22
يُدَ سِ نُن كُنتِفِيٍ شَ لَنيِ
مَتِيُ ٢٦؛١ ٬ ٥،١٤ ٬ ١٦، مَرَكِ ١٤؛١ ٬ ٢،١٠ ٬ ١١
1 تَامِ لّبِنِتَرٍ سَلِ نَشَ مَكْرّ، نَشَن مَن شِلِ قَلَمَ سَيَمَلٍكّ دَنفِ سَلِ.
2 سّرّشّدُبّ كُنتِفِيٍ نُن سّرِيّ كَرَ مْشْيٍ نُ نَ قّيرّ قٍنقٍ عٍ شَ عِسَ سُشُ، عٍ شَ عَ قَشَ، كْنْ عٍ نُ فَاشُشِ حَمَ نَن يَ رَ.
3 نَ تّمُي سٍنتَنّ نَشَ بِرَ عِسَ قْشِرَبِرّ يُدَ سِ عِسِكَرِيٌتِ قْشْ رَ، نَشَن نُ نَ عِسَ شَ شّيرَ قُ نُن قِرِنيِيٍ يَ مَ.
4 عَ تَن يُدَ سِ نَشَ سِفَ سّرّشّدُبّ كُنتِفِيٍ نُن كْسِبِلِ مَنفّيٍ شْن، عٍ نَشَ وْيّن، عَ سَ نْمَ عِسَ سَدٍ عٍ بّلّشّ كِ نَشّ.
5 عٍ قَن نَشَ حّلّشِن كِ قَنيِ رَ، عٍ كْبِرِ لَايِدِ تٌنفٌ عَ بّ.
6 يُدَ سِ نَشَ تِن نَ رَ، عَ سٌ وَشَتِ قٍنقٍ عَ عِسَ سَمَ عٍ بّلّشّ تّمُي نَشّ حَمَ شَنبِ.
سَيَمَلٍكّ دَنفِ سَلِ
مَتِيُ ٢٦؛١٧ ٬ ٣٥، مَرَكِ ١٤؛١٢ ٬ ٣١
7 تَامِ لّبِنِتَرٍ سَلِ نَشَ عَ لِ، يّشّي لَنمَ قَشَمَ لْشْ نَشّ سَيَمَلٍكّ دَنفِ سَلِ شَ قٍ رَ.
8 عِسَ نَشَ ثِيّرِ نُن يَيَ يَمَرِ عَ قَلَقٍ رَ، «وٌ شَ سِفَ سَيَمَلٍكّ دَنفِ سَلِ يِرٍ رَقَلَ وٌن بّ، عَلَكٌ وٌن بِرِن شَ سَيَمَلٍكّ دَنفِ سَلِ دٌنيِ دٌن.»
9 عٍ نَشَ عَ مَشْرِن، «عِ وَ مَ مُشُ شَ سَ عَ رَقَلَ مِندٍن؟»
10 عَ نَشَ عَ مَسٍن عٍ بّ، «وٌ نُ سٌ تَا كُي، وٌ نُن شّمّ ندٍ نَرَلَنمَ، يٍ قّحّ دْشْشِ عَ شُن مَ. وٌ شَ بِرَ عَ قْشْ رَ هَن عَ سَ سٌمَ بَنشِ نَشَن كُي.
11 وٌ شَ عَ قَلَ نَ بَنشِ كَنيِ بّ، ‹كَرَ مْشْ وَ مَ عَ كٌلٌنقٍ عَ نْمَ سَيَمَلٍكّ دَنفِ سَلِ دٌنيِ دٌندٍ دّننَشّ، عَ تَن نُن عَ قْشِرَبِرّيٍ.›
12 عَ قَمَ بَنشِ كُي شُنفبٍ مَسٍندٍ وٌ بّ كٌورٍ رَ، نَ سٍ بِرِن يَءِلَنشِ عَ قَنيِ رَ. وٌ شَ سَيَمَلٍكّ دَنفِ سَلِ دٌنيِ رَقَلَ مّننِ.»
