20
इस्राएली हेंथे गाक्शो
1 मिनु ७ बर्स ङा ५ महिना ङा १० नाक्ती इस्राएल ङा खाल्पापुकी परमप्रभु यावे कली हिल्लो पचा कली जाक्शा आं ङोंइती बाक्तेक्म। इजीकीएल १४:१
2 मेना परमप्रभु यावेमी आं कली लोव़ पाप्तु।
3 मेकोमी “ए मुर, इस्राएल ङा खाल्पा आन कली लोव़ पावो। गो, परमप्रभु, परमप्रभु यावेमी, मारदे गेपुकी आं कली हिल्लो पथ जाक्नी? गो आं ब्रोंइशा बाक्शो खोदेंशो पा, इन कली लोव़ मलेत्नुङ। इजीकीएल १४:३
4 ए मुर, गे मेको आन कली निसाफ पाइनेवे? गे मेको आन कली निसाफ पाइनेवे? मो हना मेको आन किकी पिपी आन ग्रांग्रा दिशो गेय आन पर्बम मेको आन कली तुइक्पतो। इजीकीएल २२:२; इजीकीएल २३:३६
5 गो इस्राएल कली योव़ङु नाक्ती याकूब आ खिं ङा आ चच युइ नु कसम जाता। इजीप्त रागीमी गो मेको आन दातेम तुइक्पांइसाक्यी। मेको आन कली गो परमप्रभु यावे, इन परमप्रभु नङ, दे कसम जाता। प्रस्थान ६:७-८
6 गो मेको नाक्ती मेको आन कली इजीप्त रे ग्रुंइशा, आन माल्शो रागीम चाक्नुङमी। मेको रागीम दूध नु खुदो शाइश्शो बाक्ब। मिनु मेको रागी, रागी नेल्ल आन क्येङा रिम्शो बाक्ब, दे कसम जशा देंशो नङ। प्रस्थान ३:८
7 मिनु गो मेको आन कली इन कोव़त दाक्शो ग्रांग्रा दित्चा ङा थोव़क ताइक्तीन। गे आंम कली इजीप्त ङा मूर्तिपुकीम ग्रांग्रा दिशो मसेल्सीन। गो परमप्रभु यावे, इन परमप्रभु नङ। यहोसु २४:१४,२३
8 तन्न मेकोपुकीमी आं कली मटिथु, आं लोव़ मनेनेम। सुइम आन कोव़त दाक्शो ग्रांग्रा दित्चा ङा थोव़क मताइक्तेक्म। सुइमी इजीप्त ङा मूर्तिपुकी यो मप्रोनेम। मिनु गे इजीप्त रागीम बाक्नीनु, आं गाइश्शो नेल्ले इन तारी मोइक्नुङ, दे मिम्ताक्ङ।
9 तन्न गो आं नें रागी रागी ङा मुर आन ङोंइती मरिम्शो मदुम्ल, दे गो इन कली इजीप्त रागी रे ग्रुंइताक्ङ। इन बाक्शो रागी ङा मुर आन कली यो आं नें तुइक्पाइक्ताक्मी। इजीकीएल २०:१४; इजीकीएल ३६:२१-२२; प्रस्थान ३२:१२
10 मोपतीके गो मेको आन कली इजीप्त रागी रे ग्रुंइशा गोरशो रागीम चाक्तामी।
11 गो मेको आन कली आं फुल्लुम मुशा ब्रेक्शो लोव़ तुइक्पाइक्तामी। मिनु आं निसाफ पतीक लोव़ कोंइताक्ङमी। सुम मेको टिशा पाइबा, मेको ब्रोंइब। लेवी १८:५; लूका १०:२८
12 मेको प्रोंइशा मेको आन कली नाइक्तीक नाक्त गेतामी। मेको गो नु मेको आन दातेमी चिन्ड का बाक्ब। मिनु गो, परमप्रभु यावेमी मेको आन कली आं मुर सेल्ताक्मी, दे तुइक्तमेक्ल। प्रस्थान ३१:१३-१७
