4
سٍنتَنّ كَتَقٍ عَ شَ عِسَ رَتَنتَن
مَرَكِ ١؛١٢ ٬ ١٣، لُكِ ٤؛١ ٬ ١٣
1 عَلَ شَشِلِ نَشَ عِسَ شُن تِ فبٍنفبٍرٍنيِ مَ عَلَكٌ عِبُلِسَ شَ سَ كَتَ عَ شَ عَ رَتَنتَن.
2 عِسَ تٌ نُ بَرَ سُن شِ تٌنفٌ نَانِ، كْي نُن يَنيِ، كَامّ نُ نَ عَ مَ.
3 مَرَتَنتَنمَ تٌ مَسٌ عَ رَ، عَ نَشَ عَ قَلَ عَ بّ، «شَ عَلَ شَ دِ نَن عِ رَ، يَامَرِ قِ يِ فّمّيٍ شَ قِندِ تَامِ رَ.»
4 عِسَ نَشَ عَ يَابِ، «عَ سّبّشِ كِتَابُي كُي، ‹مِشِ مُ بَلٌمَ تَامِ فبَنسَن شَ رَ. عَلَ شَ مَسٍنيِ بِرِن قِندِشِ بَلٌي نَن نَ عَدَ مَ بّ.›»
5 عِبُلِسَ نَشَ عَ شَنِن دَرِ سَلَمُ، تَا سّنِيّنشِ، عَ عَ تِ عَلَ شَ هْرْ مْبَنشِ قَرِ، يِرٍ عِتٍشِ.
6 عَ نَشَ عَ قَلَ عَ بّ، «شَ عَلَ شَ دِ نَن لَنشِ عِ مَ، تُفَن، بَرِ مَ عَ سّبّشِ،
‹عَلَ يَامَرِ قِمَ نّ عَ شَ مَلٍكّيٍ مَ عِ شَ قٍ رَ،›
‹عٍ عٍ بّلّشّيٍ رَ سٌمَ نّ عِ بُن مَ،
عٍ عِ رَلَشُن عَلَكٌ عِ سَنيِ نَشَ دِن فّمّ رَ.›»
7 عِسَ نَشَ عَ يَابِ، «عِيٌ، كْنْ عَ مَن سّبّشِ كِتَابُي كُي، ‹عِ نَشَ عِ مَرِفِ عَلَ مَتٌ.›»
8 عِبُلِسَ مَن نَشَ عَ شَنِن فٍيَ عِتٍشِ قَرِ، عَ قَ دُنِحَ مَنفّيَ بِرِن مَسٍن عَ بّ، عٍ نُن عٍ شَ دَرِيّ.
9 عَ نَشَ عَ قَلَ عَ بّ، «ﭑ يِ بِرِن قِمَ نّ عِ مَ شَ عِ سُيِدِ ﭑ بّ، عِ ﭑ بَتُ.»
10 عِسَ نَشَ عَ يَابِ، «سٍنتَنّ، كٍلِ بٍ! عَ سّبّشِ كِتَابُي كُي، ‹عِ شَ عِ مَرِفِ عَلَ فبَنسَن نَن بَتُ، عِ شَ سُيِدِ عَ كٍرٍن نَن بّ.›»
11 نَ وْيّنيِ دَنفِ شَنبِ، عِبُلِسَ نَشَ كٍلِ عَ شُن. مَلٍكّيٍ نَشَ عٍ مَسٌ عِسَ رَ، عٍ عَ سّنبّ سٌ.
عِسَ عَ شَ وَلِ قْلْقٍ فَلِلٍ بْشِ مَ
مَرَكِ ١؛١٤ ٬ ٢٠، لُكِ ٤؛١٤ ٬ ١٥
12 عِسَ تٌ عَ مّ عَ يَيَ بَرَ سَ فٍيلِ، عَ نَشَ فبِلٍن فَلِلٍ بْشِ مَ.
13 عَ نَشَ كٍلِ نَسَرّتِ تَا كُي، عَ سَ سَبَتِ كَثّرّنَمُ، تَا ندٍ نَشَن نُ نَ بَا دّ رَ، سَبُلٌن نُن نَقَتَلِ بْشِ مَ.
