2
عِسَ بَرِ كِ نَشّ
مَتِيُ ١؛١٨ ٬ ٢٥
1 نَ تّمُي، رْ مَ مَنفّ شُنفبٍ عٌفُسُتُ نَشَ يَامَرِ قِ دُنِحَ بِرِن شَ شِلِ سّبّ رَبَ.
2 يِ شِلِ سّبّ سِنفٍ رَبَ تّمُي نَشّ، كِرِنيُسِ نَن نُ قِندِشِ سِرِيَ فٌمِنَ رَ.
3 بِرِن نَشَ سِفَ عَ بَرِ تَا عَ شِلِ سّبّدٍ.
4 يُسُقُ قَن نَشَ كٍلِ نَسَرّتِ، تَا نَشَن نَ فَلِلٍ بْشِ مَ، سِفَقٍ رَ بّتّلّيمُ، مَنفّ دَوُدَ بَرِدٍ نَشَن نَ يُدَيَ بْشِ مَ. يُسُقُ سِفَ نَا نّ، بَرِ مَ عَ نُ كٍلِشِ دَوُدَ بْنسْي نُن عَ شَبِلّ نَن كُي،
5 عَ سِفَ عَ شَ سَ عَ شِلِ سّبّ، عٍ نُن مَرِيَمَ، عَ نُ بَرَ نَشَن شَ كٌتٍ دْشْ. مَرِيَمَ تّيفّشِ نَن نُ عَ رَ.
6 عٍ نُ نَ مّننِ تّمُي نَشّ، مَرِيَمَ دِ سْتْ تّمُي نَشَ عَ لِ،
7 عَ قَ عَ شَ دِ سِنفٍ بَرِ، دِ شّمّ. عَ نَشَ عَ مَقِلِن دُفِ كُي، عَ عَ سَ شُرُ سٍ دّفٍدٍ كُي، بَرِ مَ يِفِيَ قَنيِ مُ نُ نَ عٍ بّ.
مَلٍكّ شَ مَسٍنيِ شُرُ سٍ دّ مَدٌنيِيٍ بّ
8 مّننِ شُرُ سٍ دّ مَدٌنيِ ندٍيٍ نُ نَ وُلَ عِ، شُرُ سٍيٍ كَنتَدٍ كْي رَ.
9 مَرِفِ شَ مَلٍكّ ندٍ نَشَ مِنِ عٍ مَ، عٍ نَشَ مَرِفِ شَ نْرّ تٌ يَنبَ رَ عٍ رَبِلِنيِ. عٍ نَشَ فَاشُ كِ قَنيِ رَ.
10 مَلٍكّ نَشَ عَ مَسٍن عٍ بّ، «وٌ نَشَ فَاشُ بَرِ مَ ﭑ قَشِ شِبَارُ قَنيِ نَن مَسٍندٍ وٌ بّ، نَشَن قِندِ مَ سّيوّ شُنفبٍ رَ حَمَ بِرِن بّ.
11 تٌ، وٌ رَكِسِمَ، عَلَ شَ مِشِ سُفَندِشِ، عَ بَرَ بَرِ دَوُدَ شَ تَا كُي. وٌ مَرِفِ نَن عَ رَ.
12 وٌ عَ كٌلٌنمَ يِ تْنشُمَ نَن نَ، وٌ دِيْرّ لِمَ عَ مَقِلِنشِ دُفِ كُي، عَ مَن سَشِ شُرُ سٍ دّفٍدٍ كُي.»
13 مَلٍكّ فّ وْيّندٍ تَن مُ عَ رَ، مَلٍكّ فَلِ نَشَ قَ بٌورٍ قّ مَ. عٍ نُ عَلَ مَتْشْقٍ، عٍ نُ عَ قَلَ،
14 «مَتْشْي نَ عَلَ بّ هَن كٌورٍ مَ! بْحّسَ نَ عَدَ مَدِيٍ بّ دُنِحَ مَ، عَ هِننّشِ نَشٍيٍ رَ!»
