3
عَلَتَلَ سَمُوٍلِ شِلِقٍ
1 نَ قٌنِكٍ سَمُوٍلِ نُ نَ عَلَتَلَ شَ وَلِ رَبَقٍ عٍلِ قّ مَ. نَ تّمُي عَلَتَلَ مُ نُ وْيّنمَ مِشِيٍ بّ عَ فبٍ رَ، عَ شَ لَامَتُنيِيٍ قَن مُ نُ وُيَ.
2 كْي ندٍ رَ عٍلِ سّرّشّدُبّ نُ سَشِ عَ شَ كٌنكٌي كُي. عَ يَيٍ مُ نُ سٍ تٌمَ عَ قَنيِ رَ، عَ فبٍ مُ نُ لُشِ عَ شَ قِندِ دْنشُي رَ.
3 عَلَ شَ لَنثُي مُ نُ شُبٍنشِ سِندٍن. سَمُوٍلِ تَن نُ عَ سَشِ عَلَتَلَ شَ بَنشِ كُي، سَاتّ كَنكِرَ نُ نَ دّننَشّ.
4 عَلَتَلَ نَشَ سَمُوٍلِ شِلِ. سَمُوٍلِ نَشَ عَ رَتِن، «ﭑ تَن نَن يَ.»
5 نَ كُي عَ نَشَ سِفَ عَ فِ رَ عٍلِ يِرٍ، عَ عَ قَلَ عَ بّ، «ﭑ بَرَ قَ عِ شَ شِلِ مَ.» عٍلِ نَشَ عَ يَابِ، «عَدٍ، ﭑ مُ عِ شِلِ دٍ. سِفَ، عِ عِ سَ.» سَمُوٍلِ نَشَ فبِلٍن، عَ سَ عَ سَ.
6 عَلَتَلَ مَن نَشَ سَمُوٍلِ شِلِ. سَمُوٍلِ نَشَ كٍلِ، عَ سِفَ عٍلِ يِرٍ، عَ عَ قَلَ عَ بّ، «عِ تٌ ﭑ شِلِ، ﭑ بَرَ قَ» عٍلِ نَشَ عَ يَابِ، «عَدٍ، ﭑ مُ عِ شِلِ. سِفَ، عِ سَ عِ سَ.»
7 سَمُوٍلِ مُ نُ عَلَتَلَ كٌلٌنشِ سِندٍن، بَرِ مَ هَن نَ تّمُي عَلَتَلَ مُ نُ وْيّن عَ بّ.
8 عَلَتَلَ مَن نَشَ سَمُوٍلِ شِلِ عَ سَشَن ندٍ. سَمُوٍلِ نَشَ كٍلِ، عَ سِفَ عٍلِ يِرٍ، عَ عَ قَلَ عَ بّ، «عِ تٌ ﭑ شِلِ، ﭑ بَرَ قَ.» نَ كُي عٍلِ نَشَ عَ قَهَامُ عَ عَلَتَلَ نَن نَ قٌنِكٍ شِلِقٍ.
9 عٍلِ نَشَ عَ قَلَ سَمُوٍلِ بّ، «فبِلٍن عِ سَ عِ سَ. عِ نَ نَ شُي مّ سْنْن، عِ شَ عَ رَتِن، ‹عَلَتَلَ، وْيّن. عِ شَ كٌنيِ دِ عَ تُلِ مَتِمَ عِ رَ.›» سَمُوٍلِ نَشَ فبِلٍن، عَ سَ عَ سَ عَ سَدٍ.
10 عَلَتَلَ نَشَ قَ عَ يِرٍ، عَ مَن نَشَ عَ شِلِ، «سَمُوٍلِ، سَمُوٍلِ.» سَمُوٍلِ نَشَ عَ رَتِن، «عَلَتَلَ، وْيّن. عِ شَ كٌنيِ دِ عَ تُلِ مَتِشِ عِ رَ.»
11 عَلَتَلَ نَشَ عَ مَسٍن سَمُوٍلِ بّ، «ﭑ قَمَ نّ قٍ ندٍ رَبَدٍ عِسِرَيِلَ، نَشَن مِشِيٍ دّ عِشَرَ مَ.
12 نَ لْشْي، ﭑ نَشَن بِرِن قَلَشِ عٍلِ شَ دٍنبَيَ شَ قٍ رَ، ﭑ عَ بِرِن نَكَمَلِمَ نّ، كٍلِقٍ عَ قْلّ هَن عَ رَحْنيِ.
13 ﭑ بَرَ عَ قَلَ عَ بّ، عَ ﭑ قَمَ نّ عَ شَ دٍنبَيَ حَشَنكَتَدٍ عَبَدَن عَ شَ يُنُبِ شَ قٍ رَ. عَ نُ عَ كٌلٌن عَ عَ شَ دِيٍ نَ ﭑ مَبٍرٍقٍ، كْنْ عَ تَن مُ تْنيِ دْشْ عٍ مَ.
14 نَ نَن عَ رَ، ﭑ بَرَ ﭑ كَلِ عٍلِ شَ دٍنبَيَ شَ قٍ رَ، شُنسَرٍ يٌ مُ نَ عٍ بّ. سّرّشّ نُن هَدِيَ مُ نْمَ عٍ شَ يُنُبِيٍ شَقَرِدٍ.»
15 سَمُوٍلِ نَشَ عَ سَ هَن فّيسّفّ، عَ قَ عَلَتَلَ شَ بَنشِ نَادّيٍ رَبِ. سَمُوٍلِ نُ فَاشُشِ عَ شَ لَامَتُنيِ يَبَدٍ عٍلِ بّ،
16 كْنْ عٍلِ نَشَ عَ شِلِ، عَ عَ قَلَ عَ بّ، «ﭑ مَ دِ سَمُوٍلِ.» سَمُوٍلِ نَشَ عَ رَتِن، «ﭑ نَ بٍ.»
17 عٍلِ نَشَ عَ مَشْرِن، «عَلَتَلَ مُنسٍ مَسٍنشِ عِ بّ؟ عِ نَشَ سٍسٍ نْشُن ﭑ مَ. شَ عِ وْيّن كٍرٍن نْشُن ﭑ مَ، عَلَ شَ نَ سَرٍ رَفبِلٍن عِ مَ، عَ قَ ندٍ سَ نَ قَرِ.»
18 نَ كُي، سَمُوٍلِ نَشَ عَلَ شَ مَسٍنيِ بِرِن نَدَنفِ عٍلِ مَ، عَ مُ سٍسٍ نْشُن عَ مَ. عٍلِ نَشَ عَ قَلَ، «عَلَتَلَ نَن عَ رَ. عَ شَ عَ سَفٌ رَبَ.»
19 سَمُوٍلِ نُ نَ مْقٍ، عَلَتَلَ قَن نُ نَ عَ قْشْ رَ. عَ مُ عَلَتَلَ شَ مَسٍنيِ يٌ رَبّحِنشِ.
20 كٍلِقٍ دَنَ هَن بٍرِ سٍيبَ، عِسِرَيِلَ بِرِن نَشَ عَ كٌلٌن عَ سَمُوٍلِ قِندِشِ عَلَتَلَ شَ نَمِحْنمّ نَن نَ.
21 عَلَتَلَ نُ لُمَ مِنِ رَ سَمُوٍلِ مَ سِلٌ، عَ عَ شَ مَسٍنيِ تِ عَ بّ.