15
عِسَ شَنِنقٍ ثِلَتِ شْن
مَتِيُ ٢٧‏؛١ ٬ ٢‏،١١ ٬ ٢٦، لُكِ ٢٣‏؛١ ٬ ٧‏،١٣ ٬ ٢٥، يَيَ ١٨‏؛٢٨‏—١٩‏؛١٦
كُيٍ تٌ عِبَ، سّرّشّدُبّ كُنتِفِيٍ، يُوِقِيٍ شَ قٌرِيٍ، سّرِيّ كَرَ مْشْيٍ، نُن يُوِقِيٍ شَ كِيتِسَ دْنشْي بِرِن، عٍ تٌ نُ بَرَ فّ عٍ شَ مَلَنيِ رَ، عٍ نَشَ عِسَ شِرِ، عٍ عَ شَنِن ثِلَتِ شْن.
ثِلَتِ نَشَ عِسَ مَشْرِن، «عِ تَن نَن قِندِشِ يُوِقِيٍ شَ مَنفّ رَ؟» عِسَ نَشَ عَ يَابِ، «عِ تَن نَن عَ قَلَشِ.» سّرّشّدُبّ كُنتِفِيٍ نَشَ قَ عِسَ تْوحّفّ قٍ فبٍفبٍ مَ. ثِلَتِ مَن نَشَ عَ مَشْرِن، «عِ مُ عٍ يَابِمَ؟ عِ مُ عَ مّشِ عٍ قٍ نَشَن بِرِن سَقٍ عِ شُن مَ؟» كْنْ عِسَ مُ يَابِ فبّتّ يٌ قِ سْنْن. ثِلَتِ قَن نَشَ كَابَ نَ مَ.
حّ يٌ حّ، سَلِ نَ عَ لِ، ثِلَتِ دَرِ قٍ نَن نُ عَ رَ، عَ شَ فٍيلِمَنِ كٍرٍن نَبّحِن حَمَ بّ، عٍ نَ وَ نَشَن يٌ شْن. نَ وَشَتِ، فٍرٍ سٌي ندٍيٍ نُ نَ فٍيلِ نَشٍيٍ نُ بَرَ كٍلِ مَنفَسَنيِ شِلِ مَ. حَشَسِ تٌ بِرَ، عٍ نُ بَرَ قَشّ تِ. شّمّ ندٍ نُ نَ عٍ يَ مَ نَشَن نُ شِلِ بَرَبَسِ. عَوَ حَمَ نَشَ قَ ثِلَتِ شْن، عٍ عَ مَشْرِن، عَ شَ عَ رَبَ عٍ بّ، عَلْ عَ دَرِشِ عَ رَ كِ نَشّ. ثِلَتِ نَشَ عٍ مَشْرِن، «وٌ وَ مَ ﭑ شَ يُوِقِيٍ شَ مَنفّ بّحِن وٌ بّ؟» 10 ثِلَتِ نُ عَ كٌلٌن عَ سّرّشّدُبّ كُنتِفِيٍ نُ عِسَ سَشِ عَ بّلّشّ تْونّ نَن مَ.
11 كْنْ سّرّشّدُبّ كُنتِفِيٍ نَشَ حَمَ كُي عِسٌ، عَلَكٌ ثِلَتِ شَ بَرَبَسِ نَن بّحِن عٍ بّ. 12 ثِلَتِ مَن نَشَ عٍ مَشْرِن، «وٌ قَ وَ مَ عَ شْن مَ ﭑ شَ مُنسٍ رَبَ يِ شّمّ رَ، وٌ نَشَن مَ، عَ يُوِقِيٍ شَ مَنفّ؟» 13 حَمَ مَن نَشَ سْنشْ، «عَ بَنبَن وُرِ مَفَلَنبُشِ مَ!» 14 كْنْ ثِلَتِ نَشَ عٍ مَشْرِن، «مُنقٍ مَ؟ عَ قٍ حَاشِ مُندُن نَبَشِ؟» كْنْ عٍ تَن سْنشْي نَن تُن شُن مَسَمَ، عٍ نُ عَ قَلَ، «عَ بَنبَن وُرِ مَفَلَنبُشِ مَ!» 15 نَ كُي، ثِلَتِ تٌ وَ حَمَ بْحّ رَقَنقٍ عٍ مَ، عَ نَشَ بَرَبَسِ رَبّحِن عٍ بّ. عَ نَشَ يَامَرِ قِ سْورِيٍ شَ عِسَ بْنبْ سّبّرّ رَ. نَ شَنبِ، عَ نَشَ عِسَ سٌ عٍ يِ عٍ شَ سَ عَ بَنبَن وُرِ مَفَلَنبُشِ مَ.
