12
ग्याइश्शा लाइक्चा पुंइसीशो लेश्शो
1 परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, गे काइ मटीब खिं ङा मुर आन दातेम बाक्शो बाक्नेवे। मेको आन के मिक्च बाक्त हना यो, मताइनीम। मेको आन के नोफा बाक्त हना यो, मनेंनीम। येरमीया ५:२१
3 मारदे हना मेकोपुकी मटीब मुर आन खिं ङा बाक्नीम। मोपतीके गे रागी रे ग्याइश्शा लाइक्चा पुंइसीशो मुर खोदेंशो पा इ कुम्लो खिक्सो। मिनु नाक्तीन मेको आन ङोंइती इ बाक्तीक रे ग्याइश्शा लाइक्चा पुंइसीशो खोदेंशो पा अर्को ठाउं लावो। मेकोपुकी मटीब खिं ङा मुर बाक्तेक्म हना यो, रुप्नीमी कों?
4 गे ग्याइश्शा लाइक्चा पुंइसीशो दुम्चा कली, मेको आन ङोंइती नाक्तीन इ मार मार फ्रेंदो। मिनु मेको आन ङोंइती रे ग्याइश्शा लाइक्चा पुंइसीशो मुर खोदेंशो पा नाक्दो लावो।
5 मेकोपुकीम तचा ङा पा गारोम पोव़ला ख्रितो। मिनु इ कुम्लो मेकेर रे पा ख्रीङो।
6 मेकोपुकीम कोव़न कोव़ना गे इ कुम्लो इ बलाम कुरो। मिनु नां रिक्मेनु कुरशा गाक्को। रागी मतचा ङा पा इ कुल सुम्सो। मारदे हना गो इ कली इस्राएल आ खिं ङा मुर आन पर्बम चिन्ड का सेल्शो बाक्नुङ” देंत। इजीकीएल २४:२४,२७
7 गो मेको आ अरेशो खोदेंशो पाता। मिनु ग्याइश्शा लाइक्चा पुंइसीशो दुम्चा कली नाक्तीन आं कुम्लो फ्रेंशा ग्रुंइताक्ङ। मिनु नाक्दो गारोम पोव़ला ख्रित्ता। मिनु मेको आन तन तना आं कुम्लो बलाम कुरशा नाक्दो गाक्ती।
8 मिनु आ सुनी परमप्रभु यावेमी आं कली लोव़ पाप्तु।
9 मार लोव़ पाप्तु देंशा हना “ए मुर, मार, मेको इस्राएल ङा मटीब खिं ङा मुरपुकीम ‘गे मार पवी’ दे इ कली हिल्लो मपामे?” देंत।
10 मेको आन कली “परमप्रभु, परमप्रभु यावेमी मार देंत देंशा हना ‘एको लोव़ यरूसलेम ङा सासन पाइब नु इस्राएल ङा मुर नेल्ल आन पर्बम बाक्ब’ दे माइक्मी।
11 मेको आन कली ‘गो गे इन कली चिन्ड का दुम्ती। गो मार पङा, मेको आन कली पाइनीमी। मेकोपुकी रागी रे ग्याइश्शा लाइक्चा पुंइसीनीम’ देंत।
12 मेको आन दातेम बाक्शो सासन पाइबमी नाक्दो आ बलाम मार मार कुरशा गाक्ब। मिनु लाङगा ग्रूचा कली गारोम पोव़ला ख्रिप्ब। मिनु मेकोम आ रागी मकोव़चा कली आ कुल सुम्ब। २राजा २५:४
13 गो मेको आ तार आं ग्याइल आप्नुङ। मिनु मेको आं ग्याइलीम बिक्ब। मिनु गो मेको कली कल्दी आन रागी बेबीलोनम चाक्नुङ। तन्न मेकोम, मेको रागी मताइब। मिनु मेकेरन बेक्ब। इजीकीएल १७:२०; येरमीया ३९:७
14 मेको आ एर ओंथ बाक्ब आ गेय पाइबपुकी नु आ लडाइ पाइब नेल्ल आन कली फशेम एर ओंथ ब्रपाइक्नुङमी। मिनु तरवार शोइश्शा खेदा पाइनुङमी।
