4
पिपमी लेंशा ङोमु तशो
1 मिनु पिप नेबुकदनेसरमी जात जात नु रागी रागी ङा आंम आंम लोव़ पाइब नेल्ल आन कली “गे थुं नाइश्शा बाक्कीन। दानीएल ६:२५
2 नेल्ल क्येङा ठेयब परमप्रभुमी आं कली चिन्ड नु छक लाक्चा ङा गेय कोंइताक्यी। मिनु मेको लोव़ इन कली शेंचा रिम्शो लाक्ती।
3 मेको आ कोंइशो चिन्ड गिश ठेयब बाक्नीमी। मिनु आ छक लाक्चा ङा गेय गिश सक्ति पाइश्शो बाक्नीमी। आ राज्य गेना हना यो लीब। मिनु आ अधिकार यो गेना हना यो लीब। दानीएल २:४४; दानीएल ४:३१; दानीएल ६:२७; दानीएल ७:१४,२७; भजन संग्रह १४५:१३
4 गो, नेबुकदनेसर, आं खिंमी मारेइ मारेइमी गाप्शा, आं दरवारमी थुं नाइश्शा बाक्शो नङ।
5 मिनु गो आं दरवारम बाक्ङानु, ङोमु का ताता। मेको तशा, थाम्पा हिंती। आं थुंमी मार मार मिम्शा, मेको कोंइतीके तशा, ख्रिंख्रि पाता।
6 मिनु गो बेबीलोन रागी ङा जोक्ब तुइक्ब मुर नेल्ल आन कली ‘आं ङोमु रे मार रुम्सीबा’? मेको तुइक्पांइसीचा कली आं बाक्तीकेमी ब्रेत्ताक्ङमी।
7 मिनु जादू, मन्तर तन्तर पाइब, सोरुल कोव़ब कल्दी नु चिन्ड आ अर्थ तुइक्ब जाक्तेक्म। मिनु गो मेको आन कली ‘गो ङोमु का ताता’ दे शोव़ता। तन्न मेकोपुकीमी आं कली आं ङोमु रे मार रुम्सीबा, मेको शेंने मचबेम।
8 मिनु नेल्ल क्येङा नोले दानीएल आं ङोंइती जाक्त। मेको आ नें आं देवता आ नें खोदेंशो पा बेल्त-शजर बाक्त। मिनु मेको आ आगाम नेल्ल क्येङा ठेयब देवता आ सोक्त बाक्त। मिनु मेको कली गो ङोमु का ताता” दे शोव़ता। दानीएल ५:११,१४
9 मिनु गो मेको कली “बेल्त-शजर, जादू पाइब आन ठेयब मुर, इ आगाम नेल्ल क्येङा ठेयब देवी देवता आन सोक्त बाक्त। मिनु ख्रुइश्शो लोव़ मारेइ मारेइ शेंने चाप्ब बाक्नेवे। मोपतीके आं तशो ङोमु आ कोंइतीक देनो। मिनु मेको रे मार रुम्सीबा शेंदी” दे माइक्ता।
10 गो इप्शा बाक्ङानु, ङोमु का ताता। मेको दोदेंशो बाक्त देंशा हना, रागी आ दातेमी सरीङ थिचशो थम लाइश्शो रवा का बाक्त।
11 मिनु मेको रवा थम लाइश्शो बाक्त। मेको रवा ठेयब नु बोल्यो दुम्त। आ ङरीमी सरीङ थिप्तु। मिनु मेको रवा रागी रागी रे तांइसीबाक्त।
12 मेको आ सफा थम दारशो बाक्तेक्म। मिनु मेको रवाम शुश फल सिश्शो बाक्त। मिनु मेको रे नेल्लेमी जाइबाक्तेक्म। मिनु जन्तु मेको रवा आ पुंमी बाक्बाक्तेक्म। मिनु चिक्ब आ राशीम ग्योव़ सेल्बाक्तेक्म। मिनु ब्रोंइशा बाक्ब नेल्लेमी मेकेर रे जचा ताइबाक्तेक्म।
13 मिनु कोंइतीके कोव़ना कोव़न बाक्ङानु, स्वर्ग ङा कोव़ब इर रे यिशो ताता।
14 मेकोमी ठेयब शेंदा पा “एको रवा कली तिमीन। आ राशी नेल्ल क्योरीन, आ सफा हेमीन। मिनु आ फल फ्रशा गेने। मिनु जन्तु आन कली आ पुं रे प्रोक्पतीन। मिनु चिक्ब आन कली मेको आ राशी रे खेरीन।
15 तन्न मेको आ ठुटा नु शाक्श खपीम लीचा माल्नीम। मेको फलाम नु कांसा के पातामी फ्रेंशा, खपीमी लीचा माल्नीम। मिनु नाक्दो यिशो सीतमी जिश्शा बाक्ल। मिनु मेको जन्तुपुकी नु बाक्ल। जन्तु खोदेंशो पा घांसम बाक्चा माल्दल।
