17
عِسَ عَ قْشِرَبِرّيٍ رَ سِقٍ
مَتِيُ ١٨؛٦ ٬ ٧،١٥،٢١ ٬ ٢٢، ١٧؛٢٠، مَرَكِ ٩؛٤٢، ١١؛٢٢ ٬ ٢٣
1 عِسَ نَشَ عَ قَلَ عَ قْشِرَبِرّيٍ بّ، «مَرَتَنتَنيِ قَقٍ مُ كَنَمَ، كْنْ حَشَنكَتّ نَ مِشِ بّ نَشَن قِندِ مَ نَ سَابُي رَ.
2 عَ قِسَ نَ كَنيِ بّ فّمّ بِنيٍ شَ شِرِ عَ كْنيِ رَ، عَ رَ سِن بَا مَ، بٍيمَنُن عَ شَ يِ مِشِ شُرِ كٍرٍن نَتَنتَن.
3 وٌ مّينِ وٌ يّتّ مَ دٍ!»
«شَ عِ نفَشَكٍرٍنيِ بَرَ هَاكّ سْتْ عِ رَ، وْيّن عَ بّ. شَ عَ تُوبِ، عِ شَ دِحّ عَ مَ.
4 شَ عَ هَاكّ سْتْ عِ مَبِرِ سَنمَيَ سٌلٌقٍرٍ لْشْي كٍرٍن بُن، عَ تُوبِشِ مَن فبِلٍن عِ مَدِحّدٍ سَنمَيَ سٌلٌقٍرٍ، قٌ عِ شَ دِحّ عَ مَ.»
5 شّيرَيٍ نَشَ عَ قَلَ مَرِفِ بّ، «مُشُ شَ دَنشَنِيَ شُن مَسَ!»
6 مَرِفِ نَشَ عٍ يَابِ، «شَ دَنشَنِيَ نَ وٌ بّ نُ، هَلِ عَ شُرُن عَلْ يّنتّن شْرِ، وٌ نْمَ نّ عَ قَلَدٍ يِ كٌندٍ بِلِ بّ، ‹تَلَ بٍ، عِ سَ سِن بَا مَ،› عَ وٌ شُي رَبَتُمَ نّ.»
7 «شَ عَ سَ لِ كٌنيِ نَ مِشِ ندٍ يِ وٌ تَفِ، نَ كٌنيِ نَ كٍلِ يِرٍ بُشَدٍ شَ نَ مُ شُرُ سٍيٍ دّ مَدٌندٍ، عَ كَنيِ نْمَ عَ قَلَدٍ عَ بّ كٍرٍن نَ، ‹قَ، عِ قَ عِ مَفٌرٌ، عِ عِ دّفٍ›؟
8 عَدٍ، وٌ عَ قَلَمَ عَ بّ، ‹ﭑ مَ دٌنسٍ رَقَلَ. عِ شَ عِ شَ دٌنمَ مَسَرَ عَلَكٌ عِ شَ قَ دٌنسٍ نُن يٍ رَ ﭑ بّ. عِ نَ فّ نَ رَ، عِ قَن نْمَ عِ دّفٍدٍ.›
9 مِشِ مُ عَ شَ كٌنيِ تَنتُمَ يَامَرِ رَبَتُقٍ مَ.
10 وٌ تَن قَن، وٌ نَ فّ قٍ بِرِن نَبَدٍ وٌ يَمَرِشِ نَشَن نَ، وٌ شَ عَ قَلَ نّ، ‹كٌنيِ نَن تُن نَ مُشُ رَ. مُشُ مُشُ شَ وَلِ فبَنسَن نَن نَبَشِ.›»
عِسَ كُنّ كَنيِ قُ رَيَلَنقٍ
11 عِسَ تٌ نُ دَرِ سَلَمُ كِرَ شْن، عَ نَشَ دَنفِ سَمَرِ نُن فَلِلٍ بْشِ تَفِ.
12 عَ تٌ سٌ تَا ندٍ كُي، كُنّ كَنيِ قُ نَشَ قَ عَ شْن. عٍ نَشَ سَ تِ عٍ ندٍدِ مَكُيَشِ عَ رَ،
13 عٍ عٍ شُي عِتٍ عَ بّ، «كَرَ مْشْ عِسَ، كِنِكِنِ مُشُ مَ!»
14 عَ تٌ عٍ تٌ، عَ نَشَ عَ قَلَ عٍ بّ، «وٌ سِفَ، وٌ سَ وٌ يّتّ مَسٍن سّرّشّدُبّيٍ بّ.» نَ كُي، عٍ نُ سِفَقٍ تّمُي نَشّ، عٍ نَشَ يَلَن.
15 نَ تّمُي، مِشِ كٍرٍن عٍ يَ مَ، عَ تٌ عَ تٌ عَ يَلَنشِ، عَ نَشَ فبِلٍن عَلَ مَتْشْ رَ عَ شُي عِتٍشِ رَ.
16 عَ نَشَ سُيِدِ عِسَ بّ، عَ عَ تَنتُ. سَمَرِكَ نَن نُ عَ رَ.
17 عِسَ نَشَ عَ قَلَ عَ بّ، «مِشِ قُ شَ مُ رَيَلَن؟ نَ سٌلٌمَنَانِيٍ تَن فٌ؟
18 مِشِ يٌ مُ فبِلٍن عَلَ تَنتُدٍ قٌ يِ سَمَرِكَ؟»
19 عِسَ نَشَ عَ قَلَ عَ بّ، «كٍلِ، عِ سِفَ. عِ شَ دَنشَنِيَ بَرَ عِ رَكِسِ.»
