16
पास्‍सा चाड मानेतीके
प्रस्‍थान २३:१४-१७; प्रस्‍थान ३४:१८-२४
मिनु मोसामी “गेपुकीमी आबीब महिनाम परमप्रभु यावे, इन परमप्रभु आ पास्‍सा चाड मानेचा माल्‍नीनी। मारदे हना परमप्रभु यावे, इन परमप्रभुमी आबीब महिना ङा नाक्‍दो इन कली इजीप्‍त रे ग्रुंइताक्‍व। प्रस्‍थान १२:- मिनु गेपुकीमी परमप्रभु यावे आ नें वोइक्‍चा कली आ योव़शो बाक्‍तीकेमी परमप्रभु यावे, इन परमप्रभु कली बोका नु ब्‍यफपुकी क्‍योरशा पास्‍सा चाड मानेचा माल्‍नीनी। गेपुकीमी ग्‍युरशो बोरब ओख्‍ती सुप्‍शो शोब्‍ले मेको श्‍ये नु मजने। गेपुकी ७ नाक्‍त सम्‍म ग्‍युरशो बोरब ओख्‍ती मसुप्‍शो शोब्‍ले जचा माल्‍नीनी। मेको इन श्‍येत ङा शोब्‍ले बाक्‍ब। मारदे हना गे इजीप्‍त रे चुइश्‍शा ग्रूतीनी। मिनु गेपुकीमी मबेक्‍नी सम्‍म इजीप्‍त रे ग्रूशो नाक्‍ती मिम्‍चा कली मेको पास्‍सा चाड मानेचा माल्‍नीनी। प्रस्‍थान १२:११ मिनु ७ नाक्‍त सम्‍म इन रागी नेल्‍लेमी ग्‍युरशो बोरब ओख्‍ती बाक्‍चा मदुम्‍ब। मिनु गेपुकी ङोंइती ङा नाक्‍दो क्‍योरशो श्‍ये सुनी सम्‍म मारेइ हेंचा मदुम्‍ब। परमप्रभु यावे, इन परमप्रभुमी इन कली गेशो सहरमी मेको पास्‍सा चाड ङा मार मार क्‍योरने मचाप्‍नीनी। परमप्रभु यावे, इन परमप्रभुमी आ नें वोइक्‍चा कली नोले योव़शो बाक्‍तीकेमी मेको पास्‍सा चाड ङा मार मार क्‍योरचा माल्‍नीनी। गे मेको इजीप्‍त रे ग्रुंइशा, नां रिक्‍ची ना पचा माल्‍नीनी। मिनु गे मेको श्‍ये कली वाल्‍शा, परमप्रभु यावे, इन परमप्रभुमी नोले योव़शो बाक्‍तीकेम चोचा माल्‍नीनी। मिनु सुनी लेश्‍शा, आंम आंम ताम्‍बु लने। गे ६ नाक्‍त सम्‍म ग्‍युरशो बोरब ओख्‍ती मसुप्‍शो शोब्‍ले जचा माल्‍नीनी। मिनु ७ नाक्‍तीम परमप्रभु यावे, इन परमप्रभु आ पर्बम बुक्‍तीक नाक्‍त बाक्‍ब। मेको नाक्‍ती मारेइ गेय मपने।
पास्‍सा आ ७ हप्‍ता नोले ङा चाड
मिनु मीशो बाली रिक्‍चा गोशो नाक्‍त रे गेपुकीमी ७ हप्‍ता हिक्‍चा माल्‍नीनी। 10 मिनु गेपुकी हप्‍तापुकी ङा चाड परमप्रभु यावे, इन परमप्रभु कली मानेचा माल्‍नीनी। परमप्रभु यावे, इन परमप्रभुमी इन कली आसीक गेशो खोदेंशो पा इन ग्‍येरसीशो थुंमी चढ़ेशा चाड मानेचा माल्‍नीनी। प्रस्‍थान ३४:२२ 11 मिनु गेपुकी, इन तमी तौपुकी, वाइलीम वाइल, इन सहरम बाक्‍शो लेवी आ थर ङा मुरपुकी, इन दातेमी बाक्‍शो अर्को रागी ङा मुरपुकी, रोम रोइक्‍च नु आन वोंइश बेक्‍शो मीश मुर नेल्‍ल परमप्रभु यावे, इन परमप्रभु आ नें वोइक्‍चा कली नोले योव़शो बाक्‍तीकेमी मेको आ ङोंइती ग्‍येरसीचा माल्‍नीनी। 12 गेपुकी इजीप्‍त रागीम वाइलीम वाइल दुम्‍शो मिम्‍चा माल्‍नीनी। गे मेको फुल्‍लुम मुशा ब्रेक्‍शो लोव़ होस पा टिचा माल्‍नीनी। ब्‍यवस्‍था ५:१५