13 तन्न इस्राएल आ खिं ङा मुरपुकीमी गोरशो रागीम आं कली मटीयीमी। मेकोपुकीम आं फुल्लुम मुशा ब्रेक्शो लोव़ नु आं निसाफ पतीक लोव़ मपामे। मेको टिशा पाइब मुर मेको रे ब्रोंइनीम। मेकोपुकीमी आं नाइक्तीक नाक्त ग्रांग्रा दिशो सेल्तेक्म। मिनु गो एको गोरशो रागीमीन आं चुरशो मोइश्शा मेको आन कली साइक्नुङमी, दे मिम्ताक्ङ। प्रस्थान ३२:१०-१२
14 मिनु गो रागी ङा मुर आन ङोंइती मेको आन कली इजीप्त रागी रे ग्रुंइताक्ङ। गो आं नें मेको रागी रागी ङा मुर आन ङोंइती मरिम्शो मदुम्ल, दे मोदेंशो पाता।
15 मिनु गो मेको आन कली गोरशो रागीमी गो इन कली गेशो, दूध नु खुदो शुश बाक्शो नेल्ल क्येङा दारशो रागीमी मलाइक्नुङ, दे कसम जाता। गन्ती १४:३०
16 मारदे हना मेकोपुकीम आं निसाफ पतीक लोव़ होस पा मपाम। मिनु फुल्लुम मुशा ब्रेक्शो लोव़ मटीम। मिनु आं नाइक्तीक नाक्ती ग्रांग्रा दिशो सेल्तेक्म। मारदे हना मेको आन थुं आन मूर्ति गे हिरशो बाक्तेक्म।
17 मो हना यो गो मेको आन कली शिशी पा, गोरशो रागीम मसदुमी। मेको आन कली मक्याम्दुमी।
18 गो गोरशो रागीम मेको आन आल आन कली ‘गे इन आम आफ आन शेंशो फुल्लुम मुशा ब्रेक्शो लोव़ मटिने। मेको आन निसाफ पतीक मपने। मेको आन मूर्तिम आंम इन कली ग्रांग्रा दिशो मसेल्सीन।
19 गो परमप्रभु यावे, इन परमप्रभु नङ। गेपुकीम आं फुल्लुम मुशा ब्रेक्शो लोव़ टिशा, आं निसाफ पतीक लोव़ होस पा पने।
20 आं नाइक्तीक नाक्ती गेय मपने। मिनु मेको गे नु गो इं दातेम चिन्ड दुम्ल। मिनु गेपुकीम गो परमप्रभु यावे, इन परमप्रभु नङ, दे तुइक्नीनी’ देंती।
21 तन्न मेको आलपुकी आं कली मटीब दुम्तेक्म। मेकोपुकीम आं फुल्लुम मुशा ब्रेक्शो लोव़म मटीम। मिनु आं निसाफ पतीक लोव़ होस पा मपाम। मेको टिशा पाइब मुर मेको रे ब्रोंइनीम। मेकोपुकीम आं नाइक्तीक नाक्ती ग्रांग्रा दिशो सेल्तेक्म। मिनु एको गोरशो रागीमीन आं चुरशो आन तारी मोइश्शा, मेको आं गाइश्शा पशो गेय कोंइनुङ।
22 तन्न गो आं गुइ तेक्ता। मिनु गो रागी ङा मुर आन ङोंइती मेको आन कली इजीप्त रागी रे ग्रुंइताक्ङ। गो आं नें मेको रागी रागी ङा मुर आन ङोंइती मरिम्शो मदुम्ल, दे मोदेंशो पाता।
23 मेको प्रोंइशा यो, गो गोरशो रागीम मेको आन कली गो इन कली रागी रागी ङा मुर आन दातेम एर ओंथ ब्रपाइक्नुङमी। मिनु राज्य राज्यम एर ओंथ ब्रपाइक्नुङमी, दे कसम जाता। लेवी २६:३३
24 मारदे हना मेकोपुकीम आं निसाफ पतीक लोव़ मपामे। मिनु आं फुल्लुम मुशा ब्रेक्शो लोव़ मटीम। आं नाइक्तीक नाक्त ग्रांग्रा दिशो सेल्तेक्म। मिनु मेकोम आन किकी पिप आन मूर्ति पूजा पाम्तेक्म।
25 गो मेको आन कली फुल्लुम मुशा ब्रेक्शो मरिम्शो लोव़ यो गेतामी। मिनु आं निसाफ पतीक लोव़म यो मेकोपुकी ब्रोंइने मचाप्बाक्तेक्म।
