9
परमप्रभुमी लडाइ पशो
मिनु मोसामी “गे इस्राएलीपुकी, नोफा दाइश्‍शा, नेनीन! मुल गे मेको रागी ओव़चा कली यर्दन खोला शोक्‍नीनी। इन क्‍येङा ठेयब नु सक्ति पाइश्‍शो रागी रागी, सरीङ थिचा चिक्‍शो गारो हिरशो सहरपुकी इन के सेल्‍नीनी। ब्‍यवस्‍था १:२८ मेकेर अनाक आ चच युइ बाक्‍नीमी। मेकोपुकी ठेयब नु लाइश्‍शो मुर बाक्‍नीम, दे तुइक्‍नीनी। गे ङोंइती ‘अनाकीम ङा मुर आन ङोंइती सु राप्‍ने चाप्‍बा ङा’ दे लोव़ पशो नेंतीनी। परमप्रभु यावे, इन परमप्रभु इन ङोंइङोंइती शोक्‍शा लाइब, दे तुइक्‍चा माल्‍नीनी। मेको नेल्‍ल ग्रु दाक्‍ब मी खोदेंशो बाक्‍ब। मिनु मेको आन कली मी खोदेंशो पा दाक्‍ब। मेकोमी इन कली जिम्‍मा गेब। मिनु परमप्रभु यावेमी देंशो खोदेंशो पा, गे मेको आन कली खेरशा रीब पा साइक्‍नीनी। ब्‍यवस्‍था ४२४
मिनु परमप्रभु यावे, इन परमप्रभुमी मेको आन कली इन ङोंइती रे खेरानु, गे इन थुंमी ‘परमप्रभु यावेमी आंइ ठीक पतीके एको रागीम चाक्‍तु’ दे ममिम्‍तीन। मेको रागी रागी ङा मुर आन मरिम्‍शो पतीके परमप्रभु यावेमी मेको आन कली इन ङोंइती रे खेरब। ब्‍यवस्‍था ८:१७; उत्‍पत्ती १५:१६ गेपुकी इन ठीक पतीक नु इन ठीक थुं दुम्‍तीके मेको आन रागी इन के सेल्‍चा तशो मननी। तन्‍न मेको रागी रागी ङा मुर आन मरिम्‍शो पतीके परमप्रभु यावे, इन परमप्रभुमी मेको आन कली खेरब। मिनु इन किकी पिप अब्राहाम, इसहाक नु याकूब नु जशो कसम खाप्‍चा कली मो पाइब। ब्‍यवस्‍था ६:२५
परमप्रभु यावे, इन परमप्रभुमी इन ठीक पतीक आ पर्बम इन कली मेको रिम्‍शो रागी इन के सेल्‍चा कली मगेवो। मारदे हना गे शुश मटीब मुर बाक्‍नीनी। प्रस्‍थान ३२:९ मिनु गेपुकी गोरशो रागीम परमप्रभु यावे, इन परमप्रभु कली दोपा गाइक्‍पाइक्‍नी, मेको मप्रेंदीन। इजीप्‍त रागी रे गे एक जाक्‍नी सम्‍म गे परमप्रभु यावे आ देंशो मटिशो बाक्‍तीनी।
मिनु होरेब डांडामी यो गे परमप्रभु यावे कली गाइक्‍पाइक्‍तीनी। मिनु परमप्रभु यावेमी इन कली क्‍याम्‍चा ङा पा शुश गाइक्‍ताक्‍व। प्रस्‍थान ३२:१-२४ मिनु गो परमप्रभु यावेमी गेपुकी नु पशो कबल ङा लोव़ ब्रेक्‍शो फुल्‍लु ब्रथ डांडा ङोंइसाक्‍यी। मिनु गो ४० नाक्‍त नु ४० नाक्‍दो मेकेर बाक्‍ती। शोब्‍ले मजङ, ब्‍वाक्‍कु यो मतूङु। प्रस्‍थान ३४:२८ 10 मिनु परमप्रभु यावेमी, आंम गुइम ब्रेक्‍शो फुल्‍लु निक्‍शी गेती। मिनु मेको फुल्‍लु तार मार ब्रेक्‍शो बाक्‍त देंशा हना, परमप्रभु यावेमी डांडामी इन कली पशो लोव़ नेल्‍ल ब्रेक्‍शो बाक्‍त। परमप्रभुमी मेको ग्रुम्‍ची नाक्‍त डांडाम ब्रशो मी आ दाते रे इन कली लोव़ पशो बाक्‍त। 11 मिनु मेको ४० नाक्‍ती नाक्‍दो थुम्‍ची ना परमप्रभु यावेमी मेको कबल ङा लोव़ ब्रेक्‍शो फुल्‍लु निक्‍शी आं कली गेती। 12 मिनु परमप्रभु यावेमी आं कली ‘बोक्‍को, रीब पा एक रे ब्रुपो। मारदे हना इ इजीप्‍त रे ग्रुंइशो मुरपुकीमी आं देंशो लां रीब पा प्रोंइतेक्‍म। आंम आन कली खतम सेल्‍तेक्‍म। गोम मेको आन कली मपचा देंशो पाम्‍तेक्‍म नु आंम कली सुन के मूर्ति सेल्‍तेक्‍म’ देंत। 13 मिनु परमप्रभु यावेमी आं कली ‘गो एको मुर आन कली कोव़ता। मिनु एकोपुकी काइ मटीब बाक्‍नीम। 14 मुल आं कली पुंइचा प्रोंइयी। मिनु गो मेको आन कली खतम सेल्‍नुङ। मिनु मेको आन नें रागी रे क्‍याम्‍नुङ। मिनु गे रे पा मेको आन क्‍येङा ठेयब नु सक्ति पाइश्‍शो जात का सेल्‍नुङ’ देंत।
