24
دَوُدَ تٌندِقٍ سْلُ قَشَدٍ مَ
1 دَوُدَ نَشَ سِفَ عٍن فٍدِ فٍيَ يِرٍ.
2 سْلُ تٌ فبِلٍن كٍلِقٍ قِلِسِتَكَيٍ فٍرٍدٍ، مِشِيٍ نَشَ عَ قَلَ عَ بّ، عَ دَوُدَ نَ عٍن فٍدِ فبٍنفبٍرٍنيِ مَ.
3 سْلُ نَشَ سْورِ وُلُ سَشَن تٌنفٌ، نَشٍيٍ قَتَ فٍرٍ سٌدٍ دَنفِ عِسِرَيِلَكَيٍ بِرِن نَ، عٍ نَشَ مِنِ دَوُدَ نُن عَ شَ مِشِيٍ قٍندٍ، هَن عٍ سَ سٌ قَنيٍيٍ لٌنفٌرِ رَ.
4 سْلُ نَشَ دَنفِ فْورّيٍ يِرٍ، نَشٍيٍ نُ نَ كِرَ دّ رَ. عَ نَشَ سٌ قْنمّ كُي عَ شَ يٍ رَقِلِ. عَ مُ عَ كٌلٌن دَوُدَ نُن عَ شَ مِشِيٍ قَن نُ نَ نَ قْنمّ كُي.
5 دَوُدَ شَ مِشِيٍ نَشَ عَ قَلَ عَ بّ، «عَلَتَلَ بَرَ يِ لْشْي قِ عِ مَ. عَ شَ مَسٍنيِ بَرَ كَمَلِ عَ قَلَقٍ رَ، ‹ﭑ تَن نَن عِ يَشُي سَمَ عِ بّلّشّ، عَلَكٌ عِ شَ عِ سَفٌ رَبَ عَ رَ.›» نَ تّمُي دَوُدَ نَشَ عَ مَسٌ دْيِندْيِن سْلُ شَنبِ رَ، عَ قَ عَ شَ بُرُ مُسِ سّيتِ شَبَ.
6 دَوُدَ تٌ فّ نَ رَبَدٍ، عَ نَشَ نِمِسَ سْلُ شَ بُرُ مُسِ سّيتِ شَبَقٍ مَ.
7 عَ نَشَ عَ قَلَ عَ شَ مِشِيٍ بّ، «عَلَتَلَ شَ ﭑ نَتَنفَ نَ قٍ مْولِ مَ. ﭑ بَرَ نَ رَبَ ﭑ مَرِفِ رَ، عَلَتَلَ نَشَن سُفَندِشِ مَنفّ رَ.»
8 دَوُدَ نَشَ تْنيِ دْشْ عَ شَ سْورِيٍ مَ سْلُ فٍرٍقٍ رَ. سْلُ نَشَ مِنِ قْنمّ كُي، عَ سِفَ.
9 دَوُدَ قَن نَشَ مِنِ قْنمّ كُي، عَ قَ سْلُ شِلِ عَ شُي عِتٍشِ رَ، «ﭑ مَ مَنفّ، ﭑ مَرِفِ!» سْلُ تٌ عَ كٌبٍ رَتٌ، دَوُدَ نَشَ عَ شُنيِ قٍلٍن بْشِ مَ، عَ سُيِدِ عَ بّ.
