6
مَلَبُ لْشْي شَ سّرِيّ،
نُن شّمّ ندٍ بّلّشّ رَيَلَنقٍ
مَتِيُ ١٢؛١ ٬ ١٤، مَرَكِ ٢؛٢٣—٣؛٦
1 مَلَبُ لْشْ ندٍ، عِسَ نُن عَ قْشِرَبِرّيٍ نُ حّرّقٍ سَنكِرَ رَ شّيٍ تَفِ. عِسَ قْشِرَبِرّيٍ نَشَ مّنفِ تْنسْي ندٍيٍ بَ، عٍ عٍ تُشُتُشُ عٍ بّلّشّ، عٍ عَ شْرِيٍ دٌن.
2 قَرِ سّنِ ندٍيٍ نَشَ وْيّن، «مُنقٍ رَ وٌ نَ مَلَبُ لْشْي سّرِيّ مَتَندِقٍ؟»
3 عِسَ نَشَ عٍ يَابِ، «وٌ مُ نُ عَ شَرَن دَوُدَ نَشَن نَبَ كَامّ تٌ عَ سُشُ، عَ تَن نُن نَشٍيٍ نُ نَ عَ قْشْ رَ؟
4 عَ سٌ نّ عَلَ شَ بَنشِ كُي، عَ تَامِ دٌن نَشَن قِشِ عَلَ مَ، عَ ندٍ سٌ عَ قْشِرَبِرّيٍ قَن يِ رَ، هَلِ عَ تٌ مُ نُ دَشَ مِشِ يٌ شَ نَ دٌن، قٌ سّرّشّدُبّيٍ.»
5 عِسَ مَن نَشَ عَ قَلَ عٍ بّ، «عَدَ مَ شَ دِ نَن قِندِشِ مَرِفِ رَ مَلَبُ لْشْي شُن مَ.»
6 مَلَبُ لْشْي فبّتّ مَ، عِسَ مَن نَشَ سٌ سَلِدٍ كُي، عَ مِشِيٍ كَوَندِ. عَ نَشَ شّمّ ندٍ لِ نَا، نَشَن يِرٍ قَن بّلّشّ تُوشِ عَ مَ.
7 قَرِ سّنِيٍ نُن سّرِيّ كَرَ مْشْيٍ نُ عٍ يَ تِشِ عِسَ رَ عٍ شَ عَ مَتٌ شَ عَ مِشِ رَيَلَنمَ مَلَبُ لْشْي مَ، عَلَكٌ عٍ شَ نْ عَ كَلَمُدٍ قٍ ندٍ مَ.
8 كْنْ عِسَ تٌ نُ عٍ شَ مَحْشُنيِ كٌلٌن، عَ نَشَ عَ قَلَ شّمّ بّ نَشَن بّلّشّ تُوشِ عَ مَ، «كٍلِ، عِ قَ تِ بٍ حَمَ تَفِ.» عَ نَشَ كٍلِ، عَ تِ.
9 عِسَ نَشَ عَ مَسٍن عٍ بّ، «ﭑ شَ وٌ مَشْرِن. عَ دَشَ قٍ قَنيِ نَن شَ رَبَ مَلَبُ لْشْي مَ، كَ قٍ حَاشِ؟ نِي رَكِسِقٍ نَن دَشَ كَ نِي سْنتْقٍ؟»
10 عَ تٌ فّ عَ يَ رَحّرّدٍ مِشِ بِرِن كَنكٍ مَ، عَ نَشَ عَ قَلَ نَ شّمّ بّ، «عِ بّلّشّ عِتَلَ.» عَ نَشَ عَ عِتَلَ، عَ بّلّشّ نَشَ يَلَن.
11 كْنْ قَرِ سّنِيٍ تَن نَشَ شْنْ كِ قَنيِ. عٍ نَشَ سٌ وْيّنقٍ عٍ بٌرٍ بّ، عٍ شَ لَن قٍ مَ، عٍ نْمَ نَشَن نِيَدٍ عِسَ رَ.
عِسَ عَ شَ شّيرَ قُ نُن قِرِنيِ سُفَندِقٍ
مَتِيُ ١٠؛١ ٬ ٣، مَرَكِ ٣؛١٣ ٬ ١٩
12 نَ وَشَتِ مَ، عِسَ نَشَ سِفَ فٍيَ قَرِ عَلَ مَشَندِدٍ، عَ كْي بِرِن نَدَنفِ عَ عَلَ مَشَندِ مَ.
