7
عَلَ شَ حَشَنكَتّ نُن عَ شَ كِسِ
1 ﭑ نَ تْورْقٍ يِ كِ!
ﭑ لُشِ نّ عَلْ مِشِ نَشَن سِفَمَ سَنسِ بٌفِ بَدٍ عَ بَ تّمُي،
كْنْ عَ مُ وّنِ بٌفِ تٌمَ نَا،
عَ مُ شْرّ قَنيِ لِمَ وُرِ كْن نَ عَلْ عَ وَ مَ عَ شْن مَ كِ نَشّ.
2 عَلَ شَنُنتٍنيِيٍ بَرَ حْن بْشِ مَ،
تِنشِنتْي كٍرٍن مُ لُمَ نَا.
عٍ بِرِن نَ عٍ بٌورٍ تْورْقٍ عَ حَاشِ رَ،
كَنكَن فَنتَنيِ تٍمَ عَ نفَشَكٍرٍنيِ بّ.
3 عٍ بِرِن قَتَ قٍ حَاشِ رَبَدٍ.
مَنفّيٍ، نٍيٍ وَ مَ بُحَ تِنشِنتَرٍ شْن مَ.
كِيتِسَيٍ، نٍيٍ كِيتِ سَمَ كْبِرِ نَن تُن مَ قٍ رَ.
كُنتِفِيٍ، نٍيٍ قَن عٍ شَ وَ سَبَلِيَ مَسٍنمَ.
عٍ بِرِن نَ قٍ كٍرٍن نّ.
4 نَشَن نَ قِسَمَنتٍ رَ وٌ يَ مَ،
نَ تَن لُمَ نّ عَلْ تُنبٍ شْنّ.
عَلَ شَ كِيتِ لْشْي بَرَ عَ لِ،
عَلْ حَمَ مَكَنتّ عَ قَلَ كِ نَشّ.
حَمَ بْحّ مِنِ تّمُي بَرَ قَ.
5 وٌ نَشَ لَ وٌ دّ قَن بٌورٍ رَ،
وٌ نَشَ لَ وٌ شَنُنتٍنيِ رَ،
هَلِ وٌ شَ فِنّ نَشَن عَ سَمَ وٌ قّ مَ،
وٌ نَشَ وٌ شَ فُندٌ بِرِن مَسٍن عَ بّ.
6 نَ وَشَتِ دِ شّمّ عَ بَبَ مَبٍرٍ مَ نّ،
دِ فِنّ تِ عَ نفَ كَنكٍ عِ،
مَمَدِ نُن عَ شَ مْرِ نفَ كْنحّمَ نّ.
كَنكَن يَشُي قِندِ مَ عَ بَرِ بٌورٍ يَتِ نَن نَ.
7 كْنْ ﭑ تَن، ﭑ يَ تِمَ عَلَتَلَ نَن نَ،
ﭑ نَ ﭑ شَشِلِ تِمَ ﭑ نَكِسِمَ عَلَ نَن نَ،
بَرِ مَ ﭑ مَرِفِ ﭑ شُي سُشُمَ نّ.
8 عِ تَن عِسِرَيِلَ يَشُي،
عِ نَشَ حّلّشِن ﭑ مَ تْورّ رَ.
هَلِ ﭑ بِرَ نّ، ﭑ مَن كٍلِمَ نّ.
هَلِ ﭑ لُ نّ دِ مِ شْورَ، عَلَتَلَ نَن نَ ﭑ مَ يَنبّ رَ.
9 ﭑ تٌ يُنُبِ رَبَ عَلَتَلَ رَ،
ﭑ قَمَ نّ عَ شَ شْنّ سْتْدٍ هَن عَ كَمَلِ،
عَ قَ ﭑ شُن مَقَلَدٍ، عَ عَ شَ تِنشِنيِ مَسٍن ﭑ بّ.
10 ﭑ يَشُييٍ نَ نَ تٌ، عٍ يَافِمَ نّ.
سِنفٍ عٍ نُ عَ قَلَمَ، «عِ مَرِفِ عَلَتَلَ نَ مِندٍن؟»
كْنْ نَ تّمُي ﭑ تَن نَن عٍ شَ بِرّ تٌمَ،
عٍ مَبٌرٌن سَنيِ رَ عَلْ بٌورَ نَشَن نَ كِرَ رَ.
11 عِ تَن عِسِرَيِلَ، وٌ شَ تّتّ رَكٍلِ لْشْي قَمَ نّ،
وٌ شَ نَانِنيِيٍ عِفبٌمَ نّ.
12 نَ لْشْي مِشِيٍ قَمَ نّ وٌ يِرٍ،
كٍلِقٍ عَسِرِيَ نُن مِسِرَ تَايٍ كُي،
كٍلِقٍ مِسِرَ بْشِ هَن عٍقِرَتِ شُرٍ،
كٍلِقٍ بَا ندٍ مَ عَ سَ دْشْ بَا فبّتّ رَ،
كٍلِقٍ فٍيَ ندٍ مَ عَ سَ دْشْ فٍيَ فبّتّ رَ.
13 دُنِحَ بْشِ قَمَ نّ كَنَدٍ مِشِيٍ شَ وَلِ حَاشِيٍ شَ قٍ رَ.
14 مّينِ عِ شَ حَمَ مَ،
بَرِ مَ عٍ قِندِشِ عِ كّ نَن نَ،
نَشٍيٍ سَبَتِشِ عٍ كٍرٍنيِ مَ قْتْنيِ كُي قِيلِ قَنيِ سّيتِ مَ.
عٍ شَ عٍ دّ مَدٌن عَ قَنيِ رَ،
عَلْ عٍ نُ عَ رَبَشِ بَسَن نُن فَلَدِ بْشِ مَ تّمُي دَنفِشِ كِ نَشّ.
15 ﭑ كَابَنَكٌي مَسٍنمَ نّ عٍ بّ،
عَلْ عٍ مِنِ مِسِرَ بْشِ رَ لْشْي نَشّ.
16 سِيٍ نَ وٌ سّنبّ تٌ، عٍ يَافِمَ نّ عٍ شَ سّنبّتَرٍيَ كُي.
17 عٍ شُبٍ دٌنمَ نّ عَلْ بْشِمَسٍ،
عٍ لُمَ فَاشُي نَن كُي وٌن مَرِفِ عَلَتَلَ يَ رَ، عٍ قَ سّرّن.
18 عَلَ مُندُن نَ نَشَن مَنِيَ عِ رَ،
نَشَن يُنُبِ شَقَرِ مَ،
نَشَن دِحّمَ عَ شَ كّ تٌنفٌمَيٍ دْنشْييٍ مَ؟
عِ مُ شْنّ رَفَتَمَ عَبَدَن،
بَرِ مَ دُفُتّفّيَ مَسٍنقٍ مُشُ بّ عَ رَقَن عِ مَ.
19 عِ مَن كِنِكِنِمَ نّ مُشُ مَ،
عِ قَمَ نّ مُشُ شَ يُنُبِيٍ لُدٍ نَا،
عِ قَ عٍ وٌلِ بَا بْتِنِ مَ.
20 عِ عِ شُي رَكَمَلِمَ نّ يَشُبَ بْنسْي بّ،
عِ هِننّمَ نّ عِبُرَهِمَ بْنسْي رَ،
عَلْ عِ عِ كَلِ عَ رَ مُشُ بٍنبَيٍ بّ كِ نَشّ تّمُي دَنفِشِ.