15
سْلُ شَ تَنتَنيِ
1 سَمُوٍلِ نَشَ عَ قَلَ سْلُ بّ، «عَلَتَلَ ﭑ تَن نَن شّي ﭑ شَ عِ سُفَندِ مَنفّ رَ عَ شَ حَمَ عِسِرَيِلَ شُن مَ. عِ تُلِ مَتِ عَلَتَلَ شَ مَسٍنيِ رَ.
2 مَنفّ عَلَتَلَ شُي نَن يَ؛ ‹ﭑ بَرَ نَتّ تٌنفٌ عَمَلّكِكَيٍ شَ قٍ رَ، نَشٍيٍ تٌندِ عِسِرَيِلَ شَ دَنفِ عٍ شَ كِرَ شْن كٍلِقٍ رَ مِسِرَ.
3 يَكْسِ، سِفَ، عٍ رَتْن. عِ نَشَ عٍ سٍسٍ لُ نَا. عِ شَ عٍ شَ شّمّيٍ، عٍ شَ فِنّيٍ، عٍ شَ دِيٍ، عٍ شَ دِيْرّيٍ، عٍ شَ نِنفٍيٍ، عٍ شَ يّشّييٍ، عٍ شَ سِيٍ، عٍ شَ حْشْمّيٍ، عٍ شَ سٌقَلٍيٍ بِرِن قَشَ.›»
4 سْلُ نَشَ عَ شَ سْورِ فَلِ مَلَن تٍلَيِمِ. شّمّ مِشِ وُلُ كّمّ قِرِن نَن قَشِ كٍلِقٍ كْولَ مَ، شّمّ مِشِ وُلُ قُ نَن قَشِ كٍلِقٍ يُدَ بْنسْي مَ.
5 سْلُ نَشَ فَنتَنيِ تٍ قٌلٍ كُي عَمَلّكِكَيٍ شَ تَا قَرِ مَ.
6 عَ نَشَ عَ قَلَ كٍنِ بْنسْي بّ، «وٌ مِنِ عَمَلّكِكَيٍ تَفِ، عَلَكٌ وٌ نَشَ سْنتْ عٍ يَ مَ، بَرِ مَ وٌ هِننّ نّ عِسِرَيِلَكَيٍ رَ عٍ مِنِشِ مِسِرَ بْشِ رَ تّمُي نَشّ.» كٍنِ بْنسْي نَشَ مِنِ عَمَلّكِكَيٍ يَ مَ.
7 سْلُ نَشَ عَمَلّكِكَيٍ بْنبْ كٍلِقٍ هَوِلَ مَ هَن سُرِ سٌدٍ دّ رَ مِسِرَ يَ رَ.
8 عَ نَشَ عَمَلّكِ مَنفّ عَفَفَ سُشُ، عَ مُ عَ قَشَ، كْنْ عَ نَشَ عَ شَ حَمَ تَن بِرِن سْنتْ سَنتِدّفّمَ رَ.
9 سْلُ نُن عَ شَ حَمَ مُ تِن عَفَفَ قَشَدٍ. عٍ نَشَ عَ لُ عَ نِي رَ، عَ نُن عَ شَ شُرُ سٍ قَنيِ بْرْفّشِيٍ، عَ شَ يّشّييٍ، عَ شَ سِيٍ، نُن عَ شَ نِنفٍيٍ. عٍ مُ تِن نٍيٍ سْنتْدٍ، كْنْ نَشٍيٍ مُ قَنشِ، عٍ نٍيٍ نَن قَشَ.
10 عَلَتَلَ نَشَ يِ مَسٍنيِ تِ سَمُوٍلِ بّ،
11 «ﭑ نِمِسَشِ سْلُ شَ قٍ رَ ﭑ نَشَن تِشِ مَنفّ رَ، بَرِ مَ عَ بَرَ عَ كٌبٍ سٌ ﭑ نَ، عَ مُ بِرَشِ ﭑ وْيّن شُي قْشْ رَ.» سَمُوٍلِ نَشَ سُننُن كِ قَنيِ، عَ عَلَتَلَ مَكُلَ نَ كْي بِرِن نَ.