13 عٍ نَشَ سِفَ، عٍ سَ قٍ بِرِن لِ عَلْ عِسَ عَ مَسٍن عٍ بّ كِ نَشّ. عٍ نَشَ سَيَمَلٍكّ دَنفِ سَلِ دٌنيِ رَقَلَ.
مَرِفِ شَ سّرّشّ تْنشُمَ
مَتِيُ ٢٦؛٢٦ ٬ ٣٠، مَرَكِ ١٤؛٢٢ ٬ ٢٦، كٌرِنتِ عِ ١١؛٢٣ ٬ ٢٥
14 وَشَتِ تٌ عَ لِ، عِسَ نَشَ عَ مَفٌرٌ عَ شَ عَ دّفٍ عٍ نُن عَ شَ شّيرَ قُ نُن قِرِنيِيٍ.
15 عَ نَشَ عَ مَسٍن عٍ بّ، «كَبِ تّمُي دَنفِشِ، عَ شْلِ ﭑ مَ كِ قَنيِ وٌن شَ يِ سَيَمَلٍكّ دَنفِ سَلِ دٌنيِ دٌن يِرٍ كٍرٍن بٍينُن ﭑ شَ حَشَنكَتّ سْتْ.
16 بَرِ مَ ﭑ شَ عَ قَلَ وٌ بّ، يِ نَ دَنفِ، ﭑ مُ عَ دٌنمَ سْنْن قٌ عَ كَمَلِ عَلَ شْنيِ عَرِيَننَ.»
17 عَ تٌ تْنبِلِ ندٍ تٌنفٌ، عَ نَشَ تَنتُي رَ سِفَ عَلَ مَ، عَ قَ عَ مَسٍن، «وٌ شَ يِ تْنبِلِ تٌنفٌ، وٌ بِرِن شَ عَ مِن.
18 ﭑ شَ عَ قَلَ وٌ بّ، ﭑ مُ يِ وّنِ مِنمَ قٌ عَلَ شَ مَنفّيَ نِينِ نَ قَ تّمُي نَشّ.»
19 نَ دَنفِ شَنبِ عِسَ نَشَ تَامِ تٌنفٌ. عَ تٌ تَنتُي رَ سِفَ عَلَ مَ، عَ نَشَ تَامِ عِفِرَ، عَ عَ سٌ عَ قْشِرَبِرّيٍ يِ رَ عَ قَلَقٍ رَ، «وٌ ﭑ كٌ، وٌ عَ دٌن. يِ قِندِشِ ﭑ قَتٍ نَن نَ، نَشَن قِشِ وٌ بّ. وٌ شَ رَتُ ﭑ مَ قٍ مَ يِ سَابُي رَ.»
20 نَ مْولِ مَن نَ، عٍ تٌ فّ عٍ دّفٍدٍ، عِسَ نَشَ تْنبِلِ قَن تٌنفٌ، عَ عَ مَسٍن، «ﭑ وُلِ نَن يَ، سَاتّ نّينّ وُلِ نَشَن بَشِ مِشِ فبٍفبٍ بّ.
21 كْنْ ﭑ شَ عَ قَلَ وٌ بّ، يَنقَنتٍ نَشَن ﭑ سَمَ مِشِيٍ بّلّشّ، عَ مَفٌرٌشِ يِ تٍيبِلِ رَ.
22 عَدَ مَ شَ دِ سِفَمَ عَلْ عَلَ عَ رَفِرِشِ كِ نَشّ، كْنْ فبَلٌي نَ شّمّ بّ نَشَن عَدَ مَ شَ دِ يَنقَمَ.»
23 عٍ قَن نَشَ سٌ عٍ بٌرٍ مَشْرِنقٍ، «ندٍ نْمَ نَ مْولِ رَبَدٍ وٌن يَ مَ؟»
نَشَن تِدٍ فبٌ عِسَ قْشِرَبِرّيٍ يَ مَ
مَتِيُ ١٨؛١، ٢٠؛٢٤ ٬ ٢٨، ١٩؛٢٨، مَرَكِ ٩؛٣٤، ١٠؛٤١ ٬ ٤٥
24 وْيّنيِ نَشَ مِنِ عِسَ قْشِرَبِرّيٍ تَفِ عٍ شَ عَ كٌلٌن نَشَن تِدٍ فبٌ عٍ يَ مَ.
