35
एदोम गोरशो रागी दुम्चशो
1 मिनु परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “ए मुर, गे सेइर पहाड गे कोव़ङो। मिनु मेको कली आं लोव़ पावो। इजीकीएल २५:१२-१४
3 परमप्रभु, परमप्रभु यावेमी ‘ए सेइर पहाड, गो इ कली लोव़ का पचा माल्नुङ। आं गुइ इ गे क्युक्नुङ। मिनु इ कली मुर मबाक्तीके नु श्येत्थ सेल्नन।
4 गो इ सहर प्रेत्नुङ। मिनु गे मुर मबाक्तीक दुम्नेवे। मिनु गोन परमप्रभु यावे नङ, दे तुइक्नेवे।
5 गे साइ इस्राएल कली ईख कुरतीवी। मिनु इस्राएली आन श्येत जची ना नु आन नोले ङा सजाइ तची ना तरवारम क्योरचा कली जिम्मा गेप्तीवी। भजन संग्रह १३७:७
6 मोपतीके परमप्रभु, परमप्रभु यावेमी, गो आं ब्रोंइशा बाक्शो खोदेंशो पा, गो इ कली हुश ख्राक्श पोक्ब आन गुइमी जिम्मा गेनन। मारदे हना गे हुश ख्राक्श पोक्चा दाक्तावी। हुश ख्राक्श पोक्तीकेम इ कली खेदा पाइब।
7 गो सेइर पहाड कली श्येत्थ नु मुर मबाक्शो पहाड सेल्नुङ। मेको रे पा एर ओंथ पाइब नेल्ल आन कली खतम सेल्नुङमी।
8 गो इ पहाड नेल्ल साइश्शो मुरपुकीम प्रिंनुङ। तरवारम साइश्शोपुकी इ डांडा मेर, इ बेंसी मेर नु इ खोल्सा मेर गोल्नीम।
9 गो इ कली गेना हना यो कली श्येत्थ सेल्नन। इ सहर मुर मबाक्तीक दुम्नीम। मिनु गोन परमप्रभु यावे नङ, दे तुइक्नेवे’।
10 गो परमप्रभु यावे मेक बाक्ती हना यो, गे ‘मेको रागी निक्शी नु राज्य निक्शी आं के दुम्ब। मिनु गो मेको आन कली हुकुम पाइनुङ’ देंते।
11 मोपतीके परमप्रभु, परमप्रभु यावेमी गो आं ब्रोंइशा बाक्शो खोदेंशो पा गे इ गाइश्शो नु गेहे पतीक कोंइताक्यी। मारदे हना गे इस्राएल कली काइ मदाक्ती। गो इ कली मोदेंशोन पाइनुङ। गो इ कली निसाफ पङानु, इन दातेमी आं कली तुइक्पाइक्नुङ।
12 मिनु गे गो परमप्रभु यावे नङ, दे तुइक्नेवे। मिनु गो इस्राएल ङा पहाड आन पर्बम इ शुक्शी पा पशो लोव़ नेल्ल नेंता। गे मार देंते देंशा हना ‘इस्राएल ङा पहाड नेल्ल मुर मबाक्तीके दुम्शो बाक्नीम। मिनु मेको आं कली गेशो बाक्ब’ देंते।
13 गे आं कली ठेयब लेश्शा कोंइताक्यी। मिनु गे आं पर्बम शुश मरिम्शो लोव़ पाप्तीवी। गो मेको नेल्ल नेंता।
14 रागी नेल्ल ग्येरसीशा बाक्मानु, गो इ कली चहिं मुर मबाक्तीक रागी सेल्नुङ।
15 मारदे हना गे इस्राएल मुर मबाक्तीके दुम्मेनु, आं के दुम्त, दे ग्येरसीशो बाक्ते। मोपतीके, गो यो इ कली मोदेंशोन पाइनुङ। गे सेइर पहाड नु एदोम नेल्ल मुर मबाक्तीके दुम्नीनी। मिनु गोन परमप्रभु यावे नङ, दे तुइक्नीनी” देंत।