46
नाक्‍त किंत किंत ङा चढ़ेतीक
मिनु परमप्रभु, परमप्रभु यावेमी “मेको आगा लाङगा ङा पूर्ब गे कोव़शो ठेयब लाप्‍चो मेको गेय पतीक ६ नाक्‍त चोक्‍शा वोइक्‍चा माल्‍नीम। तन्‍न नाइक्‍तीक नाक्‍त नु औंसी नाक्‍त रोक्‍चा माल्‍नीम। सासन पाइब मेको पिंडी रे लाङगा ङा लाप्‍चो रे पा ओव़चा माल्‍ब। मिनु लाप्‍चो आ नेक्‍था राप्‍शा बाक्‍चा माल्‍ब। मिनु चढ़ेबपुकीम सासन पाइब आ चोशा चढ़ेतीक नु दुशा बाक्‍तीक आ पर्बम चढ़ेतीक चढ़ेचा माल्‍नीम। मिनु सासन पाइबमी लाप्‍चो आ नेक्‍था राप्‍‍शा, खुम्‍की पा परमप्रभु यावे कली ठेयब सेल्‍चा माल्‍ब। मिनु नोले मेको लाङगा रे ग्रूचा माल्‍ब। तन्‍न मेको लाप्‍चो नां मरिक्‍म सम्‍म रोक्‍स ङा रोक्‍स बाक्‍चा माल्‍ब। इजीकीएल ४४:३ मिनु रागी ङा मुरपुकीम मेको ठेयब लाप्‍चो आ नेक्‍था नाइक्‍तीक नाक्‍ती नु औंसी नाक्‍ती खुम्‍की पा बाप्‍चा माल्‍नीम। मेको सासन पाइबमी परमप्रभु यावे कली नाइक्‍तीक नाक्‍ती मार चढ़ेचा माल्‍ब देंशा हना, चोशा चढ़ेचा कली मारेइ मदुम्‍शो ६ ओटा पाठा नु सांड का चढ़ेचा माल्‍ब। गन्‍ती २८:९-१० मेको जचा थोव़क चढ़ेचा कली सांड नु एफाह का अन्‍न चढ़ेचा माल्‍ब। मिनु पाठा नु अन्‍न गिश चढ़ेचा दाक्‍बा, मिश चढ़ेने चाप्‍‍ब। मिनु एफाह का का अन्‍न कली तेल चढ़ेचा माल्‍ब। एफाह का २२ लिटर पुक्‍तीक बाक्‍ब। हिन का ४ लिटर खोदेंशो बाक्‍ब।इजीकीएल ४५:२४ मिनु मेकोम औंसी नाक्‍त कली मार चढ़ेचा माल्‍ब देंशा हना, मारेइ मदुम्‍शो बोहोर का ६ ओटा पाठा नु सांड का चढ़ेचा माल्‍ब। मिनु जचा थोव़क चढ़ेचा कली बोहोर नु एफाह का अन्‍न नु सांड नु एफाह का अन्‍न चढ़ेचा माल्‍ब। मिनु पाठा नु अन्‍न गिश चढ़ेचा दाक्‍बा, मिश चढ़ेने चाप्‍ब। मिनु एफाह का का अन्‍न कली हिन का का तेल चढ़ेचा माल्‍ब। मिनु सासन पाइब ओव़मेनु, मेको ठेयब लाप्‍चो ङा पिंडी रे पा ओव़चा माल्‍ब। नोले मेको आ ओव़शो लां रेन लाङगा ग्रूचा माल्‍ब।
सासन पाइब आन चढ़ेशो
मिनु रागी ङा मुरपुकी देंशो नाक्‍त ङा चाडम परमप्रभु यावे कली ठेयब सेल्‍चा कली आ ङोंइती जाक्‍तेक्‍म हना, मेको उत्तर ङा ठेयब लाप्‍चो रे ओव़चा माल्‍नीम। नोले दक्‍खिन ङा ठेयब लाप्‍चो रे पा ग्रूचा माल्‍नीम। सु चहिं दक्‍खिन ङा ठेयब लाप्‍चो रे ओव़नीमी, मेकोपुकी उत्तर ङा ठेयब लाप्‍चो रे ग्रूचा माल्‍नीम। मेकोपुकी आगा ओव़शो ठेयब लाप्‍चो रे लाङगा ग्रूचा मदुम्‍नीम। आन ओव़शो लाप्‍चो रे ग्रूचा मदुम्‍नीम। ग्‍येत्‍थ पा अर्को ठेयब लाप्‍चो रे पा ग्रूचा माल्‍नीम। 10 मेकोपुकी ओव़मानु, सासन पाइब मेको नु ओव़चा माल्‍ब। मिनु मेकोपुकी लाङगा ग्रूमानु, मेको यो ग्रूचा माल्‍ब।
