6
पिप कोरेस आ ब्रेक्‍स थिश्‍शो
मिनु बेबीलोन रागीमी पिप दारामी सासन पा मार मार ब्रेक्‍स वोइक्‍तीकेमी पिप आन ब्रेक्‍स माल्‍तेक्‍म। मिनु मादी रागी ङा ठेयब सहर एक-बतानामी तोल्‍शा वोइश्‍शो ब्रेक्‍स का थित्‍तेक्‍म। मिनु मेको ब्रेक्‍समी मार ब्रेक्‍शो बाक्‍त देंशा हना
पिप कोरेसमी सासन पशो ङोंइती ङा बर्समी यरूसलेममी परमप्रभु आ खिं आ पर्बम हुकुम पशो ब्रेक्‍स का ग्रुंइशो बाक्‍ब। मार लोव़ ग्रुंइशो बाक्‍ब देंशा हना “मेको खिं लेंशा सेलीन। मेको चढ़ेचा कली नु चोशा चढ़ेतीक चढ़ेचा कली बाक्‍ब। आ ग्‍येत्‍थ लाइश्‍शो ६० कुबीत नु आ पित्‍थ ब्रेम्‍शो ६० कुबीत दुम्‍चा माल्‍ब। कुबीत का आधा मिटर खोदेंशो बाक्‍ब। मेको ख्रोइश्‍शो फुल्‍लु के लहर सां नु शी के लहर का पा सेल्‍चा। मिनु मेको सेल्‍चा कली आ माल्‍शो नेल्‍ल पिप आ क्‍येट वोइक्‍तीक रे गेचा।
पिप नेबुकदनेसरमी यरूसलेम ङा परमप्रभु आ खिं रे ग्रुंइशा बेबीलोन सहरम चाक्‍शो सुन नु चांदी के बोसपुकी यो लेंशा ङोंइती ङा आन बाक्‍तीक उइ वोइक्‍चा। मेको नेल्‍ल यरूसलेममी परमप्रभु आ खिंमी लाइश्‍शा वोइक्‍चा नम” दे ब्रेक्‍शो बाक्‍त।
पिप दारामी वारच पशो
मिनु पिप दारामी “युफ्रेटीस आइक्‍ची हांबु ङा रागीमी हुकुम पाइब तत्तेनाइ, शेथार-बोजे‍नाइ नु इन गेय पाइबपुकी नु युफ्रेटीस आइक्‍ची हांबुम बाक्‍ब सोइश्‍शो नेल्‍ल इन कली परमप्रभु आ खिं सेल्‍तीक गेय मतेक्‍कीन। यहूदी आन कली सासन पाइब नु मेको आन खाल्‍पा आन कली परमप्रभु आ खिं ङोंइती ङा आ बाक्‍तीक उइ सेल्‍चा गेने। मिनु गो हुकुम का पाइनुङ। गे यहूदी आन खाल्‍पा आन कली परमप्रभु आ खिं सेल्‍चा कली मार पचा माल्‍नीनी मेको यो इन कली हुकुम गेनन्‍नी। मेको सेल्‍तीक गेय पचा कली युफ्रेटीस आइक्‍ची हांबु ङा रागी रे पोक्‍शो तिरो रे पिप आ क्‍येट वोइक्‍तीक रे मेको आन कली माल्‍शो नेल्‍ल गेने।
मिनु मेको आन कली माल्‍शो, बाछा, सांड, पाठा स्‍वर्गम बाक्‍ब परमप्रभु कली चोशा चढ़ेतीक चढ़ेचा कली गेचा माल्‍नीनी। यरूसलेममी बाक्‍ब चढ़ेब आन माल्‍शो चेरब, हिक्‍सी, अङगुर शांबु नु तेल मप्रेंथु, नाक्‍त किंत किंत रीब पा गेचा माल्‍नीनी। 10 मिनु मेकोपुकीमी स्‍वर्ग ङा परमप्रभु आ दाक्‍चा ङा पा चढ़ेने चाप्‍नीम। मिनु पिप नु आ तौपुकी शुश ब्रोंइशा बाक्‍ने चाप्‍मेक्‍ल, दे परमप्रभु कली पुंइनीम। 11 मेको प्रोंइशा यो गो एको हुकुम गे‍नन्‍नी सुमी एको आं अरेशो लोव़ फाइक्‍बा, मेको आ खिं ङा थाम का ग्रुंइशा, मेको थाममी क्‍युक्‍‍चा पुंइसीब। मिनु मोशो ला ममाइ, आ खिं यो प्रेश्‍शा गेचा पुंइसीब। 12 परमप्रभुमी आ नें तुइक्‍पाइक्‍चा कली यरूसलेममी आ बाक्‍तीक सेल्‍पाइश्‍शो बाक्‍त। परमप्रभुमी आ हुकुम फाइक्‍ब नु यरूसलेम आ खिं प्रेप्‍ब पिप नेल्‍ल नु अरु मुर, सु बाक्‍तेक्‍म हना यो, मेको आन कली खतम पोक्‍गल। गो पिप दाराम हुकुम पाता। मेको रीब पा पचा माल्‍नीम” दे हुकुम पाप्‍तु।
