3
हामान मोरदेकै नु गाइश्शो
1 मिनु नोले पिप अहासूरसमी अगाग आ मुर हम्मदाता आ तौ हामान कली आ मान बारपाइक्तु। मिनु मेको कली हुकुम पाइब नेल्ल आन क्येङा ठेयब सेल्शा, ठेयब मान गेशा वोइक्तु। १सामुएल १५:३२; प्रस्थान १७:१४-१६
2 मिनु पिप आ लोव़ टिशा, दरवार ङा गेय पाइब नेल्लेमी दरवार ङा ठेयब लाप्चोमी हामान आ ङोंइती बाप्शा पोक्च थेक्शा, सेउ पाम्तेक्म। तन्न मोरदेकैमी मोदेंशो पा पोक्च थेक्शा, सेउ मपावो। मत्ती ४:९-१०
3 मिनु पिप आ दरवार ङा ठेयब लाप्चोम गेय पाइबपुकीमी मोरदेकै कली “गे मारदे पिप आ देंशो मटीनीनी?” दे हिल्लो पाम्तेक्म।
4 मिनु नाक्त किंत किंत मेकोपुकीमी मेको कली मो पा लोव़ पाम्तेक्म। तन्न मोरदेकैमी मेको आन लोव़ का यो मनेन। मोदेंशो पशो हामानम फाल्ने चाप्बाक्म कों मचाप्बाक्म, दे कोव़चा कली, मेकोपुकीमी मेको लोव़ हामान कली शोव़तेक्म। मारदे हना मोरदेकैमी मेको आन कली “गो यहूदी नङ” देंशो बाक्त।
5 मिनु मोरदेकैमी आ ङोंइती बाप्शा, सेउ पा मान मपशो तशा, हामान साप्पा चुरमाक्त।
यहूदी नेल्ल साइक्चशो
6 मिनु हामानमी मोरदेकै आ जात, आ लोक्ब सु बाक्मा, दे तुइक्ता नोले, मेको कली ला ममाइ, तन्न पिप अहासूरस आ राज्य ङा यहूदी, मोरदेकै आ जात ङा मुर नेल्ल आन कली खतम सेल्तीक लां माल्तु।
7 मिनु अहासूरस पिप दुम्शो १२ बर्स दुम्शा, आ ङोंइती ङा निसान माइश्शो महिनामी हामान आ अर्ती गेब मेको नु गारशा, यहूदी आन कली गेना साइक्चा, दे हामान आ ङोंइती जोक्ब तुइक्ब आन कली साहीत कोव़पाइक्तु। मेको साहीत कोव़तीके कली पुर देंतेक्म। मिनु मेको साहीत १२ महिना नोले अदार महिनामी ग्रूत। प्रस्थान १३:४; प्रस्थान १२:२; एस्तर ९:२४
8 मिनु हामानमी पिप अहासूरस कली “इन राज्य ङा रागी नेल्लेमी मुर आन दातेमी जात का ङा मुर ब्रशा बाक्शो बाक्नीम। मेकोपुकी अरु मुर रे ब्राशा बाक्नीम। मिनु मेको आन पतीके गो नु मगारचा ङा बाक्ब। मेकोपुकीमी इन ऐन कानुन मटीनीम। मिनु गेमी मेको आन कली मोदेंशो पचा गेचा मदुम्ब। ब्यवस्था ४:५-८
9 मोपतीके गे दाक्नीनी हना, मेको आन कली खतम सेल्चा, दे ब्रेक्स का ब्रेक्पतीन। मिनु गो नोले मेको पिप आ क्येट वोइक्तीके ङा गेय पाइब आन कली १० हजार टलेन्ट चांदी पिप आ क्येट वोइक्तीकेमी वोइक्चा कली गेनुङ” देंत। टलेन्ट का चांदी ३४ किलो बाक्ब। एस्तर ४:७
10 मिनु पिपमी आ छाप पाइश्शो औंठी प्रुइश्शा, यहूदी आन जोरी सत्रु अगाग आ मुर हम्मदाता आ तौ हामान कली गेप्तु।
11 मिनु पिपमी हामान कली “मेको चांदी नु मेको मुरपुकी इन केन बाक्नीम। गे मार दाक्नीनी मेको पने चाप्नीनी” देंत।
12 मिनु ङोंइती ङा महिना ङा १३ नाक्तीमी पिप आ ब्रेक्स पाइब आन कली ब्रेत्ताक्मी। मिनु हामानमी देंशो खोदेंशो पा रागी नेल्ल इन सरकार ङा गेय पाइब नु जात जात ङा मुर आन ठेयब मुर नु रागी रागी ङा हुकुम पाइब आन कली मेको मुर नेल्ल आन जात जात ङा ब्रेक्स नु आंम आंम लोव़म ब्रेक्पदा बाक्त। मेको ब्रेक्सम पिप अहासूरस आ छाप थोक्शा, मेको आ नेंमी ब्रेक्शो बाक्त।
13 मिनु मेको सोइश्शो मुरपुकीमी मेको ब्रेक्स रीब रीब पा पिप आ रागी ङा मुर नेल्ल आन कली सोइक्तमे बाक्त। मेको ब्रेक्समी मार ब्रेक्शो बाक्त देंशा हना, अदार माइश्शो महिना ङा १३ नाक्त, काबुमीन यहूदी नेल्ल आन कली साइक्चा माल्नीम। वोंइश आल रे खाल्पा सम्म नु मीश मुर नु आल ब्रेप्च नेल्ल आन कली यो साइक्चा माल्नीम। मिनु यहूदी आन शोंप नेल्ल रोइक्चा माल्नीम, दे ब्रेक्शो बाक्त।
14 मिनु मेको नाक्त कली सासीशा बाक्चा, दे जात नेल्ल ङा मुर आन कली तुइक्पाइक्चा, दे लेंशा ब्रेक्स का ब्रेक्शा, रागी ङा मुर नेल्ल आन कली का का पा गेशा, उरदी पचा कली सोइक्ताक्म।
15 पिपम मेको लोव़ चोव़थ लाइक्ब आन कली रीब रीब पा सोइक्ताक्व। मिनु सुसा दरवारमी यो मेको लोव़ ब्रपाइक्तेक्म। मो पामे नोले पिप नु हामान तूचा कली निस्साक्स। तन्न सुसा सहरम चहिं खाल बाल बोक्त।