7
दानीएलमी कोंइतीके तशो
दानीएल २:-
1 मिनु बेबीलोन ङा बेल-शजर पिप दुम्शो ङोंइती ङा बर्समी दानीएल इम्मेनु, ङोमु पा, कोंइतीके का ताप्तु। मिनु मेकोमी आ तशो ङोमु ब्रेक्ताक्व। दानीएल ५:१
2 मिनु दानीएलमी गो, दानीएल, इप्शा ङोमु पा, कोंइतीक का ताता, सरीङ पूर्ब, पच्छिम, उत्तर, दक्खिन रे फश पा ठेयब समुन्द्र कली छाल पोक्पाइश्शो ताता।
3 मिनु समुन्द्र रे ४ ओटा ठेयब जन्तु ग्रूतेक्म। मेको दोदेंशो तांइसाक्म देंशा हना, प्रकाश १३:१-२
4 मेको ङोंइती ङा जन्तु गुप्स खोदेंशो बाक्शा, ककाकुली आ फ्रां खोदेंशो फ्रां पाइश्शो बाक्त। मिनु गो कोव़शा बाक्ङानु, मेको आ फ्रां तुल्चा पुंइसाक्व। मिनु मेको खप रे बोक्पाइश्शा, मुर खोदेंशो पा आ खोइल निक्शीमी राप्पाइक्चा पुंइसाक्व। मिनु मेकोमी मुर आ थुं ताप्तु।
5 मिनु मेको आ नोले अर्को जन्तु का ग्रूत। मेको वां खोदेंशो बाक्त। मेकोमी का पटटी रे बोक्शा, जेरी सां आ शोव़म काम्शो बाक्त। मिनु मेको कली “बोक्को, श्ये शुश ब्वावो” देंशो नेंता।
6 मिनु गो कोव़शा बाक्ङानु, नोले अर्को जन्तु का ग्रूत। मेको जोइ खोदेंशो बाक्त। मेको आ चीमी ४ ओटा चिक्ब आ फ्रां खोदेंशो फ्रां बाक्तेक्म। मिनु मेको के ४ ओटा पिया बाक्तेक्म। मिनु मेकोमी सासन पतीक अधिकार ताप्तु।
7 मिनु नोले गो नाक्दो ङा कोंइतीकेमी नेल्ल क्येङा नोले ङा जन्तु ग्रूशो ताता। मेको शुश हिंचा ङा, अर्को आन क्येङा बोल्यो बाक्त। मेको के फलाम के ठेयब ख्रुइ बाक्तेक्म। मिनु श्ये ब्वना ब्वन बाक्शा, लीशो श्ये आ खोइलीमी दिम्ताक्व। मेको ङोंइती ङा जन्तु आन खोदेंशो मबा। मारदे हना मेको के १० ओटा ग्रोव़ बाक्तेक्म।
8 मिनु गो मेको ग्रोव़ आन कली रिम्शो पा कोव़ङुनु, मेको आन दातेमी अर्को आइक्च ग्रोव़ का ग्रूशो ताता। मेको आइक्च ग्रोव़ कली बाक्तीक गेचा कली ङोंइती ङा ग्रोव़ सां आन शाक्श सुन्दा एत्तेक्म। मेको नक ग्रूशो ग्रोव़मी मिक्च बाक्तेक्म। मेको मुर आ मिक्च खोदेंशो बाक्तेक्म। मिनु मेको के ठेयब लेश्शा लोव़ पाइब शोव़ का बाक्त। दानीएल ११:३६
9 मिनु गो कोव़ना कोव़न बाक्ङानु, पिप आन शुश नित्तीक वोइश्शो ताता। मिनु मेको शुश बर्स दुम्शो का ठेयब नित्तीकेमी निस्साक्व। मेको आ वा फुं खोदेंशो बुश बाक्त। मिनु आ पिया ङा चां रिम्शो ऊन खोदेंशो पा बुश बाक्त। मिनु मेको आ ठेयब नित्तीके ठेयब ब्रशो मी खोदेंशो बाक्त। मेको ठेयब नित्तीक आ गुगीलपुकी बाक्तेक्म। मेको के यो थम ठेयब मी खोदेंशो बाक्तेक्म। इजीकीएल १:२६; प्रकाश ४:२; भजन संग्रह ९०:२
10 मिनु मेको शुश बर्स दुम्शो का आ ङोंइती रे मी के खोला खोदेंशो पा ग्रूत। मिनु हजार हजार आ स्वर्ग ङा गेय पाइबमी मेको कली गेय पाम्तेक्म। मिनु १०, १० हजार मेको आ ङोंइती बाक्तेक्म। मिनु मेको निसाफ पचा कली निस्साक्म। मिनु किताबपुकी प्राक्शा वोइक्तेक्म। प्रकाश ५:११; भजन संग्रह ६९:२९; प्रकाश २०:१२
11 मिनु गो मेको ठेयब लेश्शो लोव़ पाइब ग्रोव़ कली कोव़ना कोव़न बाक्ती। मिनु गो कोव़ना कोव़न बाक्ङानु, मेको जन्तु कली साइक्तेक्म। मिनु मेको आ रां खतम सेल्शा, ठेयब मीमी हुम्ताक्म। प्रकाश १९:२०
12 मिनु लीशो जन्तु आन सासन पतीक अधिकार रोइक्चा पुंइसाक्म। तन्न मेको आन कली इच्का नोले सम्म ब्रोंइचा गेम्तेक्म। दानीएल २:२१
13 मिनु नोले गो नाक्दो ङा कोंइतीकेमी मुर खोदेंशो का ताता। मेको गोस्सुम गिल्सीशा पिना पिन पशो ताता। मिनु मेको कली शुश बर्स दुम्शो का आ ङोंइती राप्पाइश्शो ताता। लूका २१:२७; प्रकाश १:१३; प्रकाश १४:१४
