11
अर्को रागी ङा मुर
1 मिनु यरूसलेममी बाक्ब सोइश्शोपुकी नु यहूदीया रागी तेइ तेइ बाक्ब थमा सुइक्ब लोक्बपुकीमी “अर्को रागी ङा मुरपुकीमी यो परमप्रभु यावे आ लोव़ नेंशा, थमा सुइक्ब दुम्मा बाक्त” देंशो नेन्मे बाक्त।
2 मिनु पत्रुस यरूसलेम लेश्शा जाक्मेनु, ख्रोइक्तीक चिनु ख्रोइश्शो थमा सुइक्बपुकीमी पत्रुस कली
3 “मारदे ख्रोइक्तीक चिनु मख्रोइश्शोपुकी नु काथा बाक्शा जवी” दे लोव़ पोक्ग्मे बाक्त। गलाती २:१२
4 मिनु पत्रुसमी मेको लोव़ पोक्ब आन कली खुप्शा, दोपा मोदेंशो दुम्मे, मेको नेल्ल रुप्पाइक्चा कली
5 “गो योप्पा सहरमी बाक्ती। मिनु काबु मार दुम्त देंशा हना, प्रार्थना पना पन बाक्ङानु, प्रभुमी कोंइतीक कोंइताक्यी। सरीङ रोक्सीशा ठेयब वा का हाम्सीशा क्युक्सीशो खोदेंशो पा खप गे यिशो ताता। मिनु आं नेक्था जाक्शा दिक्त। प्रेरित १०:९-४८
6 मिनु गो गीशा कोव़ङुनु, मब्वचा ङा, ग्रांग्रा दिचा ङा, जन्तु, खोते नु चिक्ब तातामी।
7 मिनु ‘ए पत्रुस, मेको साइश्शा ब्वामी’ देंशो नेंता।
8 मिनु गोमी ‘हत्तेरी, ओदेंशो ग्रांग्रा दिचा ङा दोपा ब्वचा नमी ङा, प्रभु, ओदेंशो ग्रांग्रा दिशो गेनायो मब्वशो नङ’ देंती।
9 मिनु ‘परमप्रभु यावेमी चोव़खो सेल्शो कली गे ग्रांग्रा मदित्तो’ दे सरीङ रे देंशो नेंता।
10 खेयप सां मोदेंशो दुम्शा, मेको ठेयब वा सरीङ गे लेश्शा लत।
11 मोदेंशो दुमे चोटीन सिजरिया रे आं कली ब्रथ सोइश्शो मुर सां आं बाक्शो खिंमी जाक्तेक्म।
12 मिनु परमप्रभु यावे आ सोक्तीमी ‘मेको आन जात मार नमी? दे ममिम्थु मेकोपुकी नु काथा लावो’ देंतीके गो मेकोपुकी नु लती। मुल एकेर गो नु बाक्ब थमा सुइक्ब ६ जना लोक्ब गो नु लाम्तेक्म। गो काथा गाक्शा, कोरनेलीयस आ खिं जाक्दीश्शा ओव़तक।
13 आ खिं ओव़शा बाक्कानु, कोरनेलीयसमी आंइ कली ‘परमप्रभु यावे आ स्वर्ग ङा गेय पाइब का आं ङोंइती राप्शा, मेकोमी योप्पा सहरमी जाक्शा बाक्शो सिमोन पत्रुस कली ब्रथ सोइक्तो।
14 मेकोमी जाक्शा, गे नु इ खिं ङा मुर नेल्ले आन कली गेना हना यो ब्रोंइशा बाक्तीक लोव़ शेंब, दे माइक्ती’ देंत।
15 मिनु गो मेकेर खुम्सीशा बाक्ब आन कली ख्रीस्त आ लोव़ शेंदुनु, साइ गोपुकी खोदेंशो पा मेकोपुकी यो परमप्रभु यावे आ सोक्तीम पिंचा पुंइसाक्म। प्रेरित २:१-४
16 परमप्रभु यावे आ सोक्तीम ब्रीचा पुंइसीशो तशा, गो इं प्रभु आ देंशो लोव़ ति फ्रुक्ता। प्रभुमी मार देंत देंशा हना ‘यूहन्नामी मुर आन कली ब्वाक्कुमी ख्रुम्शा ग्रुंइताक्व। गे चहिं परमप्रभु यावे आ सोक्तीमी ख्रुम्चा पुंइसीनीनी’ देंत। प्रेरित १:५
17 गोपुकीमी प्रभु येसु ख्रीस्त कली थमा सुइक्तीके परमप्रभु यावे आ सोक्तीम पिंचा पुंइसाक्य। मिनु अर्को रागी ङा मुरपुकीमी यो येसु ख्रीस्त कली थमा सुइक्तीके आ सोक्तीम पिंचा पुंइसाक्म। मोदेंशो दुम्शो तशा, मार पाइनुङा? गो परमप्रभु आ पशो गेय तेक्ने चाप्नङा?” दे रुप्पाइक्मी बाक्त।