25 عِسَ نَشَ عَ مَسٍن عٍ بّ، «حَمَنّ مَنفّيٍ مِشِيٍ يَمَرِ مَ عَ شْرْشْي رَ. عٍ تَن نَشٍيٍ عٍ سّنبّ رَ مِنِمَ مِشِيٍ مَ، عٍ ‹قٍ قَنيِ رَبَيٍ› شِلِ نَن نَتٍمَ عٍ يّتّ شُن.
26 كْنْ وٌ تَن نَشَ لُ نَ كِ. نَشَن تِدٍ فبٌ وٌ يَ مَ، عَ شَ لُ عَلْ وٌ بِرِن شُنيَ. يَرٍرَتِ مَن شَ لُ عَلْ بِرِن مَ وَلِكّ.
27 ندٍ تِدٍ فبٌ، نَشَن عَ مَفٌرٌشِ عَ شَ عَ دّفٍ، كَ نَشَن دٌنيِ رَدَنفِمَ عَ مَ؟ نَشَن مَفٌرٌشِ عَ دّفٍدٍ، نَ نَن تِدٍ فبٌ، كْنْ ﭑ تَن نَ وٌ يَ مَ عَلْ مِشِ نَشَن وَلِمَ وٌ بّ.»
28 «وٌ تَن نَن قِندِشِ ﭑ قْشِرَبِرّيٍ رَ نَشٍيٍ مُ نُ كٍلِ ﭑ شُن ﭑ مَ تْورّ كُي.
29 ﭑ قَن بَرَ مَنفّيَ قِ وٌ مَ، عَلْ ﭑ بَبَ عَلَ عَ قِشِ ﭑ مَ كِ نَشّ.
30 نَ كُي، وٌن بِرِن وٌن دّفٍمَ نّ ﭑ شْنيِ ﭑ مَ مَنفّيَ كُي، وٌ مَن وٌ مَفٌرٌ مَ نّ كِبَنيِيٍ مَ، وٌ عِسِرَيِلَ بْنسْي قُ نُن قِرِن مَكِيتِ.»
عِسَ عَ قَلَقٍ ثِيّرِ بّ عَ عَ يّتّ رَ سَنمَ نّ عَ مَ
مَتِيُ ٢٦؛٣١ ٬ ٣٥، مَرَكِ ١٤؛٢٧ ٬ ٣١، يَيَ ١٣؛٣٦ ٬ ٣٨
31 «سِمْن، سِمْن، عَ كٌلٌن سٍنتَنّ بَرَ عَلَ مَشْرِن وٌ تَن شَ سَ عَ بّلّشّ، عَ شَ وٌ عِقٍ عَلْ مَالٍ عِقٍمَ كِ نَشّ.
32 كْنْ ﭑ بَرَ عَلَ مَشَندِ عِ بّ، عَلَكٌ دَنشَنِيَ نَشَ فّ بَدٍ عِ يِ. عِ نَ فبِلٍن ﭑ مَ، عِ شَ عِ نفَشَكٍرٍنيِيٍ رَلِمَنِيَ.»
33 ثِيّرِ نَشَ عَ قَلَ عَ بّ، «شَ وٌن بِرِن نَن عَ رَ، ﭑ تِنشِ، هَلِ عَ قِندِ فٍيلِ رَ، هَلِ عَ قِندِ قَشّ رَ!»
34 عِسَ نَشَ عَ مَسٍن، «ثِيّرِ، ﭑ شَ عَ قَلَ عِ بّ، بٍينُن كٌنكٌرٍ شَ عَ رَتٍ، عِ عَ قَلَمَ نّ دْشْ سَشَن، عَ عِ مُ ﭑ كٌلٌن.»
عِسَ عَ قْشِرَبِرّيٍ رَ سِقٍ
35 عِسَ مَن نَشَ عَ مَسٍن عَ قْشِرَبِرّيٍ بّ، «ﭑ تٌ وٌ شّي كْبِرِ، فبْنقْي، نُن سَنكِرِ مُ وٌ شُن، وٌ تْورْ نّ؟» عٍ نَشَ عَ يَابِ، «عَدٍ.»