26 गो मेको आन कली आन चढ़ेशो रे पा ग्रांग्रा दिशो दुम्चा गेतामी। आन ङोंइती जरमेशो मारेइ मारेइ आन रे आं कली चढ़ेचा आ पर्बम मेको आन कली ग्रांग्रा दिशो दुम्पाइक्तामी। मेकोपुकी हिंशा ग्येत्थ लुक्च दुम्मल, दे मो पाता। मिनु मेकोपुकीम गो परमप्रभु यावे नङ, दे तुइक्तमेक्ल, दे मो पाता” देंत। इजीकीएल १६:२०; प्रस्थान १३:२,१३; प्रस्थान २२:२८
27 मोपतीके ए मुर, इस्राएल आ खिं ङा मुरपुकी नु लोव़ पावो। मिनु मेको आन कली “परमप्रभु, परमप्रभु यावेमी इन कली मार देंत देंशा हना, इन किकी पिपीम आं कली जोल पा शुक्शी पाइक्तीमी।
28 गो कसम जशा मेको आन कली गेनुङ देंशो रागीम चाक्तामी। मेकोपुकीम मेकेर लाइश्शो डांडा नु शुश सफा पाइश्शो रवा ताम्तेक्म। मेकेर आन मार मार चढ़ेम्तेक्म। आं कली गाइक्पाइक्चा कली आन पोक्शो मार मार चढ़ेम्तेक्म। मेकेर आन ब्रोव़शो रिना पाइश्शो धूप चोशा, आन तूचा थोव़क चढ़ेतीक चढ़ेम्तेक्म।
29 मिनु गो मेको आन कली गे इन लशो लाइश्शो डांडा मार बाक्बा? दे हिल्लो पातामी। मुल सम्म यो मेको ठाउं आ नें बामाह देंसीब” दे परमप्रभु यावेमी देंत। बामाह देंशो लाइश्शो डांडा ङा थान रुम्सीब।
परमप्रभु आ मुर आन कली पतीके
30 मोपतीके परमप्रभु, परमप्रभु यावेमी इस्राएल आ खिं ङा मुर आन कली “गे यो इन किकी पिपी आन खोदेंशो पा इन कली ग्रांग्रा दिशो सेल्सीनीनी? मिनु मेको आन ग्रांग्रा दिशो मूर्ति आन नोले खोइक्नीनी?
31 गेपुकीम मेको आन कली चढ़ेनीनी। गे इन आल आन कली चोशा चढ़ेनीनी। मिनु मुलाक्ती सम्म यो गे इन मूर्ति पूजा पतीकेम आंम इन कली ग्रांग्रा दिशो सेल्सीशो बाक्नीनी। ए इस्राएल आ खिं ङा मुरपुकी, गो ब्रोंइशा बाक्शो खोदेंशो पा, गे आं कली हिल्लो पचा मताइनीनी” दे परमप्रभु, परमप्रभु यावेमी देंत।
32 मिनु परमप्रभुमी “इन थुंम ‘गोपुकी अर्को रागी ङा मुर नु अर्को जात ङा मुर खोदेंशो दुम्चा दाक्नीक’ देंतीनी। गेपुकीमी ‘रागी ङा जात जात ङा मुर खोदेंशो पा शी नु फुल्लु आन कली पूजा पाइब बाक्नीकी’ देंतीनी। तन्न इन मिम्शो गेनायो मजाक्दीप्ब” देंत। प्रस्थान २३:२४
33 परमप्रभु, परमप्रभु यावेमी “गो ब्रोंइशा बाक्शो खोदेंशो पा, सक्ति पाइश्शो गुइ दिंशा चुरशा गो इन कली सासन पाइनुङ।
34 गो इन कली सक्ति पाइश्शो गुइ दिंशा चुरशा इन ब्रशा बाक्शो रागी रागी ङा मुर आन दाते रे ग्रुंइशा चाक्नन्नी। मिनु गे इन ब्रशो रागी रे इन कली ग्रुम्पाइक्नन्नी।
35 गो इन कली रागी रागी ङा मुर आन गोरशो रागीम चाक्नन्नी। मिनु मेकेर इन कली निसाफ पाइनुङ। होसे २:१६