18 पत्रुसम मो देंशो नेंशा, मेको आन पोक्शो लोव़ साम्शा “मोदेंशो बाक्त हना, परमप्रभु यावेमी इं कली गेशो खोदेंशो पा अर्को रागी ङा मुर आन कली यो आन थुं लेप्पा आन पाप क्याम्बाक्माक्त” दे परमप्रभु यावे कली ठेयब सेल्मे बाक्त।
अर्को रागीम येसु आ लोव़ शेंशो
19 स्तीफानस साइक्चा पुंइसे नोले खेदा पचा पुंइसीशा, प्रोक्शा गाक्शो थमा सुइक्ब का निक्शी फोनीसीया, का निक्शी साइप्रस, का निक्शी एन्टीओक जाक्दीश्शो बाक्मा बाक्त। मिनु मेकोपुकीमी येसु आ लोव़ यहूदी आन कली ला शेंदमे बाक्त। प्रेरित ८:१-४
20 साइप्रस नु साइरेनी रे एन्टीओक सहर जाक्दीश्शो थमा सुइक्ब का निक्शीमी चहिं अरु ग्रीस रागी ङा मुर आन कली यो प्रभु येसु आ पर्बम शेंदमे बाक्त।
21 मोदेंशो शेंब आन कली प्रभुमी सक्ति गेवा बाक्त। मिनु मेको आन लोव़ नेंशा, शुश मुरुमी थमा सुइश्शा, आन थुं प्रभु गे हिरदमे बाक्त। प्रेरित २:४७
22 एन्टीओक सहरमी शुश मुर थमा सुइक्ब दुम्तेक्म, दे यरूसलेममी बाक्ब थमा सुइक्बपुकीमी यो नेन्मे बाक्त। मिनु बारनाबास कली रुप्थ सोइक्तमे बाक्त। प्रेरित ४:३६
23 बारनाबास एन्टीओकम जाक्दीश्शा, परमप्रभु यावेमी शुश मुर आन कली शिशी पा आन थुं लेप्पाइश्शो तशा थाम्पा ग्येरसे बाक्त। मिनु मेको आन कली “मार दुम्त हना यो, प्रभु कली मप्रोंइचा, है” दे आन थमा सुइक्तीक थुं बारपाइक्मी बाक्त।
24 बारनाबास रिम्शो मुर बाक्माक्त। परमप्रभु यावे आ सोक्तीमी ब्रीशा, खोइल थेक्शो खोदेंशो पा थमा सुइक्बाक्माक्त। आ पशो तशा, आ लोव़ नेंशा, शुश मुरुमी प्रभु कली थमा सुइक्ब दुम्मा बाक्त। प्रेरित ५:१४
ख्रीस्तीयन नें वोइक्चा पुंइसीशो
25 मिनु नोले बारनाबास सावल माल्थ टारसस सहर लमाक्त। प्रेरित ९:३०
26 मिनु थिश्शा एन्टीओकम जाक्शा बाक्सा बाक्त। मिनु बर्स का सम्म थमा सुइक्बपुकी नु काथा बाक्शा, शुश मुर आन कली प्रभु आ लोव़ शेंना शेंन बाक्सा बाक्त। एन्टीओक सहरमीन येसु आ लां खोइक्ब नेल्ल क्येङा ङोंइती “ख्रीस्तीयन” दे नें वोइक्चा पुंइसमा बाक्त। मेना रे मेको नें लीमाक्त। गलाती २:११
श्येत जाइब आन कली क्येट सोइश्शो
27 मिनु काबु परमप्रभु यावे आ लोव़ पाइबपुकी यरूसलेम रे यिशा, एन्टीओकम जाक्मा बाक्त। प्रेरित १३:१; प्रेरित १५:३२
28 मेको आन दातेमी अगाबस नें पाइश्शो मुर का बाक्माक्त। मिनु काबु थमा सुइक्बपुकी खुम्सीशा बाक्मानु, अगाबसमी परमप्रभु यावे आ सोक्त रे पा “रागी नेल्लेमी अन्काल दुम्शा, जचा मतांइसीब” दे लोव़ पवा बाक्त। मेको लोव़ पिप क्लौदीयस आ सासनम थमा दुम्माक्त। प्रेरित २१:१०
29 अन्काल दुम्ब देंशो तुइश्शा, एन्टीओक ङा थमा सुइक्बपुकीमी “यहूदीया रागीमी बाक्ब थमा सुइक्ब आन कली वारच पाइक्चा माल्ब, मोपतीके क्येट पोक्य” देंमा बाक्त।
30 मिनु नेल्लेमी दो दोशो चाप्मे, मो मोशो क्येट पोक्शा, यरूसलेममी बाक्ब थमा सुइक्ब आन शेंब खाल्पा आन कली गेचा नमी, दे बारनाबास नु सावल आस कली चोव़थ सोइक्तमे बाक्त। प्रेरित १२:२५; १कोरिन्थी १६:१-४