16
यरूसलेम तेल्लेम खोदेंशो दुम्शो
इजीकीएल २३:-
1 परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, यरूसलेम कली मूर्ति पूजा पचा मदुम्ब, दे तुइक्पतो।
3 मिनु मेको कली परमप्रभु, परमप्रभु यावेमी यरूसलेम कली ‘इ गोतीके नु इ जरमेतीक रागी कनानी आन रागी बाक्ब। इ आफ एमोरी का बाक्त। इ ममा हित्ती बाक्त।
4 गे जरमेसेनु सुइम इ सपु मख्रोदेम। इ कली ब्वाक्कुम मचिक्तेम। सुइम इ रांम हिक्सी मख्रेक्तेम। इ कली सुइम वाम मगिलेम।
5 सुइम मेको नेल्ल पचा कली इ कली शिशी मकोंइदेम। तन्न गे जरमेसेनु, इ कली रूम ताइक्ताक्म। मारदे हना इ कली ग्रांग्रा दित्ताक्म।
6 मिनु गो इ नेक्था रे पा लङानु, इ कली हुश लुम्सीशा बाक्शो ताइतन। मिनु गे मोपा लुम्सीशा बाक्ङेनु, गो इ कली रू ङा बोट खोदेंशो पा कोल्शा, ब्रोंइशा, बाक्को’ देंती।
7 मिनु गे कोल्शा ठेयब दुम्ते। मिनु इ कुचु कोल्शा इ चां लाइश्शो दुम्त। तन्न गे वा मफेक्शो शिश्रा बाक्ते।
8 गो लेंशा इ नेक्था रे पा लङानु, गे ग्युंबे पची ना दुम्शो बाक्ते। मिनु गो आं वा आ सुरमी इ शिश्रा रां सुम्ता। गो गे नु कबल का पाता। मिनु गे आं के दुम्ते। रूथ ३:९; प्रस्थान १९:५
9 नोले गो इ कली ब्वाक्कुम चिक्शा इ हुश नेल्ले चिक्ताक्न। मिनु इ कली तेल ख्रेक्ताक्न।
10 नोले गो इ कली बुटा आप्शो वाम ग्योम्ताक्न। मिनु इ खोइलीम रिम्शो कुशुल के जुत्ता लिक्ताक्न। गो इ कली रिम्शो पा किरशो सुती श्येले के वा फेक्ताक्न। मिनु शुश क्येट लाइब वाम इ कली ग्योम्ताक्न।
11 गो इ कली गहना पांइताक्न। इ गुइम चुरा लिक्ताक्न। इ शुरम सुन के माला रेल्ताक्न।
12 गो इ नेंम मुन्द्री लिक्ताक्न। मिनु इ नोफाम माडवडी क्युक्ताक्न। इ पियाम दारशो सुन फू चुइक्ताक्न।
13 मोपा गे सुन चांदीम ग्योम्साक्वे। इ वा रिम्शो पा किरशो सुती श्येले के वा, शुश क्येट लाइब वा नु बुटा आप्शो दारशो वा दुम्तेक्म। इ जचा थोव़क रिम्शो फस, खुदो नु रिम्शो तेल बाक्तेक्म। गे थम दारशो दुम्शा कोल्ते। मिनु गे पिपीम दुम्चा शिरते।
14 गे दारशो दुम्तीके इ नें रागी रागी ङा मुर आन दातेम ब्रत। मारदे हना इ दारस मारेइ मदुम्शो रिम्शो बाक्त। मेको नेल्ल आं इ कली गेशो ग्योम्तीके रे मोदेंशो दुम्त, दे परमप्रभु, परमप्रभु यावेमी देंशो बाक्ब” देंत।
15 मिनु परमप्रभुमी “तन्न गे इ दारसम थमा सुइक्तीवी। मिनु गे इ नें चेम्शा तेल्लेम का दुम्ते। इ नेक्था रे पा लाइब सु बाक्तेक्म हना यो, गे मेको नु तेल्लेम पाप्तीवी। येरमीया २:२०
16 गे इ वा रे लाइश्शा, इ कली दारशो थान सेल्तीवी। मिनु मेकेर गे तेल्लेम पाप्तीवी। मेको मोदेंशो ङोंइती गेनायो मदुम्शो बाक्त। मिनु नोले यो गेनायो मदुम्ब।
17 गो इ कली गेशो दारशो गहना लाइश्शा, मेको आं सुन चांदी के बाक्तेक्म। मिनु मेको रे वोंइश मुर मूर्ति सेल्साक्वे। मिनु मेको नु तेल्लेम पाप्तीवी। होसे ८:४
