8
क्येट पोक्शो
1 आं लोक्बपुकी, परमप्रभु यावेमी मासीडोनीया रागीमी बाक्ब थमा सुइक्ब आन कली शिशी पशो आ पर्बम इन कली शेंनीकी। रोमी १५:२६
2 मेकोपुकी शुश श्येत जाम्तेक्म हना यो, ग्येरसीशो बाक्नीम। प्रुङग बाक्तेक्म हना यो, अरु आन कली योक्शा गेम्तेक्म।
3 सुइमी गेन की गेन मदेंथु, आंमा आन दाक्शो पा आन चाप्शो क्येङा यो शुश गेम्तेक्म। आन चाप्शो क्येङा शुश गेशो आं मिक्चीमीन ताता।
4 मेकोपुकीमी आं कली “गो यो थमा सुइक्ब आन कली क्येट पोक्चा दाक्नीकी” दे पुंइतेक्म। प्रेरित ११:२९
5 मेको आन मोदेंशो चहिं क्येट गेचा लोव़ ला ममाइ। ङोंइती मेकोपुकीमी आन थुं प्रभु कली गेम्तेक्म। मिनु परमप्रभु यावे आ दाक्शो पा, गोपुकी नु गारशा बाक्तेक्म।
6 ङोंइती तीतसमी इन कली क्येट पोक्पाइक्तु। मुल गो तीतस कली “इन क्येट पोक्तीके, रिम्शो गेय, थुमीन” दे अरेतक।
7 गे मार पाइतीनी हना यो, शुश पाइतीनी। इन थमा सुइक्चा, इन लोव़ पस जोक्चा, इन तुइक्चा, इन रिम्शो गेय पतीके नु इन आंइ कली दाक्तीकेमी शुश गेय पाइनीनी। मुल गे मेको दाक्तीक गेयमी यो रिम्शो गेय कोंइताक्नी। १कोरिन्थी १:५; १कोरिन्थी १६:१-२
8 इन कली अधिकार तशो लोव़ मपाइनुङ। थमा पा दाक्चा दोपा तांइसीब देंशा हना, सुइमी गेन की गेन माइक्चा मपुंइसीथु, आंम थुंमी मिम्शा गेशो रे तांइसीब। शुशेमी मोपा गेम्तेक्म। मिनु गेपुकीमी यो दाक्तीक गेय कोंइदीने।
9 मारदे हना गे इं प्रभु येसु ख्रीस्त आ शिशी तुइक्नीनी। मेको शोंप पाइश्शो बाक्त हना यो इन पर्बम प्रुङग दुम्त। मेको प्रुङग दुम्तीकेम गे शोंप पाइश्शो दुमीन, दे मो पाप्तु। मत्ती ८:२०; फिलिप्पी २:७
10 मिनु गो इन कली मार देंनुङ देंशा हना “बर्स का ङोंइती इन गोशो गेय थुम्चा मालीने” देंनुङ।
11 इन गेचा दाक्शो नु इन गेने चाप्चा ङा क्येट पोक्शा गारीन।
12 आंम के बाक्शो ला गेने जाप्ब, आंम के मबाक्शो गेने मजाप्ब। इन चाप्चा ङा पा गेने। हितोपदेस ३:२७-२८; मर्कूस १२:४३
13 इन कली मजाक्दीत्चा ङा पा वोइश्शा, अरु आन कली आन माल्शो क्येङा शुश गेन मदेंनुङ। इन कली गप्ल, मेको आन कली यो गप्ल देंनुङ।
14 मुल इन के शुश बाक्मेनु, मथीब आन कली वारच पतीने। मिनु नोले मेको आन के शुश दुम्मेनु, इन कली यो वारच पाइनीम। मोपा वारच पा गेमुशोमी नेल्ल इं के बाक्शो उइक्थ उइक्थ दुम्ल, दे मिम्ताक्ङ।
15 मार ब्रेक्शो बाक्त देंशा हना “सु सुमी शुश खुप्तमे, मेको आन के महें। सु सुमी चहिं इच्का ला खुप्तमे, मेको आन कली यो जाक्दीत्त” दे ब्रेक्शो बाक्ब। प्रस्थान १६:१८
16 गो परमप्रभु यावे कली “गे रिम्शो पाइब बाक्नीनी” दे ठेयब सेल्नुङ। मारदे हना तीतसमी कोरिन्थी इन कली शुश मिम्ताक्व।
17 गोपुकीमी तीतस कली “कोरिन्थी आन कली ग्रुम्थ लावो की लावो” दे सोइक्ताक्क। आंइ देंशो लोव़ टिशा, लशो ला ममाइ। आं यो ग्रुमग्रुम दाक्शा ग्येरसीशा पित, दे तुइक्नुङ। २कोरिन्थी ८:६; २कोरिन्थी ७:७,१५
18 तीतस नु गाक्ब वारच का यो सोइक्ताक्क। थमा सुइक्ब नेल्लेमी मेको कली तुइश्शो बाक्नीमी। मारदे हना मेको येसु ख्रीस्त आ ग्येरपाइक्ब लोव़ रिम्शो पा शेंब, दे नें चलेशो बाक्ब। २कोरिन्थी १२:१८
19 आ नें चलेशो ला ममाइ। थमा सुइक्बपुकी गारशा मेको कली गो नु क्येट पोक्शा गाक्चा कली योव़तेक्म। मेको गोपुकी नु शिशी पतीक गेय पाइब। गो मेको वारच पतीके प्रभु कली ठेयब सेल्चा कली पाइनीकी। गलाती २:१०
20 मोपा सांकछी वोइक्कानु, मेको क्येट आ पर्बम मरिम्शो लोव़ पने मचाप्नीम।
21 गो प्रभु आ ङोंइती रिम्शो पशो ला ममाइ। मुर नेल्ल आन ङोंइती यो रिम्शो पशा कोंइनीकी।
22 मोपतीके मेको निक्शी नु आंइ लोक्ब का यो सोइक्नीकी। ङोंइती खेयप निक्शी सां सोइक्तकानु, मेको लोक्बमी रिम्शो गेय पा कोंइताक्व। मोपतीके मुल यो रिम्शो पाइब, दे तुइक्ताक्क। मेकोमी इन कली यो रिम्शो मिम्ब।
23 तीतस गो नु गारशा इन कली गेय पाइब बाक्ब। अर्को लोक्ब निक्शी थमा सुइक्ब आन सोइश्शो बाक्नीस। मेको ख्रीस्त आ नें ठेयब सेल्ब बाक्नीस। २कोरिन्थी ७:१३; २कोरिन्थी १२:१८
24 मोपतीके मेको सां इन बाक्तीके जाक्मानु, मेको आन कली दाक्शा, वारच पतीने। मेको आन कली मार माल्दा, मेको गेने, आन लोव़ नेनीने। आं देंशो पाइतीनी हना, गोमी इन पर्बम पशो लोव़ थमा दुम्ब। मिनु गो ग्येरसीनुङ। थमा सुइक्ब नेल्लेमी यो “कोरिन्थीपुकीमी रिम्शो पामे बाक्त” दे तुइक्नीम। २कोरिन्थी ७:१४