36 ङोंइती गो दोपा इजीप्त ङा गोरशो रागीम इन किकी पिपी आन कली निसाफ पङा, मोपा इन कली यो निसाफ पाइनुङ। गन्ती १४:२२-२३
37 गो इन कली हिक्शा आं कबल पपाइक्नन्नी। लेवी २७:३२; येरमीया ३३:१३
38 इन दाते ङा आं कली मटीब नु मरिम्शो पाइब आन कली तिल्नुङमी। गो मेको आन कली अर्को रागी ङा मुर दुम्शा बाक्शो रागी रे ग्रुंइनुङमी। तन्न मेको इस्राएल रागी ओव़चा मताइनीम। मिनु गेपुकीम गो परमप्रभु यावे नङ, दे तुइक्नीनी।
39 ए इस्राएल आ खिं ङा मुरपुकी, परमप्रभु यावेमी इन कली ‘लन। गे आं देंशो टिचा मदाक्नीनी हना, मुल रे गे नेल्लेम इन इन मूर्ति आन कली पूजा पने। तन्न इन मूर्ति पूजा पतीकेमी आं नें कली गेनायो ग्रांग्रा दिशो मसेलीन।
40 मारदे हना आं डांडा, इस्राएल ङा डांडामी इस्राएल आ खिं ङा मुर नेल्लेम आं कली ठेयब सेल्नीम। मिनु गो मेकेर मेको आन कली ब्राइनुङमी। गो मेकेर इन गेशो, इन गेशो नेल्ल क्येङा रिम्शो थोव़क नु इन चढ़ेशो नेल्ल ताक्नुङ। इजीकीएल १७:२३
41 गो इन कली रागी रागी ङा मुर आन दाते रे ग्रुंइशा नु इन कली इन ब्रशो रागी रे खुप्शा, ब्रोव़शो रिना पाइश्शो धूप खोदेंशो पा ब्राइनन्नी। मिनु रागी रागी ङा मुर आन ङोंइती आं कली तुइक्पांइसीनुङ।
42 मिनु गो इन किकी पिपी आन कली गेनुङ देंशो इस्राएल रागीम इन कली चाक्नन्नी। मेना गेपुकीम गो परमप्रभु यावे नङ, दे तुइक्नीनी।
43 मेकेर गे इन कली ग्रांग्रा दिशो सेल्ब थोव़क नु मरिम्शो गेय नेल्ल मिम्नीनी। मिनु इन पशो मरिम्शो गेय नेल्ल आन पर्बम मिम्शा आंम इन कली ग्रांग्रा दीनीनी। इजीकीएल ३६:३१-३२
44 ए इस्राएल आ खिं ङा मुरपुकी, गे इन मरिम्शो पतीक नु इन हेंथे पशोम ममाइ, तन्न आं नें आ पर्बम गो इन कली रिम्शो पाइनुङ। मिनु गेपुकीम गोन परमप्रभु यावे नङ, दे तुइक्नीनी’ देनो” दे परमप्रभु, परमप्रभु यावेमी देंत।
दक्खिन आ पर्बम लोव़
45 परमप्रभु यावेमी आं कली लोव़ पाप्तु।
46 मार लोव़ पाप्तु देंशा हना “ए मुर, दक्खिन गे कोव़शा दक्खिन आ पर्बम आं लोव़ पावो। मेको दक्खिन नेगेब ङा ब्वाकी आ पर्बम आं लोव़ पावो।
47 नेगेब ङा ब्वाकी कली ‘परमप्रभु यावे आ लोव़ नेनो। परमप्रभु, परमप्रभु यावेमी गो इ कली मी सुइक्चा चिक्शो बाक्नुङ। मिनु इ गिगी रवा नु सोव़शो रवा आन कली मेकोम नेक्ब। मेको आ ब्रशो मकाप्ब। मिनु मेकोम पतीके दक्खिन रे उत्तर सम्म ङा नेल्ल आन कुल किक्ब।
48 मिनु मुर नेल्लेमी गो, परमप्रभु यावेमी मेको जेत्ताक्ङ, दे तुइक्नीम। मेको काप्चा मदुम्ब’ देनो” देंत।
49 मिनु गो “परमप्रभु, परमप्रभु यावे, मेकोपुकीम आं पर्बम ‘मेकोमी कथा ला देंशो बाक्ब, ममाइ ङा?’ देंनीम” देंती।