12 عَ نَشَ كٍلِ سُبَشّ مَ، عَ سِفَ سْلُ يِرٍ. مِشِ ندٍ نَشَ عَ قَلَ عَ بّ عَ سْلُ بَرَ سِفَ كَرٍ مٍلٍ فٍيَ قَرِ تْنشُمَ ندٍ تِدٍ. نَ دَنفِ شَنبِ، عَ كٍلِ مّننِ، عَ فٌرٌ فِلِفَلِ.
13 سَمُوٍلِ تٌ سْلُ يِرٍ لِ، سْلُ نَشَ عَ قَلَ عَ بّ، «عَلَ شَ بَرَكَ سَ عِ مَ. ﭑ بَرَ عَلَتَلَ شَ يَامَرِ رَتِنمّ.»
14 سَمُوٍلِ نَشَ عَ مَشْرِن، «ﭑ شُرُ سٍ وَ شُي مُندُن مّقٍ يِ كِ؟»
15 سْلُ نَشَ عَ يَابِ، «حَمَ نَن قَشِ يِ شُرُ سٍيٍ رَ عٍ نَشَن تٌنفٌشِ عَمَلّكِكَيٍ يِ رَ، عَلَكٌ عٍ شَ عٍ بَ سّرّشّ رَ عِ مَرِفِ عَلَتَلَ بّ. مُشُ بَرَ نَ دْنشْي تَن سْنتْ.»
16 سَمُوٍلِ نَشَ عَ قَلَ سْلُ بّ، «عَوَ يِرٍ. ﭑ شَ عَلَتَلَ شَ مَسٍنيِ قَلَ عِ بّ عَ نَشَن قِشِ ﭑ مَ يِ كْي رَ.» سْلُ نَشَ عَ قَلَ، «عَوَ، نَ قَلَ ﭑ بّ.»
17 سَمُوٍلِ نَشَ عَ قَلَ، «عَلَتَلَ مُ عِ تِشِ شّ مَنفّ رَ عِسِرَيِلَ بْنسْي شُن مَ، هَلِ عِ تٌ نُ عَ كٌلٌن مِشِ شُرُدِ نَن عِ رَ؟
18 عَلَتَلَ عِ شّي نّ، عَ عَ قَلَ عِ بّ، ‹سِفَ عَمَلّكِ يُنُبِتْييٍ سْنتْدٍ. عِ شَ عٍ بِرِن حْن قٍوٌ›.
19 مُنقٍ رَ عِ مُ عِ تُلِ مَتِشِ عَلَتَلَ شُي رَ؟ مُنقٍ رَ عِ بَفَنشِ نَ سٍيٍ مَ، عِ قٍ حَاشِ رَبَ عَلَتَلَ يَ عِ؟»
20 سْلُ نَشَ سَمُوٍلِ يَابِ، «ﭑ بَرَ عَلَتَلَ شُي رَبَتُ عَ قَنيِ رَ. ﭑ بَرَ بِرَ عَ شَ كِرَ قْشْ رَ، عَ ﭑ تِشِ نَشَن شْن مَ. ﭑ قَشِ عَمَلّكِ مَنفّ عَفَفَ نَن تُن نَ، ﭑ بَرَ عَمَلّكِ حَمَ دْنشْي بِرِن سْنتْ.
21 كْنْ حَمَ بَرَ عَ شَ شُرُ سٍ قَنيِيٍ مَيٍفٍتِ، نٍيٍ شَ قِندِ سّرّشّ قِسَمَنتٍيٍ رَ عِ مَرِفِ عَلَتَلَ بّ فِلِفَلِ.»
22 سَمُوٍلِ نَشَ عَ يَابِ،
«عَلَتَلَ حّلّشِنمَ سّرّشّ فَن دَاشِيٍ نُن هَدِيَيٍ نَن نَ بَ،
كَ عَ حّلّشِنمَ مِشِيٍ نَن نَ نَشٍيٍ عَ شُي رَبَتُمَ؟
ﭑ شَ عَ قَلَ عِ بّ،
يَامَرِ رَبَتُقٍ قِسَ سّرّشّ بَقٍ بّ،
يّتّ مَفٌرٌي قِسَ، يّشّي كٌنتٌنيِ تُرٍ بّ.
23 عَلَ شُي مَتَندِقٍ حَاشُ،
عَلْ سٍمَتٌي شَ وَلِ حَاشُشِ كِ نَشّ.
عَلَ شَ يَامَرِ مَتَندِقٍ حَاشُ،
عَلْ كُيٍ بَتُقٍ حَاشُشِ كِ نَشّ.
