11
परमप्रभु यावे आ ठेयब गेय
मिनु मोसामी “गे परमप्रभु यावे, इन परमप्रभु कली दाक्‍चा माल्‍नीनी। गे नाक्‍त किंत किंत मेको आ ब्रेक्‍शा अरेशो लोव़, आ फुल्‍लुम मुशा ब्रेक्‍शो लोव़, आ निसाफ पतीक लोव़ नु आ शेंशो नेल्‍ल टिने। मिनु परमप्रभु यावे, इन परमप्रभुमी इन आल आन ङोंइती मारेइ यो छक लाक्‍चा ङा गेय नु सजाइ मकोंइद। तन्‍न मेकोमी दोपा आ ठेयब पतीकेमी शुश सक्ति पाइश्‍शो नु ठेयब बोल पतीकेमी इन कली इजीप्‍त रागी रे ग्रुंइशो, गे नेल्‍लेम तशा तुइश्‍शा मिम्‍चा माल्‍नीनी। ब्‍यवस्‍था ४:३६ मिनु इजीप्‍त रागी नु आ पिप फाराओ नु मेको आ मुर नेल्‍ल आन कली कोंइशो चिन्‍ड नु आ पशो गे नेल्‍ले तशो तुइश्‍शो बाक्‍नीनी। मिनु मेकोमी इजीप्‍त ङा लडाइ पाइक्‍ब, शारा नु बग्‍गी आन कली पशो नेल्‍ल तुइक्‍नीनी। इन कली खेदा पामेनु, मेकोमी मेको आन कली लल समुन्‍द्र ङा ब्‍वाक्‍कुम साइक्‍चा कली ख्रुम्‍तु, मेको यो तशो बाक्‍नीनी। मुल सम्‍म मेको लडाइ पाइब आन हुल खतम दुम्‍शो बाक्‍नीम। प्रस्‍थान १४:२५,२७ मिनु एको रागी मजाक्‍शो सम्‍म गोरशो रागीम मेकोमी इन कली मार मार पवा, मेको गे तुइश्‍शो बाक्‍नीनी। मिनु मेकोमी रूबेन आ चच निक्‍शी, एलीआब आ तौ दाथान नु अबीराम आस कली पशो तुइक्‍नीनी। दोपा खपीम आ शोव़ पाक्‍शा इस्राएली आन दातेमी मेको आस कली दाक्‍गा। मिनु आस खिं ङा मुर नु आस ताम्‍बु नु मेको आस मारेइ मारेइ दाक्‍शो गेपुकीम तुइश्‍शो बाक्‍नीनी। गन्‍ती १६:२५-३४ गेपुकी परमप्रभु यावेमी पशो ठेयब गेय नेल्‍ले तशो बाक्‍नीनी।
मोपतीके गो मुलाक्‍ती इन कली दें‍शो परमप्रभु यावे आ शें‍शो नेल्‍ल टिशा पने। मेको पाइतीनी हना, गेपुकी बोल्‍यो दुम्‍नीनी। मिनु खोला शोक्‍शा इन के सेल्‍चा चिक्‍शो रागीम ओव़शा, थमा पा इन के सेल्‍ने चाप्‍नीनी। मोपा गे परमप्रभु यावेमी इन किकी पिपी नु आन चच युइ, इन कली, गेशो रागीम शुश ब्रोंइशा बाक्‍चा ताइनीनी। मेको रागीम शुश दूध नु खुदो बाक्‍ब। प्रस्‍थान ३:१७ 10 मारदे हना मेको इन के सेल्‍चा चिक्‍शो रागी, इन ग्रूशा पिशो इजीप्‍त रागी खोदेंशो ममाइ, मेकेर वांचेर शोक्‍शा, गिग खाइ रू कली ब्‍वाक्‍कु कुर पचा माल्‍ताक्‍नी। 11 मेको गे शोक्‍चा, इन के सेल्‍चा चिक्‍शो रागी, डांडा नु बेंसी ङा रागी बाक्‍ब। मेकेर रेउ यिशा, रागी जिप्‍पाइक्‍ब। 12 परमप्रभु यावे, इन परमप्रभुमी मेको रागी कली कोव़ब। मेकोमी बर्स ङा ङोंइती ङा नाक्‍त रे नोले ङा नाक्‍त सम्‍म, गेना हना यो कोव़ब।
13 मिनु मुलाक्‍ती गो इन कली दें‍शो आं शें‍शो नेंतीनी, गे परमप्रभु यावे, इन परमप्रभु कली इन थुं सोक्‍त नेल्‍लेमी दाक्‍शा नु मेको कली गेय पाइतीनी हना, लेवी २६:३-५; येरमीया ५:२४ 14 मेना परमप्रभु यावेमी इन कली ‘गो इन रू कली गारचा ङा रेउ गेनुङ। ङोंइती नु नोले ङा रेउ ठीक पा गेनुङ। मोपा इन अन्‍न, इन अङगुर नु तेल रवा आन फल खुप्‍ने चाप्‍नीनी। 15 मिनु गो इन बी ब्‍यफ, क्‍यारश भेडा आन कली योव़तीकेम घांस वापाइक्‍नुङ। मिनु गे जशा तूशा रूनीनी’ दे परमप्रभुमी इन कली देंत। 16 मोपतीके सुइम इन कली हेंथे गाक्‍पाइक्‍चा मगेने, होस पा बाक्‍कीन। गेपुकी परमप्रभु क्‍येङा ङोन लाइतीनी नु देवी देवता आन कली सेउ पाइतीनी हना, 17 परमप्रभु यावेमी गाइश्‍शा रागीम रेउ मयिपाइक्‍ब। मिनु मारेइ खुप्‍चा मताइनीनी। मिनु परमप्रभु यावेमी इन कली गेशो रिम्‍शो रागी रे क्‍याम्‍ब। ब्‍यवस्‍था २८:२३-२४; लेवी २६:१९-२०