سْورِيٍ عِسَ مَيٍلٍقٍ
مَتِيُ ٢٧‏؛٢٧ ٬ ٣١، يَيَ ١٩‏؛٢ ٬ ٣
16 سْورِيٍ نَشَ عِسَ شَنِن فٌمِنَ شْنيِ، نَ تّتّ كُي، عٍ عٍ بٌورٍ سْورِيٍ بِرِن شِلِ. 17 عٍ نَشَ مَنفّ فُبَ فبٍيلِ رَفٌرٌ عِسَ مَ، عٍ قَ تُنبٍيٍ مَقِلِن، عٍ عٍ يَءِلَن مَنفّ كَتَنيِ مَنِيّ رَ. عٍ نَشَ نَ سَ عَ شُن مَ، 18 عٍ نُ عَ شّيبُ، «عِ كّنَ، يُوِقِيٍ شَ مَنفّ.» 19 عٍ نُ عَ شُنيِ بْنبْمَ وُرِ رَ، عٍ دّيٍ بْشُن عَ مَ، عٍ عٍ شِنبِ سِن، عٍ سُيِدِ عَ بّ. 20 عٍ تٌ فّ عِسَ مَيٍلٍدٍ، عٍ نَشَ مَنفّ فُبَ رَتٍ عَ مَ، عٍ عَ فبٍ دُفِ رَفٌرٌ عَ مَ، عٍ قَ عَ رَ مِنِ عٍ شَ سَ عَ بَنبَن وُرِ مَفَلَنبُشِ مَ.
عِسَ بَنبَنقٍ وُرِ مَفَلَنبُشِ مَ
مَتِيُ ٢٧‏؛٣٢ ٬ ٤٤، لُكِ ٢٣‏؛٢٦ ٬ ٤٩، يَيَ ١٩‏؛١٦ ٬ ٢٤
21 سِرٍنِكَ شّمّ ندٍ نُ نَ دَنفِقٍ كِرَ رَ، عَ كٍلِشِ دَاشَ. عَ نُ شِلِ سِمْن، عَلٍسَندِرٍ نُن رُقُ بَبَ. سْورِيٍ نَشَ عَ يَمَرِ، عَ شَ عِسَ شَ وُرِ مَفَلَنبُشِ شَنِن. 22 عٍ نَشَ عِسَ شَنِن يِرٍ دّننَشَن شِلِ قَلَمَ فٌلٌفٌتَ، نَ نَن قَلَشِ عٍ شَ شُي، «شُنكٌنكٌتَ يِرٍ». 23 عٍ نَشَ وّنِ سٌ عَ يِ، مِرِ سٍرِ سَشِ عَ شُن، كْنْ عَ مُ تِن عَ مِندٍ. 24 عٍ نَشَ عَ مَبَنبَن وُرِ مَفَلَنبُشِ مَ، عٍ كَندَ بُن عَ شَ دُفِيٍ شَ قٍ رَ، عَلَكٌ عٍ شَ عَ كٌلٌن كَنكَن نَشَن سْتْمَ. 25 عٍ نُ عَ بَنبَنقٍ تّمُي نَشّ، فّيسّفّ تَفِ نَن نُ عَ رَ. 26 عٍ تٌ نُ وَ مَ بِرِن شَ عَ كٌلٌن عٍ عَ بَنبَنشِ قٍ نَشَن مَ، عٍ يِ سّبّلِ نَن فبَكُ عَ شُن مَ، «يُوِقِيٍ شَ مَنفّ.»
27‏-28 عٍ نَشَ سُوتٍ مِشِ قِرِن قَن بَنبَن وُرِ مَفَلَنبُشِيٍ مَ عِسَ قّ مَ، كٍرٍن عَ يِرٍقَنيِ مَ، بٌورٍ عَ كْولَ مَ. 29 مِشِيٍ نُ دَنفِمَ عِسَ كٌنبِ رَ، عٍ نُ عٍ شُنيِ لِنتَن عَ مَ، عٍ عَ قَلَ، «عٍٍ، عِ تَن نَشَن هْرْ مْبَنشِ رَبِرَ مَ، عِ مَن قَ عَ تِ شِ سَشَن بُن مَ، 30 عِ يّتّ رَكِسِ! فٌرٌ وُرِ مَفَلَنبُشِ كْن نَ!» 31 سّرّشّدُبّ كُنتِفِيٍ نُن سّرِيّ كَرَ مْشْيٍ قَن نُ عَ مَيٍلٍقٍ، عٍ نُ عَ قَلَ، «عَ بَرَ مِشِ فبّتّيٍ رَكِسِ، كْنْ عَ مُ نْمَ عَ يّتّ تَن نَكِسِدٍ. 32 عِسِرَيِلَ مَنفّ شَ مُ عَ رَ، عَلَ شَ مِشِ سُفَندِشِ؟ عَ شَ فٌرٌ وُرِ مَفَلَنبُشِ كْن بٍ يَ، مُشُ شَ عَ تٌ، مُشُ شَ لَ عَ رَ.» نَشٍيٍ نُ بَنبَنشِ عَ قّ مَ، نٍيٍ قَن نُ عِسَ كٌنبِقٍ نّ.
