7
स्तीफानस आ लोव़
1 मिनु ठेयब चढ़ेबमी “एको आन देंशो लोव़ थमा देय जोल, लो देनो” देंमेनु,
2 स्तीफानसमी “आं आफ, बाजे नु आं लोक्बपुकी, गो लोव़ का निक्शी पाइनुङ। दोपा छेङछेङ नु सक्ति पाइश्शो परमप्रभु यावेमी इं किकी पिपी अब्राहाम कली तपांइसे, गो मेको नेल्लेमी तुइक्नय। उत्पत्ती ११:- ५०:-; यहोसु २४:३२
3 हारान जाक्दीत्चा क्येङा ङोंइती अब्राहाम मेसोपोटामीया रागीम बाक्शो बाक्माक्त। मेकेर बाक्मेनु, परमप्रभु यावेमी ‘इ रागी नु इ खिं ङा मुर प्रोंइशा लावो। ते लशा बाक्चा माल्नेवे, नोले तुइक्पाइक्नन’ दे माइश्शो बाक्माक्त।
4 मिनु अब्राहाम कल्दी आन रागी प्रोंइशा, हारान सहर जाक्दीश्शा बाक्माक्त। मिनु आ आफ बेक्म नोले परमप्रभुमी अब्राहाम कली हारान रे मुल इं बाक्शो रागीमी चाक्गा बाक्त।
5 मेना परमप्रभु यावेमी अब्राहाम कली खोइल थेक्तीक रागी यो मगेशो बाक्माक्त। तन्न ‘एको रागी इ चच युइ आन कली गेनुङमी’ दे लोव़ पशो बाक्माक्त। मेना अब्राहाममी तमी तौ काइ यो मथिशो बाक्माक्त।
6 मिनु परमप्रभु यावेमी ‘नोले इ चच युइ मुर आन रागीमी लाइनीमी। मेको रागी ङा मुरपुकीमी इ मुर आन कली वाइलीम वाइल सेल्शा, ४ सहे बर्स सम्म श्येत गेशा वोइक्नीम। उत्पत्ती १५:१३-१४; प्रस्थान १२:४०
7 तन्न गो मेको श्येत गेब आन कली सजाइ गेनुङमी। इ चच युइ चहिं मेको रागी प्रोंइशा एक लेश्शा जाक्शा, आं कली ठेयब सेल्शा मानेनीम’ दे परमप्रभुमी अब्राहाम कली नोले दुम्ब लोव़ तुइक्पदा बाक्त।
8 मिनु नोले परमप्रभुमी अब्राहाम कली ख्रोइक्तीक चिनु ङा कबल गेवा बाक्त। मिनु अब्राहाममी आ तौ इसहाक थिशो, ८ नाक्त दुम्मेनु, मेको कली ख्रोइक्तीक चिनु ख्रोदा बाक्त। इसहाक याकूब आ आफ दुम्माक्त। मिनु याकूब आ १२ जना तौ आन आफ दुम्माक्त। मिनु मेको १२ जना तौ इं यहूदी १२ थर दुम्मा बाक्त।
9 मिनु याकूब आ तौ आन लोक्ब योसेफ कली गेहे पा, मेको कली इजीप्त रागी ङा मुर आन कली लेयङमे बाक्त। तन्न परमप्रभु यावेमी मेको कली कोव़शो बाक्माक्त।
10 मिनु आ श्येत रे प्रोंइबाक्माक्त। मिनु योसेफ इजीप्त रागी ङा पिप फाराओ आं ङोंइती जाक्मेनु, मेकोमी आ जोक्तीक तुइक्तीक थुं तशा, योसेफ कली शुश दाक्शो बाक्माक्त। मिनु पिप फाराओम योसेफ कली आ रागी ङा ठेयब मुर सेला बाक्त।
11 मिनु इजीप्त नु कनान रागीमी ठेयब अन्काल दुम्तीके, मुरपुकीमी जचा मतामे बाक्त। इं किकी पिपीमी यो जचा मतामे बाक्त।
