8
बेबीलोन रे लेश्शा जाक्ब आन नें
1 पिप आरता-सास्तमी सासन पवा ना बेबीलोन रे गो नु लाइब खिं खिं ङा ठेयब मुर आन नें ब्रेक्तीकेम ब्रेक्शो सु सु बाक्तेक्म देंशा हना, एज्रा ७:१,७
2 फिनेहास आ चच युइ रे गेरशोम, इथामार आ चच युइ रे दानीएल, दाऊद आ चच युइ रे हत्तुश, १इतिहास ३:२२
3 शेकन्याह आ चच युइ, पारोश आ चच युइ, जकरिया नु नें ब्रेक्तीकेम नें ब्रेक्शो १५० जना वोंइश मुर,
4 पहाथ-मोआब आ चच युइ रे, जेराहीयाह आ तौ एली-ए-होएनाइ नु मेको नु २०० जना वोंइश मुर, एज्रा २:६
5 जत्तु आ चच युइ रे याहासीएल आ तौ शेकन्याह नु ३०० जना वोंइश मुर,
6 आदीन आ चच युइ रे योनाथन आ तौ एबेद नु ५० जना वोंइश मुर,
7 एलाम आ चच युइ रे अथाल्याह आ तौ येशायाह नु ७० जना वोंइश मुर,
8 शेफत्याह आ चच युइ रे मिकाएल आ तौ जेबदीयाह नु ८० जना वोंइश मुर,
9 योआब आ चच युइ रे येहीएल आ तौ ओबदिया नु २१८ जना वोंइश मुर,
10 बानी आ चच युइ रे योसीफीया आ तौ शेलोमीथ नु १६० जना वोंइश मुर, एज्रा २:१०
11 बेबाइ आ चच युइ रे आ तौ जकरिया नु २८ जना वोंइश मुर,
12 अज्गाद आ चच युइ रे हककातान आ तौ योहानान नु ११० जना वोंइश मुर,
13 नोले जाक्शो अदोनीकाम आ चच युइ रे एली-फेलेत, येहुएल नु शेमायाह नु ६० जना वोंइश मुर,
14 मिनु बिग्वाइ आ चच युइ रे उथाइ, जाक्कुर नु ७० जना वोंइश मुर बाक्तेक्म।
चढ़ेब लेवी आन कली माल्शो
15 गो मेको मुर नेल्ल आन कली अहावा गे लाइब खोला आ नेक्थाम पुक्ताक्मी। मिनु गो मेकेर नाक्त सां सम्म बाक्तीक सेल्शा बाक्तक। मिनु गो मुर नु चढ़ेब आन कली कोव़ङुमीनु, लेवी आ चच युइ काइ मबाक्म।
16 मिनु गो मुर आन कली एलीएजर, अरीएल, शेमायाह, एल्नाथान, यारीब, एल्नाथान, नाथान, जकरिया नु मेशुल्लाम आन कली ब्रेत्थ सोइक्ताक्ङ। मेको लेवी आन दातेमी ठेयब मुर बाक्तेक्म। जोक्ब तुइक्ब योयारीब नु एल्नाथान आस कली यो ब्रेत्थ सोइक्ताक्ङ।
17 मिनु गो कासीपीया ङा ठेयब मुर इददो आ बाक्तीकेमी “लन” दे सोइक्ताक्ङमी। मिनु मेको आन कली कासीपीयाम लशा, इददो मेको आ मुरपुकी नु मेकेर ङा परमप्रभु आ खिंम गेय पाइब आन कली “आंइ परमप्रभु आ खिंमी गेय पचा कली गेय पाइबपुकी सोइक्तीन” दे माइक्थ सोइक्ताक्ङमी।
18 आंइ परमप्रभु आ शिशी पतीके गुइ आंइ तारी बाक्त। मारदे हना मेकोपुकीमी जोक्ब तुइक्ब मुर का चाक्तेक्म। मेको इस्राएल आ तौ लेवी आ तौ माहली आ चच युइ शेरेब्याह माइश्शो मुर बाक्त। मेको आ तौपुकी नु आ लोक्ब नेल्ल पा १८ जना वोंइश मुर चाक्तेक्म। एज्रा ७:६
19 मिनु मेकोपुकीम यो हशाब्याह, मेरारी आ चच युइ येशायाह नु मेको आ लोक्ब नु मेको आन तौ २० जना यो चाक्तेक्म।
20 मिनु मेको आन कली प्रोंइशा २२० जना परमप्रभु आ खिंमी गेय पाइब यो चाक्तेक्म। ङोंइती दाऊद नु आ गेय पाइब ठेयब मुरपुकीमी लेवी आन कली वारच पचा कली योव़शा वोइश्शो बाक्त। मेको नेल्ल आन नें नें ब्रेक्तीकेम ब्रेक्शो बाक्तेक्म। १इतिहास ९:२
माइजा बाक्शा, पुंइशो लोव़
21 मिनु गो अहावा खोलाम बाक्कानु, गो मुर आन कली “परमप्रभु कली पुंइचा कली गो माइजा बाक्चा माल्नय” देंती। “परमप्रभु आ ङोंइती आंइ दाक्शो मपथु, आंइ कली, आंइ आल आन कली नु आंइ शोंप कली लांम रिम्शो दुम्ल” दे परमप्रभु कली पुंइतक।