36 عَ مَن نَشَ عَ مَسٍن عٍ بّ، «كْنْ يَكْسِ تَن، شَ كْبِرِ نُن فبْنقْي نَ نَشَن يِ، عَ شَ عٍ تٌنفٌ. شَ سَنتِدّفّمَ مُ نَ نَشَن يِ رَ، عَ شَ عَ شَ شِنبٍلِ دٌنمَ مَتِ، عَ سَنتِدّفّمَ سَرَ،
37 بَرِ مَ ﭑ شَ عَ قَلَ وٌ بّ، يِ مَسٍنيِ نَشَن سّبّشِ كِتَابُي كُي، قٌ عَ شَ ﭑ لِ، ‹عَ حَشَنكَتّ نَن سْتْمَ قٍ كٌبِ رَبَيٍ يَ مَ.› نَشَن نَفِرِشِ ﭑ مَ، نَ ﭑ لِمَ نّ. نَشَن سّبّشِ، نَ قَمَ نّ كَمَلِدٍ.»
38 عَ قْشِرَبِرّيٍ نَشَ عَ مَسٍن، «مَرِفِ، عَ مَتٌ، سَنتِدّفّمَ قِرِن نَن يَ.» عَ نَشَ عٍ يَابِ، «نَ بَرَ وَ سَكّ.»
عِسَ عَلَ مَشَندِقٍ فٍتٍسٍمَنِ
مَتِيُ ٢٦؛٣٦ ٬ ٤٦، مَرَكِ ١٤؛٣٢ ٬ ٤٢
39 عِسَ تٌ مِنِ، عَ نَشَ سِفَ عٌلِوِ فٍيَ مَ عَلْ عَ نُ دَرِشِ عَ رَ كِ نَشّ، عَ قْشِرَبِرّيٍ قَن نَشَ عَ مَتِ.
40 عٍ تٌ مّننِ لِ، عِسَ نَشَ عَ قَلَ عٍ بّ، «وٌ عَلَ مَشَندِ نّ، وٌ نَشَ قَ بِرَ تَنتَنيِ كُي.»
41 عَ نَشَ عَ ندٍدِ مَسِفَ عٍ رَ، عَ عَ شِنبِ سِن، عَ عَلَ مَشَندِ،
42 «ﭑ بَبَ، شَ عِ سَفٌ نَ عَ رَ، عِ شَ ﭑ نَتَنفَ يِ حَشَنكَتّ مَ. كْنْ ﭑ سَفٌ نَشَ رَبَ، عِ تَن نَن سَفٌ شَ رَبَ.»
43 نَ تّمُي مَلٍكّ ندٍ نَشَ مِنِ عَ مَ كٍلِ كٌورٍ، عَ عَ سّنبّ سٌ.
44 عِسَ بْحّ تٌ نُ حَشَنكَتَقٍ، عَ نَشَ عَ شَ عَلَ مَشَندِقٍ سّنبّ شُن مَسَ. عَ يِلٍنقُرٍ نَشَ سِلْن بْشِ عَلْ وُلِ.
45 عَ تٌ كٍلِ عَلَ مَشَندِدٍ، عَ نَشَ فبِلٍن عَ قْشِرَبِرّيٍ يِرٍ، عَ نَشَ عٍ لِ عٍ نَ شِقٍ نِمِسّ شَ قٍ رَ.
46 عَ نَشَ عٍ مَشْرِن، «وٌ شِقٍ مُنقٍ رَ؟ وٌ كٍلِ، وٌ عَلَ مَشَندِ، عَلَكٌ وٌ نَشَ بِرَ تَنتَنيِ كُي.»