आसीक नु सराप
18 मिनु गेपुकीमी आं देंशो लोव़ इन थुंम वोतीन। मेको मिम्‍चा कली इन गुइमी चिन्‍ड फ्रेंदीन। मिनु कुप्‍फीम फ्रेंतीके खोदेंशो पा फ्रेंचा माल्‍नीम। ब्‍यवस्‍था ६:६-९ 19 आंम खिंम बाक्‍नीनु, लां गाक्‍नीनु, इप्‍थ लनीनु नु बोक्‍नीनु इन तमी तौ आन कली मेको अरेशो आ पर्बम लोव़ पा शेंदीन। 20 इन खिं ङा थाम तारी नु लाप्‍चो तारी ब्रेक्‍तीन। 21 मिनु गे नु इन आलपुकी परमप्रभु यावेमी इन किकी पिपी आन कली ‘गेनुङ’ दे कसम जशो रागीमी शुश ब्रोंइनीनी। रागी तार सरीङ बाक्‍म सम्‍म शुश ब्रोंइनीनी।
22 गेपुकीमी गो इन कली दें‍शो अरेशो लोव़ नेल्‍ल होस पा पाइतीनी नु परमप्रभु यावे, इन परमप्रभु कली दाक्‍ताक्‍नी हना, मेको आ लां नेल्‍ल गाक्‍शा, मेको कली मप्रोंइतीनी हना, 23 परमप्रभु यावेमी मेकेर ङा रागी रागी ङा मुर नेल्‍ल कली इन ङोंइती रे खेरब। मिनु गे इन क्‍येङा शुश नु सक्ति पाइश्‍शो रागी रागी ङा मुर आन रागी इन के सेल्‍नीनी। ब्‍यवस्‍था ७:१-२ 24 गे इन खोइलीम थेक्‍शो रागी नेल्‍ल गे इन के दुम्‍ब। गोरशो रागी रे लेबानोन सम्‍म नु ठेयब खोला युफ्रेटीस रे पच्‍छिम ङा समुन्‍द्र सम्‍म इन के सांद दुम्‍ब। 25 गे नु लडाइ पा सुइ मग्रानीम। परमप्रभु यावे, इन परमप्रभुमी आ देंशो खोदेंशो पा तेको रागी थेक्‍नीनी, मेकेर ङा मुर आन कली इन कली तशा हिंतीक थुं गेब। प्रस्‍थान २३:२७
26 नेनीन, मुलाक्‍त गो आसीक नु सराप इन ङोंइती वोइक्‍नुङ। ब्‍यवस्‍था ३०:१,१५,१९ 27 गे परमप्रभु यावे, इन परमप्रभु आ शेंशो टीतीनी हना, आसीक राइनीनी। ब्‍यवस्‍था २८:२,१५ 28 परमप्रभु यावे, इन परमप्रभु आ शेंशो मटिथु, गो मुलाक्‍ती इन कली देंशो लचा माल्‍शो लां रे हेंथे गाक्‍तीनी नु इन मतुइश्‍शो देवी देवता आन नोले खोइक्‍तीनी हना, सराप राइनीनी।
29 मिनु परमप्रभु यावे, इन परमप्रभुमी इन कली इन के सेल्‍चा चिक्‍शो रागीम ओंइचानीनु, गेरीजीम डांडा रे आसीक गेचा नु एबाल डांडा रे सराप पचा माल्‍नीनी। ब्‍यवस्‍था २७:१२-१३; यहोसु ८:३३-३४ 30 मेको डांडापुकी यर्दन आइक्‍ची हांबु, नां रिक्‍तीक गे यर्दन बेंसी ङा लां आ नोले, अराबाहमी बाक्‍शो कनानी आन रागीम बाक्‍नीस। मेको गिल्‍गाल आ ङोंइती मोरेह माइश्‍शो ब्‍वाकी आ नेक्‍था बाक्‍नीस। उत्‍पत्ती १२:६
31 मिनु गेपुकी यर्दन शोक्‍शा, परमप्रभु यावे, इन परमप्रभुमी इन कली गेशो रागी ओव़नीनी। मिनु गे मेको इन के सेल्‍शा, मेकेर बाक्‍नीनी। 32 मुलाक्‍त गो इन कली शेंशो फुल्‍लुम मुशा ब्रेक्‍शो लोव़ नु ठीक पतीक लोव़ नेल्‍ल पशा, होस पा बाक्‍कीन” देंत।