27
فِنّيٍ شَ كّ سّرِيّ
1 يُسُقُ شَ دِ شّمّ مَنَسِ، نَ قَن شَ دِ شّمّ مَكِرِ، نَ قَن شَ دِ شّمّ فَلَدِ، نَ قَن شَ دِ شّمّ شٍقٍرِ، نَ قَن شَ دِ شّمّ سٍلٌقٍشَدِ، دِ فِنّ سُولِ نَن سْتْ، نَشٍيٍ نُ شِلِ؛ مَشَلَ، نٌوَ، شٌفَلَ، مِلِكَ نُن تِرِ سَ.
2 نَ دِ فِنّيٍ نَن قَ عٍ يّتّ كَن دّنتّفّ مُنسَ، عٍلٍيَسَرِ سّرّشّدُبّ، نُن عِسِرَيِلَ يَرٍرَتِيٍ بّ، عِسِرَيِلَ حَمَ بِرِن يَ شْرِ، هْرْ مْلِنفِرَ سٌدٍ دّ رَ. عٍ نَشَ عَ مَسٍن،
3 «مُشُ بَبَ مُ دِ شّمّ سْتْ. عَ بَرَ قَشَ فبٍنفبٍرٍنيِ مَ، كْنْ عَ مُ نُ نَ كٌرَ شَ مِشِيٍ يَ مَ نَشٍيٍ كٍلِ عَلَتَلَ شِلِ مَ. عَ تَن قَشَ عَ يّتّ كَن شَ يُنُبِ رَبَشِ نَن مَ.
4 مُنقٍ رَ مُشُ بَبَ شِلِ بَمَ عَ شَبِلّ شَ مِشِيٍ يَ مَ، دِ شّمّ تٌ مُ نَ عَ بّ؟ كّ ندٍ سٌ مُشُ قَن يِ رَ، مُشُ بَبَ نفَشَكٍرٍنيِيٍ تَفِ!»
5 مُنسَ نَشَ عٍ شَ قٍ دّنتّفّ عَلَتَلَ بّ.
6 عَلَتَلَ نَشَ عَ مَسٍن عَ بّ،
7 «سٍلٌقٍشَدِ شَ دِ فِنّيٍ بَرَ نْندِ قَلَ. عٍ بَبَ كّ سٌ عٍ يِ رَ عَلْ عٍ بَبَ نفَشَكٍرٍنيِيٍ عَ سْتْ كِ نَشّ.
8 عَ قَلَ عِسِرَيِلَكَيٍ بّ، ‹شَ شّمّ ندٍ سَ قَشَ دِ شّمّ شَنبِ، وٌ عَ كّ سٌ عَ شَ دِ فِنّيٍ يِ رَ.
9 شَ دِ فِنّ قَن مُ نَ عَ بّ، وٌ عَ كّ سٌ عَ قَقَشَكٍرٍنيِيٍ يِ رَ.
10 شَ قَقَشَكٍرٍن يٌ مُ نَ عَ بّ، وٌ عَ سٌ عَ بَبَ قَقَشَكٍرٍنيِيٍ يِ رَ.
11 شَ عَ سَ لِ، عَ بَبَ قَقَشَكٍرٍن يٌ مُ نَ، وٌ عَ كّ سٌ مِشِ يِ رَ، عٍ نُن نَشَن مَكْرّ عٍ بٌورٍ رَ عَ شَبِلّيٍ يَ مَ.› نَ شَ قِندِ يَامَرِ نُن سّرِيّ رَ عِسِرَيِلَكَيٍ بّ، عَلْ ﭑ تَن عَلَتَلَ عَ يَمَرِشِ عِ بّ كِ نَشّ.»
يٌسُوٍ قِندِقٍ مُنسَ حْشْي رَ
12 عَلَتَلَ نَشَ عَ مَسٍن مُنسَ بّ، «تٍ يِ عَبَرِ مِ فٍيَ قَرِ، عَلَكٌ عِ شَ بْشِ مَتٌ ﭑ نَشَن قِمَ عِسِرَيِلَكَيٍ مَ.
13 عِ نَ فّ عَ مَتٌدٍ، عِ تَا مَسَرَ مَ نّ، عِ فبِلٍن عِ بٍنبَيٍ مَ عَلْ عِ تَارَ هَرُنَ،
14 بَرِ مَ وٌ بَرَ ﭑ مَ يَامَرِ مَتَندِ. عِسِرَيِلَكَيٍ تٌ كٍلِ ﭑ شِلِ مَ يٍ شْلِ شَ قٍ رَ كَدٍ سِ، سِنِ فبٍنفبٍرٍنيِ مَ، وٌ مُ سٍيدٍحْشْيَ رَبَ ﭑ مَ سّنِيّنيِ شَ قٍ رَ.»
15 مُنسَ نَشَ عَ قَلَ عَلَتَلَ بّ،
16 «عَلَتَلَ، دَالِ بِرِن مَرِفِ عَلَ، مِشِ كٍرٍن دْشْ حَمَ شُن مَ،
17 نَشَن تِمَ عٍ يَ رَ، عٍ مِنِ تّمُي نُن عٍ سٌ تّمُي، نَشَن عٍ رَ مِنِمَ، عَ عٍ رَ سٌ، عَلَكٌ عِ شَ حَمَ نَشَ لُ عَلْ شُرُ سٍ نَشٍيٍ رَبّحِنشِ عٍ يّتّ مَ، كَنتَمَ يٌ مُ عٍ بّ.»
18 عَلَتَلَ نَشَ عَ مَسٍن مُنسَ بّ، «عِ شَ نُنُ شَ دِ يٌسُوٍ سُفَندِ، شَشِلِ سّنِيّنشِ نَ نَشَن مَ. عِ شَ عِ بّلّشّ سَ عَ مَ.
19 عِ شَ عَ تِ عٍلٍيَسَرِ سّرّشّدُبّ نُن حَمَ بِرِن يَ شْرِ، عِ قَ يَامَرِيٍ سٌ عَ يِ رَ،
20 عِ شَ مَنفّيَ ندٍ شَ دَنفِ عَ مَ، عَلَكٌ عِسِرَيِلَ حَمَ بِرِن شَ عَ شُي سُشُ.
21 عَ تِمَ نّ عٍلٍيَسَرِ سّرّشّدُبّ يَ عِ ﭑ وَشْنقٍ مَشْرِندٍ فّمّ سُفَندِشِيٍ رَ. ﭑ يَابِ نَشَن قِمَ، عَ تَن نُن حَمَ بِرِن حّرّ مَ نَ نَن مَ. عٍ مِنِمَ عٍلٍيَسَرِ سّرّشّدُبّ شُي نَن مَ، عٍ سٌمَ يٌسُوٍ شُي نَن مَ.»
22 مُنسَ نَشَ عَلَتَلَ شَ يَامَرِ رَبَ. عَ نَشَ يٌسُوٍ تٌنفٌ، عَ سَ عَ تِ عٍلٍيَسَرِ سّرّشّدُبّ نُن عِسِرَيِلَ حَمَ يَ عِ،
23 عَ عَ بّلّشّ سَ عَ مَ، عَ يَامَرِيٍ سٌ عَ يِ رَ، عَلْ عَلَتَلَ نُ بَرَ عَ يَمَرِ كِ نَشّ.