5
شّمّ شَ تٌقَنيِ
شّمّ شَ مَسٍنيِ فِنّ بّ
1 «ﭑ شَنُنتٍنيِ، ﭑ بَرَ سٌ ﭑ مَ سَنسِ يِرٍ.
ﭑ شُنيَ، ﭑ بَرَ ﭑ مَ سُرَيِ مَلَن،
ﭑ بَرَ كُمِ دٌن،
ﭑ بَرَ وّنِ نُن شِحّ مِن.
ﭑ بَرَ عَ قَلَ ﭑ بٌورٍيٍ بّ عٍ قَن شَ عٍ مِن،
عٍ شَ شَنُنتٍيَ كٌلٌن.»
فِنّ شَ مَسٍنيِ شّمّ شَ قٍ رَ
2 «ﭑ نُ نَ شِقٍ، كْنْ ﭑ بْحّ مُ شِشِ،
عَ ﭑ شَنُنتٍنيِ شُي مّشِ،
نَشَن نُ بَرَ نَادّ كْنكْن.»
شّمّ شَ مَسٍنيِ فِنّ بّ
«ﭑ مَافِنّ، ﭑ دْشْفِنّ، نَادّ رَبِ ﭑ بّ.
ﭑ مَ تْوكّ فِنّ، نَشَن شَ تٌقَنيِ مَنِيّ مُ نَ.
شِنِ بَرَ ﭑ شُنيِ شِنبٍلِ،
عَ بَرَ ﭑ شُنسّشّ بُندَ.»
فِنّ شَ مَسٍنيِ شّمّ بّ
3 «ﭑ حَن نُ بَرَ ﭑ مَ دُفِ بَ،
قٌ ﭑ مَن شَ عَ رَفٌرٌ ﭑ مَ؟
ﭑ حَن نُ بَرَ ﭑ سَنيِ مَشَ،
قٌ ﭑ مَن شَ تِ بْشِ مَ؟
4 ﭑ شَنُنتٍنيِ نَشَ عَ بّلّشّ رَ سٌ نَادّ لٌنفٌرِ رَ،
عَلَكٌ عَ شَ عَ رَبِ.
ﭑ بْحّ نَشَ سّيوَ عَ شَ قٍ رَ.
5 ﭑ نَشَ كٍلِ عَلَكٌ ﭑ شَ نَادّ رَبِ ﭑ شَنُنتٍنيِ بّ.
لَبُندّ نُ نَ ﭑ بّلّشّ مَ،
تُرٍ نُ نَ ﭑ بّلّشّسٌلٍيٍ مَ.
نَ بِرِن نَشَ لُ نَادّ رَبِ سٍ مَ.
6 ﭑ نَشَ نَادّ رَبِ ﭑ شَنُنتٍنيِ بّ،
كْنْ عَ حَن نُ بَرَ سِفَ.
ﭑ بْحّ نَشَ سُننُن.
ﭑ نَشَ عَ قٍن، كْنْ ﭑ مُ عَ تٌشِ.
ﭑ نَشَ عَ شِلِ، كْنْ عَ مُ ﭑ مَ شِلِ رَتِنشِ.
7 تَا كَنتَمَيٍ تٌ ﭑ تٌ،
عٍ نَشَ ﭑ سُشُ، عٍ ﭑ بْنبْ،
عٍ ﭑ مَ شِنبٍلِ دُفِ مُحَ.»
فِنّ شَ مَسٍنيِ فِنّدِ مّيٍ بّ
8 «دَرِ سَلَمُ فِنّدِ مّيٍ،
ﭑ بَرَ وٌ مَيَندِ،
شَ وٌ بَرَ ﭑ شَنُنتٍنيِ تٌ،
وٌ شَ عَ قَلَ عَ بّ عَ شْلِ بَرَ ﭑ سُشُ شَنُنتٍيَ شَ قٍ رَ.»
فِنّدِ مّيٍ شَ مَسٍنيِ فِنّ بّ
9 «فِنّ تٌقَنيِ قِسَمَنتٍ،
عِ شَنُنتٍنيِ قَن عَ بِرِن بّ؟
عِ بَرَ مُشُ مَيَندِ
بَرِ مَ عَ قَن عَ بِرِن بّ؟»
فِنّ شَ مَسٍنيِ فِنّدِ مّيٍ بّ
10 «ﭑ شَنُنتٍنيِ كِرِ قِيشّ، عَ رَفبٍيلِ.
عَ كٌلٌن حْشُن نَ شّمّ وُلُ قُ يَ مَ.
11 عَ شُنيِ لُشِ نّ عَلْ شّيمَ قَنيِ،
عَ شُنسّشّ عِقْورْشِ عَلْ شَشَ قْورّ شَبٍ.
12 عَ يَيٍ رَيَبُ عَلْ فَنبّ نَشٍيٍ تِشِ شُرٍ دّ رَ،
عٍ قِيشّ عَلْ شِحّ، عٍ يَنبَمَ عَلْ دِيَمَن.
13 عَ شّرّيٍ لُشِ نّ عَلْ لَبُندّ يَءِلَندٍ،
عَ دّ كِرِ مَنِيَشِ سَنسِ قُفٍ تٌقَنيِ نَن نَ،
عَ شِرِ حْشُن.
14 عَ بّلّشّ تٌقَن عَلْ بّلّشّسٌلٍرَ سٌي شّيمَ دَاشِ،
دِيَمَن نَ نَشَن مَ.
عَ قَتٍ لُشِ نّ عَلْ سِلِ حِنيِ قِيشّ،
فّمّ تٌقَنيِ مْولِ ندٍ، يٍيٍ مَسٌشِ نَشَن مَ.
15 عَ سَنيِ سّنبّ فبٌ عَلْ قَنيٍ قِيشّ،
نَشَن تِشِ شّيمَ قَرِ.
عَ تٌقَن عَلْ لِبَن،
عَ عِتٍ عَلْ سّدِرِ وُرِ بِلِيٍ.
16 عَ دّ عِحْشُن، عَ شَ قٍ بِرِن قَن.
دَرِ سَلَمُ فِنّدِ مّيٍ، ﭑ شَنُنتٍنيِ نَ نَ كِ نّ،
ﭑ دّ قَن بٌورٍ نَن عَ رَ.»