18 गे इ बुटा आप्शो वा लाइश्शा, मेको आन कली सुम्तीवी। मिनु गे आं तेल नु धूप मेको आन ङोंइती चढ़ेप्तीवी।
19 गो इ कली जचा थोव़क यो गेतन। गो इ कली रिम्शो फस, खुदो नु रिम्शो तेल जचा गेतन। तन्न गे मेको जचा थोव़क मेको आन ङोंइती ब्रोव़शो रिना पपाइक्चा कली चढ़ेप्तीवी। मोदेंशो दुम्त।
20 मिनु गे आं कली थिशो तमी तौ आन कली लाइश्शा, मूर्ति आन कली जचा थोव़क सेल्शा क्योरशा चढ़ेप्तीवी। मार इ तेल्लेम पशोमीन मगाम ङा? इजीकीएल २०:२६; इजीकीएल २३:३७; ब्यवस्था १२:३१; २राजा १६:३; येरमीया ७:३१
21 गे आं आल आन कली क्योरशा, मूर्ति आन कली चढ़ेप्तीवी।
22 मिनु इ मूर्ति पूजा नु इ तेल्लेम पशो नेल्लेम ठिटी दुम्शो ङा नाक्त ममिम्ती। मेना गे वा मफेक्सीशो शिश्रा नु हुश लुम्सीशो बाक्ते।
23 इ आं अरेशो मटिशो आ पर्बम परमप्रभु, परमप्रभु यावेमी इ पर्बम ‘आबी आबी’ देंत। येरमीया ११:१३
24 गे इ कली चोक चोकम मूर्ति पूजा पतीके सेल्साक्वे।
25 मिनु गे लां ग्रुम्तीक नेल्लेम इ कली लाइश्शो बाक्तीके सेल्शा, इ दारसम तेल्लेम पाप्तीवी। मिनु मेको रे पा लाइब नेल्ल आन कली गे इ रां गेशा इ तेल्लेम पतीक बारपाइक्तीवी।
26 गे इ माल्शो, इ नेक्था बाक्ब इजीप्त ङा मुर नु तेल्लेम पाप्तीवी। मोपा इ तेल्लेम पतीक बारपाइश्शा, आं कली थाम्पा गाइक्पाइक्ती।
27 मोपतीके गो इ कली सजाइ गेतन। गो इ कली शुश जचा थोव़क मगेथु, इ जोरी सत्रु आन गुइम गेतन। गो इ कली पलिस्ती आन दाक्शो सिखार दुम्पाइक्चा कली गेतामी। पलिस्ती आन तमीपुकी इ मरिम्शो पशो तशा मुने पाम्तेक्म।
28 गे अस्सुर ङा मुर नु यो तेल्लेम पाप्तीवी। मारदे हना गे मोपा मरूशो बाक्ते। तेल्लेम पशा नोले यो मरूङे। इजीकीएल २३:१२
29 गे मार मार ग्याप्ब लेयब रागी कल्दी नु यो इ तेल्लेम पतीक बारपाइक्तीवी। मेको मो पशा यो मरूङे” देंत।
30 मिनु परमप्रभु, परमप्रभु यावेमी “गे मोदेंशो पचा कली इ थुंम दोदेंशो पा रोइ पचा माल्दा? गे एको गेय नेल्ल मुने मपाइश्शो तेल्लेममी खोदेंशो पा पाप्तीवी।
31 गे ग्रुम्तीक लां नेल्ल नु इ चोक चोकम इ लाइश्शो बाक्तीके सेल्तीवी। तन्न गे तेल्लेम खोदेंशो मदुमे। मारदे हना गे इ गाल्च मताक्गी।
32 गे हेंथे पाइब मीश, इ वोंइश आ पा ङा अर्को नु बाक्नेवे।
33 मुरपुकीम तेल्लेम नेल्ल आन कली गाल्च गेनीम। तन्न गे चहिं दूली पा इ कली दाक्ब आन कली कका गाल्च गेप्तीवी। गे मेको आन कली एर ओंथ नेल्ल रे चाक्शा, गे नु इप्पाइक्चा कली घूस गेप्तीवी।
34 मोपा गे इ तेल्लेम पतीकेम अरु मीश मुर खोदेंशो मदुमे। इ कली सुइम मयोव़ङेम। मोपतीके गे गाल्च गेप्तीवी। गे इ गाल्च मतगी। मोपा गे अरु तेल्लेम खोदेंशो मदुमे” देंत।
35 मोपतीके ए तेल्लेम, परमप्रभु यावे आ लोव़ नेनो।