15 मिनु गो मेको आन कली रागी रागी ङा मुर आन दातेम फ्राइनुङमी। राज्य राज्यम एर ओंथ ब्रपाइक्नुङमी। मिनु मेकोपुकीम गोन परमप्रभु यावे नङ, दे तुइक्नीम।
16 तन्न गो मेको आन दाते ङा का निक्शी आन कली तरवार, अन्काल नु मुर बेक्तीक रोइ रे प्रोंइनुङमी। मिनु मेकोपुकी ते ते बाक्नीमी, मेक मेक ङा रागी रागी ङा मुर आन दातेम आन ग्रांग्रा दिशो गेय पशो आ पर्बम बित्चीम ला मो पका बाक्त देंमल। मिनु मेकोपुकीम गोन परमप्रभु यावे नङ, दे तुइक्नीम” दे परमप्रभुम देंत। इजीकीएल ६:८
इजीकीएल चिन्ड दुम्शो
17 मिनु लेंशा परमप्रभु यावेम आं कली लोव़ पाप्तु।
18 मार लोव़ पाप्तु देंशा हना “ए मुर, गे इ जचा थोव़क जवीनु ख्रिंख्रि पा जावो। मिनु ब्वाक्कु तूङीनु, हिंशा गिक गिक पा ख्रिंख्रि पा तूङो।
19 मिनु रागी ङा मुर नु यरूसलेम नु इस्राएल रागीम बाक्ब मुर आन कली परमप्रभु, परमप्रभु यावेमी ‘मेको आन जचा थोव़क हिंशा जाइनीम। मिनु सुर्ता पा ब्वाक्कु तूनीम। मारदे हना मेकेर बाक्ब आन मरिम्शो पतीके, मेको रागी नु मेकेर बाक्शो मारेइ मारेइ गोरशो सेल्नुङ।
20 मुर बाक्शो सहर नेल्ल श्येत्थ दुम्नीम। मिनु रागी नुप्ब। मिनु गेपुकीम गो परमप्रभु यावे नङ, दे तुइक्नीनी’ देंशो बाक्ब” देंत।
21 मिनु लेंशा परमप्रभु यावेमी आं कली लोव़ पाप्तु।
22 “ए मुर, इस्राएल रागी आ पर्बम मार लोव़ बाक्बा? नाक्ती लाक्ना लाक्न बाक्नीम। मिनु परमप्रभु यावे आ कोंइतीके मखाप्नीम। २पत्रुस ३:४
23 मोपतीके मेको आन कली ‘परमप्रभु, परमप्रभु यावेमी, गो मेको मो देंतीक लोव़ आ अर्थ साम्नुङ। मिनु मेकोपुकीम इस्राएलम मेको देंतीक लोव़ गेनायो मदेंनीम’ दे माइक्मी। मेको आन कली ‘नाक्त नेक्थान जाक्शो बाक्नीम। कोंइतीक नेल्ल गाप्ब। हबकुक २:३
24 मारदे हना मुल लेंशा गेनायो इस्राएली आन दातेम जोल पा कोंइतीके नु लेम्शा लिंक्यु कोव़ब मदुम्नीम।
25 मारदे हना गो, परमप्रभु यावे आं देंशो लोव़ पशा, खाप्नुङ। मेको देश मपाइब रीब पा दुम्ब। ए मटीब खिं ङा मुर, इन पालामीन गो आं देंशो लोव़ खाप्नुङ’ दे परमप्रभु, परमप्रभु यावेमी देंशो बाक्ब” देंत।
26 मिनु लेंशा परमप्रभु यावेमी आं कली लोव़ पाप्तु।
27 मेकोमी “ए मुर, इस्राएल आ खिं ङा मुरपुकी, मेको आ कोंइतीकेमी कोंइशो लोव़ शुश बर्स नोले ला दुम्ब। मेको नोले दुम्ब लोव़ बाक्ब।
28 मोपतीके मेको आन कली ‘परमप्रभु, परमप्रभु यावेमी आ देंशो लोव़ खाप्ब। लोव़ का यो मजाम्ब। मार देंबा, मेको पाइब’ दे माइक्मी, दे परमप्रभु, परमप्रभु यावेमी” देंत।