عِ تٌ بَرَ عَلَتَلَ شَ يَامَرِ رَبّحِن،
عَ قَن قَمَ نّ عِ رَبّحِندٍ،
عَ مَنفّيَ بَ عِ يِ رَ.»
24 سْلُ نَشَ عَ قَلَ سَمُوٍلِ بّ، «ﭑ بَرَ يُنُبِ رَبَ. ﭑ بَرَ عَلَتَلَ شَ سّرِيّ كَنَ، ﭑ بَرَ عِ قَن شُي مَتَندِ. ﭑ نُ فَاشُشِ حَمَ نَن يَ رَ، ﭑ نَشَ ﭑ تُلِ مَتِ عٍ رَ.
25 يَكْسِ ﭑ بَرَ عِ مَيَندِ، دِحّ ﭑ مَ يُنُبِ مَ. عِ نَشَ فبِلٍن ﭑ قْشْ رَ. نَ كُي ﭑ قَن شَ سُيِدِ عَلَتَلَ بّ.»
26 سَمُوٍلِ نَشَ عَ قَلَ سْلُ بّ، «ﭑ مُ بِرَ مَ عِ قْشْ رَ، بَرِ مَ عِ بَرَ عِ كٌبٍ رَ سٌ عَلَتَلَ شَ مَسٍنيِ رَ، عَلَتَلَ قَن بَرَ عِ رَبّحِن، عَ بَرَ عِسِرَيِلَ مَنفّيَ بَ عِ يِ رَ.»
27 سَمُوٍلِ تٌ عَ مَقِندِ سِفَقٍ رَ، سْلُ نَشَ عَ شَ دٌنمَ سُشُ، عَ قَ بْو عَ يِ رَ.
28 سَمُوٍلِ نَشَ عَ قَلَ عَ بّ، «تٌ عَلَتَلَ قَن بَرَ عِسِرَيِلَ مَنفّيَ بَ عِ يِ رَ نَ كِ، عَ عَ قِ عِ بٌورٍ مَ، نَشَن قَن دَنفِ عِ تَن نَ.
29 عَلَتَلَ نَشَن قِندِشِ عِسِرَيِلَ سّنبّ رَ، عَ مُ وُلٍ قَلَمَ، عَ شَشِلِ مُ مَسَرَ مَ. عِبُنَدَ مَ مُ عَ رَ.»
30 سْلُ مَن نَشَ عَ قَلَ، «ﭑ بَرَ يُنُبِ رَبَ. يَندِ، ﭑ بَرَ عِ مَشَندِ، عِ شَ ﭑ بِنيَ عِسِرَيِلَ نُن عَ كُنتِفِيٍ يَ عِ. بِرَ ﭑ قْشْ رَ، ﭑ شَ سُيِدِ عِ مَرِفِ عَلَتَلَ بّ.»
31 نَ تّمُي سَمُوٍلِ نَشَ بِرَ سْلُ قْشْ رَ. سْلُ نَشَ سُيِدِ عَلَتَلَ بّ.
32 نَ دَنفِ شَنبِ سَمُوٍلِ نَشَ عَ قَلَ، «وٌ قَ عَمَلّكِ مَنفّ عَفَفَ رَ.» عَفَفَ نَشَ قَ بْحّسَ كُي، بَرِ مَ عَ مَحْشُنشِ نّ عٍ مُ شْنْشِ عَ مَ سْنْن عٍ شَ عَ قَشَ.
33 سَمُوٍلِ نَشَ عَ قَلَ عَ بّ، «عِ تٌ دِنفّيٍ شَ دِيٍ قَشَ عِ شَ سَنتِدّفّمَ رَ، عِ نفَ قَن شَ دِ بَمَ عَ يِ رَ.» سَمُوٍلِ تٌ نَ قَلَ، عَ نَشَ عَ قَشَ عَلَتَلَ يَ عِ فِلِفَلِ.
34 سَمُوٍلِ نَشَ سِفَ رَ مَ. سْلُ قَن نَشَ سِفَ عَ شْنيِ فِبِيَ.
35 سَمُوٍلِ مُ سْلُ تٌ سْنْن. عَ نَشَ سُننُن سْلُ شَ قٍ رَ. عَلَتَلَ قَن نَشَ نِمِسَ عَ سْلُ قِندِقٍ مَنفّ رَ عِسِرَيِلَ.