10 دَوُدَ نَشَ عَ قَلَ سْلُ بّ، عَ نَشّ، «مُنقٍ رَ عِ تُلِ مَتِمَ مِشِيٍ شَ وْيّنيِيٍ رَ، نَشٍيٍ عَ قَلَمَ، عَ ﭑ تَن مُ وَ مَ عِ شَ قٍ قَنيِ شْن مَ؟
11 تٌ لْشْي عَلَتَلَ بَرَ عِ سَ ﭑ سَفٌي قْنمّ كُي. ﭑ مَ مِشِيٍ بَرَ عَ قَلَ ﭑ بّ، عَ ﭑ شَ عِ قَشَ، كْنْ ﭑ بَرَ تٌندِ. ﭑ بَرَ عَ قَلَ، ‹ﭑ مُ ﭑ مَرِفِ فٍرٍ مَ، عَلَتَلَ نَشَن سُفَندِشِ مَنفّ رَ.›
12 عِ بَرَ عَ تٌ سٍ نَشَن نَ ﭑ بّلّشّ؟ ﭑ بَرَ عِ شَ بُرُ مُسِ سّيتِ شَبَ. ﭑ نُ نْمَ عِ قَشَدٍ، كْنْ ﭑ مُ عَ رَبَ. نَ كُي عِ نْمَ عَ كٌلٌندٍ قٍ حَاشِ يٌ مُ نَ ﭑ قُرِ كُي عِ شَ قٍ رَ. ﭑ مُ وَ مَ عِ مَتَندِقٍ، ﭑ مُ وَ مَ هَاكّ شْن، كْنْ عِ تَن نَ بِرَقٍ ﭑ قْشْ رَ، عِ شَ ﭑ قَشَ.»
13 «عَلَتَلَ شَ وٌن مَكِيتِ. عَلَتَلَ شَ ﭑ فبٍ حْشْ. ﭑ تَن مُ عِ قَشَمَ قٍوٌ.
14 قٌرِيٍ عَ قَلَمَ، ‹حَاشُحَ كٍلِمَ مِشِ حَاشِيٍ نَن مَ.› نَ كُي ﭑ شَ عَ قَلَ عِ بّ، ﭑ تَن مُ عِ قَشَمَ قٍوٌ.
15 عِ تَن عِسِرَيِلَ مَنفّ، عِ وَ مَ ندٍ فٍرٍقٍ؟ عِ نَ بِرَقٍ ندٍ قْشْ رَ؟ مِشِ شُرُدِ نَشَن تِدٍ مُ دَنفِ بَرٍ قَشَشِ رَ، شَ نَ مُ عَ رَ نِمَسٍ شُنشُرِ؟
16 عَلَتَلَ شَ وٌن قِرِن مَكِيتِ. عَ شَ نْندِ قِ ﭑ مَ، عَ شَ ﭑ نَتَنفَ عِ بّلّشّ.»
17 دَوُدَ تٌ فّ نَ مَسٍنيِ تِدٍ، سْلُ نَشَ عَ قَلَ عَ بّ، عَ نَشّ، «عِ تَن نَن يَتِ شُي عَ رَ، ﭑ مَ دِ دَوُدَ؟» سْلُ نَشَ وَ قْلْ.
18 عَ قَ عَ قَلَ دَوُدَ بّ، عَ نَشّ، «عِ تِنشِن ﭑ تَن بّ، بَرِ مَ عِ بَرَ ﭑ مَ قٍ كٌبِ مَسَرَ قٍ قَنيِ رَ.
19 تٌ تَن عِ بَرَ عِ شَ مَرَقَنيِ مَسٍن ﭑ بّ. عَلَتَلَ نُ بَرَ ﭑ سَ عِ سَفٌي، عِ قَ تٌندِ ﭑ قَشَدٍ.
20 شَ مِشِ عَ يَشُي مَسْتْ، عَ بّحِنمَ بْحّسَ كُي؟ عَلَتَلَ شَ عِ سَرٍ قِ عِ نَشَن نَبَشِ ﭑ بّ تٌ لْشْي.
21 ﭑ عَ كٌلٌن عِ قَمَ نّ قِندِدٍ مَنفّ رَ، عِسِرَيِلَ قَمَ شَندٍ عِ شَ مَنفّيَ بُن مَ.
22 عِ شَ عِ كَلِ عَلَ شِلِ رَ، عَ عِ مُ ﭑ بْنسْي سْنتْمَ ﭑ قَشَ شَنبِ، عِ مَن مُ ﭑ شِلِ كَنَمَ ﭑ مَ مِشِيٍ تَفِ.»
23 دَوُدَ تٌ عَ كَلِ سْلُ بّ، سْلُ نَشَ فبِلٍن عَ شْنيِ، دَوُدَ نُن عَ شَ مِشِيٍ نَشَ سِفَ كَنتَرِ يِرٍ.