22 गो आंइ कली लांम आंइ जोरी सत्रु रे प्रोंइचा कली लडाइ पाइब नु शारा ङोइक्बपुकी सोइक्तीकी, दे पिप कली पुंइचा मुने पाता। मारदे हना गोपुकीमी पिप कली “आंइ परमप्रभुमी आ नोले खोइक्ब नेल्ल आन कली कोव़ब। तन्न मेको कली प्रोंइब आन कली आ गाइश्शो कोंइब” देंशो नङ।
23 मिनु गो आंइ रिम्शो पा गाक्तीक आ पर्बम माइजा बाक्शा, आंइ परमप्रभु कली पुंइतक। मिनु परमप्रभुमी आंइ पुंइशो नेंतु।
परमप्रभु आ शोंप जिम्मा गेशो
24 मिनु गो ठेयब चढ़ेब आन दाते रे १२ जना आन कली योव़तामी। मेको सु सु बाक्तेक्म देंशा हना, शेरेब्याह नु हशाब्याह नु मेको आस लोक्ब १० जना बाक्तेक्म।
25 मिनु पिप आ अर्ती गेब, मेको आ गेय पाइब ठेयब मुरपुकी नु मेकेर बाक्ब इस्राएली नेल्लेमी परमप्रभु आ खिं कली गेशो सुन चांदी नु अरु बोसपुकी नाक्शा, मेको आन कली गेतामी।
26 गो मेको आन कली ६ सहे ५० टलेन्ट चांदी, अरु सहे का टलेन्ट ङा चांदी के बोस नु सुन सहे का टलेन्ट, टलेन्ट का ३४ किलो बाक्ब।
27 सुन के बोस २० ओटा, मेको नेल्ल हजार का आदारकोन ङा बाक्नीम। नु सुन खोदेंशो रिम्शो कांसा के बोस निक्शी यो गेतामी। आदारकोन सुन के क्येट बाक्ब। टुक्रा का ८.४ ग्राम बाक्ब।
28 मिनु गो मेको आन कली “गे परमप्रभु यावे आ मुर बाक्नीनी। एको बोस यो परमप्रभु यावे आ बोस बाक्नीम। मुरपुकीमी एको सुन नु चांदी इन किकी पिपी आन परमप्रभु कली ग्येरशा गेशो बाक्नीम।
29 गे मेको नेल्ल कली रिम्शो कोव़ङीन। यरूसलेम परमप्रभु यावे आ खिंमी ठेयब चढ़ेबपुकी, लेवी नु इस्राएली आन खिं खिं ङा ठेयब मुर आन ङोंइती नाक्शा मगेशो सम्म होस पा कोव़ङीन” दे माइक्तामी।
30 मिनु मेको चढ़ेब नु लेवीपुकीमी यरूसलेमम बाक्शो आंइ परमप्रभु आ खिंमी लाइक्चा कली मेको नाक्शो सुन चांदी नु बोसपुकी ताक्तेक्म।
इस्राएलीपुकी यरूसलेम जाक्शो
31 मिनु गो ङोंइती ङा महिना ङा १२ नाक्तीमी यरूसलेम लचा कली अहावा खोला रे गाक्तक। मिनु आंइ परमप्रभु आ गुइ आंइ तार बाक्त। मेकोमी पतीके जोरी सत्रु नु लांम बाप्शा बाक्ब रे ब्रोंइतक।
32 मिनु गो यरूसलेम जाक्शा नाक्त सां सम्म नांइसाक्क।
परमप्रभु आ खिं ङा शोंप चाक्शो
33 मिनु आ दीसा मेको सुन चांदी नु बोसपुकी, आंइ परमप्रभु आ खिंमी लाइश्शा, चढ़ेब उरीयाह आ तौ मेरेमोथ कली नाक्शा गेतक। मेको नु फिनेहास आ तौ एलाजर यो बाक्त। मिनु मेको निक्शी नु लेवी आन दाते ङा येशुआ आ तौ योजाबाद नु बिन्नुइ आ तौ नोआदीयाह यो बाक्ताक्स।
34 मेको नेल्ल हिक्शा नाक्शा ब्रेक्शा वोइक्तेक्म।
जाक्बपुकीमी चोशा चढ़ेशो
35 लेश्शा जाक्शो ग्याइश्शा लाइक्चा पुंइसीब इस्राएलीपुकीम आन परमप्रभु कली चोशा चढ़ेम्तेक्म। इस्राएली नेल्ल आन पर्बम १२ ओटा ब्यफ, ९६ ओटा सांड, ७७ ओटा पाठा नु पाप आ पर्बम चढ़ेतीके चढ़ेचा कली १२ ओटा बोका चढ़ेम्तेक्म। मेको नेल्ल परमप्रभु यावे कली चोशा चढ़ेतीके बाक्तेक्म। एज्रा ६:१७
36 मेकोपुकीमी पिपमी ब्रेक्शा अरेशो लोव़ युफ्रेटीस आइक्ची हांबु ङा रागी ङा पिप आ गेय पाइब नु हुकुम पाइब आन कली गेम्तेक्म। मिनु मेकोपुकीमी मुर आन कली नु परमप्रभु आ खिं कली ठेयब वारच पाइक्तेक्म।