13 كُيٍ تٌ عِبَ عَ نَشَ عَ قْشِرَبِرّيٍ شِلِ. عَ نَشَ قُ نُن قِرِن سُفَندِ عٍ يَ مَ، عَ عٍ شِلِ سَ شّيرَيٍ. عٍ تَن نَن يَ؛
14 سِمْن، عِسَ نَشَن شِلِ سَ ثِيّرِ، ثِيّرِ شُنيَ عَندِرٍ، يَكِ، يَيَ، قِلِثُ، بَرٌتٌلٌمٍ،
15 مَتِيُ، تٌمَسِ، عَلِقَ شَ دِ يَكِ، سِمْن نَشَن شِلِ نُ قَلَمَ سٍلٌتِ،
16 يَكِ شَ دِ يُدَ سِ، نُن يُدَ سِ عِسِكَرِيٌتِ نَشَن قِندِ يَنقَنتٍ رَ، عَ عِسَ سَ مِشِ كٌبِيٍ بّلّشّ.
عِسَ حَمَ كَوَندِقٍ
مَتِيُ ٥—٧
17 عِسَ نُن نَ مِشِ قُ نُن قِرِنيِيٍ تٌ فٌرٌ، عَ نَشَ تِ كّنّ ندٍ مَ. عَ قْشِرَبِرّيٍ فَلِ نُ نَ نَا، عَ نُن حَمَ فبٍفبٍ نَشٍيٍ نُ كٍلِشِ يُدَيَ نُن دَرِ سَلَمُ، عَ نُن بَا دّ رَ، تِرٍ نُن سِدْن نَبِلِنيِ.
18 عٍ بِرِن نُ قَشِ عِسَ شُي رَ مّدٍ، عَ مَن شَ عٍ رَيَلَن عٍ شَ قُرٍيٍ مَ. حِننّ نُ نَشٍيٍ تْورْ مَ، عَ نُ عٍ رَيَلَنمَ.
19 حَمَ بِرِن نُ كَتَقٍ عٍ شَ دِن عَ رَ، بَرِ مَ سّنبّ نُ مِنِقٍ عَ عِ، عَ نُ عٍ بِرِن نَيَلَن.
سّيوّ نُن فبَلٌي
مَتِيُ ٥؛١ ٬ ١٢
20 نَ تّمُي عِسَ نَشَ عَ يَ تِ عَ قْشِرَبِرّيٍ رَ، عَ عَ مَسٍن عٍ بّ،
«سّيوّ نَ وٌ بّ، وٌ تَن سٍتَرٍيٍ،
بَرِ مَ وٌ حَن نَ عَلَ شَ مَنفّيَ نِينِ بُن مَ.
21 سّيوّ نَ وٌ بّ، وٌ تَن نَشٍيٍ كَامّشِ يَكْسِ،
بَرِ مَ وٌ قَمَ نّ وَ سَدٍ.
سّيوّ نَ وٌ بّ، وٌ تَن نَشٍيٍ وَ مَ يَكْسِ،
بَرِ مَ وٌ قَمَ نّ يٍلٍدٍ.
22 سّيوّ نَ وٌ بّ، مِشِيٍ نَ وٌ شْن تّمُي نَشّ،
عٍ نَ وٌ كٍرِ، عٍ نَ وٌ كٌنبِ، عٍ نَ وٌ شِلِ كَنَ عَدَ مَ شَ دِ شَ قٍ رَ.
23 وٌ شَ سّيوَ نَ لْشْي، وٌ تُفَن حّلّشِنيِ رَ،
بَرِ مَ وٌ بَرَايِ فبٌمَ نّ عَرِيَننَ.
عٍ بٍنبَيٍ نُ نَمِحْنمّيٍ قَن تْورْ مَ نَ كِ نّ.»
24 «كْنْ فبَلٌي نَ وٌ بّ، وٌ تَن بَننَيٍ،
بَرِ مَ وٌ حَن بَرَ وٌ شَ قٍ قَنيِ سْتْ.
25 فبَلٌي نَ وٌ بّ، وٌ تَن نَشٍيٍ وَ سَشِ يَكْسِ،
بَرِ مَ كَامّ قَمَ نّ وٌ سُشُدٍ.
فبَلٌي نَ وٌ بّ، وٌ تَن نَشٍيٍ يٍلٍمَ يَكْسِ،
بَرِ مَ سُننُنيِ نُن وَ قَمَ نّ وٌ سُشُدٍ.
26 فبَلٌي نَ وٌ بّ، مِشِ بِرِن نَ وٌ شِلِ قَنيِ قَلَ تّمُي نَشّ،
بَرِ مَ عٍ بٍنبَيٍ نُ وُلٍ قَلّيٍ قَن شُنمَقَلَمَ نَ كِ نّ
نَشٍيٍ نُ عٍ يّتّ قِندِشِ نَمِحْنمّيٍ رَ.»
