24
ग्‍युंबे पा प्रोंइतीक आ पर्बम
मिनु मुर कामी ग्‍युंबे पा आ मीश नु बाक्‍शा, नोले ला मेको मरिम्‍शो बाक्‍त, दे तुइश्‍शा, मेको कली प्रोंइचा कली ब्रा‍चा आ पर्बम ब्रेक्‍स गेशा, आ खिं रे सोइक्‍ताक्‍व हना, मेको लशा, अर्को आ मीश दुम्‍मेनु, मिनु मेको अर्को वोंइशेम यो मरिम्‍शो बाक्‍त, दे तुइश्‍शा, मेको कली मदाक्‍थु प्रोंइचा कली ब्रा‍चा आ पर्बम ब्रेक्‍स गेशा, आ खिं रे सोइक्‍ताक्‍व हना, कि मेको मुर आंमा बेक्‍त हना, मेको आ ङोंइती प्रोंइशो वोंइशेम मेको मीश मुर अरु वोंइश नु बाक्‍शा ग्रांग्रा दुम्‍शो नोले लेंशा चाक्‍ने मचाप्‍ब। मारदे हना मोदेंशो पशो परमप्रभु यावे आ ङोंइती ग्रांग्रा बाक्‍ब। परमप्रभु यावे, इन परमप्रभुमी इन कली गेशो रागीमी पाप मचाक्‍कीन।
रिम्‍शो दुम्‍चा कली अरेशो
वोंइश मुर कामी नक ग्‍युंबे पशो बाक्‍त हना, मेको लडाइम लचा मदुम्‍ब। अरु गेय यो “मेको कली पावो” दे अरेचा मदुम्‍ब। बर्स का सम्‍म मेको आ खिंम बाक्‍शा आ नक चाक्‍शो मीश नु ग्‍येरसीचा माल्‍ब। ब्‍यवस्‍था २०:७
सुइमी सुइ आन यात जाकटी मवोइक्‍चा। मारदे हना मेको मबाक्‍त हना दोपा शोब्‍ले सेल्‍ने चाप्‍नीमी?
सुइ मुरुमी इस्राएली लोक्‍ब कली ग्‍याइश्‍शा खुइ पा आ वाइल सेल्‍तु हना, लेयतु हना, मेको खुइ कली साइक्‍चा माल्‍नीम। मोपा गेपुकीमी इन दाते रे मरिम्‍शो नेल्‍ले ग्रुंइचा माल्‍नीनी। प्रस्‍थान २१:१६
कोव़र मुतीक तशा होस पा बाक्‍कीन। चढ़ेब, लेवीपुकीमी मेको आ पर्बम इन कली शेंशो खोदेंशो पा नेल्‍ल पचा माल्‍नीनी। गो मेको आन कली अरेशो खोदेंशो पा होस पा बाक्‍कीन। गेपुकी इजीप्‍त रे ग्रूशा पिनीनु, परमप्रभु यावे, इन परमप्रभुमी लांम मिरयाम कली पशो गेय मप्रेंदीन। गन्‍ती १२:१०-१५
10 मिनु गेपुकीमी इन वारच कली जेर गेनीनु, मेको के मार मार जाकटी पुंइथ आ खिं मओव़ङीन। 11 लाङगामीन रिम्‍दीन। मिनु जेर लाइबमी मेको जाकटी लाङगा ग्रुंइशा गेब। 12 मेको मुर प्रुङग बाक्‍त हना, मेको आ जाकटी इन खिंम वोइश्‍शा ब्रशा मइपीन। 13 नां रिक्‍ची ना मेको जाकटी लेश्‍शा गेने। मिनु मेकोमी मेको आ फेक्‍तीक फेक्‍शा इप्‍थ लने चाप्‍ब। मिनु मेकोम इन कली आसीक गेब। मेको परमप्रभु यावे, इन परमप्रभु आ ङोंइती ठीक पतीक बाक्‍ब। प्रस्‍थान २२:२५; अय्‍युब २२:६; आमोस २:८; ब्‍यवस्‍था ६:२५
14 गेपुकीमी इस्राएल ङा कि इन सहरम बाक्‍शो अर्को रागी ङा प्रुङग नु श्‍येत जाइब खेत्‍लाम इन कली गेय पाप्‍तु हना, आ ततीक ठीक पा गेने। 15 गेय पची नाक्‍ती नां मरिक्‍थु, आ तचा ङा गाल्‍च गेचा माल्‍नीनी। मेको प्रुङग मुर आ गाल्‍च माल्‍ब बाक्‍ब। ठीक पा मगेतीनी हना, मेकोमी इन मरिम्‍शो पशो आ पर्बम परमप्रभु यावे नु लोव़ पाइब। मिनु गे पाप राइनीनी।
16 मुर आ तमी तौम साइक्‍चा ङा पाप पाप्‍तु हना, आफ कली मसाइक्‍चा। मिनु आफोमी साइक्‍चा ङा पाप पाप्‍तु हना, आ तमी तौ आन कली मसाइक्‍चा। सुमी पाप पाइबा, मेको ला साइक्‍चा पुंइसीब। २राजा १४:६
17 मिनु अर्को रागी ङा मुर नु रोम रोइक्‍च आन कली निसाफ दूली मपने। मिनु वोंइश बेक्‍शो मीश मुर आन फेक्‍तीक वा जाकटी मवोतीन। 18 गेपुकी इजीप्‍त रागीम वाइलीम वाइल दुम्‍शो मिम्‍तीन। मिनु परमप्रभु यावे, इन परमप्रभुमी इन कली मेक रे प्रोंइशो मप्रेंदीन। मोपतीके गो इन कली मोदेंशो पचा, दे अरेता। ब्‍यवस्‍था ५:१५
19 गेपुकीमी खेतम बाली नाली रिक्‍शा, मुठा का खेतम प्रेंताक्‍नी हना, लेश्‍शा ब्रथ मलने। मेको मुठा अर्को रागी ङा मुर, रोम रोइक्‍च नु वोंइश बेक्‍शो मीश मुर आन कली बाक्‍ब। मो पाइतीनी हना, परमप्रभु यावे, इन परमप्रभुमी इन गेय नेल्‍लेमी इन कली आसीक गेब। लेवी १९:९-१० 20 गेपुकीमी तेल रवा आ फल थेप्‍तीनी हना, लेंशा लीशो फल मथेपीन। मेको लीशो फल अर्को रागी ङा मुर, रोम रोइक्‍च नु वोंइश बेक्‍शो मीश मुर आन कली बाक्‍नीम। 21 गेपुकीमी इन अङगुर रू ङा अङगुर सेक्‍तीनी हना, लेंशा लीशो फल मसेक्‍कीन। मेको लीशो फल अर्को रागी ङा मुर, रोम रोइक्‍च नु वोंइश बेक्‍शो मीश मुर आन कली बाक्‍नीम। 22 गेपुकी इजीप्‍त रागीम वाइलीम वाइल दुम्‍शो, मिम्‍तीन। मोपतीके गो इन कली मोदेंशो पचा, दे अरेता।