15 مَلٍكّيٍ تٌ كٍلِ عٍ شُن مَ تٍقٍ رَ كٌورٍ مَ، شُرُ سٍ دّ مَدٌنيِيٍ نَشَ عَ قَلَ عٍ بٌرٍ بّ، «وٌن شّي بّتّلّيمُ، وٌن شَ سَ يِ قٍ مَتٌ نَشَن نَبَشِ نَا، مَرِفِ بَرَ نَشَن مَسٍن وٌن بّ.»
16 عٍ نَشَ سِفَ عٍ شُلُن نَ، عٍ مَرِيَمَ نُن يُسُقُ لِ، عٍ نُن دِيْرّ، عَ سَشِ شُرُ سٍ دّفٍدٍ كُي.
17 عٍ تٌ نَ تٌ، عٍ نَشَ قٍ بِرِن تَفِ رَبَ، مَلٍكّ نَشَن مَسٍن عٍ بّ نَ دِ شَ قٍ رَ.
18 مِشِ نَشٍيٍ شُرُ سٍ دّ مَدٌنيِيٍ شُي مّ، عٍ بِرِن نَشَ كَابَ عٍ شَ وْيّنيِ مَ.
19 مَرِيَمَ قَن نَشَ يِ قٍ بِرِن نَفَتَ عَ بْحّ مَ، عَ نُ عَ حْشْ سَ عَ شْن.
20 شُرُ سٍ دّ مَدٌنيِيٍ نَشَ فبِلٍن عَلَ مَتْشْ رَ، عٍ نُ عَ تَنتُ قٍ بِرِن مَ عٍ بَرَ نَشٍيٍ مّ، عٍ مَن بَرَ نَشٍيٍ تٌ. عٍ عَ بِرِن لِشِ نّ عَلْ عَ مَسٍن عٍ بّ كِ نَشّ.
21 شِ سٌلٌمَسَشَن تٌ كَمَلِ، دِيْرّ نَشَ سُننَ. عَ شِلِ نَشَ سَ عِسَ، مَلٍكّ نُ بَرَ شِلِ نَشَن مَسٍن عَ نفَ بّ بٍينُن عَ شَ تّيفّ عَ مَ.
عِسَ سِفَقٍ دَرِ سَلَمُ عَ يْرّ رَ
22 مَرَ سّنِيّنيِ وَشَتِ تٌ كَمَلِ عَننَبِ مُنسَ شَ سّرِيّ كِ مَ، يُسُقُ نُن مَرِيَمَ نَشَ عِسَ شَنِن دَرِ سَلَمُ، عَ شَ مَسٍن مَرِفِ بّ،
23 عَلْ عَ سّبّشِ كِ نَشّ مَرِفِ شَ سّرِيّ كُي، «وٌ دِ شّمّ سِنفٍ بِرِن قِمَ ﭑ تَن نَن مَ.»
24 عٍ مَن سِفَ نّ عٍ شَ سَ سّرّشّ بَ عَلْ عَ سّبّشِ مَرِفِ شَ سّرِيّ كُي كِ نَشّ، «فَنبّ قِرِن، شَ نَ مُ عَ رَ كٌلٌكٌندٍ لَنمَ قِرِن.»
25 شّمّ ندٍ نُ نَ دَرِ سَلَمُ، نَشَن شِلِ سِمٍيْن. دِينّلَ تِنشِنشِ نَن نُ عَ رَ، نَشَن نُ عِسِرَيِلَ رَكِسِمَ مَمّقٍ. عَلَ شَشِلِ سّنِيّنشِ نُ نَ عَ شُن مَ.
26 عَلَ شَشِلِ سّنِيّنشِ نُ بَرَ عَ مَسٍن عَ بّ، عَ عَ مُ قَشَمَ قٌ عَ مَرِفِ شَ مِشِ سُفَندِشِ تٌ.