عِسَ سُشُقٍ
مَتِيُ ٢٦؛٤٧ ٬ ٥٦، مَرَكِ ١٤؛٤٣ ٬ ٥٠، يَيَ ١٨؛٣ ٬ ١١
47 عِسَ حَن مُ نُ فّشِ وْيّندٍ، مِشِ فَلِ نَشَ عَ يِرٍ لِ. يُدَ سِ، نَشَن نُ نَ عِسَ قْشِرَبِرّ قُ نُن قِرِنيِيٍ يَ مَ، عَ تَن نَن نُ تِشِ عٍ يَ رَ. عَ نَشَ عَ مَسٌ عِسَ رَ، عَ شَ عَ سُنبُ.
48 عِسَ نَشَ عَ مَسٍن عَ بّ، «يُدَ سِ، عِ عَدَ مَ شَ دِ يَنقَمَ سُنبُي نَن نَ؟»
49 نَشٍيٍ نُ نَ عِسَ قْشْ رَ، عٍ تٌ عَ تٌ نَشَن قَقٍ رَبَدٍ، عٍ نَشَ عَ مَشْرِن، «مَرِفِ، مُشُ شَ فٍرٍ سٌ سَنتِدّفّمَ رَ؟»
50 عَ قْشِرَبِرّ ندٍ نَشَ سّرّشّدُبّ كُنتِفِ شَ كٌنيِ يِرٍقَنيِ تُلِ بٌلٌن.
51 كْنْ عِسَ نَشَ عَ قَلَ، «وٌ عَ لُ!» عَ نَشَ قَ عَ بّلّشّ سَ نَ شّمّ تُلِ مَ، عَ عَ رَيَلَن.
52 نَ تّمُي، عِسَ نَشَ وْيّن سّرّشّدُبّ كُنتِفِيٍ، هْرْ مْلِنفِرَ كْسِبِلِ مَنفّيٍ، نُن قٌرِيٍ بّ نَشٍيٍ نُ قَشِ عَ شِلِ مَ. عَ نَشَ عَ قَلَ عٍ بّ، «وٌ تٌ مِنِشِ ﭑ شِلِ مَ سَنتِدّفّمَ نُن فبٍنفبٍتَ سُشُشِ وٌ يِ رَ، سُوتٍ نَن ﭑ نَ؟
53 لْشْ يٌ لْشْ ﭑ نُ نَ وٌ يَ مَ هْرْ مْبَنشِ كُي، وٌ مُ ﭑ سُشُ. كْنْ يِ وَشَتِ تَن قِندِشِ وٌ فبٍ نُن دِ مِ نْي كَنيِ فبٍ نَن نَ.»
ثِيّرِ عَ يّتّ رَ سَنقٍ عِسَ مَ
مَتِيُ ٢٦؛٥٧ ٬ ٥٨،٦٩ ٬ ٧٥، مَرَكِ ١٤؛٥٣ ٬ ٥٤،٦٦ ٬ ٧٢، يَيَ ١٨؛١٢ ٬ ١٨،٢٥ ٬ ٢٧
54 عٍ تٌ عِسَ سُشُ، عٍ نَشَ عَ شَنِن سّرّشّدُبّ كُنتِفِيٍ شُنيِ شْنيِ. ثِيّرِ قَن نَشَ بِرَ عٍ قْشْ رَ، كْنْ عَ مُ نُ عَ مَكْرّ مَ عَ فبٍ رَ.
55 عٍ تٌ سٌ، عٍ نَشَ تّ شُرُ تَندٍ، عٍ بِرِن دْشْ مّننِ، سّرّشّدُبّ كُنتِفِ شَ تّتّ كُي. ثِيّرِ قَن نُ دْشْشِ عٍ يَ مَ.
56 كٌنيِ فِنّ ندٍ تٌ ثِيّرِ تٌ تّ قّ مَ، عَ نَشَ عَ يَ تِ عَ رَ، عَ قَ عَ قَلَ، «عِسَ نُن يِ شّمّ نَن نُ عَ رَ.»
57 كْنْ ثِيّرِ نَشَ عَ مَتَندِ، عَ عَ قَلَ، «ﭑ تَن مُ نَ شّمّ كٌلٌن قٍوٌ!»
