139
عَلَ مِشِيٍ كٌلٌنقٍ
عَلَ مَتْشْي
دَوُدَ شَ بّيتِ بّيتِبَيٍ شَ مَنفّ بّ
عَلَتَلَ، عِ ﭑ بْحّ بِرِن كٌلٌن.
عِ ﭑ دْشْ تّمُي كٌلٌن، عِ ﭑ كٍلِ تّمُي كٌلٌن،
عِ ﭑ مَ مَحْشُنيِيٍ بِرِن كٌلٌن
بٍينُن ﭑ شَ عٍ مَحْشُن.
عِ ﭑ حّرّ تّمُي كٌلٌن، عِ ﭑ سَ تّمُي كٌلٌن،
عِ ﭑ مَ كِرَيٍ بِرِن كٌلٌن.
بٍينُن وْيّنيِ شَ مِنِ ﭑ دّ عِ،
عِ تَن حَن بَرَ عَ بِرِن كٌلٌن.
عِ ﭑ نَبِلِنمَ نّ عِ شْنيّيٍ رَ.
نَ قٍ كٌلٌنيِ مَكَابَشِ فبٌ ﭑ تَن بّ،
عَ دَنفِ ﭑ مَ قَهَامُي رَ.
 
ﭑ سِفَمَ مِندٍن، ﭑ شَ ﭑ مَكُيَ عِ شَشِلِ رَ؟
ﭑ نَ ﭑ فِمَ مِندٍن، ﭑ شَ ﭑ نْشُن عِ مَ؟
شَ ﭑ سَ تٍ كٌورٍ نّ، عِ نَ مّننِ.
شَ ﭑ سَ فٌرٌ عَلِفِيَمَ نّ، ﭑ عِ لِمَ نّ نَا.
شَ ﭑ سَ كٍلِ سُبَشّ مَ، ﭑ بَا عِفِرِ،
10 عِ بّلّشّ ﭑ نَحّرّ مَ نّ، عِ سّنبّ ﭑ مَلِمَ نّ.
11 شَ عَ سَ لِ ﭑ قَ عَ قَلَ،
«ﭑ نْمَ ﭑ نْشُندٍ دِ مِ كُي نَءِيَلَنيِ مُ نَ دّننَشّ،»
12 عِ ﭑ تٌمَ نّ نَ دِ مِ كُي عَلْ ﭑ نَ سٌفٍ نَن بُن مَ.
 
13 عِ تَن نَن ﭑ نِي دَاشِ،
عِ تَن نَن ﭑ نَقَلَشِ ﭑ نفَ تّيفّ.
14 ﭑ عِ مَتْشْمَ نّ بَرِ مَ ﭑ دَا كِ مَكَابَ.
عِ شَ وَلِ مَنِيّ مُ نَ.
ﭑ نَ كٌلٌنشِ عَ قَنيِ رَ.
15 ﭑ قَتٍ كِ مُ نُ نْشُنشِ عِ مَ
عَ تٌ يَءِلَنشِ فُندٌ كُي.
16 عِ يَيٍ نَشَ ﭑ تٌ بٍينُن ﭑ شَ قِندِ عَ رَ.
ﭑ مَ لْشْييٍ بِرِن نُ سّبّشِ عِ شَ بُكِ كُي بٍينُن ﭑ شَ دَالِ.
17 عَلَ، عِ شَ مَحْشُنيِيٍ فبٌ، عٍ تِلِن.
18 شَ ﭑ سَ عٍ كْنتِمَ نّ نُ، عٍ وُيَ مّيّنيِ شْرِ بّ.
نَ بِرِن كُي، ﭑ لُمَ عِ يِ.
 
19 عَلَ، يَندِ، عِ شَ مِشِ حَاشِيٍ قَشَ،
عِ شَ قَشّتِيٍ مَكُيَ ﭑ نَ.
20 عِ يَشُييٍ قٍ حَاشِ قَلَمَ عِ شَ قٍ رَ، عٍ عِ شِلِ كَنَمَ.
21 عَلَتَلَ، عَ مُ لَنمَ ﭑ شَ عِ شْنمِشِيٍ شْن؟
عَ مُ لَنمَ عِ مَتَندِلَيٍ شَ رَحَاشُ ﭑ مَ؟
22 ﭑ عٍ شْنمَ نّ. عٍ بَرَ قِندِ ﭑ يَشُييٍ رَ.
 
23 عَلَ عِ شَ ﭑ بْحّ كُي مَتٌ،
عِ شَ ﭑ مَ كْنتْقِلِ كٌلٌن.
24 عَ مَتٌ شَ ﭑ نَ كِرَ كٌبِ ندٍ نَن شْن مَ،
عِ نَشَن شْنشِ.
شَ عَ نَ نَ كِ نّ، عِ شَ ﭑ تِ كِسِ كِرَ نَن شْن مَ.