25
फेस्तस आ ङोंइती राप्पाइश्शो
1 फेस्तस हुकुम पाइब दुम्शा, आ सांबु नाक्ती सिजरिया रे गाक्शा, यरूसलेम ग्येत्थ लमाक्त।
2 मिनु यरूसलेममी बाक्मेनु, ठेयब चढ़ेबपुकी यहूदी आन ठेयब मुरपुकीमी ग्रुम्थ जाक्शा, फेस्तस कली पावल आ पर्बम लोव़ पामे बाक्त।
3 मार देंमा बाक्त देंशा हना “पावल कली यरूसलेम लेश्शा सोइश्शा, आ मुददा कोव़चा माल्ताक्व” दे शुश लोव़ पा पुन्मे बाक्त। मारदे हना, लांमी बाप्शा, साइक्चा, दे लोव़ पशो बाक्मा बाक्त। प्रेरित २३:१५
4 मिनु हुकुम पाइब फेस्तसमी मेको आन लोव़ नेंशा, आन पुंइशो मगेथु “पावल कली सिजरियामी चोक्स ङा चोक्स वोइश्शा पिती। मुल शुश नाक्त मबाक्थु, मेरेन लेश्शा लाइनुङ।
5 मोपतीके अधिकार तशो इन मुर का निक्शी योव़शा, गो नु सोइक्तीने। मिनु सिजरियामी जाक्दीश्शा, मुददा कोव़नुङ। मेको मुरुमी मरिम्शो पशो बाक्त हना, दोस ग्रुंइने चाम्सीब” दे माइक्मी बाक्त।
6 मिनु ८, १० नाक्त बाक्शा, सिजरिया लेश्शा यिमाक्त। मिनु आ दीसा नाक्ती कछडी वोइश्शा, पावल कली चाक्पाइश्शा, आ ङोंइती राप्पदा बाक्त।
7 मिनु आ ङोंइती राप्पदानु, यरूसलेम रे जाक्शो यहूदीपुकीमी शुश दोस गेमे बाक्त। तन्न लोव़ का यो थमा बाक्ब, दे कोंइने मचाप्मे बाक्त।
8 मिनु पावलमी “आंइ यहूदी आन अरेशो लोव़ का यो दूली मपङ। परमप्रभु यावे खिं ग्रांग्रा मपङ। रोमी पिप सिजर कली यो मरिम्शो मदेंङ” देंमाक्त।
9 फेस्तसमी यहूदी आन कली ग्येरपाइक्चा दाक्ता बाक्त। मोपतीके पावल कली “गे यरूसलेम लचा दाक्नेवे? इ मुददा मेरेन कोव़शा गेनन, दुम्बा?” दे हिल्लो पवा बाक्त।
10 मिनु पावलमी “मदुम्ब हजुर, मारदे हना सिजर आ निसाफ पाइबपुकीमी कका आं मुददा कोव़चा माल्नीम। यहूदी आन कली मरिम्शो मारेइ मपङ, दे हजुर, गे यो तुइक्नीनी।
11 गो दू्ली पाइब दुम्शा, साइक्चा पुंइसीचा ङा बाक्ती हना, सजाइ जाइनुङ। बेक्चा यो महिंनुङ। आं कली दोस गेबपुकीमी दोस ग्रुंइने मचाप्तेक्म हना, आन गुइमी दोपा गेचा पुंइसीनुङा? सिजर पिपी कली आं मुददा कोव़चा गेने, देंनुङ” दे मदा बाक्त। प्रेरित २३:११; प्रेरित २८:१९
12 मिनु फेस्तसमी आ मुरपुकी नु पावल आ मुददा मार पचा, दो पचा, दे लोव़सी पने थुम्शा, पावल कली “गे सिजर पिप कली इ मुददा कोव़चा गेचा देंते। मोपतीके सिजर पिप आ बाक्तीके सोइक्नन” दे माइश्शा, कछडी पोक्शा सोइक्तीमी बाक्त।
अग्रीप्पा नु फेस्तस लोव़ पशो
13 मिनु इच्का नाक्त नोले पिप अग्रीप्पा नु बेरनीस हुकुम पाइब फेस्तस कली ग्रुम्थ सिजरिया जाक्सा बाक्त।
14 मिनु शुश नाक्त बाक्सानु, फेस्तसमी पिप कली पावल आ पर्बम “एक फेलीक्समी मुददा मख्रोइक्थु चोक्शा वोइश्शो मुर का बाक्ब। प्रेरित २४:२७