58 عَ مُ بُ، مِشِ فبّتّ قَن نَشَ ثِيّرِ تٌ، عَ عَ قَلَ عَ بّ، «عِ قَن قِندِشِ عَ شَ مِشِ ندٍ نَن نَ.» ثِيّرِ نَشَ عَ يَابِ، «عَدٍ، ﭑ تَن مُ نَ كِ!»
59 وَشَتِ كٍرٍن تٌ دَنفِ، مِشِ فبّتّ نَشَ عَ مَشْرْشْ، عَ عَ قَلَ، «يِ مِشِ نُن عِسَ نَن نُ عَ رَ، بَرِ مَ فَلِلٍكَ نَن عَ رَ.»
60 ثِيّرِ نَشَ عَ يَابِ، «ﭑ تَن مُ عَ كٌلٌن عِ نَ قٍقٍ قَلَقٍ!» عَ حَن مُ نُ فّشِ وْيّندٍ، كٌنكٌرٍ نَشَ عَ رَتٍ كٍرٍن نَ.
61 نَ تّمُي، مَرِفِ نَشَ عَ مَقِندِ، عَ عَ يَ تِ ثِيّرِ رَ. ثِيّرِ قَن نَشَ رَتُ مَرِفِ شَ مَسٍنيِ مَ، عَ تٌ عَ قَلَ عَ بّ، «بٍيمَنُن كٌنكٌرٍ شَ عَ رَتٍ تٌ، عِ عِ يّتّ رَ سَنمَ نّ ﭑ مَ دْشْ سَشَن.»
62 ثِيّرِ نَشَ مِنِ، عَ وَ عَ شْرْشْي رَ سُننُنيِ كُي.
عِسَ تِقٍ يُوِقِ كِيتِسَيٍ يَ رَ
مَتِيُ ٢٦؛٥٧ ٬ ٦٨، مَرَكِ ١٤؛٥٣ ٬ ٦٥، يَيَ ١٨؛١٢ ٬ ٢٤
63 شّمّ نَشٍيٍ نُ عِسَ سُشُشِ، عٍ نَشَ عَ رَ سْتْ، عٍ نَشَ عَ بْنبْ.
64 عٍ نَشَ عَ يَ مَشِرِ، عٍ نُ قَ عَ قَلَ، «نَمِحْنمّحَ رَبَ! عَ قَلَ بَ، نَشَن عِ بْنبْشِ!»
65 عٍ مَن نَشَ كٌنبِ مْولِ بِرِن سَ عَ قَرِ.
66 كُيٍ تٌ عِبَ، يُوِقِيٍ شَ قٌرِيٍ، سّرّشّدُبّ كُنتِفِيٍ، نُن سّرِيّ كَرَ مْشْيٍ نَشَ سَنٍدٍرّن مَلَنيِ رَبَ عِسَ مَكِيتِقٍ رَ. عٍ تٌ قَ عِسَ رَ،
67 عٍ نَشَ عَ مَشْرِن، «شَ عِ قِندِشِ عَلَ شَ مِشِ سُفَندِشِ نَن نَ، عَ قَلَ مُشُ بّ.» عِسَ نَشَ عَ مَسٍن عٍ بّ، «ﭑ نَ عَ قَلَ وٌ بّ، وٌ مُ لَمَ عَ رَ.
68 شَ ﭑ مَشْرِنيِ تِ، وٌ مُ ﭑ يَابِمَ.
69 كْنْ كٍلِ يِ وَشَتِ مَ، عَدَ مَ شَ دِ دْشْمَ عَلَ سّنبّ كَنيِ يِرٍقَنيِ مَ.»
70 عٍ بِرِن نَشَ قَ عَ مَشْرِن، «نَ كُي، عِ قِندِشِ عَلَ شَ دِ نَن نَ؟» عَ نَشَ عٍ يَابِ، «وٌ تَن نَن يَتِ عَ قَلَشِ نَ كِ، عَ ﭑ قِندِشِ عَلَ شَ دِ نَن نَ.»
71 عٍ قَن نَشَ عَ قَلَ، «وٌن هَيِ مُندُن نَ سٍيدٍ فبّتّ مَ سْنْن؟ وٌن بَرَ عَ تَن يّتّ يَتِ وْيّن شُي مّ.»