परमप्रभु आ लोव़ गाप्‍शो
13 मिनु पिप दारामी अरेशो लोव़ युफ्रेटीस आइक्‍ची हांबु ङा रागीम हुकुम पाइब तत्तेनाइ, शेथार-बोजे‍नाइ नु मेको नु बाक्‍ब नेल्‍लेमी का यो मख्राइक्‍थु पाम्‍तेक्‍म। 14 मिनु यहूदी आन खाल्‍पापुकीमी सेल्‍ना सेल्‍न बाक्‍तेक्‍म। परमप्रभु यावे आ लोव़ पाइब हाग्‍गै नु इददो आ तौ जकरिया आस देंशो खोदेंशो पा रीब पा दुम्‍ना दुम्‍न लत। इस्राएली आन परमप्रभु आ देंशो खोदेंशो पा, पारसी रागी ङा पिप कोरेस आ हुकुम गेशो खोदेंशो पा, पिप दारा आ वारच पतीकेमी नु पिप आरता-सास्‍त आन ब्रेक्‍शा ग्रुंइशो हुकुम खोदेंशो पा मेकोपुकीमी मेको खिं लेंशा सेल्‍ने थुम्‍तेक्‍म। 15 पिप दारा आ सासन पशो ६ बर्स दुम्‍मेनु, अदार माइश्‍शो महिना ङा सां नाक्‍तीम मेको खिं सेल्‍ने थुम्‍तेक्‍म।
परमप्रभु आ खिं जिम्‍मा गेशो
16 मिनु नोले इस्राएल ङा मुरपुकी, चढ़ेबपुकी, लेवीपुकी नु लेश्‍शा जाक्‍शो ग्‍याइश्‍शा लाइक्‍चा पुंइसीब नेल्‍लेमी परमप्रभु आ खिं परमप्रभु कली “इन के बाक्‍ब” दे ग्‍येरसीशा जिम्‍मा गेम्‍तेक्‍म। 17 मोपा मेकोपुकीमी मेको खिं परमप्रभु कली जिम्‍मा गेमेनु, सहे का ब्‍यफ, सहे निक्‍शी सांड नु ४ सहे पाठा चढ़ेम्‍तेक्‍म। मिनु इस्राएली आन पाप आ पर्बम १२ थर आन कली, बोका का का पा, १२ ओटा बोका चढ़ेम्‍तेक्‍म। गन्‍ती ७:१० 18 मिनु मेकोपुकीमी मोसा आ किताबमी ब्रेक्‍शो खोदेंशो पा चढ़ेब आन पालो पालो पा नु लेवी आन पालो पालो पा यरूसलेममी परमप्रभु आ गेय पचा कली लेंशा वोइक्‍तेक्‍म। गन्‍ती ३:६
पास्‍सा चाड मानेशो
19 मिनु लेश्‍शा जाक्‍शो ग्‍याइश्‍शा लाइक्‍चा पुंइसीबपुकीमी ङोंइती ङा महिना ङा १४ नाक्‍तीमी पास्‍सा चाड मानेम्‍तेक्‍म। 20 चढ़ेब नु लेवी नेल्‍लेमी आंम आन कली ठीक सेल्‍सीशो बाक्‍तेक्‍म। मेको नेल्‍ल परमप्रभु कली गेय पचा कली ठीक दुम्‍शो बाक्‍तेक्‍म। मेकोपुकीमी लेश्‍शा जाक्‍शो ग्‍याइश्‍शा लाइक्‍चा पुंइसीब, चढ़ेब आन लोक्‍ब आन कली नु आंम आन कली पास्‍सा चाड ङा पाठा क्‍योरतेक्‍म। 21 लेश्‍शा जाक्‍शो ग्‍याइश्‍शा लाइक्‍चा पुंइसीब इस्राएलीपुकीम मेको ब्‍वाम्‍तेक्‍म। मिनु रागी ङा मरिम्‍शो दुम्‍तीके रे दिल्‍शो परमप्रभु यावे, इस्राएली आन परमप्रभु कली ठेयब सेल्‍ब मुरपुकी मेको नु गारशा ब्‍वाम्‍तेक्‍म। ब्‍यवस्‍था १६:१-८ 22 मिनु मेकोपुकीमी ग्‍येरशा ७ नाक्‍त सम्‍म बोरब ओख्‍ती मसुप्‍शो शोब्‍ले ङा चाड मानेम्‍‍तेक्‍म। मारदे हना परमप्रभु यावेमी मेको आन कली ग्‍येरपाइश्‍शो बाक्‍त। मेकोमी अस्‍सुर ङा पिप आ थुं हिरशा, मेको आन कली दाक्‍पाइश्‍शो बाक्‍त। मोपतीके मेको पिपमी इस्राएल ङा परमप्रभु आ खिं सेल्‍चा कली मेको आन कली वारच पाइक्‍तीमी।