12 इजीप्तमी अन्न ग्याप्चा तांइसीब देंशो नेंशा, याकूबमी आ तौ आन कली इजीप्त सोइक्तीमी बाक्त।
13 मिनु ग्याप्शा चाक्ग्मेनु, मजाक्दीत्थु, लेंशा सोइक्तीमी बाक्त। मोपा लमानु, योसेफमी आ लोक्ब आन कली ‘गो इन लोक्ब योसेफ नङ’ दे तुइक्पपांइसे बाक्त। में ङा मेरे फाराओमी मेकोपुकी योसेफ आ मुर बाक्मा बाक्त, दे तुइक्ता बाक्त।
14 मिनु योसेफमी आ आफ, आ लोक्बपुकी आ खिं ङा मुर नेल्ल आन कली इजीप्त रागी जाक्शा बाक्कीन, दे ब्रथ सोइक्तीमी बाक्त। मेको नेल्ल ७५ जना बाक्मा बाक्त।
15 मिनु याकूब इजीप्त जाक्दीश्शा, शुश बर्स बाक्शा, मेकेर उइ बेक्माक्त। नोले इं किकी पिपी याकूब आ तौ यो मेकेर बेक्मा बाक्त।
16 इजीप्तमी बेक्तेक्म हना यो, आन बेक्शो रां शेकेम सहर लाइश्शा थिम्मे बाक्त। अब्राहाममी शेकेम सहरम मेको थिम्तीके रू हमोर आ तौपुकी रे चांदी गेशा, ग्याप्शो बाक्माक्त।
17 मिनु परमप्रभु यावेमी अब्राहाम कली गेशो लोव़ जाक्दीम्माक्त। मोपतीके इजीप्त रागीमी इं मुर बारना बारन लशा, शुश दुम्मा बाक्त। प्रस्थान १:-३:-
18 मिनु इजीप्त रागीमी अर्को पिप दुम्माक्त। मेको योसेफ नु आ खिं ङा मुर आन कली मतुइक्ब बाक्माक्त।
19 मेको पिपीमी इं मुर आन कली शिशी मपथु, शुश श्येत गेवा बाक्त। आल थीब आन कली यो आन आल थुल्चा मगेथु ताइक्पदा बाक्त।
20 मेना मोसा जरमेसे बाक्त। मेको परमप्रभु यावे आ ङोंइती थम दारशो आल बाक्त। मोपतीके आम आफोमी मेको कली महिना सां सम्म आस खिंमी ख्रुइश्शा थुल्से बाक्त।
21 महिना सां नोले आल कली प्रोन्से बाक्त। मिनु फाराओ आ तमीमी मेको आल कली थिश्शा लाइश्शा, आ तौ सेला बाक्त।
22 मिनु पिप बाक्तीक खिंमी बाक्मेनु, इजीप्त रागी ङा ठेयब मुर आन जोक्शो तुइश्शो आं यो नेल्ल जोक्ब तुइक्ब दुम्माक्त। मिनु मोसा आ लोव़ नु आ गेय नेल्ल सक्ति पाइश्शो दुम्माक्त।
23 मिनु मोसा ४० बर्स दुम्मेनु, आ लोक्ब इस्राएली आन कली ग्रुम्चा थुं पवा बाक्त।
24 मिनु काबु ग्रुम्थ लमेनु, इजीप्त ङा मुरुमी इस्राएली कली तुप्शो तशा, मोसामी इस्राएली कली प्रोंइशा, इजीप्ती कली तुप्शा सदा बाक्त।
25 मोसामी ‘परमप्रभुमी आं कली आं लोक्ब आन कली श्येत रे प्रोंइब सेल्ती’ आं लोक्बपुकीमी एको आंइ कली श्येत रे प्रोंइब बाक्माक्त, दे रुप्शा, आं कली ब्राइनीम, दे मिम्शो बाक्माक्त। आ लोक्बपुकीमी चहिं मेको काइ मरुप्शो बाक्मा बाक्त।
26 मिनु आ दीसा मोसा लेंशा मेक जाक्दीम्मेनु, इस्राएली निक्शी आस कली जिशो तवा बाक्त। मिनु मेको आस कली ‘गे निक्शी, वोबु दुम्शा यो जिनीसी?’ देंमाक्त।