يَشُييٍ شَنُقٍ
مَتِيُ ٥؛٣٨ ٬ ٤٨
27 «ﭑ شَ عَ قَلَ وٌ بّ، وٌ تَن نَشٍيٍ نَ وٌ تُلِ مَتِقٍ ﭑ نَ،
وٌ شَ وٌ يَشُييٍ شَنُ،
وٌ قٍ قَنيِ نَن نَبَ وٌ شْنمَيٍ بّ،
28 وٌ عَلَ مَشَندِ وٌ دَنكَمَيٍ بّ،
وٌ عَلَ مَشَندِ وٌ تْورْ مَيٍ بّ.
29 شَ مِشِ عِ شّرّ فَرِن،
عِ شَ بٌورٍ سّيتِ قَن تِ عَ بّ.
شَ مِشِ عِ شَ دٌنمَ تٌنفٌ،
عِ نَشَ تٌندِ عَ شَ عِ شَ مَقٍلٍنيِ قَن تٌنفٌ.
30 نَشَن يٌ نَ عِ مَكُلَ، عِ شَ عَ كِ.
نَشَن نَ سٍيٍ بَ عِ يِ، عِ نَشَ عَ مَشْرِن عَ شَ عَ رَفبِلٍن.
31 وٌ وَ مَ مِشِيٍ شَ نَشَن بِرِن نَبَ وٌ بّ،
وٌ قَن شَ نَ نَن نَبَ عٍ بّ.»
32 «شَ وٌ سَ مِشِ فبَنسَن نَن شَنُمَ، نَشٍيٍ وٌ قَن شَنُشِ، وٌ بَرَايِ مُندُن سْتْمَ نَ كُي؟ هَلِ يُنُبِتْييٍ، عٍ مِشِيٍ نَن شَنُمَ نَشٍيٍ عٍ تَن قَن شَنُشِ.
33 شَ وٌ سَ قٍ قَنيِ رَبَمَ مِشِيٍ بّ، نَشٍيٍ قٍ قَنيِ رَبَمَ وٌ قَن بّ، وٌ بَرَايِ مُندُن سْتْمَ نَ كُي؟ نَ تَن، هَلِ يُنُبِتْي عَ رَبَمَ.
34 شَ وٌ سَ دٌنِ تِمَ مِشِ نَن بّ، وٌ لَشِ نَشَن نَ عَ وٌ شَ دٌنِ قِمَ، وٌ بَرَايِ مُندُن سْتْمَ نَ كُي؟ هَلِ يُنُبِتْييٍ، عٍ دٌنِ تِمَ عٍ بٌورٍ بّ، عَلَكٌ عٍ مَن شَ دٌنِ بِرِن سْتْ.
35 كْنْ وٌ تَن شَ وٌ يَشُييٍ شَنُ. وٌ شَ قٍ قَنيِ نَن نَبَ. وٌ شَ دٌنِ تِ، هَلِ وٌ مُ لَشِ عَ قِقٍ رَ. نَ كُي، وٌ بَرَايِ فبٌمَ نّ، وٌ قِندِ عَلَ شِلِ شُنفبٍ كَنيِ شَ دِيٍ رَ، بَرِ مَ عَ تَن قٍ قَنيِ رَبَمَ قِنسِرِوَلِيٍ نُن مِشِ كٌبِيٍ بّ.
36 وٌ قَن شَ كِنِكِنِ مِشِ مَ، عَلْ وٌ بَبَ عَلَ كِنِكِنِمَ مِشِ مَ كِ نَشّ.»
وُرِ قُحِ نُن شٍبٍنيِ
مَتِيُ ٧؛١ ٬ ٥
37 «وٌ نَشَ وٌ يّتّ قِندِ وٌ بٌورٍ عَدَ مَ كّوَلِيٍ مَكِيتِمَ رَ، عَلَكٌ كِيتِ نَشَ قَ كَنَ وٌ قَن نَ عَلَ يِ. وٌ نَشَ مِشِ مَكِيتِ كِيتِ شْرْشْي رَ، عَلَكٌ وٌ قَن نَشَ مَكِيتِ كِيتِ شْرْشْي رَ. وٌ دِحّ مِشِ مَ، عَلَكٌ عَلَ شَ دِحّ وٌ قَن مَ.
38 وٌ مِشِ كِ، عَلَكٌ عَلَ قَن شَ وٌ كِ. وٌ كِمَ كِ نَشّ، عَ لُمَ نّ عَلْ مَالٍ نَ مَنِيَ، عَ مَنِيَسٍ رَقٍ عَ قَنيِ رَ، مَالٍ مَدّتّن، عَ شّيّ شّيّ، ندٍ مَن قَ سَ عَ شُن هَن عَ قِلِ عَ مَ. نَ كُي، وٌ مَنِيَسٍ نَشَن نَوَلِمَ بٌورٍيٍ بّ، نَ نَن نَوَلِمَ وٌ قَن بّ.»