15 मिनु गो डांडा रे ब्रुप्‍ती। मेको डांडाम मी ब्रस ङा ब्रस बाक्‍त। मिनु गो मेको कबल ङा लोव़ ब्रेक्‍शो फुल्‍लु निक्‍शी कुरता। 16 मिनु गेपुकीमी परमप्रभु यावे, इन परमप्रभु कली पाप पा, आंम कली बाछा आ मूर्ति सेल्‍सीशो बाक्‍तीनी। परमप्रभु यावेमी इन कली अरेशो लां रीब पा प्रोंइशा दूली लां खोइक्‍नी बाक्‍त। 17 मिनु गो मेको फुल्‍लु निम्‍फा ताइश्‍शा, इन ङोंइती प्रोल्‍ता।
18 मिनु ङोंइती खोदेंशो पा, गो परमप्रभु यावे आ ङोंइती बाप्‍शा, ४० नाक्‍ती ४० नाक्‍दो शोब्‍ले मजङ, ब्‍वाक्‍कु यो मतूङु। इन पशो पाप आ पर्बम मोदेंशो पा बाक्‍ती। गे परमप्रभु यावे कली काइ मरिम्‍शो पा गाइक्‍पाइक्‍तीनी। 19 मारदे हना गो परमप्रभु यावेमी इन पर्बम गाइश्‍शा, चुरशा पशो तशा, साप्‍पा हिंती। मेकोमी इन कली थमा पा साइक्‍च, दे मिम्‍शो बाक्‍त। मिनु परमप्रभु यावेमी मेना यो आं पुंइशो लोव़ नेंतु। हिब्रू १२:२१ 20 परमप्रभु यावे हारून आ पर्बम यो शुश गाइश्‍शा ‘मेको कली साइक्‍नुङ’ दे मिम्‍शो बाक्‍त। गो हारून आ पर्बमी यो पुंइता। 21 मिनु इन पशो पाप, मेको बाछा लाइश्‍शा, मीम हुम्‍ताक्‍ङ। मेको कली तुप्‍शा, फस सेल्‍ता। मिनु मेको फस पहाड रे यिशो खोलाम ताइक्‍ताक्‍ङ।
22 मिनु गेपुकीमी तबेरा, मास्‍साह नु किब्रोथ-हत्तावामी यो परमप्रभु यावे कली गाइक्‍पाइक्‍तीनी। गन्‍ती ११:३; प्रस्‍थान १७:७; गन्‍ती ११:३४ 23 मिनु परमप्रभु यावेमी गे कादेश-बारनेआ रे लशा, इन कली ‘मेकेर लने। मिनु इन कली गेशो रागी इन के सेलीन’ दे सोइक्‍ताक्‍व। मिनु गेपुकीमी परमप्रभु यावे, इन परमप्रभु आ अरेशो मबित्‍थु, गन गन पा मेको कली थमा मसुइक्‍नी। मेको आ लोव़ यो मटिनी। गन्‍ती १३:२,३१; गन्‍ती १४:१-४ 24 गो इन कली तुइक्‍तु रेन गे परमप्रभु यावे आ लोव़ मटिथु गन गन पाइतीनी।
मोसामी इस्राएली आन पर्बम पुंइशो
25 मोपतीके परमप्रभु यावे आ ङोंइती गो ४० नाक्‍ती ४० नाक्‍दो सम्‍म बाप्‍शा बाक्‍ती। मारदे हना परमप्रभु यावेमी ‘गे इन कली क्‍याम्‍नुङ’ देंशो बाक्‍त। ब्‍यवस्‍था ९:१८ 26 मिनु गो परमप्रभु यावे कली ‘परमप्रभु, इन मुर आन कली मक्‍याम्‍दीन। गे मेको आन कली प्रोंइशा इन शुश सक्ति पाइश्‍शोमी इजीप्‍त रागी रे ग्रुंइताक्‍नी। 27 इन वाइल अब्राहाम, इसहाक नु याकूब आन कली मिम्‍तीन। एको मुर आन खकटा थुं, इन अरेशो मटितीके नु आन मरिम्‍शो पतीके मकोव़ङीन। 28 गे मेको आन कली क्‍याम्‍ताक्‍नी हना, आंइ कली ग्रुंइशो रागी ङा मुरपुकीमी “परमप्रभु यावेमी मेको आन कली देंशो रागी चाक्‍दीन्‍ने मचाप्‍तीके, मेको आन कली मदाक्‍तीके गोरशो रागीम साइक्‍चा कली एक रे ग्रुंइशा लाइक्‍तु” देंनीम। गन्‍ती १४:१६ 29 मेको इन मुर बाक्‍नीम। मिनु गे शुश सक्ति नु ठेयब बोलमी ग्रुंइशा चाक्‍तीनी’ दे परमप्रभु कली पुंइशा, लोव़ पाता” देंत।