14 मिनु मेको कली सासन पतीक अधिकार, मान ततीक नु पिप सेल्शा राज्य गेशो ताता। मिनु जात जात नु रागी रागी ङा आंम आंम लोव़ पाइब मुर नेल्लेमी मेको कली गेय पशो ताता। आ सासन पतीके अधिकार गेना हना यो लीबाक्त। आ पिप दुम्शो राज्य गेनायो खतम मदुम्बाक्त।
15 मिनु गो, दानीएल, मेको कोंइतीके तशा, आं थुं लुक्च लत। मिनु गो हिंती।
16 मिनु गो मेकेर राप्शा बाक्ब का कली “एको लोव़ रे मार रुम्सीबा?” दे हिल्लो पाता। मिनु मेकोमी “गो इ कली नेल्ल रुप्पाइक्नुङ।
17 मेको ४ ओटा ठेयब जन्तु रागी ङा ४ जना पिप बाक्नीम।
18 तन्न मेको नेल्ल क्येङा ठेयब आ मुरपुकीम मेको राज्य ताक्शा, गेनायो मनुप्चा ङा पा, गेना हना यो सासन पाइनीम” देंत।
19 मिनु गो मेको नेल्ल आन क्येङा नोले ङा जन्तु रे मार रुम्सीबा, दे रुप्चा थुं पाता। मेको अरु जन्तु खोदेंशो मबा। मेको थम हिंचा ङा बाक्त। मेको आ ख्रुइ फलाम के नु नङग्रा कांसा के बाक्तेक्म। मेकोमी मारेइ मारेइ ब्वशा नाक्शा, लीशो श्ये चहिं आ खोइलीम दिम्ताक्व। दानीएल ७:७
20 मिनु मेको आ पियामी बाक्शो १० ओटा ग्रोव़ नु अर्को ग्रोव़ का आ पर्बम रुप्चा थुं पाता। मेको ग्रोव़ का ग्रूमेनु, ङोंइती ङा ग्रोव़ सां एत्तेक्म। मेको ग्रूशो ग्रोव़ के मिक्च नु ठेयब लेश्शो लोव़ पतीक शोव़ बाक्त। मिनु मेको अरु ग्रोव़ आन क्येङा ठेयब बाक्त। मेको आ पर्बम यो रुप्चा थुं पाता।
21 मिनु गो कोव़ना कोव़न बाक्ङानु, मेको ग्रोव़मी नेल्ल क्येङा ठेयब आ मुर नु लडाइ पा ग्रात। प्रकाश १३:७
22 मिनु मेको शुश बर्स दुम्शो का मजाक्म सम्म लडाइ ग्राना ग्रान बाक्त। मिनु नेल्ल क्येङा ठेयबमी आ मुर आन कली निसाफ पतीक अधिकार गेप्तु। मेना नेल्ल क्येङा ठेयब आ मुरुम मेको राज्य आंम के सेल्तेक्म।
23 मिनु आं कली रुप्पाइक्बमी नेल्ल आन क्येङा नोले ङा जन्तु “रागीमी मेको नेल्ल आन क्येङा नोले ङा जन्तु राज्य का बाक्ब। मेको अरु राज्य खोदेंशो मबाक्ब। मिनु मेकोमी रागी नेल्ल आन कली ग्रु दाक्ब। आ खोइलीमी दिम्शा नेल्ल आन कली रोबल चिबल पोक्ब।
24 मिनु मेको १० ओटा ग्रोव़ आ अर्थ मार बाक्ब देंशा हना, मेको राज्य रे १० जना पिप ग्रूनीम। मिनु मेको आन नोले अर्को पिप का ग्रूब। मेको ङोंइती ङा पिप खोदेंशो मदुम्ब। मिनु मेकोमी पिप सां आन कली फ्रुइक्ब। प्रकाश १७:१२
25 मिनु मेकोमी नेल्ल क्येङा ठेयब आ पर्बम मरिम्शो लोव़ पा, नेल्ल क्येङा ठेयब आ मुर आन कली यो खतम सेल्ब। मिनु मेकोमी परमप्रभु आ देंशो चाड नु आ अरेशो लोव़ कली फाइक्चा दाक्ब। मिनु परमप्रभु आ मुर आन पाला का, पाला निक्शी नु आधा पाला मेको आ अधिकारमी गेचा पुंइसीनीमी। प्रकाश १३:५-६; दानीएल १२:७
26 मिनु नोले निसाफ पची ना जाक्ब। मेको आ सासन पतीक अधिकार लेंशा गेनायो मतचा ङा पा आ गुइ रे रोइक्नीम। मिनु मेको कली साइश्शा खतम पोक्नीम।
27 मिनु राज्य, सासन पतीक अधिकार नु राज्य नेल्ल आन ठेयब दुम्तीके नेल्ल क्येङा ठेयब आ मुर आन कली गेचा पुंइसीनीम। मेको आन राज्य गेना हना यो लीब राज्य दुम्ब। मिनु सक्ति पाइश्शो नेल्लेमी मेको आ गेय पा, मेको कली टीनीम” देंत।
28 मेको आं ङोमु तशो आ लोव़ बाक्ब। गो दानीएल, एको मिम्शा थाम्पा हिंती। मिनु आं कुल क्येर दुम्त। मिनु गो एको लोव़ नेल्ल आं थुंम वोइक्ता। दानीएल ८:१८; दानीएल १०:८,१६-१८