16
قَرِ سّنِيٍ نُن سَدُ سٍنِيٍ شَ دَنشَنِيَتَرٍحَ
مَرَكِ ٨؛١١ ٬ ٢١
1 قَرِ سّنِيٍ نُن سّرِيّ كَرَ مْشْيٍ نَشَ قَ عِسَ يِرٍ. عٍ تٌ نُ وَ مَ فَنتَنيِ سَقٍ عَ بّ، عٍ نَشَ عَ مَشْرِن عَ شَ تْنشُمَ مَكَابَشِ ندٍ مَسٍن عٍ بّ كٍلِقٍ كٌورٍ مَ.
2 عِسَ نَشَ عٍ يَابِ، «نُنمَرٍ نَ عَ لِ وٌ نَشّ، ‹كُيٍ قَنمَ تِنَ، بَرِ مَ كٌورٍ عِفبٍيلِشِ.›
3 كُيٍ نّ عِبَ وٌ نَشّ، ‹تُنّ نُن قٌيٍ مِنِمَ نّ تٌ، بَرِ مَ كٌورٍ عِفبٍيلِشِ، نُشُييٍ عِقْورْ.› وٌ قَتَ كٌورٍ حِنفِ تَفِ رَبَدٍ، كْنْ وٌ مُ قَتَ يِ وَشَتِ قٍيٍ تَن تَفِ رَبَدٍ.
4 تٌ مِشِيٍ كٌبِ، عٍ بَرَ فبِلٍن عَلَ قْشْ رَ. عٍ وَ مَ تْنشُمَ مَكَابَشِ تٌقٍ، كْنْ تْنشُمَ يٌ مُ قِمَ عٍ مَ بَقٍ عَننَبِ يُنُسَ شَ تْنشُمَ رَ.»
نَ شَنبِ عِسَ نَشَ كٍلِ عٍ شُن مَ، عَ سِفَ.
5 عِسَ قْشِرَبِرّيٍ نَشَ فِرِ نَاكِرِ مَ، عٍ نّيمُ تَامِ مَ.
6 عِسَ نَشَ عَ مَسٍن عٍ بّ، «وٌ وٌ يّتّ رَتَنفَ قَرِ سّنِيٍ نُن سَدُ سٍنِيٍ شَ لّبِنِ مَ.»
7 عِسَ قْشِرَبِرّيٍ نَشَ نَ قٍ مَتٌ، عٍ قَ عَ قَلَ عٍ بٌرٍ بّ، «عَ نَ قَلَشِ نّ بَرِ مَ وٌن مُ قَشِ تَامِ رَ.»
8 عِسَ تٌ نُ عٍ شَ مَحْشُنيِ كٌلٌن، عَ نَشَ عَ مَسٍن عٍ بّ، «وٌ تَامِ قٍ قَلَمَ وٌ بٌرٍ بّ مُنقٍ رَ؟ وٌ شَ دَنشَنِيَ شُرُن.
9 هَن يَ وٌ مُ شَشِلِ سْتْ؟ كَ وٌ نّيمُشِ نّ تَامِ فُندِ سُولِ تٌ شّمّ وُلُ سُولِ وَ سَ؟ وٌ تٌ نَ تَامِ دْنشْي مَتٌنفٌ، وٌ دٍبٍيٍ يٍرِ رَقٍ؟
10 كَ وٌ مَن نّيمُشِ نّ تَامِ فُندِ سٌلٌقٍرٍ تٌ شّمّ وُلُ نَانِ وَ سَ؟ وٌ تٌ نَ قَن دْنشْي مَتٌنفٌ، وٌ دٍبٍيٍ يٍرِ رَقٍ؟
11 مُنسٍ عَ تٌشِ وٌ مُ عَ كٌلٌن عَ ﭑ مُ تَامِ قٍ شَ قَلَقٍ وٌ بّ؟ وٌ شَ وٌ يّتّ رَتَنفَ قَرِ سّنِيٍ نُن سَدُ سٍنِيٍ شَ لّبِنِ مَ.»
12 نَ كُي، عٍ نَشَ عَ قَهَامُ عَ عِسَ مُ عَ قَلَشِ شّ عٍ بّ عَ عٍ شَ عٍ يّتّ رَتَنفَ تَامِ لّبِنِ دَاشِ مَ. عَ نُ عَ قَلَقٍ نّ عٍ شَ عٍ يّتّ رَتَنفَ قَرِ سّنِيٍ نُن سَدُ سٍنِيٍ شَ شَرَنيِ مَ.
عِسَ قِندِشِ ندٍ رَ؟
مَرَكِ ٨؛٢٧ ٬ ٣٠، لُكِ ٩؛١٨ ٬ ٢١
13 عِسَ تٌ سٍسَرٍيَ قِلِثِ بْشِ لِ، عَ نَشَ عَ قْشِرَبِرّيٍ مَشْرِن، «مِشِيٍ مُنسٍ قَلَمَ عَدَ مَ شَ دِ شَ قٍ رَ؟ ندٍ لَنشِ عَ مَ؟»
14 عٍ نَشَ عَ يَابِ، «ندٍيٍ عَ قَلَمَ عَننَبِ يَيَ شُنشَ. ندٍيٍ عَ قَلَمَ عَننَبِ عٍلِيَ. ندٍيٍ عَ قَلَمَ عَننَبِ يٍرٍ مِ، شَ نَ مُ عَ رَ نَمِحْنمّ فبّتّ.»