16 मेको ७ बर्स मोदेंशो दुम्चा माल्ब। मिनु मेको मुर आ थुं फांइसीशा, जन्तु आन थुं खोदेंशो दुम्ब।
17 स्वर्ग ङा कोव़बपुकीमी ‘नेल्ल क्येङा ठेयब परमप्रभुमी राज्य नेल्ल कली सासन पाइब। मेकोमी आ दाक्शो मुर कली सासन पतीक गेय गेब। मेको नेल्ल क्येङा ब्रेम्शो मुर आ गुइमी गेब। मेको मुर नेल्लेमी तुइक्चा माल्नीम’ दे लोव़ पाम्तेक्म। दानीएल २:२१
दानीएलमी ङोमु आ अर्थ शेंशो
18 मोपा गो पिप, नेबुकदनेसरमी ङोमु का ताता। मुल बेल्त-शजर, गे एको ङोमु रे मार रुम्सीबा, मेको शेंदी। आं राज्यम बाक्ब जोक्ब तुइक्ब नेल्लेमी मेको शेंने मचबेम। गे चहिं मेको शेंने चाप्नेवे। मारदे हना इ आगाम ठेयब देवता आ सोक्त बाक्ब” दे माइक्ता।
19 मिनु मेको नेंशा, बेल्त-शजर माइश्शो दानीएल आ थुं लुक्च लत। आ मिम्तीकेमी मेको कली शुश हिंपाइक्तु। मिनु गो, पिपमी मेको कली “बेल्त-शजर, आं ङोमु नु मेको आ रुप्तीकेमी इ कली हिंपाइक्चा मगेवो” देंती। मिनु दानीएलमी “हजुर, आं पिप, एको ङोमु इन जोरी सत्रु आन कली दुम्ल। मिनु मेको आ रुप्तीक लोव़ इन जोरी सत्रुम राम हना, दुम वा।
20 इन ङोमुम तशो रवा ठेयब नु बोल्यो दुम्शा, आ ङरीमी सरीङ थिप्तु। मिनु मेको रवा कली रागी रागी रे तांइसीबाक्त। इजीकीएल ३१:३-१४
21 मेको आ सफा थम दारशो बाक्तेक्म। मेको रवाम शुश फल सिश्शो बाक्त। मिनु मेको रे नेल्लेमी जाइबाक्तेक्म। मिनु जन्तुपुकी मेको रवा आ पुंमी बाक्बाक्तेक्म। मिनु चिक्ब आ राशीम बास बाक्बाक्तेक्म।
22 हजुर, पिप, गे मेको रवा बाक्नीनी। गे ठेयब नु सक्ति पाइश्शो दुम्तीनी। इन सक्ति बारशा, सरीङ सम्म जाक्दीश्शो बाक्त। मिनु इन अधिकार बारशा, रागी नेल्ल आन कली हुकुम पाइतीनी।
23 हजुर, पिप, गे स्वर्ग ङा कोव़ब यिशो ताइतीनी। मिनु मेकोमी ‘एको रवा कली तिमीन। खतम पोक्कीन। तन्न मेको आ ठुटा नु शाक्श खपीम लीचा माल्नीम। मेको फलाम नु कांसा के पातामी फ्रेंशा, खपीमी लीचा माल्नीनी। मिनु नाक्दो यिशो सीतमी जिश्शा बाक्ल। मिनु मेको जन्तुपुकी नु बाक्ल। ७ बर्स मलाक्गा सम्म मोदेंशो दुम्चा माल्ब’ देंत।
24 मिनु हजुर, पिप, मेको ङोमु ङा रुप्तीक नु इन पर्बम नेल्ल क्येङा ठेयब परमप्रभु आ हुकुम मार बाक्त देंशा हना,
25 गे मुर आन बाक्तीके रे खेरचा पुंइसीनीनी। मिनु गे जन्तुपुकी नु बाक्नीनी। बी ब्यफोमी खोदेंशो पा घांस ब्वाइनीनी। मिनु नाक्दो ङा सीतम जित्नीनी। मिनु ७ बर्स सम्म मोदेंशो दुम्नीनी। नेल्ल क्येङा ठेयब परमप्रभुमी मुर आन राज्यम सासन पाइब। मिनु परमप्रभुमी मेको राज्य आ दाक्शो मुर आ गुइमी गेब, दे इन कली तुइक्पाइक्चा कली मोदेंशो पाप्तु।
26 मिनु रवा आ ठुटा नु शाक्श खप उइ प्रोंइचा देंशो हुकुम दुम्त। मिनु मेको रे मार रुम्सीब देंशा हना, स्वर्ग ङा परमप्रभु नेल्ल आन कली सासन पाइब बाक्ब, दे रुम्नी नोले इन राज्य लेंशा ताइनीनी।
