5
بُكِ ندٍ رَبِقٍ
نَ دَنفِ شَنبِ، ﭑ نَشَ عَلَ تٌ عَ شَ كِبَنيِ كُي، بُكِ ندٍ نُ نَ عَ شْنيّ، سّبّلِ تِشِ عَ كُي نُن عَ قَرِ، عَ مَبَلَنشِ عَ بَلَنسٍ سٌلٌقٍرٍ رَ. ﭑ نَشَ مَلٍكّ سّنبّمَ ندٍ تٌ، عَ عَ قَلَمَ عَ شُي عِتٍشِ رَ، «ندٍ نْمَ يِ بُكِ رَبِدٍ، ندٍ نْمَ عَ بَلَنسٍيٍ بَدٍ عَ مَ؟» نِمَسٍ يٌ مُ نُ نَ كٌورٍ مَ، بْشِ مَ، شَ نَ مُ عَ رَ بْشِ بُن مَ، نَشَن نُ نْمَ نَ بُكِ رَبِدٍ، عَ عَ كُي مَتٌ. نَ كُي، ﭑ نَشَ وَ عَ فبٍفبٍ رَ، بَرِ مَ نِمَسٍ يٌ مُ نُ نَ، نَشَن نُ نْمَ نَ بُكِ رَبِدٍ، عَ عَ كُي مَتٌ. قٌرِ ندٍ نَشَ عَ قَلَ ﭑ بّ، «عِ نَشَ وَ، يُدَ بْنسْي شَ يّتّ، نَشَن قِندِشِ دَوُدَ بْنسْي رَ، عَ بَرَ فٍينِ. عَ تَن نَن نْمَ نَ بُكِ نُن عَ بَلَنسٍ سٌلٌقٍرٍ رَبِدٍ.»
نَ تّمُي ﭑ نَشَ يّشّييْرّ تٌ عَ تِشِ كِبَنيِ نُن نَ نِمَسٍ نَانِ نُن نَ قٌرِيٍ تَفِ. نَ يّشّييْرّ نُ لُشِ نّ عَلْ عَ كْن نَشَبَشِ. قٍرِ سٌلٌقٍرٍ نُن يَ سٌلٌقٍرٍ نُ نَ عَ بّ، نَشٍيٍ مِسَالِشِ عَلَ شَشِلِ سّنِيّنشِ كَمَلِشِ رَ، نَشَن نُ بَرَ شّي دُنِحَ يِرٍ بِرِن مَ. يّشّييْرّ نَشَ عَ مَسٌ عَلَ رَ، نَشَن نُ مَفٌرٌشِ كِبَنيِ كُي، عَ قَ بُكِ رَ سُشُ عَلَ يِرٍقَنيِ شْنيّ.
عَ تٌ بُكِ مَسْتْ، نَ نِمَسٍ نَانِ نُن نَ قٌرِ مْشْحّن نُن نَانِ، عٍ نَشَ سُيِدِ يّشّييْرّ بّ. كْرَ نُ نَ عٍ بِرِن يِ رَ، عَ نُن سُرَيِ سَسٍ شّيمَ دَاشِ نَشٍيٍ رَقٍشِ سُرَيِ رَ، نَشَن مِسَالِشِ سّنِيّنتْييٍ شَ عَلَ مَشَندِيٍ رَ. عٍ نَشَ بّيتِ نّينّ ندٍ بَ، عٍ نُ عَ قَلَ،
«عِ تَن نَن دَشَ يِ بُكِ تٌنفٌدٍ،
عِ تَن نَن دَشَ عَ بَلَنسٍيٍ رَبِدٍ،
بَرِ مَ عِ بَرَ عِ يّتّ بَ سّرّشّ رَ،
عِ بَرَ عَدَ مَدِيٍ شُنسَرَ عَلَ بّ عِ وُلِ سَابُي رَ،
عَدَ مَدِ نَشٍيٍ كٍلِشِ بْنسْي بِرِن،
نَشٍيٍ شُي بِرِن قَلَمَ،
نَشٍيٍ قَتَنشِ حَمَنّ نُن سِ بِرِن نَ.
10 عِ بَرَ نَ عَدَ مَدِيٍ قِندِ سّرّشّدُبّيٍ رَ
مُشُ مَرِفِ عَلَ بّ.
عِ بَرَ عٍ رَ سٌ عَلَ شَ مَنفّيَ نِينِ بُن مَ.
عٍ قَمَ نّ دُنِحَ يَمَرِدٍ.»
 
11 نَ تّمُي ﭑ نَشَ مَلٍكّ وُلُ وُلُ وُيَشِ تٌ، ﭑ نَشَ عٍ شُي مّ عَلَ شَ كِبَنيِ، نَ قٌرِيٍ، نُن نَ نِمَسٍيٍ رَبِلِنيِ. 12 عٍ نَشَ عَ قَلَ عٍ شُي عِتٍشِ رَ، «يّشّييْرّ نَشَن بَشِ سّرّشّ رَ، عَ دَشَ عَ شَ سّنبّ، بَننَيَ، لْننِ، نْي، بِنيّ، مَتْشْي، نُن تَنتُي سْتْ.» 13 نِمَسٍ نَشَن بِرِن نَ كٌورٍ مَ، بْشِ قَرِ، بْشِ بُن مَ، بَا مَ، عَ نُن دَالِسٍ بِرِن، ﭑ نٍيٍ بِرِن شُي مّ نّ، عٍ نُ قَ عَ قَلَ، «مَتْشْي، بِنيّ، تَنتُي، نُن سّنبّ نَ عَلَ بّ نَشَن مَفٌرٌشِ كِبَنيِ كُي، عَ نُن يّشّييْرّ بّ عَبَدَن.» 14 نَ نِمَسٍ نَانِ نَشَ عَ رَتِن، «عَمِنَ.» قٌرِيٍ نَشَ عٍ قٍلٍن بْشِ مَ، عٍ عَلَ نُن يّشّييْرّ بَتُ.