15 मिनु यरूसलेम लङानु, ठेयब चढ़ेब नु यहूदी आन शेंब खाल्पापुकीमी एको मुर आ पर्बम नेल्ल तुइक्पाइक्तीमी। शुश दोस गेम्तेक्म। मिनु मेको कली सजाइ गेचा, दे पुंइतेक्म।
16 गो मेको आन कली ‘कछडी वोइश्शा, दोस गेबपुकी नु दोस गेचा पुंइसीब कली मग्रुम्पाइक्थु, दोस मग्रुंइथु, सजाइ गेचा आंइ रोमी ऐन कानुनम मगारब। दोस गेचा पुंइसीबमी एको आन देंशो थमा बाक्ब, दे मदेंम सम्म सजाइ गेचा मदुम’ दे माइक्तामी। प्रेरित २२:२५
17 मिनु दोस गेबपुकी एक जाक्मा आ दीसा नाक्त कछडी वोइश्शा ग्रुम्पदुमीनु,
18 एको मुरुमी मुर साइश्शो बाक्मे कों, दे मिम्शो नङ। तन्न दोस गेमेनु, दोस मारेइ मबा।
19 आन जिमुशो दा आन धर्म आ पर्बम कका बाक्माक्त। लोव़ का दोपा परमप्रभु कली मान पचा आ पर्बम, लोव़ का येसु माइश्शो मुर आ पर्बम बाक्माक्त। यहूदीपुकीमी मेको मुर बेक्त देंबाक्तेक्म। तन्न पावलमी चहिं बेक्शो रे सेंसीशा ब्रोंइशो बाक्ब देंबाक्त।
20 मिनु गो मार पङ, दो पङ दुम्ती। मोपतीके गो पावल कली ‘यरूसलेम लशा, मेरेन इ मुददा कोव़चा दुम्बा?’ दे हिल्लो पाता।
21 मो देंङानु, पावलमी ‘अगस्टस कली आं मुददा कोव़चा गेने। सिजर आ बाक्तीकेमी मसोइक्तीनी सम्म चोक्शा वोइय्यीनी’ दे पुंइतु। मिनु गो रिम्शो पा वोइक्पाइक्ता। मिनु गेना सोइक्तु, दे लां कोव़ना कोव़न बाक्ती” देंमाक्त।
22 मिनु अग्रीप्पामी फेस्तस कली “गो मेको मुर आ लोव़ नेंचा दाक्नुङ” देंमेनु “सरकार, दीसान इन ङोंइती राप्पाइक्नुङ” देंमाक्त। लूका २२:८
अग्रीप्पा आ ङोंइती राप्पाइश्शो
23 मिनु आ दीसा अग्रीप्पा नु बेरनीस नु सहर ङा सरकार आ ठेयब मुरपुकीमी सरकारी वा फेक्शा जाक्शा, दरवारमी देल्मा बाक्त। मिनु फेस्तसमी पावल कली चाक्पाइश्शा, नेल्ल आन ङोंइती राप्पदा बाक्त।
24 मिनु फेस्तसमी “सरकार अग्रीप्पा, एकेर देल्शो हजुरपुकी, आं लोव़ का निक्शी नेनीने। एको इन ङोंइती राप्पाइश्शो मुर कोव़ङीने। यहूदी नेल्लेमी एको कली मरिम्शो मुर, दे दोस गेनीमी। यरूसलेम नु एकेर कछडी वोदमेनु ‘मेको कली साइक्चा माल्ब’ देंन देंन रेयके पाम्तेक्म। प्रेरित २२:२२
25 गो चहिं मो देंशो साइक्चा पुंइसीब मुर मतङ। मिनु एकोमी यो रोमी पिप सिजर अगस्टस कली आं मुददा कोव़चा गेने, दे पुंइतु। मिनु सिजर आ बाक्तीके सोइक्तु देंती।
26 तन्न सिजर कली एको मुर आ पर्बम मार लोव़ ब्रेक्चा ङा? आ दोस ग्रुंइने मचबु। मोपतीके मुलाक्ती अग्रीप्पा सरकार नु हजुर नेल्ल इन ङोंइती राप्पाइक्ता। गो नेल्लेमी हिल्लो हिक्सी पा दोस ग्रुंइताक्य हना, सिजर पिप कली ब्रेक्शा सोइक्ने चाप्नुङ।
27 मारदे हना ओं पा ग्याइश्शा फ्रेंशो मुर कली दोस का यो मग्रुंइथु, सिजर पिप बाक्तीके सोइक्ताक्ङ हना, मुने दोक्सीब, दे मिम्ताक्ङ” देंमाक्त।