عَلَ شَ مَنفّيَ نِينِ نُن عِسَ شَ فبِلٍنيِ
مَتِيُ ٢٤؛٢٣ ٬ ٢٨،٣٧ ٬ ٤١، مَرَكِ ١٣؛٢١ ٬ ٢٢، ١٥—١٦
20 قَرِ سّنِيٍ تٌ عِسَ مَشْرِن، عَ عَلَ شَ مَنفّيَ نِينِ قَمَ مُن تّمُي، عَ نَشَ عٍ يَابِ، «مِشِ مُ عَلَ شَ مَنفّيَ نِينِ قَ تّمُي كٌلٌنمَ.
21 مِشِيٍ مُ عَ قَلَمَ شّ دٍ، ‹عَ مَتٌ، عَ تَن نَن يَ،› شَ نَ مُ عَ رَ، ‹عَ تَن نَن سَ نَ كِ›، بَرِ مَ عَلَ شَ مَنفّيَ نِينِ نَ وٌ يَ مَ نّ.»
22 نَ تّمُي، عِسَ نَشَ عَ قَلَ عَ قْشِرَبِرّيٍ بّ، «وَشَتِ قَمَ نّ، عَدَ مَ شَ دِ تٌ شْلِ وٌ سُشُمَ نّ، عَ شَ لُ وٌ يَ مَ هَلِ لْشْ كٍرٍن ثٍتِ، كْنْ وٌ مُ عَ تٌمَ.
23 مِشِيٍ عَ قَلَمَ نّ وٌ بّ، ‹عَ مَتٌ، عَ تَن نَن سَ نَ كِ،› شَ نَ مُ عَ رَ، ‹عَ تَن نَن يِ كِ!› وٌ نَشَ وٌ فِ نَ مَتٌدٍ، وٌ نَشَ بِرَ نٍيٍ قْشْ رَ.
24 عَ قَ لْشْي، عَدَ مَ شَ دِ لُمَ نّ عَلْ سٍيَمَكْنيِ نَشَن مِنِمَ، كُيٍ بِرِن يَنبَ.
25 كْنْ بٍينُن نَ لْشْي شَ عَ لِ، قٌ عَ شَ تْورّ فبٍفبٍ سْتْ. تٌ مِشِيٍ مُ لَمَ عَ رَ.
26 عَدَ مَ شَ دِ قَ لْشْي لُمَ نّ عَلْ عَننَبِ نُهَ شَ وَشَتِ.
27 مِشِيٍ نُ عٍ دّفٍمَ، عٍ نُ عٍ مِنمَ، عٍ نُ فِنّيٍ دْشْمَ، عٍ نُ عٍ شَ دِيٍ قِمَ شّمّيٍ مَ، هَن عَننَبِ نُهَ سٌ كُنكُي كُي لْشْ نَشّ. بَنبَرَنيِ بٍلٍبٍلٍ تٌ دِن بْشِ مَ، عٍ بِرِن نَشَ سْنتْ.
28 نَ نَن مَن نَبَ لٌتِ شَ وَشَتِ. مِشِيٍ نُ عٍ دّفٍمَ، عٍ نُ عٍ مِنمَ، عٍ نُ سَرٍ مَتِمَ، عٍ نُ سَنسِ سِمَ، عٍ نُ بَنشِيٍ تِمَ.
29 كْنْ لٌتِ كٍلِ سٌدٌ مَ لْشْ نَشّ، تّ نُن سٌودَ يٍ نُ فٌرٌ مَ نّ كٍلِقٍ كٌورٍ مَ عَلْ تُنّ، بِرِن نَشَ سْنتْ.
30 عَ مَن سَ رَبَمَ نَ كِ نّ عَدَ مَ شَ دِ نَ مَكّنّن لْشْ نَشّ.»
31 «نَ لْشْي، نَشَن نَ تَندٍ، عَ نَشَ سٌ عَ هَرِفٍ تٌنفٌدٍ بَنشِ كُي. نَشَن نَ شّ مَ، عَ قَن نَشَ فبِلٍن عَ شْنيِ.
32 وٌ شَ رَتُ نّ لٌتِ شَ فِنّ مَ.
33 مِشِ يٌ كَتَقٍ عَ يّتّ رَتَنفَدٍ، نَ كَنيِ لْيمَ نّ، كْنْ مِشِ يٌ عَ يّتّ رَلْيمَ، نَ كَنيِ رَتَنفَمَ نّ.
34 ﭑ شَ عَ قَلَ وٌ بّ، نَ تّمُي مَ، شَ مِشِ قِرِن سَشِ سَدٍ كٍرٍن مَ كْي رَ، مِشِ كٍرٍن تٌنفٌمَ نّ، بٌورٍ لُ نَا.
35-36 شَ فِنّ قِرِن نَ سٍ دِنقٍ مُلُنيِ كٍرٍن كُي، كٍرٍن تٌنفٌمَ نّ، بٌورٍ لُ نَا.»
37 عٍ نَشَ عَ مَشْرِن، «مَرِفِ، نَ رَبَمَ مِندٍن؟» عَ نَشَ عٍ يَابِ، «بِنبِ نَ لُ دّننَشّ، يُبّيٍ سَ عٍ مَلَنمَ مّننِ نّ.»