39 عِسَ مَن نَشَ يِ تَالِ وْيّنيِ قَلَ عٍ بّ، «دْنشُي نْمَ شُلِ سُشُدٍ دْنشُي بّ يِرٍ؟ عَ دِ، عٍ قِرِن بِرِن مُ بِرَ مَ شّ يِلِ كُي؟
40 تَالِبِ مُ دَنفِمَ عَ كَرَ مْشْ رَ، كْنْ تَالِبِ نَشَن بِرِن نُ فّ عَ مَتِنكَندٍ، عَ لُمَ نّ عَلْ عَ كَرَ مْشْ.»
41 «مُنقٍ رَ عِ وُرِ قُحِ تٌمَ عِ نفَشَكٍرٍنيِ يَ مَ، عَ قَ لِ عِ مُ شٍبٍنيِ تٌشِ نَشَن نَ عِ تَن يّتّ يَ مَ؟
42 عِ نْمَ عَ قَلَدٍ عِ نفَشَكٍرٍنيِ بّ دِ، ‹عَ لُ ﭑ شَ نَ وُرِ قُحِ بَ عِ يّتّ يَ مَ،› عَ قَ لِ عِ تَن مُ شٍبٍنيِ تٌشِ نَشَن نَ عِ تَن يَ مَ؟ عِ تَن قِلَنكَقُي، شٍبٍنيِ نَن سِنفٍ بَ عِ يَ مَ! نَ بَ شَنبِ، عِ نْمَ نّ سٍ عِفبّدٍ عَ قَنيِ رَ، عَلَكٌ عِ شَ وُرِ قُحِ بَ عِ نفَشَكٍرٍنيِ قَن يَ مَ.»
وُرِ بِلِ كٌلٌنمَ عَ بٌفِ نَن مَ
مَتِيُ ٧؛١٦ ٬ ٢٠، ١٢؛٣٣ ٬ ٣٥
43 «سَنسِ قَنيِ مُ نَ نَشَن بٌفِ كٌبِ رَ مِنِمَ، سَنسِ كٌبِ قَن مُ نَ نَشَن بٌفِ قَنيِ رَ مِنِمَ.
44 سَنسِ بِرِن كٌلٌنمَ عَ بٌفِ نَن مَ. شْرّ مُ بَمَ تُنبٍ بِلِ رَ، كُسُ قَن مُ بَمَ بَافِ بِلِ كْن نَ.
45 قٍ قَنيِ تٌ رَفَتَشِ مِشِ قَنيِ بْحّ كُي، عَ قٍ قَنيِ نَن نَمِنِمَ. قٍ كٌبِ تٌ رَفَتَشِ مِشِ كٌبِ بْحّ كُي، عَ قٍ كٌبِ نَن نَمِنِمَ. نَشَن نَ فبٌ مِشِ بْحّ كُي، نَ نَن دْنشْي مِنِمَ عَ دّ عِ.»
بَنشِتِ قِرِنيِيٍ شَ تَالِ
مَتِيُ ٧؛٢٤ ٬ ٢٧
46 «مُنقٍ رَ وٌ ﭑ شِلِمَ ‹ﭑ مَرِفِ، ﭑ مَرِفِ،› كْنْ وٌ مُ ﭑ شُي رَبَتُمَ؟
47 مِشِ يٌ قَ ﭑ مَ، عَ ﭑ مَ مَسٍنيِ رَ مّ، عَ قَ عَ رَبَتُ، وٌ وٌ تُلِ مَتِ ﭑ شَ عَ مَسٍن وٌ بّ نَ كَنيِ مَنِيَشِ مِشِ نَشَن نَ.
48 عَ مَنِيَشِ بَنشِتِ نَن نَ، نَشَن بْشِ فٍ هَن عَ سَ قَنيٍ لِ، عَ قَ عَ شَ بَنشِ بِلِ تِ نَ قَنيٍ قَرِ. لْشْ ندٍ، شُرٍ نَشَ بَنبَرَن يّ هَن عَ دِن بَنشِ مَ، كْنْ عَ مُ نْ سٍسٍ نِيَدٍ عَ رَ، بَرِ مَ عَ نُ تِشِ عَ قَنيِ رَ.
49 كْنْ مِشِ يٌ نَشَن ﭑ مَ مَسٍنيِ رَ مّ، عَ قَ لِ عَ مُ عَ رَبَتُ، نَ كَنيِ تَن مَنِيَشِ شّمّ نَن نَ نَشَن بَنشِ تِ بْشِ قَرِ مَ، بِلِ مُ عَ بّ. شُرٍ تٌ بَنبَرَن، عَ دِن بَنشِ مَ، عَ نَشَ عَ رَبِرَ كٍرٍن نَ، بَنشِ نَشَ كَنَ عَ حَاشِ رَ.»