2
येसु ख्रीस्त आ पर्बम शेंशो
1 आं लोक्बपुकी, गो गेपुकी नु बाक्ङानु, परमप्रभु यावे आ लोव़ नेंपदुनु, मुर आन जोक्तीक तुइक्तीक रे नु फू चुइश्शो लोव़ पा मशेंदन्नी।
2 मारदे हना येसु ख्रीस्त कली शीम केप्शा कांटी थोक्शा क्याइश्शा साइक्चा पुंइसीशो लोव़ ङा लाक्शा अरु मशेंनुङमी, दे आं थुं फ्रेंशा जाक्शो नङ। गलाती ६:१४
3 मिनु इन कली शेंदन्नीनु, आं रांमी बल मबाक्थु, हिंना हिंन, ख्रिंख्रि पा शेंताक्न्नी। गलाती ४:१३; प्रेरित १८:९; २कोरिन्थी १०:३
4 मुर आन कली जोक्तीक तुइक्तीक कोंइशा, ठेयब लोव़ मपङ। तन्न परमप्रभु यावे आ सोक्तीम कोंइशो सक्ति रे पा शेंताक्न्नी। मत्ती १०:२०
5 तन्न इन थमा सुइक्तीके मुर आन जोक्तीक तुइक्तीकेम मबाक्थु, परमप्रभु यावे आ सक्तिम बाक्ल। १थिस्सलोनिकी १:५
परमप्रभु आ जोक्तीक तुइक्तीक
6 मो हना यो गो जोक्तीक तुइक्तीक लोव़ रुप्ब आन कली लोव़ पाइनीकी। तन्न रागी ङा नु सासन पाइब आन जोक्तीक तुइक्तीक ङा लोव़ चहिं ममाइ। मारदे हना मेको बेक्शा लाइनीम।
7 तन्न गो दोदेंशो जोक्तीक तुइक्तीक ङा लोव़ शेंनीकी देंशा हना, परमप्रभु यावे आ जोक्तीक तुइक्तीक ङा लोव़ शेंनीकी। मेको लोव़ ङोंइती ख्रुइश्शा वोइश्शो बाक्त। मुल इन कली रिम्शो दुम्मल, दे शेंनीकी। मत्ती ११:२५; कलस्सी १:२६
8 मेको लोव़ रागी ङा ठेयब मुरपुकीमी मरुबेम। रुप्तेक्म हना, सक्ति पाइश्शो प्रभु कली शीम केप्शा कांटी थोक्शा क्याइश्शा मसदेम वा।
9 मिनु “मिक्चीम मतशो, नोफाम मनेंशो, मुर आन थुंमी ममिम्शो लोव़ परमप्रभु यावेमी आ कली दाक्ब आन कली तुइक्पाइश्शा, रुप्चा गेम्तीमी” दे ब्रेक्शो बाक्ब। यसैया ६४:४
10 मेको लोव़ परमप्रभु यावेमी आ सोक्त रे पा इं कली तुइक्पाइश्शा रुप्पाइक्तु। मारदे हना परमप्रभु यावे आ सोक्तीम नेल्ल तुइक्ब। ख्रुइश्शो लोव़ यो माल्शा ग्रुंइब। परमप्रभु यावे आ सोक्तीम परमप्रभु यावे आ थुं ङा लोव़ यो नेल्ल तुइक्ब।
11 मुर आन थुंमी मार बाक्बा, सुमी तुइक्नीमी ङा? आंम आन थुं ङा लोव़ आंमा ला तुइक्नीम। परमप्रभु यावे आ सोक्त ङा लाक्शा सुइमी परमप्रभु यावे आ थुं ङा लोव़ मतुइक्नीम, आ सोक्तीम ला तुइक्ब।
12 गोपुकीम रागी ङा सोक्त मतशो बाक्नय, परमप्रभु यावे आ सोक्त कली ताइतय। मोपतीके गो परमप्रभु यावे आ गेशो नेल्ल रुप्नय। यूहन्ना १४:१६-१७
13 मोपतीके गो शेंदकानु, मुर आन जोक्तीक तुइक्तीक लोव़म मशेंनीकी। परमप्रभु यावे आ सोक्तीम गेशो लोव़ पा शेंनीकी। मिनु परमप्रभु यावे आ सोक्तीम ब्रीशो मुर आन कली शेंशा रुप्पाइक्नीकी।
14 परमप्रभु यावे कली थमा मसुइक्ब मुरुम परमप्रभु यावे आ सोक्त ङा गेय मताइनीम। मेको नेल्ल मेको आन कली मूर्ख गेय खोदेंशो पा रुप्ने मचाप्नीम। मारदे हना मेको सोक्त ङा लोव़ बाक्ब। यूहन्ना ८:४७; १कोरिन्थी १:२३
15 परमप्रभु यावे आ सोक्त पाइश्शो मुरपुकीमी मारेइ मारेइ नाक्ने नु रुप्ने चाप्नीम। तन्न मेको आन कली नाक्ब सुइ मबाक्नीम।
16 मार ब्रेक्शो बाक्ब देंशा हना “सुमी प्रभु आ थुं नाक्ने नु रुम्ने चाप्बा ङा? सुमी प्रभु कली शेंने चाप्बा ङा?” दे ब्रेक्शो बाक्त। तन्न गोपुकी नु ख्रीस्त आ थुं बाक्ब। यसैया ४०:१३