27 हजुर पिप, मोपतीके आं गेशो अर्ती इन कली दुम्ल। इन पाप कली ठीक पतीकेमी क्याम्दीन। मिनु इन मरिम्शो पशो, श्येत जाइब आन कली शिशी पतीकेमी क्याम्दीन। मो पाइतीनी हना, इन रिम्शो बाक्तीक शुश नाक्त सम्म लीब” देंत। हितोपदेस १९:१७; मत्ती ५:७
पिप आ ङोमु गाप्शो
28 मिनु पिप नेबुकदनेसरमी दोदेंशो ङोमु तवा, मोदेंशोन दुम्त।
29 मिनु १२ महिना नोले मेको पिप बेबीलोन आ दरवार आ कौसीमी हिरना हिरन बाक्शा,
30 मेकोमी “मार, एको बेबीलोन थम रिम्शो मबाक्बा ङा? गो एको आं ठेयब सक्तिमी आं शुश शोंप वोइश्शा, बाक्चा कली सेल्ता” देंत। हितोपदेस १६:१८
31 मिनु पिपमी मेको लोव़ देंमेनु, स्वर्ग रे सेंदा कामी “पिप नेबुकदनेसर इ कली मार लोव़ देंशो बाक्त देंशा हना, एको राज्य इ गुइ रे रोइक्ने थुम्शो बाक्ब।
32 गे मुर आन बाक्तीके रे खेरचा पुंइसीनेवे। मिनु गे जन्तुपुकी नु बाक्नेवे। बी ब्यफोमी खोदेंशो पा घांस ब्वाइनेवे। मिनु नाक्दो ङा सीतम जित्नेवे। मिनु ७ बर्स सम्म मोदेंशो दुम्नेवे। नेल्ल क्येङा ठेयब परमप्रभुमी मुर आन राज्य कली सासन पाइब। मिनु परमप्रभुमी मेको राज्य आ दाक्शो मुर आ गुइमी गेब, दे इन कली तुइक्पाइक्चा कली मोदेंशो पाइब” देंत। दानीएल ५:२१
33 मिनु मेको लोव़ पशो नेना चोटीन नेबुकदनेसर थमा पा मोदेंशो दुम्त। मेको मुर आन दाते रे खेरचा पुंइसाक्व। मिनु बी ब्यफोम खोदेंशो पा घांस ब्वचा गोप्तु। मिनु मेको आ रां नाक्दो ङा सीतमी जित्त। मिनु मेको आ चां ककाकुली आ ओफ्ला खोदेंशो पा लाइश्शो नु आ गेय चिक्ब आ नङग्रा खोदेंशो दुम्त।
पिपमी परमप्रभु कली मान पशो
34 मिनु पिपमी “मेको देंशो नेल्ल जाक्दीम नोले, गो आं पिया पोक्शा सरीङ गे कोव़ता। मिनु आं निप्स लेंशा रिम्शो दुम्त। मिनु गो नेल्ल क्येङा ठेयब नु गेना हना यो ब्रोंइशा बाक्ब परमप्रभु कली ठेयब सेल्शा, मान पाता। मेको आ सासन पतीके गेना हना यो लीब। मेको आ राज्य पाला पाला सम्म लीब। दानीएल ३:३३
35 रागी ङा मुरपुकी नेल्ल मेको आ ङोंइती मारेइ मबाक्नीम। मेकोमी स्वर्ग ङा गेय पाइब नु रागी ङा मुर आन कली मार पचा दाक्बा, मेकोन पने चाप्ब। सुइमी मेको कली तेक्ने मचाप्नीम। मिनु सुइमी ‘गे मार पनी?’ देंने मचाप्नीम। यसैया ४०:१७; अय्युब ९:१२
36 मेना आं निप्स लेंशा रिम्शो दुम्त। मिनु आं राज्य ङा छेङछेङ आं कली लेत्ताक्यी। आं कली अर्ती गेब नु आं ठेयब गेय पाइबपुकी आं कली ग्रुम्थ जाक्तेक्म। मिनु गो लेंशा पिप दुम्ती। मिनु गो ङोंइती क्येङा शुश सक्ति नु मान ताता।
37 मुल गो, नेबुकदनेसरमी ‘स्वर्ग ङा पिप ठेयब बाक्ब’ दे मान पाइनुङ। मारदे हना आ पशो नेल्ल थमा बाक्ब। आ पतीके नेल्ल ठीक बाक्नीम। मेकोमी ठेयब लेश्शो मुर आन कली ब्रेम्शो सेल्ने चाप्ब” दे पिपमी देंत। लूका १:५१; लूका १८:१४