19
मुर साइश्‍शा प्रोक्‍तीक सहर
मिनु परमप्रभु यावे, इन परमप्रभुमी रागी रागी ङा मुर आन कली खेरशा इन कली गेशो रागीमी आन सहर नु खिंपुकी इन के दुम्‍‍मेनु, मेना परमप्रभु यावे, इन परमप्रभुमी इन कली गेशो रागीम गे सहर सां तिल्‍चा माल्‍नीनी। ब्‍यवस्‍था ४:४१-४३ मिनु परमप्रभु यावे, इन परमप्रभुम इन कली गेशो रागी कली का का पा प्रोक्‍तीक सहर योव़चा, दे भाग सां सेल्‍चा माल्‍नीनी। मेको का का पा सहर सांम मुर साइक्‍ब मुर प्रोक्‍शा, लशा बाक्‍तीक सहर सेल्‍चा माल्‍नीनी।
मिनु सुइमी गेहे मपथु, साइक्‍चा ममिम्‍थु मुर का कली साइक्‍तु हना, मेकेर प्रोक्‍शा लशा ब्रोंइल। दोदेंशो दुम्‍ने चाप्‍ब देंशा हना, आन वारच नु शी ख्रोइक्‍थ ब्‍वाकी लमानु, रवा तिम्‍मेनु, मेको खा ङा फलम बुइश्‍शा, लशा, ख्रशा आ वारच बेक्‍त हना, मोदेंशो पा मुर साइक्‍ब मुर मेको सहरम प्रोक्‍शा लने चाप्‍नीम। मेको सहर ङोन बाक्‍त हना बेक्‍ब मुर आ मुरपुकीम मेको कली क्‍येक्‍क लेत्‍चा कली लांमी खेदा पा साइक्‍ब। तन्‍न मेको मुर साइक्‍चा मपुंइसीब बाक्‍ब। मारदे हना मेको आ वारच बाक्‍त। मोपतीके गो इन कली “सहर सां तिल्‍चा माल्‍नीनी” दे माइक्‍तन्‍नी।
मिनु परमप्रभु यावे, इन परमप्रभुमी इन किकी पिपी नु कसम जशो खोदेंशो पा इन रागी बारपाइक्‍तु हना, मिनु गे मुलाक्‍ती शेंशो परमप्रभु यावे आ अरेशो नेल्‍ल होस पा पाइतीनी हना, मिनु गे परमप्रभु यावे, इन परमप्रभु कली दाक्‍ताक्‍नी हना, गे नेल्‍ल नाक्‍ती मेको आ लांम गाक्‍तीनी हना, मेको सहर सां कली अर्को सहर सां तेम्‍चा माल्‍नीनी। 10 मोपा परमप्रभु यावे, इन परमप्रभुमी इन कली गेशो रागीम दोस मताइब कली मसदमेक्‍ल। दोस मताइब कली साइक्‍नीम हना, इन दातेमी साइक्‍चा ङा पाप राइब।
11 तन्‍न मुरुम ङोंइती रे ईख कुरशा, गेहे पशा, बाप्‍शा मुर कली तुप्‍शा साइक्‍तु हना, प्रोक्‍तीक सहर काम प्रोक्‍त हना, 12 मेको मुर आ सहर ङा खाल्‍पापुकीमी मेको कली चाक्‍पाइश्‍शा, क्‍येक्‍क लेप्‍ब आन गुइमी साइक्‍पाइक्‍चा कली जिम्‍मा गेमेक्‍ल। 13 मेको कली शिशी मपन। मिनु इस्राएलम सुम मारेइ दोस मतशो मुर कली हुश ख्राक्‍श पोक्‍शो पाप मोदेंशो पा क्‍याम्‍चा माल्‍ब। ब्‍यवस्‍था २१:८-९
सांद याक्‍चा मदुम्‍ब
14 मिनु गे परमप्रभु यावे, इन परमप्रभुमी इन कली इन के सेल्‍चा कली गेशो रागीम बाक्‍तीनी हना, इन किकी पिपीमी वोइश्‍शो इन नेक्‍था ङा मुर आन सांद याक्‍चा मदुम्‍ब। ब्‍यवस्‍था २७:१७
सांकछी आन लोव़ गारचा माल्‍ब
15 मुर कामी दोस ताइब दुम्‍शो बाक्‍त देंतेक्‍म हना, सांकछी का आ लोव़ ला नेंशा मदुम्‍ब। सांकछी निक्‍शी, सां आन लोव़ गारत हना ला मेको कली दोस गेचा। ब्‍यवस्‍था १७:६; गन्‍ती ३५:३०; यूहन्‍ना ८:१७; २कोरिन्‍थी १३:१; हिब्रू १०:२८ 16 मिनु जोल पा सांकछी बाक्‍शा, मुर का कली दोस गेचा कली बोक्‍त हना, 17 दोस गेब नु दोस ताइब निम्‍फा, परमप्रभु यावे आ ङोंइती, चढ़ेब नु निसाफ पाइब आ नेक्‍था जाक्‍चा माल्‍नीस। 18 मेको निसाफ पाइबमी मेको निक्‍शी आस कली खोदील निदील पा हिल्‍लो पचा माल्‍ब। दोस गेब आ लोव़ जोल बाक्‍त हना, दूली पा आ लोक्‍ब कली दोस गेशो बाक्‍त हना, 19 मेकोम आंम लोक्‍ब कली मार पचा मिम्‍शो बाक्‍मे, मेको कली मोन पचा माल्‍ब। मोपा गे इन दाते रे मरिम्‍शो पतीके क्‍याम्‍चा माल्‍नीनी। 20 मिनु अरु मुरपुकीमी मेको नेंशा हिंचा माल्‍नीम। मिनु नोले इन दातेमी मोदेंशो मरिम्‍शो मपाइनीम। 21 मिनु गेपुकीमी शिशी मपने। साइक्‍ब कली साइक्‍चा माल्‍ब। मिक्‍च पुक्‍ब कली आ मिक्‍च पुक्‍चा माल्‍ब। ख्रुइ जिक्‍ब कली आ ख्रुइ जिक्‍चा माल्‍ब। गुइ खोइल जिक्‍ब कली आ गुइ खोइल जिक्‍चा प्रस्‍थान २१:२३-२५