ. وٌ عٍ شَ وُرِ بٌفِلَيٍ بِرِن نَبِرَ مَ نّ. وٌ عٍ شَ يٍ دُلٌنيِيٍ بِرِن دّ سّمَ نّ. وٌ فّمّيٍ رَيٍنسٍنمَ نّ عٍ شَ شّ قَنيِيٍ مَ.» 20 نَ كُي فّيسّفّ سّرّشّ بَ تّمُي، يٍ نَشَ قَ كٍلِ عٍدٌن بِرِ رَ، عَ بْشِ مَكٌتٌ يٍ رَ.
21 مٌوَبَكَيٍ تٌ عَ مّ عَ مَنفّيٍ نَ تٍقٍ عٍ فٍرٍدٍ، عٍ نَشَ مِشِيٍ مَلَن نَشٍيٍ قَتَ فٍرٍ سٌسٍ رَ، عٍ قَ تِ مٌوَبَ نَانِنيِ رَ. 22 عٍ تٌ كٍلِ فّيسّفّ فبٍ، سٌفٍ يَنبّ نُ تِشِ نَ يٍ مَ، عَ قَ لُ مٌوَبَكَيٍ بّ عَلْ فُلُنبَ رَقٍشِ وُلِ نَن نَ. 23 عٍ نَشَ عَ قَلَ، «وُلِ نَن عَ رَ. مَنفّيٍ بَرَ سَنتِدّفّمَ تٌنفٌ عٍ بٌورٍ شِلِ مَ، عٍ عٍ بٌورٍ قَشَ. يَكْسِ، مٌوَبَكَيٍ وٌن شّي، وٌن سَ عٍ شَ سٍيٍ تٌنفٌ.»
24 عٍ تٌ عِسِرَيِلَكَيٍ يٌنكِندٍ لِ، عِسِرَيِلَكَيٍ نَشَ كٍلِ، عٍ عٍ بْنبْ هَن عٍ نَشَ عٍ فِ عٍ يَ رَ. 25 عِسِرَيِلَكَيٍ نَشَ مٌوَبَ تَايٍ كَنَ، عٍ فّمّيٍ بَ نَ تّتّيٍ مَ، عٍ عٍ مَوٌلِ مٌوَبَكَيٍ شَ شّيٍ مَ. عٍ نَشَ يٍ دُلٌنيِيٍ دّ سّ فّمّيٍ رَ، عٍ وُرِ بٌفِلَيٍ بِرِن نَبِرَ.
كِرٍ شَرٍ سٍتِ تَا تّتّ فّمّيٍ نَن تُن نُ قَ لُشِ. لَاتِ كَنيِيٍ نَشَ عَ رَبِلِن، عٍ عَ مَفْنْ. 26 مٌوَبَ مَنفّ تٌ عَ تٌ فٍرٍ سّنبّ بَرَ فبٌ عَ بّ، عَ نَشَ سَنتِدّفّمَ كَنيِ كّمّ سٌلٌقٍرٍ تٌنفٌ، عٍ شَ كِرَ رَبْو سِفَقٍ رَ عٍدٌن مَنفّ يِرٍ، كْنْ عٍ مُ نْ. 27 نَ كُي عَ نَشَ عَ شَ دِ شّمّ سِنفٍ تٌنفٌ، نَشَن نُ لَن عَ شَ تِ مَنفّ رَ عَ حْشْي رَ، عَ عَ بَ سّرّشّ رَ تَا تّتّ قَرِ. نَ تّمُي، شْنّ بٍلٍبٍلٍ نَشَ فٌرٌ عِسِرَيِلَكَيٍ مَ، عٍ قَ عٍ مَكُيَ مٌوَبَ مَنفّ رَ، عٍ فبِلٍن عٍ شَ بْشِ مَ.