27 عَلَ شَشِلِ سّنِيّنشِ نَشَ عَ نِيَ عَ شَ سِفَ هْرْ مْبَنشِ كُي. عِسَ بَرِ مَيٍ قَن تٌ سٌ نَا عٍ شَ دِ رَ، عَلَكٌ عٍ شَ عَلَ شَ سّرِيّ رَبَتُ عَ شَ قٍ رَ،
28 سِمٍيْن نَشَ عِسَ رَ سُشُ، عَ عَ سَ عَ كَنكٍ مَ. عَ نَشَ عَلَ مَتْشْ، عَ عَ مَسٍن،
29 «مَرِفِ، عِ بَرَ قَ عِ شَ لَايِدِ رَكَمَلِ ﭑ بّ تٌ،
عِ شَ كٌنيِ شَ تَا مَسَرَ بْحّسَ كُي،
30 بَرِ مَ ﭑ يَ بَرَ عِ شَ كِسِ تٌ،
31 عِ نَشَن شّيشِ عَدَ مَدِيٍ بِرِن يَ شْرِ.
32 نَءِيَلَنيِ نَن عَ رَ
نَشَن عَلَ مَكّنّنمَ سِ فبّتّيٍ بّ،
عَ قِندِ نْرّ رَ عِ شَ عِسِرَيِلَ حَمَ بّ.»
33 عِسَ بَبَ نُن عَ نفَ تٌ عَ مّ نَشَن مَسٍنشِ عَ شَ قٍ رَ، عٍ نَشَ كَابَ.
34 سِمٍيْن تٌ دُبَ عٍ بّ، عَ نَشَ عَ قَلَ عِسَ نفَ مَرِيَمَ بّ، «عَلَ بَرَ حَنِفٍ تٌنفٌ يِ دِ شَ قٍ رَ. عِسِرَيِلَكَيٍ شَ قٍ فبٍفبٍ مَفٌرٌ مَ نّ عَ سَابُي رَ، ندٍيٍ قَن شَ قٍ عِتٍمَ نّ. عَ قِندِ مَ تْنشُمَ نَن نَ، كْنْ مِشِ وُيَشِ قَمَ نّ عَ مَتَندِدٍ.
35 نَ كُي، مِشِ فبٍفبٍ بْحّ مَ قٍيٍ قَمَ مَكّنّندٍ. عِ تَن قَن، سُننُنيِ قَمَ عِ بْحّ تُنبَدٍ عَلْ سَنتِدّفّمَ.»
36 نَمِحْنمّ فِنّ قٌرِ قَن نُ نَ، نَشَن شِلِ عَننَ. عَ شَ سِمَيَ نُ بَرَ مَسِفَ كِ قَنيِ. قَنُوٍلِ شَ دِ نَن نُ عَ رَ كٍلِقٍ عَسٍرِ بْنسْي. عَ نُ بَرَ دْشْ شّمّ تَا عَ فِنّدِ مّدِ رَ، كْنْ حّ سٌلٌقٍرٍ دَنفِ شَنبِ، عَ شَ مْرِ نَشَ لَاشِرَ.
37 كَبِ نَ تّمُي، عَ نُ بَرَ لُ كَاحّ كُي هَن عَ شَ سِمَيَ نُ بَرَ حّ تٌنفٌ سٌلٌمَسَشَن نُن نَانِ لِ. عَ مُ نُ كٍلِمَ هْرْ مْبَنشِ كُي، عَ نُ عَلَ بَتُ نَا، كْي نُن يَنيِ، سُنيِ نُن سَلِ رَ.
38 نَ وَشَتِ كٍرٍنيِ، عَننَ نَشَ قَ نَرَلَن عِسَ نُن عَ شَ مِشِيٍ رَ. عَ نَشَ سٌ عَلَ مَتْشْقٍ، عَ نُ قَ يِ دِ شَ قٍ قَلَ بِرِن بّ، نَشٍيٍ نُ عٍ يَ تِشِ عَلَ رَ دَرِ سَلَمُ شُنسَرَقٍ رَ.