15 عِسَ نَشَ عٍ مَشْرِن، «كْنْ وٌ تَن نَشّ عَ دِ؟ ندٍ ﭑ نَ؟»
16 سِمٌن ثِيّرِ نَشَ عَ يَابِ، «عَلَ شَ مِشِ سُفَندِشِ نَن نَ عِ رَ، عَبَدَن عَلَ شَ دِ.»
17 عِسَ نَشَ عَ قَلَ عَ بّ، «سّيوّ نَ عِ بّ، عِ تَن يُنُسَ شَ دِ سِمْن، بَرِ مَ عِبُنَدَ مَ شَ مُ نَ مَسٍنشِ عِ بّ. ﭑ بَبَ نَشَن نَ عَرِيَننَ، نَ نَن عَ مَسٍنشِ عِ بّ.
18 ﭑ شَ عَ قَلَ عِ بّ، عِ قِندِشِ ثِيّرِ نَن نَ، نَشَن قَلَشِ ‹فّمّ.› ﭑ نَن ﭑ مَ دَنشَنِيَتْي حَمَ تِمَ نَ فّمّ نَن قَرِ. هَلِ قَشّ، عَ مُ نْمَ ﭑ مَ حَمَ رَ.
19 ﭑ عَلَ شَ مَنفّيَ سَابِ سٌمَ نّ عِ يِ رَ. عِ نَ تْنيِ دْشْ قٍ نَشَن مَ دُنِحَ، عَلَ نَشَن نَ عَرِيَننَ، عَ قَن تْنيِ دْشْمَ نّ نَ قٍ رَ. عِ نَ تِن قٍ نَشَن نَ دُنِحَ، عَلَ نَشَن نَ عَرِيَننَ، عَ قَن تِنمَ نّ نَ قٍ رَ.»
20 نَ تّمُي عَ نَشَ عَ مَتِنتِن عَ قْشِرَبِرّيٍ رَ، عَ عٍ نَشَ عَ قَلَ مِشِ يٌ بّ، عَ عَ تَن نَن قِندِشِ عَلَ شَ مِشِ سُفَندِشِ رَ.
عِسَ عَ شَ قَشّ نُن مَرَكٍلِ شَ قٍ مَسٍنقٍ
مَرَكِ ٨؛٣١ ٬ ٣٣، لُكِ ٩؛٢٢
21 كٍلِ نَ تّمُي مَ، عِسَ نَشَ عَ تَفِ رَبَ قْلْ عَ قْشِرَبِرّيٍ بّ، عَ قٌ عَ شَ سِفَ دَرِ سَلَمُ، عَ شَ تْورّ فبٍفبٍ سْتْ يُوِقِيٍ شَ قٌرِيٍ، سّرّشّدُبّ كُنتِفِيٍ، نُن سّرِيّ كَرَ مْشْيٍ رَ، عٍ عَ قَشَ، كْنْ عَ مَن شَ كٍلِ قَشّ مَ عَ شِ سَشَن ندٍ مَ.
22 ثِيّرِ تٌ عَ بّندُن، عٍ سَ تِ عٍ شَتِ مَ، عَ نَشَ سٌ وْيّنقٍ عِسَ رَ، عَ عَ قَلَ عَ بّ، «عَلَ شَ عِ تَنفَ نَ مَ، ﭑ مَرِفِ! نَ قٍ مْولِ مُ عِ سْتْمَ قٍوٌ!»
23 عِسَ نَشَ عَ يَ رَقِندِ ثِيّرِ مَ، عَ عَ قَلَ، «كٍلِ ﭑ يَ عِ، عِ تَن سٍنتَنّ! عِ كَتَقٍ نّ عِ شَ ﭑ نَتَنتَن، بَرِ مَ عِ شَشِلِ مُ تِشِ عَلَ قٍيٍ شَ رَ، عَ تِشِ عَدَ مَ قٍيٍ نَن نَ.»
بِرَقٍ عِسَ قْشْ رَ
مَرَكِ ٨؛٣٤—٩؛١، لُكِ ٩؛٢٣ ٬ ٢٧
24 نَ تّمُي عِسَ نَشَ عَ مَسٍن عَ قْشِرَبِرّيٍ بّ، «شَ مِشِ وَ بِرَقٍ ﭑ قْشْ رَ، عَ شَ عَ يّتّ وَشْنقٍ فٍرٍ، عَ شَ تٌندِ عَ يّتّ مَ، عَ تِن تْورّ نُن قَشّ رَ، عَ بِرَ ﭑ قْشْ رَ.
25 مِشِ نَشَن وَ مَ عَ يّتّ رَكِسِقٍ، نَ كَنيِ لْيمَ نّ. نَشَن عَ يّتّ رَلْيمَ ﭑ تَن مَ قٍ رَ، نَ كَنيِ كِسِمَ نّ.
26 دُنِحَ بِرِن سْتْي مُنسٍ قَنمَ مِشِ مَ، شَ عَ سِفَمَ يَهَننَمَ؟ قٍ مُندُن نَ، مِشِ نْمَ عَ شَ عَرِيَننَ مَسَرَدٍ نَشَن نَ؟
27 عَدَ مَ شَ دِ قَمَ قَدٍ عَ بَبَ شَ نْرّ كُي، عٍ نُن عَ شَ مَلٍكّيٍ. نَ تّمُي عَ مِشِ بِرِن سَرٍ قِمَ نّ، كَنكَن نُن عَ كّوَلِ.
28 ﭑ شَ نْندِ قَلَ وٌ بّ، مِشِ ندٍيٍ تِشِ وٌ يَ مَ بٍ، نَشٍيٍ مُ قَشَمَ قٌ عٍ عَدَ مَ شَ دِ تٌ قَ رَ عَ شَ مَنفّيَ كُي.»