14 نَ نَشَ رَبَ عَلَكٌ عَننَبِ عٍسَيِ شَ مَسٍنيِ شَ كَمَلِ،
15 «سَبُلٌن نُن نَقَتَلِ بْشِ،
نَشٍيٍ نَ كِرَ رَ سِفَقٍ بَا دّ رَ يُرُدّن نَاكِرِ،
وٌ قِندِشِ فَلِلٍ بْشِ نَن نَ نَشَن نَ سِ فبّتّيٍ بّلّشّ.
16 حَمَنّ نَشَن دْشْشِ دِ مِ كُي،
عٍ بَرَ نَءِيَلَنيِ بٍلٍبٍلٍ تٌ.
نَشٍيٍ دْشْشِ قَشّ شَ دِ مِ كُي،
نَءِيَلَنيِ بَرَ مِنِ عٍ بّ.»
17 كٍلِ نَ تّمُي مَ، عِسَ نَشَ كَوَندِ تِ قْلْ، عَ نُ عَ قَلَ، «وٌ تُوبِ، بَرِ مَ عَلَ شَ مَنفّيَ نِينِ بَرَ مَكْرّ.»
عِسَ عَ قْشِرَبِرّ سِنفٍيٍ شِلِقٍ
مَرَكِ ١؛١٦ ٬ ٢٠، لُكِ ٥؛١ ٬ ١١
18 عِسَ تٌ نُ حّرّقٍ فَلِلٍ بَا دّ رَ، عَ نَشَ شّمّ قِرِن تٌ عٍ نَ يّلّ وٌلِقٍ. يّشّسُشُييٍ نَن نُ عٍ رَ، سِمْن، نَشَن شِلِ ثِيّرِ، عَ نُن عَ شُنيَ عَندِرٍ.
19 عِسَ نَشَ عَ قَلَ عٍ بّ، «وٌ بِرَ ﭑ قْشْ رَ. تّمُي دَنفِشِ وٌ نُ يّشّ نَن سُشُمَ، كْنْ يَكْسِ ﭑ عَ نِيَمَ وٌ شَ نُ مِشِيٍ نَن سْتْ ﭑ بّ.»
20 عٍ نَشَ عٍ شَ يّلّيٍ لُ نَ كٍرٍن نَ، عٍ بِرَ عِسَ قْشْ رَ.
21 عٍ تٌ سِفَ، عٍ نَشَ شّمّ قِرِن فبّتّ تٌ، سٍبٍدٍ شَ دِ يَكِ نُن عَ شُنيَ يَيَ. عٍ نُ نَ يّلّيٍ مَدّفّقٍ كُنكُي كُي عٍ بَبَ سٍبٍدٍ قّ مَ. عِسَ نَشَ عٍ شِلِ،
22 عٍ قَن نَشَ كُنكُي نُن عٍ بَبَ لُ نَ كٍرٍن نَ، عٍ بِرَ عِسَ قْشْ رَ.
عِسَ مِشِيٍ كَوَندِقٍ نُن قُرٍ مَيٍ رَيَلَنقٍ
لُكِ ٦؛١٧ ٬ ١٩
23 نَ شَنبِ عِسَ نَشَ فَلِلٍ بْشِ بِرِن عِسَ قْلْ. عَ نُ مِشِيٍ شَرَنمَ عٍ شَ سَلِدٍيٍ كُي، عَ نُ عٍ كَوَندِ عَلَ شَ مَنفّيَ نِينِ شَ شِبَارُ قَنيِ رَ، عَ نُ قُرٍ مَ مْولِ بِرِن نَيَلَن حَمَ يَ مَ.
24 عَ شِلِ نَشَ تٍ سِرِيَ بْشِ بِرِن مَ. مِشِيٍ نَشَ قَ قُرٍ مَ مْولِ بِرِن نَ عَ شْن مَ. عٍ نُ قَمَ مِشِيٍ رَ نَشٍيٍ نُ نَ تْورْقٍ عَ حَاشِ رَ، حِننّ نُ نَشٍيٍ قْشْ رَ، بِرَ قُرٍ نُ نَ نَشٍيٍ مَ، عَ نُن نَمَتّيٍ. عِسَ نُ عٍ بِرِن نَيَلَنمَ.
25 حَمَ فبٍفبٍ نَشَ بِرَ عَ قْشْ رَ كٍلِقٍ فَلِلٍ بْشِ مَ، تَا قُ بْشِ، دَرِ سَلَمُ، يُدَيَ، نُن بْشِ نَشَن نَ يُرُدّن نَاكِرِ مَ.