10
पावल आ गेय
1 गो, ख्रीस्त आ ब्रेम्शो नु रिम्शो पतीकेमी, इन कली शेंना शेंन बाक्नुङ। गो इन नेक्था बाक्शा, ब्रेम्शो लोव़ पाइनुङ। तन्न गो ङोन बाक्ती हना, हुइश्शा लोव़ पाइनुङ।
2 गो इन बाक्तीके जाक्ङानु, चिठीम ब्रेक्शो लोव़ खोदेंशो पा हुइश्शा लोव़ पचा ममाल्ङल, दे मिम्शा ब्रेक्ताक्ङ। आंइ पर्बमी “रागी ङा मुर खोदेंशो पा शेंनीम” देंब आन कली हुइश्शो खोदेंशो पा इन कली हुइक्चा मदाक्नुङ। २कोरिन्थी १३:१-२; १कोरिन्थी ४:२१
3 मारदे हना गो रागीम बाक्तक हना यो, रागी ङा मुर खोदेंशो पा मजीनीकी।
4 आंइ लडाइ पतीक या रागी ङा खोदेंशो मबाक्नीम। तन्न मेको परमप्रभु यावे आ सक्ति पाइश्शो बाक्नीम। मेकोमी मारेइ मारेइ खतम सेल्ने चाप्नीम। एफिसी ६:१३-१७
5 परमप्रभु यावे कली थमा सुइक्ब आन कली तेक्बमी पशो लोव़, ठेयब लेश्शा थमा मसुइक्तीक लोव़ खतम सेल्तक। मिनु ख्रीस्त आ लोव़ टीब दुम्पाइक्चा कली मटीब मिम्तीक नेल्ल ग्याइश्शा लाइक्ब खोदेंशो बाक्नीकी।
6 मिनु इन ख्रीस्त कली टिशो रिम्शो दुम्त हना, सु सुमी मटीमे, गो मेको आन कली सजाइ गेनीकी।
7 मिनु इन ङोंइती दोपा बाक्नीकी, मेको कोव़ङीन। सु सुमी “गो ख्रीस्त आ मुर दुम्ती” दे आन नें बोरपदमे, मेकोपुकीमी आंइ कली यो ख्रीस्त आ मुर बाक्नीम, दे रुप्मेक्ल।
8 गो आंइ अधिकार आ पर्बम बोरती हना यो, मुने मदोक्नुङ। मारदे हना मेको इन कली खतम सेल्चा कली ममाइ। तन्न इन कली रिम्शो सेल्चा कली प्रभुम गेती। २कोरिन्थी १३:१०; १कोरिन्थी ५:४-५
9 आं ब्रेक्शो चिठी इन कली हिंपाइक्चा कली ममाइ, दे मिम्तीन।
10 मारदे हना मेकोपुकीमी “मेको आ ब्रेक्शो चिठी ठेयब नु बोल्यो लोव़म ब्रीशो बाक्नीम। तन्न आंमान जाक्त हना, मारेइ पने मचाप्ब नु ब्वाक्स मजोक्ब बाक्ब” देंनीम।
11 मोदेंशो मुरपुकीमी मार रुप्चा माल्नीम देंशा हना “गो मबाक्ची ना हुइश्शा शेंशा ब्रेक्शो लोव़, आंइ बाक्ची ना मपाइनीकी” दे रुप्मेक्ल। २कोरिन्थी १३:२,१०
ठेयब मनकी, दे रुप्पाइश्शो
12 आंमान ठेयब सेल्सीबपुकी नु मगारनीकी। आन पशो खोदेंशो यो मपाइनीकी। मेकोपुकीमी ठेयब सेल्सीशा, आंम आन जोक्तीक तुइक्तीक कोंइमुइनीम। मोदेंशो पशोमी “मारेइ मरुप्ब बाक्नीम” दे तुंइसीब। २कोरिन्थी ३:१; २कोरिन्थी ५:१२
13 गो आंइ नें बोरपाइक्नीकी। मारदे हना परमप्रभु यावेमी आंइ कली अधिकार गेशा, इन कली शेंब सेल्तु। आ गेशो अधिकार ङा लाक्शा चहिं जोक्ब तुइक्ब नकी, दे बोरशा मगाक्नीकी। रोमी १५:२०; रोमी १२:३
14 आंइ नें बोरपाइक्नीकी। मारदे हना आंइ क्येङा ङोंइती इन बाक्तीके ख्रीस्त आ ग्येरपाइक्तीक लोव़ नेंपाइक्थ सुइम मजाक्म, दे तुइक्ताक्क।
15 अरु मुरपुकीमी इन कली शेंशो आ पर्बम गो मबोरनीकी। तन्न इन थमा सुइक्तीके बारना बारन लमेनु, आंइ शेंतीके यो मेको नु बारना बारन लाइब।
16 मिनु इन बाक्तीक क्येङा लाक्शा, एर ओंथ ख्रीस्त आ ग्येरपाइक्तीक लोव़ शेंने चाप्नीकी। मुर आन शेंने थुम्शो ग्रुम्तीके आ पर्बम आंइ नें मबोरपाइक्नीकी।
17 सु बोरनीमी, मेको प्रभु आ पर्बम नें बोरपदमेक्ल। येरमीया ९:२३-२४; १कोरिन्थी १:३१
18 सुमी आंम कली शेंब सेल्बा, मेको कली मब्राइनीम। तन्न प्रभुमी शेंब सेल्शो कली ब्राइनीम। १कोरिन्थी ४:५