बाली नाली ओंइतीक चाड
13 मिनु इन रू ङा अन्‍न अङगुर मारेइ मारेइ खुम्‍ने थुम्‍शा, गेपुकीमी बाली नाली ओंइतीक चाड ७ नाक्‍त सम्‍म मानेचा माल्‍नीनी। 14 मिनु गेपुकी, इन तमी तौ, इन वाइलीम वाइल, इन सहरम बाक्‍शो लेवीपुकी, अर्को रागी ङा मुरपुकी, रोम रोइक्‍च नु आन वोंइश बेक्‍शो मीश मुरपुकी, नेल्‍लेमी ग्‍येरसीशा मेको चाड मानेचा माल्‍नीम। ब्‍यवस्‍था २६:११; यसैया ३०:२९ 15 मिनु गेपुकीमी परमप्रभु यावे, इन परमप्रभु आ योव़शो बाक्‍तीकेमी ७ नाक्‍त सम्‍म मेको चाड मानेचा माल्‍नीनी। मारदे हना परमप्रभु यावे, इन परमप्रभुमी इन कली बाली नाली शुश गेब नु इन मारेइ मारेइ पशोमी इन कली आसीक गेब। मोपतीके गेपुकी शुश ग्‍येरसीचा माल्‍नीनी।
16 मिनु परमप्रभु यावे, इन परमप्रभुमी आ नोले योव़शो बाक्‍तीकेमी इन दाते ङा वोंइश मुर नेल्‍ले सां खेयप परमप्रभु यावे आ ङोंइती जाक्‍दीत्‍चा माल्‍नीम। ग्‍युरशो बोरब ओख्‍ती मसुप्‍शो शोब्‍ले ङा पास्‍सा माइश्‍शो चाड, ७ हप्‍ता नोले ङा हप्‍ता ङा चाड नु बाली नाली ओंइतीक गोठ सेल्‍तीक चाडम जाक्‍दीत्‍चा माल्‍नीम। मिनु परमप्रभु यावे आ ङोंइती श्‍येत्‍थ गुइ जाक्‍चा मदुम्‍ब। 17 परमप्रभु यावे, इन परमप्रभुमी आसीक गे‍शो खोदेंशो पा नेल्‍लेमी आन चाप्‍शो गेचा माल्‍नीम।
निसाफ पतीके
18 मिनु मुर आन कली ठीक निसाफ पचा कली गेपुकीमी इन थर थर ङा नु परमप्रभु यावे, इन परमप्रभुमी इन कली गेशो सहर सहरम निसाफ पाइब नु ठेयब मुर योव़शा वोइक्‍चा माल्‍नीनी। ब्‍यवस्‍था १:१६-१८; गन्‍ती ११:१६ 19 निसाफ हेंथे मपने। कुल मकोव़ङीन। घूस मजने। मारदे हना घूसमी जोक्‍ब तुइक्‍ब मुर आन मिक्‍च सिल्‍ब। मिनु ठीक पाइबमी घूस जशा दूली लोव़ पाइब। १सामुएल ८:३ 20 मिनु परमप्रभु यावे, इन परमप्रभुमी गेशो रागीम ब्रोंइचा नु इन के सेल्‍चा, दे ठीक पतीक लां खोतीन।
चढ़ेतीके परमप्रभु कली ला बाक्‍ब
21 गेपुकीमी अशेराह देवी आ लाइश्‍शो मूर्ति परमप्रभु यावे, इन परमप्रभु कली चढ़ेतीक आ नेक्‍था ख्रुक्‍चा मदुम्‍ब। ब्‍यवस्‍था ७:५; २राजा २३:४ 22 गेपुकीमी तेकोइ अर्को मूर्ति वोइक्‍चा मदुम्‍ब। मारदे हना मेको नेल्‍ल परमप्रभु यावे, इन परमप्रभुमी कली ग्रांग्रा दीब” देंत। लेवी २६:१; येरमीया २:२७