27 मिनु मरिम्शो पाइबमी गाइश्शा मोसा कली ‘गो आंस कली हुकुम नु निसाफ पाइब सुम सेले? प्रस्थान २:१४
28 सिनाक्त एकेर इजीप्ती कली साइश्शो खोदेंशो पा आं कली सदु, देने?’ दे नेप्ता बाक्त।
29 मेको लोव़ नेंशा, मोसा इजीप्त रागी रे प्रोक्शा, मिदयान रागीम जाक्दीम्माक्त। मेकेर जाक्दीश्शा बाक्मेनु, तौ निक्शी थिमाक्त। प्रस्थान १८:३-४
30 मिदयान जाक्दीश्शा, बाक्शो ४० बर्स दुम्माक्त। मिनु काबु सीनै डांडा ङा गोरशो रागीमी बाक्मेनु, परमप्रभु यावे आ स्वर्ग ङा गेय पाइब कामी ब्रशो बुटा कोंइदा बाक्त।
31 मोसामी मोपा ब्रशो तशा छक लाक्शा, ओदेंशो मार ब्रमे, दे आ नेक्था लशा कोव़ङा बाक्त। मिनु नेक्था जाक्दीश्शा कोव़ङानु, परमप्रभु आ लोव़ नेंना बाक्त। प्रस्थान ३:५-१०
32 ‘गो इन किकी पिपी आन परमप्रभु यावे नङ। गो अब्राहाम, इसहाक नु याकूब आन परमप्रभु यावे नङ’ देंशो नेंशा हिंशा, ख्रिंख्रि पा बुटा गे यो कोव़ने मचबा बाक्त।
33 मिनु परमप्रभु यावेमी ‘इ थेक्शा राप्शा बाक्तीके आं बाक्तीक बाक्ब। मोपतीके इ जुत्ता प्रुइश्शा, आं लोव़ नेनो।
34 इजीप्त रागीम बाक्ब आं मुरपुकीमी शुश श्येत जाम्तेक्म, दे तुइक्ताक्ङ। आन श्येत ताता। मिनु आन ङाक्शो यो नेंता। मिनु आं मुर आन कली मोदेंशो श्येत रे प्रोंइपाइक्चा दुम्ती, दे इ कली इजीप्त सोइक्नन’ देंशो नेना बाक्त।
35 ‘इ कली हुकुम पाइब नु निसाफ पाइब सुम सेले?’ दे खेरचा पुंइसीशो मोसा कली परमप्रभु यावेमी हुकुम पाइब नु प्रोंइब सेल्शा, आ स्वर्ग ङा गेय पाइब रे बुटाम तपांइसीशा इजीप्त सोइक्ता बाक्त।
36 मिनु शुश चिन्ड नु छक लाक्चा ङा गेय कोंइशा, इस्राएली आन कली इजीप्त रे ग्रुंइशा, लल समुन्द्र चाक्दीम्मी बाक्त। मेकेर यो शुश छक लाक्चा ङा गेय कोंइदीमी बाक्त। मिनु लल समुन्द्र शोक्शा ४० बर्स सम्म गोरशो रागीमी हिरशा गाक्मानु, शुश छक लाक्चा ङा गेय पाइबाक्माक्त। प्रस्थान ७:१०; प्रस्थान १४:२१
37 मेको मोसामी इस्राएली आन कली ‘आं खोदेंशो, परमप्रभु यावेमी आ लोव़ पाइब इन दाते रे का योव़शा, आ लोव़ नेंपाइक्ब का सेल्ब’ दे तुइक्पाइक्मी बाक्त। ब्यवस्था १८:१५
38 इस्राएलीपुकी गोरशो रागीमी बाक्मानु, आन कली लां कोंइब मेको मोसा बाक्माक्त। सीनै डांडामी परमप्रभु आ सोइश्शा आ गेय पाइबमी इं किकी पिपी आन कली लोव़ पवानु, मेको मोसा रे पा नेंपाइक्मी बाक्त। मेको लोव़ चहिं मजाम्थु गेना हना यो लीब लोव़ बाक्ब। मुल सम्म गो इं कली गारशो लोव़ बाक्ब, दे तुइक्तीने। प्रस्थान १९:-; ब्यवस्था ९:१०