39 يُسُقُ نُن مَرِيَمَ تٌ فّ قٍ بِرِن نَكَمَلِدٍ عَلْ مَرِفِ شَ سّرِيّ عَ مَسٍنشِ كِ نَشّ، عٍ نَشَ فبِلٍن نَسَرّتِ، عٍ شْنيِ فَلِلٍ بْشِ مَ.
40 دِ نَشَ مْ، عَ نُ سّنبّ سْتْ، عَ شَ لْننِ شُن نُ سِفَ مَسَ رَ كِ قَنيِ. عَلَ شَ هِننّ نُ نَ عَ شُن مَ.
عِسَ سِفَقٍ دَرِ سَلَمُ عَ دِ مّدِ تّمُي
41 حّ يٌ حّ، عِسَ بَرِ مَيٍ نُ سِفَمَ سَيَمَلٍكّ دَنفِ سَلِ رَبَدٍ دَرِ سَلَمُ.
42 عِسَ حّ قُ نُن قِرِن سْتْ حّ نَشَن نَ، عٍ بِرِن نَشَ تٍ سَلِ رَبَدٍ دَرِ سَلَمُ عَلْ عٍ دَرِشِ عَ رَ كِ نَشّ.
43 سَلِ لْشْييٍ بِرِن تٌ دَنفِ، عِسَ بَرِ مَيٍ نَشَ بِيَاسِ قْلْ فبِلٍنقٍ عٍ شْنيِ، كْنْ عٍ شَ دِ عِسَ نَشَ لُ دَرِ سَلَمُ، عٍ تَن مُ عَ كٌلٌن.
44 عٍ نُ بَرَ عَ مَحْشُن عَ عَ نَ عٍ بِيَاسِبٌورٍيٍ يَ مَ. عٍ تٌ فّ قّيحّن كٍرٍن حّرّ رَبَدٍ، عٍ نُ عَ قٍنقٍ عٍ بَرٍنيِيٍ نُن عٍ بٌورٍيٍ يَ مَ.
45 كْنْ عٍ تٌ مُ عَ تٌ، عٍ نَشَ فبِلٍن دَرِ سَلَمُ عَ قٍندٍ.
46 شِ سَشَن دَنفِ شَنبِ، عٍ نَشَ قَ عَ تٌ هْرْ مْبَنشِ كُي كَرَ مْشْيٍ يَ مَ، عَ عَ تُلِ مَتِقٍ عٍ رَ، عَ نُ مَشْرِنيِ تِقٍ عٍ مَ.
47 نَشَن بِرِن نُ نَ عِسَ شُي مّقٍ، عٍ نُ كَابَمَ عَ شَ شَشِلِ قَنيِ نُن عَ شَ يَابِيٍ مَ.
48 عَ بَرِ مَيٍ تٌ عَ تٌ، عٍ قَن نَشَ كَابَ. عَ نفَ نَشَ عَ قَلَ عَ بّ، «ﭑ مَ دِ، عِ يِ قٍ مْولِ رَبَشِ مُشُ رَ مُنقٍ رَ؟ ﭑ تَن نُن عِ بَبَ كْنتْقِلِشِ نَن عِ قٍنشِ يِ كِ.»
49 عَ نَشَ عَ قَلَ عٍ بّ، «وٌ ﭑ قٍنمَ مُنقٍ رَ؟ وٌ مُ عَ كٌلٌن قٌ ﭑ شَ ﭑ بَبَ شَ وَلِ رَبَ؟»
50 كْنْ عٍ مُ قَهَامُي سْتْ عَ شَ وْيّنيِ مَ.
51 نَ تّمُي، عِسَ نَشَ بِرَ عٍ قْشْ رَ فٌرٌقٍ رَ نَسَرّتِ، عَ نُ عٍ سَفٌ رَبَ. عَ نفَ نَشَ يِ قٍ بِرِن نَفَتَ عَ بْحّ مَ.
52 عِسَ نَشَ مْ لْننِ نُن هِننّ رَ. عَ نَشَ رَقَن عَلَ نُن مِشِيٍ مَ.