3
नक कबल ङा गेय
1 गो मेकोपुकीमी लोव़ पशो खोदेंब पा ठेयब सेल्सीनीकी ङा? मेकोपुकीमी सिफारीस कागज ग्रुंइनीमी। मिनु गोपुकी यो मोदेंशो कागज कुरशा, शेंना शेंन गाक्चा माल्नीकी ङा? २कोरिन्थी ५:१२
2 मोदेंशो आंइ कागज चहिं गेपुकी दुम्तीनी। गे आंइ थुंमी ब्रेक्शो बाक्नीनी। मिनु मुर नेल्लेमी इन पर्बम तुइक्ने चाप्नीम। १कोरिन्थी ९:२
3 गे ख्रीस्तमी ब्रेक्शो चिठी दुम्तीनी। कागज मसीमी ब्रेक्शो ममाइ। फुल्लु मुशा ब्रेक्शो यो ममाइ। ब्रोंइचा गेब परमप्रभु यावे आ सोक्तीमी इन थुंमी ब्रेक्शो बाक्ब। प्रस्थान २४:१२
4 ख्रीस्त आ नेंमी परमप्रभु यावे कली थमा सुइक्नीकी।
5 गो शेंदकानु, आंम जोक्तीक तुइक्तीक मकोंइनीकी। आंइ लोव़ शेंतीके परमप्रभु यावेमी पपाइश्शो बाक्ब, दे तुइक्नीकी। २कोरिन्थी २:१६
6 मेकोमी आंइ कली जोक्ब तुइक्ब सेल्शा, आ नक कबल ङा लोव़ शेंथ सोइक्ताक्की। ब्रेक्शा ममाइ, तन्न आ सोक्तीमी गेप्तु। ब्रेक्शोमी साइक्ब, तन्न आ सोक्तीमी ब्रोंइचा गेब। येरमीया ३१:३१; १कोरिन्थी ११:२५; रोमी ७:६; यूहन्ना ६:६३
नक कबल ठेयब बाक्ब
7 बेक्तीक चाक्ब कबल फुल्लुमी मुशा, ब्रेक्शो बाक्माक्त। मेको आ छेङछेङ थम ठेयब बाक्त। मेकोम पतीके इस्राएलीपुकीम मोसा आ कुल कोव़ने मचाबेम। तन्न नोले मेको छेङछेङ ग्युम्ना ग्युम्न लत। प्रस्थान ३४:२९-३५
8 परमप्रभु यावे आ सोक्त आ कबल मेको क्येङा छेङछेङ मदुम्बा ङा? गलाती ३:२,५
9 मारदे हना बेक्तीक कबल छेङछेङ बाक्त हना, ठीक पतीके आ कबल मेको क्येङा शुश छेङछेङ दुम्चा माल्ब। रोमी १:१७; रोमी ३:२१
10 मेको ङोंइती छेङछेङ पाइश्शो बाक्त। मुल आ छेङछेङ नेल्ल जाम्शा लत। मारदे हना मुल मेको क्येङा शुश छेङछेङ पाइश्शो जाक्त।
11 ङोंइती ङा जाम्शा लाइब कबल छेङछेङ पाइश्शो बाक्ब। मुल लीशो कबल आ छेङछेङ गिश ठेयब बाक्म माइ?
12 मोदेंशो आस पतीके गो काइ महिंब दुम्शो बाक्नीकी।
13 साइ मोसामी पशो खोदेंशो मपाइनीकी। मोसामी इस्राएलीपुकीमी आ कुल ङा छेङछेङ ग्युम्ना ग्युम्न लशो मतामेक्ल, दे आ कुल वामी गिल्से बाक्त।
14 मोसामी इस्राएली आन कली परमप्रभु यावे आ देंशो लोव़ शेंदीमी बाक्त। मेकोपुकी चहिं मारेइ मरुप्ब दुम्मा बाक्त। मुल यो मरुप्ब बाक्नीम। साइ ङा लोव़ नेंपदमेनु, मेको आन थुं वाम गिल्शो खोदेंब दुम्शा, लोव़ मरुप्नीम। ख्रीस्तमी ला मेको आन थुंमी गिल्शो वा प्राक्शा रुप्ब सेल्ने चाप्ब। प्रेरित २८:२७; रोमी ११:२५
15 मुल यो मोसाम ब्रेक्शो लोव़ नेन्मेनु, आन थुं गिल्सीशो बाक्ब।
16 तन्न सुमी आ थुं प्रभु गे हिरबा, मेको आ थुंमी गिल्शो वा हुक्सीशा, रुप्ब दुम्ब। रोमी ११:२३,२६; प्रस्थान ३४:३४
17 मारदे हना प्रभु सोक्त बाक्ब। प्रभु आ सोक्ती ते बाक्बा, मेकेर पाप आ सजाइ रे ब्रोंइतीके बाक्ब।
18 गो नेल्ल इं थुं गिल्शो वा हुक्शा, प्रभु आ छेङछेङ कोंइशा, प्रभु आ छेङछेङ पाइश्शो खोदेंशो दुम्शा फाइक्चा पुंइसाक्य। मेको फाइक्तीके बारना बारन लशा, इं कली छेङछेङ का रे अर्को छेङछेङम फाइक्ब। मेको नेल्ल प्रभु रे जाक्ब। मेको सोक्त बाक्ब। २कोरिन्थी ४:६