39 इं किकी पिपीमी मोसा आ लोव़ मटिथु मनेंथु, मोसा कली प्रोंइशा आन थुं इजीप्त रागी गे हिरदमे बाक्त।
40 मिनु हारून कली ‘इं कली इजीप्त रागी रे एक चाक्ब मोसा ते लाक्गा? बेक्म कों प्रोक्म कों? मतुंइसे। मुल लां कोंइब का माल्ताक्व। मोपतीके देवता सेल्चा गेकी। मिनु मेको इं कली लां कोंइब दुम्ल’ दे पुन्मे बाक्त। प्रस्थान ३२:१
41 मिनु सुन के बाछा आ मूर्ति सेल्शा, मार मार क्योरशा जारदेमे बाक्त। आंम आन गुइमी सेल्शो मूर्ति तशा ग्येरसीशा, जचा तूचा सेल्शा ङा मिन बुक्शा जामे तूङमे बाक्त।
42 मेकोपुकीमी मो पशो तशा, परमप्रभु यावे गाइश्शा ‘मेकोपुकी नां नु तास्ला कली सेउ पाइब दुम्ल’ दे प्रोंइमी बाक्त। परमप्रभु यावे आ लोव़ पाइबमी ‘गे इस्राएलीपुकी, गोरशो रागीम ४० बर्स सम्म हिरशा गाक्नीनु, मार मार क्योरशा जारशा, आं कली चढ़ेनी ङा?
43 मो मपनी। गे मोलोक देवता आ ताम्बु कुरशा लाइक्तीनी। रिफन सोरुल आ मूर्ति सेल्शा लाइक्तीनी। मोपतीके इन रागी रे बेबीलोन लाइक्नन्नी’ दे ब्रेक्शो बाक्त। आमोस ५:२५-२७
44 इं किकी पिपी गोरशो रागीमी हिरसमानु, परमप्रभु यावे आ ताम्बु यो कुरशा गाक्मा बाक्त। परमप्रभु यावे आ ताम्बु चहिं दोपा सेल्चा, दे परमप्रभु यावेमी मोसा कली कोंइशो खोदेंशो पा मोसामी सेल्पाइश्शो बाक्माक्त। प्रस्थान २५:९
45 मिनु नोले इं किकी पिपी यहोसु मेको आन लां कोंइब दुम्शा, मेको ताम्बु कुरशा गाक्मा बाक्त। मिनु कनान रागीमी जाक्दीम्मानु, मेको ताम्बु आन ङोंइती कुरशा गाक्शो बाक्तेक्म। परमप्रभु यावेमी मेकेर बाक्ब मुर आन कली ग्राशा खेरशा, मेको रागी आन के सेल्शा, मेको ताम्बु मेकेन वोदमे बाक्त। मिनु पिप दाऊद आ पाला सम्म मेको ताम्बु मोदेंशोन लीमाक्त। यहोसु ३:१४; यहोसु १६:१
46 पिप दाऊद परमप्रभु यावे आ दाक्शो मुर बाक्माक्त। पिप दाऊदमी परमप्रभु यावे कली दाक्शा ‘याकूब आ परमप्रभु यावे कली खिं सेल्नुङ’ दे थुं पवा बाक्त। २सामुएल ७:१-१६; भजन संग्रह १३२:३-५
47 तन्न आ तौ सोलोमनमी परमप्रभु यावे आ खिं सेला बाक्त। १राजा ६:-
48 मिनु नेल्ल क्येङा ठेयब मुरुम सेल्शो खिंमी मबाक्ब। साइ नेसी परमप्रभु यावे आ लोव़ पाइबमी परमप्रभु यावेमी
49 ‘सरीङ आं नित्तीके बाक्ब। रागीम आं खोइल थेक्तीक बाक्ब। मोपतीके आं कली दोदेंशो खिं सेल्ने चाप्नीनी? गो आं नाइक्चा कली बाक्तीक मार सेल्ने चाप्नीनी?