36 परमप्रभु, परमप्रभु यावेमी “मारदे हना माल्तीके थम ठेयब बाक्त, इ तेल्लेम पचा कली इ कली माल्शो मुर आन कली इ शिश्रा रां कोंइताक्वी। मेको नेल्ल इ ग्रांग्रा दिशो मूर्ति नु इ आल आन हुश जारशो आ पर्बम बाक्ब।
37 मोपतीके गो इ तेल्लेम पशो नु ग्येरसीशा बाक्शो इ दाक्शो मुर नेल्ल आन कली इ एर ओंथ रे खुप्नुङमी। इ कली दाक्ब नु मदाक्ब नेल्ल आन कली खुप्नुङमी। गो मेको नेल्ल एर ओं रे खुप्नुङमी। मिनु गो मेको आन ङोंइती इ कली शिश्रा सेल्नन। येरमीया १३:२२
38 गो इ कली हेंथे गाक्ब हुश ख्राक्श पोक्ब मीश मुर खोदेंशो पा आं निसाफ पतीक लोव़ कोव़शा निसाफ पाइनुङ। गो आं गाइश्शो नु रुश पशोमी सजाइ गेनुङ। लेवी २:१०
39 मिनु गो इ कली इ मदाक्शो मुर आन गुइम जिम्मा गेनुङ। मिनु मेकोपुकीम इ लाइश्शो बाक्तीके नु लां ङा बाक्तीके प्रेत्नीम। मेकोपुकीमी इ वा प्रुइश्शा इ दारशो थोव़क रोइश्शा, इ कली शिश्रा सेल्शा प्रोंइनीम।
40 मेकोपुकीम इ कली ग्रांग्ये माग्ये पोक्ब मुरपुकी चाक्नीम। मिनु फुल्लु आप्नीम। मिनु इ कली आन तरवारम चेक्शा चोकटा लाम्टा सेल्नीम। ब्यवस्था २२:२३-२४
41 मेकोपुकीम इ खिंम मी सुइक्नीम। मिनु शुश मीश मुर आन ङोंइती इ कली सजाइ गेनीम। गो इ तेल्लेम पतीक तेक्नुङ। मिनु इ मुर आन कली गाल्च गेतीक तेक्नुङ। २राजा २५:९
42 मिनु आं गाइश्शो नु आं रुश पशो, इ रे ङोन नाइक्पाइक्नुङ। मिनु गो सिक्सी पा बाक्शा मगाइक्नुङ।
43 मारदे हना गे इ ठिटी बाक्ङे ना ङा नाक्त ममिम्ती। तन्न एको गेय नेल्लेमी आं कली गाइक्पाइक्ती। मोपतीके गो इ पशो इ पियामीन मोइक्ता। गे इ अरु ग्रांग्रा दिशो गेय नेल्ल प्रोंइशा यो इ पतीक नेल्ल मरिम्शो सेल्शा, इ गेय मतेम्दी ङा? गे मूर्ति पूजा पाइब क्येङा मरिम्शो पाइब मनवे ङा?” देंत।
44 मेकोम “कथा पाइब नेल्लेम इ पर्बम कथा पा ‘दोदेंशो ममा मोदेंशो तमी’ देंनीम।
45 गे इ ममा आ तमी बाक्नेवे। मेकोम आ वोंइश नु आ आल आन कली प्रोंइतु। मिनु गे इ दिदी आ लोक्ब यो बाक्नेवे। मेकोम आ वोंइश नु आ आल आन कली प्रोंइतु। इ ममा हित्ती का बाक्ब। इ आफ एमोरी का बाक्ब। इजीकीएल १६:३
46 मिनु इ दिदी सामरीया बाक्ब। मेको इ उत्तर गे आ तमीपुकी नु बाक्शो बाक्त। इ लोक्ब नु आ तमी चहिं दक्खिन गे सोदोम सहरम बाक्नीम। मेको आ तमीपुकी नु बाक्शो बाक्ब।
47 गे मेको आन गाक्शो लांम ला मगाक्ङे। मिनु मेको आन मूर्ति पूजा पशो आ नोले यो खोइक्तीवी। मिनु इच्का नाक्तीमीन इ पतीक नेल्लेम मेको आन क्येङा यो शुश मरिम्शो पाप्तीवी” देंत।
48 परमप्रभु, परमप्रभु यावेमी “गो आं ब्रोंइशा बाक्शो खोदेंशो पा, इ लोक्ब सोदोम नु मेको आ तमीपुकीम इ मरिम्शो पशो खोदेंशो गेनायो मपाम। मत्ती १०:१५
49 इ लोक्ब सोदोम आ दोस मार बाक्त देंशा हना, मेको नु आ तमीपुकी ठेयब लेश्शा, शुश जशा ब्वशा, शोंप पाइश्शो दुम्शा बाक्तेक्म। मेकोपुकीम प्रुङग नु मारेइ मथीब आन कली वारच मपदेम।