11 मिनु चाडपुकी नु देंशो नाक्‍त कली जचा थोव़क चढ़ेचा कली बोहोर नु एफाह का अन्‍न नु सांड नु एफाह का अन्‍न चढ़ेचा माल्‍ब। मिनु पाठा नु अन्‍न गिश चढ़ेचा दाक्‍बा, मिश चढ़ेने चाप्‍ब। मिनु एफाह का का अन्‍न कली हिन का का तेल चढ़ेचा माल्‍ब। एफाह का २२ लिटर पुक्‍तीक बाक्‍ब। मेको ५ पाथी आधा खोदेंशो बाक्‍ब। 12 मिनु सासन पाइबमी परमप्रभु यावे कली आ थुंम ग्‍येरशा चढ़ेतीक चढ़ेचा दाक्‍ताक्‍व हना, चोशा चढ़ेतीक कि दुशा बाक्‍तीक आ पर्बम चढ़ेतीक चढ़ेचा दाक्‍ताक्‍व हना, मेको ओव़चा कली पूर्ब ङा ठेयब लाप्‍चो रोक्‍शा गेचा माल्‍नीम। मिनु मेकोमी आ चोशा चढ़ेतीक नु दुशा बाक्‍चा आ पर्बम चढ़ेतीक, नाइक्‍तीक नाक्‍ती चढ़ेशो खोदेंशो पा चढ़ेचा माल्‍ब। मिनु नोले मेको लाङगा लचा माल्‍ब। मिनु लम नोले मेको ठेयब लाप्‍चो चोक्‍चा माल्‍नीम।
13 मेकोमी परमप्रभु यावे कली नाक्‍त किंत किंत मारेइ मदुम्‍शो बर्स का गाप्‍शो पाठा का का सुनी कुस कुस चोशा चढ़ेचा कली गेचा माल्‍ब। प्रस्‍थान २८:३८-४२; गन्‍ती २८:३ 14 मेको नु सुनी कुस कुस चढ़ेतीक नु एफाह ङा ६ भाग ङा भाग का अन्‍न, हिन का ङा ३ भाग ङा भाग का तेल रिम्‍शो फस ब्‍वाइक्‍चा कली चढ़ेचा माल्‍ब। एको परमप्रभु यावे कली अन्‍न चढ़ेतीक बाक्‍ब। मिनु मेको गेना हना यो परमप्रभु यावे कली अन्‍न चढ़ेतीक बाक्‍ब। एफाह का २२ लिटर पुक्‍तीक बाक्‍ब। हिन का ४ लिटर खोदेंशो बाक्‍ब। 15 मिनु मेको पाठा, अन्‍न चढ़ेतीक नु तेल सुनी कुस कुस चाक्‍शा, चोशा चढ़ेचा माल्‍ब” देंशो बाक्‍ब।
सासन पाइब आ थेरशो रू
16 मिनु परमप्रभु, परमप्रभु यावेमी “सासन पाइबमी आ तौ का कली आ शोंप रे रू गेप्‍तु हना, मेको आ तौ चच युइ आन के दुम्‍ल। 17 तन्‍न मेकोम आ थेरशो रू रे आ गेय पाइब कली गेप्‍तु हना, मेको प्रोंइतीक बर्स सम्‍म ला मेको गेय पाइब आ शोंप दुम्‍ब। नोले मेको लेंशा सासन पाइब केन दुम्‍ब। आ तौ कली गेशो रू चहिं मेको केन दुम्‍शा लीब। लेवी २५:१०; येरमीया ३४:८ 18 सासन पाइबमी मुर आन थेरशो रू रे ग्रुंइशा आ शोंप सेल्‍‍ने मचाप्‍ब। मेकोम आ तौ आन कली रू गेचा दाक्‍ब हना, आ शोंप रे गेचा माल्‍ब। मोपा सुइ आं मुर रू रोइक्‍चा मपुंइसीनीम” देंत। इजीकीएल ४५:८-९
चढ़ेशो श्‍ये क्‍येतीक कोठा
19 मिनु नोले मेकोमी आं कली उत्तर गे ङा ठेयब लाप्‍चो ङा ओव़तीक आ नेक्‍था रे पा, चढ़ेब आन कली तिल्‍शा वोइश्‍शो कोठाम लाइक्‍ती। मिनु मेकेर बाक्‍तीक आ पच्‍छिम गे बाक्‍तीक का ताता। 20 मिनु मेकोम आं कली “एकेर चढ़ेबपुकीम दोस आ पर्बम चढ़ेतीक नु पाप आ पर्बम चढ़ेतीक आन श्‍ये लोप्‍नीम। मिनु चढ़ेशो अन्‍न के मार मार चोइनीम। मोपा मेकोपुकीम चढ़ेशो थोव़क लाङगा गे ङा लाङगाम मग्रुंइनीम। मारदे हना मुर आन कली मरिम्‍शो मदुम्‍ल” देंत।
21 मिनु नोले मेकोमी आं कली लाङगा गे ङा लाङगा ङा ४ सुर कोंइताक्‍यी। 22 मेको लाङगा गे ङा लाङगा ङा ४ सुरम ४ ओटा आइक्‍च लाङगा बाक्‍तेक्‍म। मेको नेल्‍ल खाल का ङा ४० कुबीत लाइश्‍शो नु ३० कुबीत ब्रेम्‍शो बाक्‍तेक्‍म। 23 मेको नेल्‍ल आन एर ओंथ गारो हिरशो बाक्‍तेक्‍म। मेको ४ ओटा लाङगामी आन सुर सुरम लहर पा चुप्‍लु बाक्‍तेक्‍म। 24 मिनु मेकोमी आं कली “एको क्‍येतीक बाक्‍नीम। एकेर परमप्रभु यावे आ खिंम गेय पाइबपुकीमी मुर आन चढ़ेशो मार मार लोप्‍नीम” देंत।