50 सरीङ नु रागी नेल्ल आं सेल्शो ममाइ ङा?’ दे परमप्रभुमी देंमाक्त” दे लोव़ पवा बाक्त। यसैया ६६:१-२
51 “ए, गे परमप्रभु यावे आ लोव़ मनेंथु मटीब फुल्लु खोदेंशो थुं पाइश्शोपुकी, गे परमप्रभु यावे कली मतुइक्ब मुर खोदेंशो पाइनीनी। इन किकी पिपीमी पशो खोदेंशो पा गे यो परमप्रभु यावे आ सोक्त आ देंशो मटिथु दूली पाइनीनी। प्रस्थान १२:९; लेवी २६:४; रोमी २:२८-२९
52 इन किकी पिपीमी मार पामे? परमप्रभु आ लोव़ पाइब सु कली श्येत मगेमे ङा? नेल्ल आन कली श्येत गेम्तेक्म। श्येत गेशा ला ममाइ। इन कली पाप रे प्रोंइब ख्रीस्त जाक्ब, दे लोव़ नेंपा गाक्ब आन कली साइक्पाइक्ना पाइक्न बाक्तेक्म। इन कली पाप रे प्रोंइब ख्रीस्त जाक्त। मिनु गेपुकीमी मेको कली यो साइक्पाइक्तीनी। २इतिहास ३६:१६; मत्ती २३:३१
53 परमप्रभु यावे आ स्वर्ग ङा गेय पाइबपुकीमी मार पचा मार मपचा, दे परमप्रभु यावे आ अरेशो लोव़ शेंसीशा योव़सीशो दुम्शा यो मटिनी” दे स्तीफानसमी हुइक्तीमी बाक्त। प्रस्थान २०:१-२१; गलाती ३:१९; हिब्रू २:२
54 स्तीफानसमी मोदें हुइक्तीमीनु, नेल्ल गाइश्शा, लल गोंगों जिशा, ख्रुइ शेप्शा प्रेक्मा बाक्त।
55 स्तीफानस चहिं परमप्रभु यावे आ सोक्तीम ब्रीशा, सरीङ गे कोव़ङा बाक्त। सरीङ गे कोव़ङानु, ठेयब सक्ति पाइश्शो नु छेङछेङ पा तांइसीशो परमप्रभु यावे कली तवा बाक्त। परमप्रभु आ ग्युरा गे रागीम जरमेशो, येसु कली यो राप्शा बाक्शो तवा बाक्त।
56 मिनु “लो कोव़ङीन, गो स्वर्ग रोक्सीशा, परमप्रभु आ ग्युरा गे रागीमी जरमेशो कली राप्शा बाक्शो ताता” दे माइक्मी बाक्त। लूका २२:६९
57 मो देंमेनु “एको आ लोव़ मनेंचा” दे शुश रेयके पा, गुइ पोक्शा प्रेक्शा ग्राम्शा ग्याइक्तमे बाक्त।
58 मिनु कीशा लाइश्शा, सहर रे ग्रुंइशा, फुल्लु क्रोम्चा गोव़मे बाक्त। सांकछीपुकीमी आन वा प्रुइश्शा, सावल नें पाइश्शो ठिटा का आ ङोंइती वोदमे बाक्त। लेवी २४:१६; प्रेरित २२:२०
59 मेको हुलमी स्तीफानस कली फुल्लु क्रोम्स ङा क्रोम्स पामेनु, स्तीफानसमी “प्रभु येसु, आं सोक्त ताक्कीन” दे पुंइदा बाक्त। लूका २३:४६
60 मिनु आ पोक्च थेक्शा ठेयब सेंदा पा “प्रभु, एको पाप एको आन कली मरल” देंशा, बेक्माक्त। लूका २३:३४