50 मेकोपुकी ठेयब लेश्शा, आं ङोंइती ग्रांग्रा दिशो गेय पाम्तेक्म। मोपतीके गो मोदेंशो तशा मेको आन कली तिल्तामी। उत्पत्ती १९:२४
51 सामरीयामी इ पशो पाप क्येङा उइक्थ यो मपावो। गे मेको आन क्येङा शुश मूर्ति पूजा पाप्तीवी। मिनु गे इ पशो गेय नेल्ल रे पा, इ लोक्ब आस कली ठीक पाइब तांइसीब खोदेंशो सेल्शो बाक्नेवे। येरमीया ३:११
52 गे इ मरिम्शो पशो रावो। मारदे हना गे इ लोक्ब आस कली इ क्येङा आइक्च सजाइ ताइब सेल्तीवी। मारदे हना गे मेको आस पाप पशो क्येङा इ पशो मूर्ति पूजा शुश बाक्त। गे इ क्येङा मेको आस कली ठीक पाइब खोदेंशो सेल्तीवी। मोपतीके मुने पावो, इ मरिम्शो पशो राव। मारदे हना गे इ लोक्ब आस कली ठीक पाइब खोदेंशो सेल्शो बाक्ते।
परमप्रभुमी आ मुर आन कली दाक्ब
53 मिनु गो सोदोम नु आ तमी आन कली रिम्शो दुम्तीक नाक्ती लेश्शा गेनुङमी। मिनु सामरीया नु आ तमी आन कली यो मोदेंशो पाइनुङ। मिनु इ रिम्शो दुम्तीके नाक्ती यो लेश्शा गेनन। ब्यवस्था ३०:३
54 मोपा गे इ मरिम्शो पशो राइनेवे। मिनु इ पशो नेल्ल आन पर्बम गे मुने दोक्चा माल्नेवे। मिनु मेको आस कली थुं नाइक्तीके दुम्नेवे।
55 इ लोक्ब सोदोम नु आ तमीपुकी ङोंइती ङा खोदेंशो पा रिम्शो दुम्नीम। मिनु सामरीया नु आ तमीपुकी यो ङोंइती ङा खोदेंशो पा रिम्शो दुम्नीम। मिनु गे नु इ तमीपुकी यो ङोंइती ङा खोदेंशो पा रिम्शो दुम्नीनी।
56 ङोंइती इ ठेयब लेत्तीक नाक्ती गे इ लोक्ब सोदोम आ पर्बम शुक्शी मपवी ङा?
57 मेना मेकोपुकीम इ परमप्रभु यावे आ अरेशो मटिशो मतुइश्शो बाक्तेक्म। मुल अराम ङा तमीपुकीमी इ कली शुक्शी पाइनीम। मेको आ नेक्था ङा मुर, पलिस्ती आ तमीपुकीमी नु एर ओंथ ङा मुर नेल्लेमी शुक्शी पा आइक्च मिम्नीम। अराम आ तमी एदोम यो बाक्ब।
58 गे इ मुने दोक्चा ङा गेय नु इ मूर्ति पूजा पशो ङा सजाइ तचा माल्नेवे” दे परमप्रभु यावेमी देंत।
गेना हना यो लीब कबल
59 परमप्रभु, परमप्रभु यावेमी “गे इ पशो खोदेंशो पा गो इ कली पाइनुङ। गे आं कसम जशो ममिम्ती। इस पशो कबल यो क्याम्ताक्वी।
60 मो हना यो गो इ ठिटी बाक्ङे नाक्त ङा गे नु पशो कबल मिम्नुङ। गो गे नु गेना हना यो लीब कबल पाइनुङ। लेवी २६:४५; होसे २:१७; इजीकीएल ३७:२६; येरमीया ३१:३१-३४
61 मेना गे इ पशो नेल्ल मिम्शा, मुने दोक्शा, इ लोक्ब आस कली ब्राइनेवे। गो मेको आस कली इ तमी खोदेंशो पा गेनन। तन्न मेको गे नु पशो कबलम पतीके पशो ममाइ। इजीकीएल २०:४३
62 मिनु गो गे नु ग्येत्थ लुक्च मपाइब कबल पाइनुङ। मिनु गे गोन परमप्रभु यावे नङ, दे तुइक्नेवे।
63 मिनु गे इ ङोंइती पशो मिम्शा मुने दोक्नेवे। गो इ पशो गेय नेल्ल आन पर्बम माफ गेनन। मिनु गे इ मुने आ पर्बम गे ठेयब लेश्शो लोव़ पने मचाप्नेवे” दे परमप्रभु, परमप्रभु यावेमी देंत। इजीकीएल ३६:३१-३२