عِسَ شَ قَشّ
مَتِيُ ٢٧‏؛٤٥ ٬ ٥٦، لُكِ ٢٣‏؛٤٤ ٬ ٤٩، يَيَ ١٩‏؛٢٨ ٬ ٣٠
33 يَنيِ تَفِ تٌ عَ لِ، يَنيِ شَرٍ رَ، دِ مِ نَشَ سِن بْشِ بِرِن مَ لّيرِ سَشَن بُن مَ. 34 نَ وَشَتِ مَ، عِسَ نَشَ فبٍلٍفبٍلٍ سّنبّ رَ، «عٍلٌيِ، عٍلٌيِ، لّمَ سَبَشَتَنِ؟» نَ نَن قَلَشِ عٍ شَ شُي، «ﭑ مَرِفِ عَلَ، ﭑ مَرِفِ عَلَ، عِ ﭑ نَبّحِنشِ مُنقٍ رَ؟» 35 مِشِ نَشٍيٍ نُ نَ نَا، عٍ تٌ عَ شُي مّ، عٍ نَشَ عَ قَلَ، «وٌ عَ مَتٌ، عَ نَ عَننَبِ عٍلِيَ نَن شِلِقٍ!» 36 مِشِ ندٍ نَشَ عَ فِ، عَ سَ دُنكٌبِ رَ سِن وّنِ شْنّ شْورَ، عَ عَ سٌ وُرِ دّ عِ، عَ قَ عَ تِ عِسَ بّ عَلَكٌ عَ شَ عَ مِن. عَ نَشَ عَ قَلَ، «وٌ عَ لُ، وٌن شَ عَ مَتٌ شَ عَننَبِ عٍلِيَ قَمَ عَ رَفٌرٌدٍ.» 37 عِسَ نَشَ عَ شُي عِتٍ سّنبّ رَ، عَ قَ لَاشِرَ.
38 نَ وَشَتِ، دُفِ شُنفبٍ نَشَن سِنفَنشِ هْرْ مْبَنشِ كُي، عَ نَشَ عِبْو قِرِن نَ، كٍلِ عَ قُفٍ هَن عَ لَابٍ. 39 سْورِ مَنفّ نَشَن نُ تِشِ عِسَ يَ عِ، عَ تٌ عِسَ لَاشِرَ كِ تٌ، عَ نَشَ عَ قَلَ، «نْندِ نَن عَ رَ يَتِ، عَلَ شَ دِ نَن نُ يِ شّمّ رَ!» 40 فِنّ ندٍيٍ قَن نُ نَ نَا، عٍ ندٍدِ مَكُيَشِ عِسَ يِرٍ رَ، عٍ يِ قٍ بِرِن مَتٌمَ. مَرِيَمَ مَفِدَلَكَ نُ نَ عٍ يَ مَ، عَ نُن سَلٌمٍ، عَ نُن مَرِيَمَ، يَكِ لَنمَدِ نُن يُسُقُ نفَ. 41 عِسَ نُ نَ فَلِلٍ تّمُي نَشّ، يِ فِنّيٍ نَن نُ بِرَ مَ عَ قْشْ رَ، عٍ نُ وَلِيٍ رَبَ عَ بّ. فِنّ فبّتّ فبٍفبٍ قَن نُ نَ نَا نَشٍيٍ نُ بَرَ عِسَ مَتِ هَن دَرِ سَلَمُ.
عِسَ شَ مَرَفَتّ
مَتِيُ ٢٧‏؛٥٧ ٬ ٦١، لُكِ ٢٣‏؛٥٠ ٬ ٥٦، يَيَ ١٩‏؛٣٨ ٬ ٤٢
42 نُنمَرٍ تٌ سٌ، بٍينُن مَلَبُ لْشْي شَ قْلْ، 43 يُسُقُ عَرِ مَتٍكَ نَشَ سِفَ ثِلَتِ شْن. يُوِقِيٍ شَ كِيتِسَ بِنيٍ ندٍ نَن نُ عَ رَ نَشَن نُ عَلَ شَ مَنفّيَ نِينِ مَمّقٍ. لِمَنِيَ كُي، عَ نَشَ سَ ثِلَتِ مَشَندِ عِسَ قُرٍ مَ. 44 ثِلَتِ نَشَ تّرّننَ عَ كٌلٌنقٍ رَ عَ عِسَ حَن بَرَ قَشَ. عَ نَشَ سْورِ مَنفّ شِلِ، عَ عَ مَشْرِن نَ قٍ مَ. 45 سْورِ مَنفّ قَن تٌ عَ رَكٌلٌن عَ عِسَ بَرَ قَشَ، ثِلَتِ نَشَ عِسَ قُرٍ سٌ يُسُقُ يِ رَ. 46 يُسُقُ تٌ كَسَنفٍ سَرَ، عَ نَشَ عِسَ قُرٍ رَفٌرٌ وُرِ مَفَلَنبُشِ كْن، عَ عَ كَسَنفٍ، عَ قَ عَ بّلّ فَبُرِ كُي، نَشَن نُ فٍشِ فّمّ كُي. نَ شَنبِ، عَ نَشَ فّمّ شُنفبٍ مَحِندِفِلِن، عَ عَ دْشْ فَبُرِ دّ مَ. 47 مَرِيَمَ مَفِدَلَكَ نُن مَرِيَمَ يُسُقُ نفَ، عٍ نَشَ عَ تٌ عٍ عِسَ رَفَتَقٍ دّننَشّ.